Luka 21
21
Bii'zhukhum khi mat'kaah nhipyaah
Mar 12:41-44
1Kaarooh Jesu eep yit niy naahpee diy tihngg kihkyeen, bhi naah mhilong mwopp kaah le bii'zhukhum dhighin kong bii'zhukhum. 2Bhi naah m'ee mat'kaah nhipyaah wu'nyi zag l'e bii'zhukhum mhi kobo vel. 3Bhi Jesu satt le, “Ih kihh satt a zeenn wunn, mat'kaah nhipyaah mhizeh ni pihh bii w'u mett mhi kakhar mwopp weett. 4P'ee gurum mhize ni mwopp weett pihh bii'zhukhum keeru a dhighin dw'uu long w'u mwopp kihh nyi, dhangg wu naah, wu'nyi, kooh bhalang phirooh nyi a nhipyaah, bhi pihh reb shaghal soh keera w'u dwallass kihhdihng.”
Bii'kattshiiy mhi kyess khi yill ni
Mat 24:1,2; Mar 13:1,2
5Bhi kaarooh pakk gurum mwopp laa'pwoo kaah rooh mwopp tapp'pee LuhNaan ni slek sh'i v'ur pangg wu'rett, kihh v'ur zhukhum w'u gurum mwopp kihh ja kihh nyi Naan, bhi Daah Jesu satt mwopp le, 6“Bii mihhse w'u wunn phi naah mwopp weett se, bhi puus kihh ji, w'u kooh pangg kihmeh p'ee dheeh dhen kihdab wu'nat noott rumm mou.”
7Bhi mwopp nang phi nyi le, “Gukamm, bii mihhse mwopp p'ee sh'in a phiranggyeh? Yakhal a mihyeh p'ee dhen a bii'kattshiiy w'u tihh katt diy le bii mihhse ni mwopp kih arr sh'in ayeh?”
8Bhi satt mwopp le, “Wu kihh kangg, tapp mwopp d'ihk wunn mou. P'ee gurum dhess mwopp p'ee ja dhighin shumm nah mwopp kihh satt le, a runn a a'n, yakhal mwopp kihh satt le kyess khi yill ni wull kuss. Tapp wu dumdang mwopp mou. 9Mihh wu klihng v'ur l'ek kihh v'ur pwoobhangg mhi rumm dhenglong sh'i bhall, bhi tapp kihkhirmuut yak wunn mou, p'ee nyi ih ching tihh bii mihhse mwopp sh'in dhangg, weett kihhsheh bhi kyess khi yill ni p'ee khi shep ji abet mou.”
10Bhi satt mwopp le, “Seghen'gurum mwopp p'ee kihh yakhal l'ek kaah Seghen'gurum, yakhal dhenglong p'ee kihh yakhal l'ek kaah dhenglong. 11V'ur tabhal'yill w'u nan-nan, kihh tekhell kihh v'ur shwal'kaam mwopp p'ee mwan kwed dhighin yill ni shi'pee-shi'pee; yakhal v'ur bii nhikhin'teghem, kihh v'ur bii'aapwoo mhi bii'kattshiiy w'u nan-nan p'ee mwan yakhal sh'i phikihtihngg.
12“Dhanggbhi bii mhize mwopp kihh sh'in, bhi mwopp p'ee yak wunn, mwopp le'zheell wunn, mwopp dum kihh wunn dyeell kihkyeen Luh'kang keeru, harr mwopp shakhat wunn luh'shakhat. Mwopp p'ee dum kihh wunn dyeell kihkyeen Daskakhamm mwopp kihh mhi'bhaar mwopp p'ee shumm nah. 13Weett kihhsheh, bhi mihhseh p'ee dheeh wunn a arr sattpwoo kaah nah mwopp.
14“T'o, pee'mhinyi, bhi shep wu m'ang dhighin phitukhup wu tapp'ji wu tong shwan pwoo w'u wunn p'ee pring nyi mwopp tihh wu mang'am diy kaah shuk dhighin dyeell ni mou. 15P'ee a'n sh'i kaah nah p'ee pihh liiss'laapwoo wunn, kihh shwan'soon w'u wu'kob wuh mwopp weett p'ee mak dyarrang yit, kooh mwopp tep mou.#Luk 12:11,12 16Harr puup wu kihh nhikhin wu mwopp, kihh em'nhikhin wu mwopp, kihh mwoll wuh mwopp, kihh shaar wu mwopp p'ee seett kihh wunn, harr mwopp twa pakk wuh. 17Gurum weett p'ee shiih kihh wunn p'ee shumm nah. 18Dhangg kooh reb m'ee shoopkaah wuh kihmeh p'ee cham ky'em mou. 19Sh'i dharr bhall-bhall, bhi wunn p'ee kyeer seen wu.
20“Dhangg mihh wu naah mhi'lek mwopp ja okhor Urshalima, bhi wu man wu le puus w'u mwopp p'ee rumm nyi diy l'ang kuss. 21Bii mihhse mihh sh'in, bhi yet tihh mwooh yill Yahudiya mwopp shwa ka duam kih v'ur bwumm mwopp, yakhal mwooh dhighin khishikhitt Urshalima ni mwopp pwat reen. Tapp mwooh kihtekhell dhighin v'ur kwangpee mwopp wak-ja dhighin Urshalima ni mou. 22P'ee t'eer mhizeh ni mwopp a shiipp nyigkopp, tihh kapp bii w'u a w'u rih-ran dhighin pwoo khi Naan gam diy.#Hos 9:7
23“Kai, mak kihh shwarab w'u kihh ak, kihh mwooh kihh zhepp pwoo'yukhur dhighin t'eer mhizeh ni mwopp! P'ee zheell wu'yon p'ee taah kaah yill ni, yakhal tukhupdyeell khi Naan p'ee sam kaah gurum mhize ni mwopp. 24Mwopp p'ee m'ang mwopp laiy shipwetd sh'i goo'lek, yakhal mwopp kok pakk a mwooh l'ek so lhiduam koohneeh dhighin yill ni. Seghen'gurum mwopp p'ee sokokhorong kaah Urshalima, mwopp treng nyi, harr seeh pee w'u Naan pihh mwopp gam dhangg.
25“V'ur bii'aapwoo p'ee mwan yakhal dhighin puus, kihh tarr, kihh dhaghar mwopp zag. Dhighin yill ni zag, bhi nhikhin'teghem p'ee kihh chaat bwut gurum mwopp, harr mwopp kihh yeehpee kih shut lhiwaa gw'aar kihh tabbhal khi kur'am.#Ish 13:10; Ezk 32:7; Joe 3:4; Wyt 6:12,13 26Gurum mwopp p'ee shep kossok mwarrap kihh lukhut, p'ee bii w'u mwopp kihh naah kad nyi p'ee taah kaah yill ni. P'ee n'an bii w'u bhall-bhall w'u sh'i phikihtihngg mwopp p'ee shoghon. 27Sh'i pee mhizeh ni, bhi gurum weett p'ee naah L'aa khi Gurum kihh sam dhighin liw, kihh maa'pee, kihh men'riin w'u mett bhall mhi satt. 28Mihh bii w'u ih yakshiiy se y'aa sh'in, bhi wu dyarrang bhall-bhall, wu eep yit wu kih dhengNaan, p'ee bh'am keewu l'ang nokk.”
29Bhi Jesu satt m'ee shumpwoo mwopp le, “Wu naah tihngg koon kihh kakhar tihngsheep mwopp weett sihng. 30Mihh songg mwopp y'aa bih'khil, y'aa tang kom, bhi wu man wu le tarr log wull kuss. 31A kihhsheh zag, mihh wu naah bii mihhse mwopp y'aa sh'in, bhi wu man wu le dhenglong khi Naan kuss ji'wull.
32“A kihh satt ih zeenn wunn, baah gurum w'u gangg mhize ni mwopp p'ee mwarrap kyes weett mou, seeh bii mihhse ni mwopp gam weett. 33Phikihtihngg kihh yill p'ee ji dhel, dhangg baah pwoo keena p'ee cham taah yill mou.
34“Pee'mhinyi bhi wu kihh kangg kihh kaah wuh, tapp'ji wu tekhenn phitukhup wu sh'i v'ur sopee nihhkatt, kihh klihngshangg, kihh rakk-mwoz, kihh annshik p'ee bii mhi yill mhize, harr puus ni ji shep wunn rug noott m'an, kaah lwaa kihh taah dhighin gyaghab rug se. 35P'ee puus mhizeh ni p'ee jiputt a rug kaah gurum w'u dhighin yill ni kihhdihng. 36Pee'mhinyi bhi wu kihh tong sh'i gonggpee kihh dhangNaan twass, tihh wu kad bhall diy p'ee merrep pwoo bii w'u mwopp p'ee ja se; yakhal tihh wu dyarrang diy kihkyeen L'aa khi Gurum.”
37Gyet Jesu kihh witt sh'in kamm kihfur LuhNaan puus, dhangg pee mihh rab bhi kihh k'aa dum teer kih Bwum Paatt. 38Gurum mwopp kihh teer yakhal dooldyeell mwopp ja kihpee nyi diy kihfur LuhNaan, tihh mwopp klihng kamm khinyi diy.
Tans Gekies:
Luka 21: Chakfem
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©️2022 Luke Initiative for Scripture Translation