Genesisi 20
20
Abrahamu ni Abhimeleki
1Abrahamu a to khukha konaho e tsula ditikoni ka Negebhe, a txi ya aka hagari ka Kadhesi ni Suri. Ene a to ya luvela ditikoni ka Gerara. 2#Wona ni ka: Gen. 12:13; 26:7. Koneyo, Abrahamu a txi womba ngu msikati wakwe Sara, a txi khene i ndiyakwe, se Abhimeleki mfumeli wa Gerara e ruma kuya teka Sara. 3Aniko Txizimu txi to endela Abhimeleki ngu mloro, ni wusiku, se txi txi ta m'gela tiya:
“U na fa ngu mhaka ya wamsikatiyo u nga mteka, nguko msikati wa wukati.”
4Abhimeleki, ngako a nga ti sinzi kuotela nayo, a to khene:
“Mkoma wangu, u na daya m'thu wo mbi na txionho kani? 5Abrahamu ngene a nga womba, a txi khene: ‘I ndiyangu’, ni nene wamsikati, e womba toneto, a txi khene: ‘I ndiyangu’. Ni mahile tiya ngu mbilu ya yinene ni manza o lulama.”
6Txizimu txi to mxamula ngu mloro, txi txi kha txona:
“Ani na tiziva kha kwati taku, eto u ti mahile ngu mbilu ya yinene; aniko ngani ni nga maha ti to u si ni onheli, ni si kutumetisi kum'gwesa. 7Se konkuwa, mtshumete eyo wamsikati, a txi tsula ka mwamna wakwe, nguko mwamna wakwe mprofeti: Se a na kukombelela kasi u txi hanya. Aniko nga ti u si mtshumeti, kufa u na fa awe ni votshe va kulumbako.”
8Abhimeleki a to vindukela kuwuka, se e dhana otshe maxonga akwe, a txi ta ma txhamusela totshe timhaka tiya; se ni ona maxonga ale a hombe, ma to tala ngu kuthava.
9Sekoko Abhimeleki a to dhana Abrahamu, a txi ta m'gela ku khene:
“U hi mahete txani kani? Njionho muni ni nga txi maha kwako, kuza u tisa mnandu wa hombe txitimwi kwangu, ni txitimwi ka mfumo wangu kani? Awe u ni mahete ati ti ku si nga ni fanelo yo mahwa.” 10Abhimeleki a wombile ka Abrahamu, a txi khene: “U pimisile txani, ngako u txi ti maha tiya kani?”
11Abrahamu a xamute a txi khene:
“Ani ni to pimisa nokha, ni txi khani: Ka wukhalo wuwa ku nava ku si nga ho ni wammweyo a thavako Txizimu, se va na ni daya ngu mhaka ya msikati wangu. 12Hahanze ka toneto, ngu ditshuri ene i ndiyangu, i mwanana wa dihorana, wa tate wangu, aniko hi nga mwanana wa dihorana wa mame wangu, se i msikati wangu.” 13Sekoko, mbimo yi Txizimu txi nga ni humisa m'tini ka tate wangu, ni txi pepeseka ni ditiko, ni gete msikati wangu, ni txi khani: “Ni kombela u txi ni mahela wumbilu wuwa, ka otshe makhalo awa hi no maneka hi di kona, womba ti to ani ni ndiyako.”
14Sekoko Abhimeleki a to teka tinvuta ni tihomu, ni sithumi sa mazambi ni sa mahorana, e ninga Abrahamu, e mtshumetela msikati wakwe Sara. 15Abhimeleki a to engeta a txi khene:
“Ndide ditiko dangu di masoni kwako, u nga sikota kuaka ni ka wuhi wukhalo u wu lavako.”
16Ka Sara a to womba a txi khene:
“Ndiya 1.000 wa maxekele a silivhela, ni mningako ndiyako. Eto ti na maha txikombiso masoni ka votshe va va ku ni nawe, txaku khu nga ni mnandu ka totshe tiya.”
17Abrahamu a to kombelela Abhimeleki ka Txizimu, se Txizimu txi to holisa, ni msikati wakwe ni sithumi sakwe, kasi ve mana kuveleka vanana; 18nguko Txizimu txi ti va mahile sifule votshe vavasikati va ha m'tini ka Abhimeleki, ngu mhaka ya Sara, msikati wa Abrahamu.
Tans Gekies:
Genesisi 20: BEC2016
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
A Bíblia em Txitxopi © Bible Society in Mozambique, 2016.
Genesisi 20
20
Abrahamu ni Abhimeleki
1Abrahamu a to khukha konaho e tsula ditikoni ka Negebhe, a txi ya aka hagari ka Kadhesi ni Suri. Ene a to ya luvela ditikoni ka Gerara. 2#Wona ni ka: Gen. 12:13; 26:7. Koneyo, Abrahamu a txi womba ngu msikati wakwe Sara, a txi khene i ndiyakwe, se Abhimeleki mfumeli wa Gerara e ruma kuya teka Sara. 3Aniko Txizimu txi to endela Abhimeleki ngu mloro, ni wusiku, se txi txi ta m'gela tiya:
“U na fa ngu mhaka ya wamsikatiyo u nga mteka, nguko msikati wa wukati.”
4Abhimeleki, ngako a nga ti sinzi kuotela nayo, a to khene:
“Mkoma wangu, u na daya m'thu wo mbi na txionho kani? 5Abrahamu ngene a nga womba, a txi khene: ‘I ndiyangu’, ni nene wamsikati, e womba toneto, a txi khene: ‘I ndiyangu’. Ni mahile tiya ngu mbilu ya yinene ni manza o lulama.”
6Txizimu txi to mxamula ngu mloro, txi txi kha txona:
“Ani na tiziva kha kwati taku, eto u ti mahile ngu mbilu ya yinene; aniko ngani ni nga maha ti to u si ni onheli, ni si kutumetisi kum'gwesa. 7Se konkuwa, mtshumete eyo wamsikati, a txi tsula ka mwamna wakwe, nguko mwamna wakwe mprofeti: Se a na kukombelela kasi u txi hanya. Aniko nga ti u si mtshumeti, kufa u na fa awe ni votshe va kulumbako.”
8Abhimeleki a to vindukela kuwuka, se e dhana otshe maxonga akwe, a txi ta ma txhamusela totshe timhaka tiya; se ni ona maxonga ale a hombe, ma to tala ngu kuthava.
9Sekoko Abhimeleki a to dhana Abrahamu, a txi ta m'gela ku khene:
“U hi mahete txani kani? Njionho muni ni nga txi maha kwako, kuza u tisa mnandu wa hombe txitimwi kwangu, ni txitimwi ka mfumo wangu kani? Awe u ni mahete ati ti ku si nga ni fanelo yo mahwa.” 10Abhimeleki a wombile ka Abrahamu, a txi khene: “U pimisile txani, ngako u txi ti maha tiya kani?”
11Abrahamu a xamute a txi khene:
“Ani ni to pimisa nokha, ni txi khani: Ka wukhalo wuwa ku nava ku si nga ho ni wammweyo a thavako Txizimu, se va na ni daya ngu mhaka ya msikati wangu. 12Hahanze ka toneto, ngu ditshuri ene i ndiyangu, i mwanana wa dihorana, wa tate wangu, aniko hi nga mwanana wa dihorana wa mame wangu, se i msikati wangu.” 13Sekoko, mbimo yi Txizimu txi nga ni humisa m'tini ka tate wangu, ni txi pepeseka ni ditiko, ni gete msikati wangu, ni txi khani: “Ni kombela u txi ni mahela wumbilu wuwa, ka otshe makhalo awa hi no maneka hi di kona, womba ti to ani ni ndiyako.”
14Sekoko Abhimeleki a to teka tinvuta ni tihomu, ni sithumi sa mazambi ni sa mahorana, e ninga Abrahamu, e mtshumetela msikati wakwe Sara. 15Abhimeleki a to engeta a txi khene:
“Ndide ditiko dangu di masoni kwako, u nga sikota kuaka ni ka wuhi wukhalo u wu lavako.”
16Ka Sara a to womba a txi khene:
“Ndiya 1.000 wa maxekele a silivhela, ni mningako ndiyako. Eto ti na maha txikombiso masoni ka votshe va va ku ni nawe, txaku khu nga ni mnandu ka totshe tiya.”
17Abrahamu a to kombelela Abhimeleki ka Txizimu, se Txizimu txi to holisa, ni msikati wakwe ni sithumi sakwe, kasi ve mana kuveleka vanana; 18nguko Txizimu txi ti va mahile sifule votshe vavasikati va ha m'tini ka Abhimeleki, ngu mhaka ya Sara, msikati wa Abrahamu.
Tans Gekies:
:
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
A Bíblia em Txitxopi © Bible Society in Mozambique, 2016.