Mateyu 5
5
1Yesusini yambo aisili maku toko yu lombili puringime kanopalie ma pangine ola pupe molorumu kinie yu lombili andolime yu molorumuna oringi. 2Kanu kinie yuni ene ungu mane sipelie nimbendo:
3“Yambo konopuna koropa pulimo pilimele yamboma Pulu Yemo enenga ye nomi kingimu molopa ene nokolemomonga ene malo.
4“Yambo kola teko konopu keri pepili molemele yamboma Pulu Yemone “Ene konopu peanga pepa toembo topili.” nimbemonga ene malo.
5“Yambo taka lelko molko yambo lupema pilku molemele yamboma ma koleama pali Pulu Yemone ene simbe lingímunge ene malo.
6“Pulu Yemone “Teai.” nilimo ulu sumbi nilime tengendo waka kolko molemele yamboma manda molongemonga ene malo.
7“Yambo lupema kondo kolemele yamboma Pulu Yemone kondo kolombamonga ene malo.
8“Yambo konopu kake tepili molemele yambomane Pulu Yemo kanongemonga ene malo.
9“‘Yamboma konopu teluna pupili molangi.’ nilimele yamboma Pulu Yemone ‘Ene nanga ambolangoma.’ nimbemonga ene malo.
10“Pulu Yemone “Teai.” nilimo ulu sumbi nilime teko molemelemonga yambo lupemane ene mindili silimele ˻akumunge˼ Pulu Yemo enenga ye nomi kingimu molombamonga ene malo.
11“Na pilku molemele yamboma, ene nanga yamboma molemelemonga we yambomane ene ungu taka tonjiku mindili siku, ungu keri lupe lupema enenga bulkundu kolo toko ninjingí kinie ene malo. 12˻Yambomane ene aku siku mele telemelemonga˼ ene mulu koleana pungí kinie kanuna Pulu Yemone ene mele kalopa konjimbe kene konopu paa aili teko siku konopu peanga pepili molayo. Yambomane kinié ene mindili silimele mele aku siku ene na molangi koro ou Pulu Yemone ungu umbu tonjirimuma pilku yamboma ningu siliku andoringi yamboma we yambomane ene kepe mindili siringila kanumu.” ˻nirimu.˼
13“Ene ma koleana yambomanga api kusa mele molemele. ˻Akumu mele peanga˼ nakolo yu songo na temba kinie ‘Yu kelepa songo tepili.’ nimbu ulu te manda temoloye? Yu kongono temba tondolo te altopa na pembamonga we topo ele temolo kinie yamboma kimbu kongono teko andoko kambilingí kinie papu.
14“Ene ma koleana yambomanga pa tenjilime molemele. Kolea aili ma pangine ola lembamo manda lopi na tenge. 15Yambomane tepe llame kandokolie mingine suku na panjilimele. ‘Melema kanangi, ulke sukundu pa tepili.’ ningu polo tenga ola nosilimele. 16Aku sipe mele ‘Olione ulu peangama telemolo mele yambomane kanokolie olionga Lapa, mulu koleana molemomo, kapi niengi.’ ningu enenga pa telemomone yamboma kanangi, pa tenjengi.” ˻nirimu.˼
17“Nane ‘Pulu Yemonga ungu manema ˻Mosisini˼ bokuna torumu unguma kinie Pulu Yemone ungu umbu tonjirimuma pilku yamboma ningu siringi yemane bokuna toringi unguma kinie ‘manie pupili.’ nimbé okomo.’ ningu na piliengi! Nane ‘Kanu unguma kamu manie pupili.’ nimbú naa okoro. ‘Aku ungumanga ungu pulu pelemoma kamu wendo opili.’ nimbú okoro. 18Nane enendo paa sike nikiru: Mulu matolo ou pora na nipili Pulu Yemonga ungu manemanga ungu wallo kolte kepe paa we manie na pumbe. Ungu manemanga pali ungu aili kangamanga pali kongonoma ou wendo ombá. 19Akumunge, yambo tene kanu ungu manemanga ungu mane kanga te kepe pulue topa, yambo lupema mane sipelie “Pulue tangi.” nimbé yambomo Pulu Yemo ye nomi kingi molopa nokolemo koleana yunge imbi paa manie molomba. Nakolo yambo tene kanu ungu manema pilipe lipe tenge panjipe molopa, yambo lupema mane simbe yambomo Pulu Yemo ye nomi kingi molopa nokolemo koleana yunge imbi paa olandopa molomba. 20Nane ene nimbu sikiru: Parisime kinie Pulu Yemonga ungu manemanga puluma mane silimele yema kinie enene ulu sumbi nilime telemele ulumanga olandopa ene we yambomane na tengi liemo, Pulu Yemo ye nomi kingi molopa yambo nokolemo talapena sukundu ene paa na puku molonge. ˻Kanu yemane ungu manema pilkulie telemele mele lupe. Pulu Yemone kanopa ulu sumbi nilime nimbe kanolemo mele lupe.˼” ˻nirimu.˼
21“Koro ou ˻Mosisini˼ anda kolepalimendo ungu mane te sirimumu ene pilimele. Kanu ungu manemo i sipe:
“Ene yamboma toko na konjengi.
Yambo topa konjimbe yambomo mongo limbe,
˻kote pilimele yambomane˼
yu kote tenjikulie mongo liku singí.”
nirimu kanumu. 22Nakolo kinié nane ene kanu ungu manemonga ungu pulumu i nimbu simbu tekero: Yambo tene yunge angenu kinie mumindili kolomba yambomo willisi kotena mengo puku kote tenjingí. Yambo tene yunge angenundu “Nu kamakoye?” nimbé yambomo poropinjili kotena mengo puku kote tenjingí. Yambo tene yambo tendo “Nu paa kongi mele aroma tolimu!” nimbé yambomo tepe koleana pumbe.
23“Aku siku tenge yamboma mongo lingí kene nuni ‘Pulu Yemone na kanopa peanga kanopili.’ ningu yunge melema tepena kaloli polona Pulu Yemo kongi molo kera popo toko kalko sinindu mengo ongolie nu angenane nu kinie we mumindili te kolomba pilkulie ninimuni, 24nu Pulu Yemo kalko sini melema Pulu Yemo popo toko kaloli polo alsekondo we lepili nosikulie kelko anju puku angenando “Teluna kapola kapola molambili.” ningu puku nipukulie, pe kelko ongo nu Pulu Yemo kaloni melema ongo yu kalko sieni.
25“Nu kote tenjimbe temba yambomo ‘Kapola kapola molambili ulu te teambo.’ ningulie welea teani. Aku na tenu liemo nu kote tenjimbe yambomone nunge kote pilili yemo molombana memba pupe simbenje. Pe kote pilili yemone nu ka ulke nokoli yemo lipe simbe, yuni nu ka ulkena lipe mundumbe. 26Nane nundu paa sike nimbu sikirumu: Nu ka ulkena wendo onindu pundu paa pali tokolie mindi wendo onimu. We manda wendo na oni.” ˻nirimu.˼
27“˻Ou Mosisini˼ ungu mane te sirimumu ene pilimele. Kanu ungu manemo i sipe:
‘Ambo ye pulime ye lupema kinie
wa ulu kerinele na teko,
ye ambo lilime ambo lupema kinie
wa ulu kerinele na teangi.’
nirimu kanumu. 28Nakolo kinié nane ene ˻kanu ungu manemonga ungu pulumu˼ i nimbu sikiru: Ye tene ambo te kanopalie ‘Yu pea tapu topo pelembelkanje papu.’ konopu lemo akumu konopu sukundu ambomo kinie kamu wa ulu kerinele telemo.
29Nunge mongotolone melte kanokolie konopuni ‘Liemboa.’ ningu pilku ulu pulu keri te tenu liemo mongotolo akuku ele teani. Nunge mongotolo angilipili nu tepe koleana liku mundungí kinie kapola na temba kene kangimunge melte wendo liku ele tekolie molko konjini kinie papu. 30Nunge kitolone ulu pulu keri te tenu liemo aku kitolo kari lelko ele teani. Nunge kitolo angilipili nu tepe koleana liku mundungí kinie kapola na temba kene kangimunge melte wendo liku ele tekolie molko konjini kinie papu.” ˻nirimu.˼
31“˻Ou Mosisini˼ ungu mane te sipelie nimbendo:
“Ye tene yunge ambomondo
‘Kamu pupili.’ nimbe makorombando
ambomo “Kamu pui.” nimbé mele
pepá te topa ambomo sipelie
yundu “Kamu pui.” nimbe aku tepili.”
nirimu kanumu. 32Nakolo nane kinié ene nimbu sikiru: Ye puli ambo te ye te kinie wa ulu kerinele na tepili yunge yemone yu makoropa “Kamu pui.” nimu liemo ‘Wa ulu kerinele teli ambomo molopili.’ nimbe aku telemo. “Pui.” nimbe makorolemo ambomo pe ye tene yu limo kinie kanu yemo kepe wa ulu kerinele telemola.” ˻nirimu.˼
33“Koro ou ˻Mosisini˼ anda kolepalimendo ungu mane te pea sirimumu ene pilimele. Kanu ungu manemo i sipe:
‘ “Paa sike tembo.” ningu, ningu panjiku
mi lenge ungumu pulue na tangi.
Ailimundu “Paa sike tembo.” ningu, ningu panjiku
mi lenge mele paa sike aku siku teangi.’
nirimu kanumu. 34Nakolo kinié nane ene nimbu sikiru: ‘ ‘Paa sike nikimu.’ ningu piliengi!’ ningu mele aili tenga imbi lelko paa mi na leangi. Mulu koleamo kepe imbi lelko mi na leangi. Aku koleamo Pulu Yemo molopa melema nokolemo koleamo kene aku na teangi. 35Ma koleamo kepe imbi lelko mi na leangila. Akumu Pulu Yemo yunge kimbu mundulimo polomo kanumu. Jerusalleme kepe imbi naa la leangi. Akumu Ye Nomi Kingi Paa Ailimunge kolea ailimu kanumu. 36Nunge penge kepe. Akumu nuni penge indi te ‘Kake tepili.’ molo ‘Pombera topili.’ ningu ulu te manda na teni kene pengemo walsiku imbi lelko mi na leai. 37Ulu te sike teni liemo sumbi siku “Tembo.” nieni. Naa teni liemo “Naa tembo.” nieni. Ulu kerimenga pali ulu pulumu pelemo ˻kuru˼ muni ambolemo yambomane mindi ungu sulu teko niliku puku mi lemele.” ˻nirimu.˼
38“˻Ou Mosisini˼ ungu mane te sirimumu ene pilimele. Kanu ungu manemo i sipe:
“Yambo tene yambo tenga mongomo
topa akumbe kinie
yunge mongomo toko akunjengila.
Yambo tene yambo tenga ungú topa langomba kinie
yunge ungú toko langonjengila.”
nirimu kanumu. 39Nakolo kinié nane ene nimbu sikiru: Ene tepa kenjimbe yambomo anju uluri na teko, ‘We tepa kenjipili.’ niengi. Yambo tene nunge kumbikere ekendonga laruwe tomba kinie topele toko ‘ekendonga kamu laruwe topili.’ nieni. 40Yambo tene ‘Nunge wale pakolimu liembo.’ nimbe kote tenjimbe temba yambomo nunge wale sulu peangamo kepe ‘pea we lipili.’ nieni. 41˻Romo ami˼ ye tene nu ambolopalie “Nuni na liku taponjiku mako tenga ˻nanga melema menjeni˼ pambili.” nimbé kinie mako tenga pea yu we liku taponjiku melema menjiku pani. 42“Melte si.” nimbe mawa temba yambomo mawa temba melemo we sieni. “Kou te pundu anjiku si.” nimbé yambomo “Molo.” na nieni.” ˻nirimu.˼
43“˻Ou Mosisini˼ ungu mane te sirimumu ene pilimele. Kanu ungu manemo i sipe:
“Opa lkerayemo konopu monjiku,
opa toumu kanoko keri kanani.”
nirimu kanumu. 44Nakolo kinié nane ene nimbu sikiru: Enene enenga opa touma konopu monjiku, ene teko kenjilimele yamboma ‘Pulu Yemone tepa konjipili.’ ningu Pulu Yemo enenga mawa tenjengi. 45Enenga ‘Lapa mulu koleana molemomonga ambolangoma molamili.’ ningu aku siku teangi. Yuni yambo keri peangama molemelena ‘Ena topili.’ nilimo. Yambo ulu sumbi nilime telemele yamboma kepe yambo ulu sumbi nilime na telemele yamboma kepe enenga pea pali ‘Lo topili.’ nilimola.
46“Ene konopu monjilimele yamboma mindi konopu monjilimele kinie Pulu Yemone kanopa peanga kanombaye? ˻Romo gapomano˼ kou takisi limele yambo ˻kerime˼ kepe anju yando akula telemele kene ˻ene kanoko keri kanolemele yamboma pea konopu monjingí kinie peanga˼. 47Enene enenga pulu lemo yambomando mindi “Ene manda molemeleye?” nilimele kinie we yambomane telemele mele maniendopa, enene telemele mele olandopaye? Ulsukundu yambomane aku sikula na telemeleye? 48Akumunge ˻Mosisini sirimu ungu manema we pilku na teko,˼ enenga Lapa mulu koleana molemo ye paa sumbi nilimu molemo mele ene aku siku yambo sumbi nilime molangi.” ˻nirimu.˼
Tans Gekies:
Mateyu 5: ubuN
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 1995, Wycliffe Bible Translators, Inc. All rights reserved.