JOAN 9
9
Odo Lokkekai Mingmanakonem Jisuke Ipíkuname
1Bíkke gígoo duem bí olen lokkekai mingmana amiko kaato. 2Bíkkelo luyilsuna kídíe bím íngkíto, “Saare, si ami sia demangkom bíkke ane abua paab itone, bí olen lokkekai mingmadune?”
3Jisu bí poto, “Si ami sikom paab ina amimang delokke bíkke ane abuekom paab imang, idola si Shédíke agérem bíkke turla yéduem lengkan nape emlamino depe ikane. 4Longe dungadape, ngom melíkna bíkke agér em iperung aido. Kaamue píídakbong, delo sékote agér gérla yimape iyé. 5Ngokke tani amoso duudungem, ngomin tani amosokke angune.”
6Sim podola bí kédengem takil sukkat geyéla, takildem kédenglo soyélsuto, delokke dem ami delokke amiglo kyam líkto. 7Bí amidem poto, “Gíkala Silom (depe emnamde Melíknam) paatanglo mobín sutolangka.” Dekepe iname amide gíla mosuto delokke amige kaala aalat doku.
8Bíkke kumrí donggong kídíe delokke bím kerape kogo dogoola magoodope kaana kídíe pokai, “Si amisi kogo dogoola duuna demangía?”
9Ayokone de ami demoko emkai. Abíde pokai, “Demang, bí kaaname delok ami delok kísanako.”
Idola bí agíe, “Ngomino de amide” emla posuto.
10“Dekemílo nokke amige kape kísa kangka kune” emla bulu ííbomkai.
11Bí pobito, “Buluke Jisu emnam amide suyunglok genla ngokke amigso kyam líkto. Bí ngom Silom Paatanglo gíla mobín sulangka emto. Dekepe iname ngo gíla mobín suname delo ngo kangkaku.”
12“Ingkolo de amide” emla bulu bím íngkíto.
Bí “Ngo kénmang” emto.
Pharisi Kídíe Ipínamem kangkí Tatkíname
13Bulu mingmana amidem Pharisi kídílo aaboto. 14Depe iduem Jisuke suyung genla ami delokke amigem dardokupe ido longede Sabbath longekuai. 15Delok legape Pharisi kídíde bí kape kísa migdar tokudí demte íngkíto. Amide poyansukai, “Bí ngokke amiglo suyungem kyam líkto, delokke ngo mobín suto kuname, supak kaadungku.”
16Pharisi ayokone pokai, “Si ami si Shédí kemang kapeila bí Sabbath longem nyomang.”
Idakkom abíde pokai, “Paab gena amide kape kísa sikena irisinyo iyodem ilayéne?” Dekepe iname bulu opéé annyikope ito.
17Méélamdem bulu mingmana amidem íngkítoku, “No bíkke legangem kape luyén? Bíkke migdar moku namde nokke amigemin.”
Amide “Bí kaaluna miriko” emla poyansuto.
18Judai kídíde ami delokke ane abuem tomla tatkímang tetengem amide mingma nakuai delokke migdar kaku emnamdem bulu arope míímang. 19Bulu ane abudem íngkíto, “Si ami sia noluke ue? Sia odo lokkekai mingmana embomnam amide? Supak kape kísa bí kaapa dungkune?”
20Ane abude pobito, “Bí ngoluke ue emla ngolu kénsudung delokke bí odo lokkekai mingmato emla ngolu kéndung. 21Idola bí supak kape kísa kaapang dungkudí demangkom sékodí bím migdar moto kune, dem ngolu kénmang. Bím íngkísutoka. Bí mine kabong; bí agí legangem pobisuyé.” 22Bíkke ane abue depe poto kapeila bulu Judai ami kídíem pesoto, legade sékodí Jisu bí Kristo emla poyédí dem kumkeng ekum lokke monpak dokupe Judai ami kídíe luyin bosutung. 23Dekepe ilamin bíkke ane abue, “Bí mine kabong, bím íngkí sutoka” emtone.
24Lennyinape bulu mingmana amidem tomto. Bulu “Shédíke keralo pésudola aruem polangka” emdola pokai, “Si ami si paab gena amiko emla ngolu berokpe kéndung.”
25Bí poyansuto, “Bí paab gedudí gemadí, ngo kénmang. Agom atelko ngo kéndung. Ngo mingma tuai idakkom supak ngo kaadungku!”
26Delokrongem bulu bím íngkíto, “Bí nom ingkoko ibitone? Bí kape kísa nokke amigem migdar motokune?”
27Bí poto, “Ngo nolum pobitobong, nolu tatgapmang. Nolu kapeila sim lekoda tallíng dungkune? Nolute bíkkelo luyilsuna amipe yélídunía?”
28Bulu bím lukaadola poto, “Nomin sok ami sokke luyilsuna amie! Ngolu Mosikíng luyilsuna kídíe! 29Ngolu kéndung Shédí bí Mosime luposuto, idola sim ami simdan, bíkke lenko angkuemte ngolu kénpete kénmang.”
30Amide poyansuto, “Supak de míngkí penamko! Bí ingkolok aadudí dem nolu kénmang, depe ilate bí ngokke amigem migdar motoku. 31Shédí bí paab gena kídíem tatbimang emla ngolu kéndung. Bí deenampe nyogapla bíkke míínamem ibina demmin tatbidune. 32Séko mete olen lokkekai mingmana amigem migdar mokunam tatkímang. 33Si ami si Shédí kénma mílo, bí atí ilamayai.”
34Sim tatla bulu poyansuto, “Nom paabem otak sutung; depe idula no kapeila ngolum lukí sukane!” Delokrongem bulu bím monpak toku.
Aid Yétalo Mingmaname
35Bulu bím monpaktoku emnamem Jisu bí tatla, bíkke amidem ríksu dokuem, bím poto, “No Tanike Uem arope míngke sudunía?”
36“Poyilne, de sékoda?” emla amide íngkíto. “Ngom pobitola, demílomin ngo bím arope míngke suyéne.”
37Jisu bí poto, “No bím supak kaatobong; aropakde, nom luposuna ami simino bí.”
38Delo amide, “Ruutume, ngo arope míngke sudung,” emdola Jisume kumto.
39Jisu bí poto, “Mingmana kídíe migdar dokupe delokke migdarna kídíe mingma dope emla bisar penam legape ngo tani amoso aato.”
40Bíkkíng yémín gena Pharisi ayokone bíkke ponamem tatla íngkíto, “Kape? Ngolute mingma dunaya?”
41Jisu bí poto, “Nolu mingma tuamílo, nolu paab edo kamayai; idakkom supak nolu migdardung emla posuname, nolukelo paab ajénge duudung.”
Tans Gekies:
JOAN 9: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
