JOAN 18
18
Jisume Umname
(Mt 26:47-56; Mk 14:43-50; Lk 22:47-53)
1Jisu bí kumnamem kumyin rongem, bí bíkkelo luyilsuna kídíem gíbosula Kidron korongem kooto. Rotkon delo baganko dungai, delo bílang bíkkelo luyilsuna kídíe gíto.
2Delo bím míírí míínyona Judas bí dem amodem kéndungai, kapeila Jisu bí leko leko luyilsuna kídíem duubosula delo duudungai. 3Dekepe iname Judas bí sipaying apééko, ríne kídí lokke amie kelang Pharisi kídíeke ayoko gíbola delo bagan delo aato. Bulu bijuli, meru delokke gíníng yoksa bomla gíto. 4Jisu bí agílo ingko ingkuedí pííyéne, dem kénru sudola, gílenla bulum íngkíto, “Sékome nolu matadune?”
5“Najareth lokke Jisume” emla bulu poyansuto.
“Ngomino bí” emla Jisu bí pokansuto.
Delo míírí míínyona Judaskom bulukíng dakbo sudungai. 6Jisu bí “Ngomoko bí” emyéname, bulu gílat sulangkula amolo oletto. 7Lekoda bí bulum íngkíto, “Sékome nolu matadune?”
Delo bulu pokai, “Najareth lokke Jisumena.”
8Jisu bí “Ngo nolum ngomoko bí emsuto” emla poto. “Nolu ngom mata dumílo sim ami kídí sim gímotoku.” 9Bíkke agom ponam kídare apíínape sikepe ikai: “Nokke ngom binamem atelkote ngo nyok momang.”#Jn 6:39
10Delokrongem Simon Pitor bí yoksadem satsula ríne ruutumlokke béérang ruubígem papakto. Béérang delokke amínem Malkos emdungai. 11Jisu bí Pitorme ngiitomto, “Nokke yoksem melat suto langku! Ngo Yayike binam batiem tííma yénía?”
Annake Keralo Jisume Aaboname
12Delokrongem sipaying opéé delang lulíkna ruutum elang delokke Judai kotoki kídíe Jisume umto. Bulu bím yééla 13delokke delo dítag delo ríne ruutumpe ina, Kaiaphake ato Annakíng bím kerape aaboto. 14Kaiapha bímino ami kídí legape midum atelko sigemílo aiyé emla Judai amikídíem ngiitomnade.
Pitorke Possuname
(Mt 26:69-70; Mk 14:66-68; Lk 22:55-57)
15Simon Pitorlang luyilsuna akonko Jisukíng mamín gedungai. Si luyilsuna akonsi ríne ruutumlokke kangkén namko, depe ila bí Jisukíng ríne ruutum tunggu lope gímín geto, 16idola Pitor bí ekum gíídalo dakyape aikai. Ríne ruutumke kénnam luyilsuna ami akonde, lenlangkula delo kaabomna mimedem popala, delo Pitorme aralo langaato. 17“Berokpe no sok amisokke luyilsuna ami akon mangkua?” emla eyab delo dakbomna mimede Pitorme íngkíto.
Bí “Ngomang” emsuto.
18De ansinge idokuai, depe iname béérang kídí elang kotoki kídíe buluke pamsudope mepom romnam delo pamsula dakto. Pitorteng bulum dakbosula, agí ete pamsula dakto.
Ríne Ruutumke Jisume Íngkí Bengkíname
(Mt 26:59-66; Mk 14:55-64; Lk 22:66-71)
19Depe iduem ríne ruutumde Jisume bíkkelo luyilsuna kídí legang emlang bíkke ngiitom legangem íngkí bengkíto. 20“Ngo tani amoso berokpe pokan tobong. Ngo agínpe kumkeng ekum kídarlo demangkom kumkeng ekumlo luyil poyilto, delo Judai ami kídí takame aato. Ngo atíkote leesupla pomang. 21Ngom kapeila íídune? Ngokke agomem tatna kídíem tatkí topena. Ngo ingkuem potodí bulu berokpe kénsudung” emla Jisu bí poyansuto.
22Jisu bí dekepe poyansuname, kotoki akonde bím mingmolok pito. “Dekepía ríne ruutumem poyan sudune?” emla bí poto.
23Jisu bí poyansuto, “Ngo atíko pomem tumílo, ingkuem pomem imem tudí ngom lubitoka. Idola aruem podumílo, no ngom kapeila kíddune?”
24Delokrongem yéénam dem yéénamrupe ríne ruutum Kaiapha kíng melíkto.
Pitorke Possuname
(Mt 26:71-75; Mk 14:69-72; Lk 22:58-62)
25Depe iduem Simon Pitor bí agíem pamsula dakdungem, “Berokrupe no bíkkelo luyilsuna kídí akon runge mai?” emla bím tatkí nako kato.
Bí dem possudola, “Ngomang” emkai.
26Ríne ruutum akonlokke béérang, Pitorke nyorungem gatpaknam ami delokke aní bíro ami akonde bím lukísuto, “Bíkkelo lekope baganlo duudope nom ngo kaamape ito langa?”
27Lekoda Pitor bí possukai, delokke delo anyo delopak peroge kokkai.
Pilatke Keralo Jisuke Dakname
(Mt 27:1-2,11-14; Mk 15:1-5; Lk 23:1-5)
28Delokrongem rokomope Kaiapha kelokke Rom Gobornorlo Jisume gíboto. Judai ruutum kídíe gobornor ekum aralo aamato, kapeila bulu gíbong gíídí domanem dopala, agíem deenampe mesupe emla mííto. 29Dekepe iname Pilat bí gílenla íngkíto, “Ingkona ajéngko nolu sim luket líkdune?”
30Bulu poyansuto, “Bí imemna ami manga mílo nokkíng ngolu bím melíkgíng kamang.”
31Pilat bí pokai, “Nolu bím bomsutoka delokke noluke ayon sulok bím bisartoka.”
“Idakkom ngolum séko mete pansaa nana ralnam bimang” emla Judai kídíe lupéé sukai. 32Jisuke agí sigangem poyin subinam agom kídarem apíípe aromope emla sikepe ikai.
33Pilat bí delo agí dungkolo gílat langkula, Jisume tompala bím íngkíto, “Nua Judai kídíke Roje?”
34Jisu bí poyansukai, “De nokke míísunam agomía demangkom ami kídía nom ngokke legangem pobitone?”
35Pilat bí poyansuto, “No ngom Judai amiko emla míídunía? Nokke ami kídíde delokke nokke ríne kídí emino ngokkíng nom melíktune. Nokke inam atí kídíe ingkuekeda?”
36Jisu bí poyansukai, “Ngokke amode tani among sokkemang. Si sokkepe ituamílo, ngokke béérang kídíe ngom Judai amikídíe umdungem mimak imín suyai. Idakla supak ngokke amode angu konlokke.”
37“No demílo rojako ai!” emla Pilat bí poto.
Jisu bí poyansuto, “No ngom rojakua emnamde arodung. Arope lumílo sok legapemin ngo tani amoso hakii bipe emla aatone. Arodanlok yéna miyonge ngokke agomem taddung.”
Jisume Pansaadope Luname
(Mt 27:15-31; Mk 15:6-20; Lk 23:13-25)
38“Arode ingkuedi?” emla Pilat bí íngkíto. Sim talla Pilat bí Judai ami kídídelo gílen langkula poto, “Ngo sim ami sim ajéng luket bompenam leríng paamang. 39Idakkom noluke ayonlok Gíbong gíídílo patek duuna amiko nolukíng ngo melen bikupe aidung. Nolu ngom ‘Judai kídíke roja’ sim melen mokupe míídonía?”
40Bulu bottepe gokpéé sukai, “Bím mang! Ngolum Barabbame melen bikui!” (Barabba bí ebín ikolo yémín genakuai).
Tans Gekies:
JOAN 18: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
