Malgo 9
9
1Ibun Yees gabalees lyaag ndaa: «Yawululees, mukyeleg: baad bambaan bal haa loo bafwa dii gun bagudeel gimfum gya Nzaam mu guwiy ande ngol.»
Luse la Yees la seem
(Maday 17:1-13; Luug 9:28-36)
2Gungoy biluum bisaamban,Yees gaseen Pedel, Zyaag ande Yowaan, gabadwaal hatal musel mos waleey, gwagun bagal gag babeen. Ibun luse la Yees lagasob hamiis mya baa; 3mileel myande mya semeeg, myawiy nsil peemb ngol, mu pil ndaa ada muud mos atala maan loo gafed gugug mu gumidulus peemb yapil yin#9:3 Gufwanas ande Pedel wa yool 1.16-18.. 4Mumbal yimos balongog abaa badaad badeel Eliya ande Mose munu gusolol ande Yees. 5Pedel galees Yees ndaa : «Looŋ, gulene piim biis mugugal ha. Duduuŋ mangaan madad, yimos ya nze, yimos ya Mose ibun yamban yi Eliya.» 6Mukyeleg Pedel loo gayabaag paan yi gawaglaag, pamb lo, aba badad bayuul ande boom. 7Ibun dud lumos laduug ibun lubafug. Ibun ndag yimos yaduug mu dud ndaa: «Wu gileen Mwaan ame wu luzol, lumuwugeen#9:7 Dala 1.11 ande bison bya gunsin.!» 8Mbal imos, balongog badal mumbiim abaa, gaanz loo badeel ada muud; Yees peel wagal ande baa. 9Mu daaŋ lubadyaag mu musel, Yees gabadunus ndaa maamb malumadeel loo gulees ada muud mos, dii gwafudumug Mwaan muud mukab lubafwa. 10Basweeg paan mween gu mudim, ibun bayandag guwufulanaan ba ye baa ndaa: «Gufudumug mukab lubafwa “gwabala songos kii”?»
11Ibun bawuful Yees ndaa: «Mumbad a kii balooŋ bansiig bawagalaga ndaa teeg Eliya wawiy#9:11 Gufwanas ande Mal 3.23.?» 12Yees gabafuduleen ndaa: «Mukyeleg Eliya gafed#9:12 Esay 9.12,Miguuŋ 22.1-18 .Guweenz wiy muud ateeg mu gufudul maamb amooz mu nzil. Gaanz mumbad akii Masonog mabala gumeen ndaa Mwaan muud gafed deel pas yavul ande gumudun? 13Gaanz mee yabal lulees ndaa: Eliya wawiyi gele, ibun bamusal amyos mibazol baa, mupil yibasonog mumbad ande.»
Yees gazunus mwaan wagal ande muhuuŋ wambi
(Maday 17:14-21; Luug 9:37-43)
14Daaŋ baduul bela bel ha gihan gyagal balongog bambaan, badeel gibug gya baad gibazyeede ibun balooŋ bansiig mun gusa teemb ande balongog. 15Daaŋ baad badeel Yees bayidig, baseen tiin mumbad guwa mbood. 16Yees gawuful balongog bande ndaa: «Teemb ya kii labalasa ande baa?» 17Muud mos mukab lu gibug gamufuduleen ndaa: «Looŋ, yaudwaal mwaan ame wa bagal gul nze, mumbad gilene ande muhuuŋ ambi wabal mugaaŋ nzil mu gugo guwagal. 18Bihan abyooz bimugamaag muhuuŋ ambi, gamubwisaga mu maan, ibun mwaan gadusagag minzeenz gu gan ande gugweedes mazin ibun lud lande lumawiy bwiid. Buyaloom gul balongog banze mu guyid muhuuŋ ambi, gaanz loo bagug.» 19Yees gabalees ndaa: «Baad bamagon lugwigil! Madaaŋ makwe lyaag yafed gal ande been? Madaaŋ makwe yafed gulugaŋeen mudim? Lu lutweleen mwaan.» 20Ibun bamudwaleen mwaan mwen. Daaŋ muhuuŋ gadeel Yees, gag mudaaŋ lalun ganigis mwaan ngol; mwaan gabwi mu maan, gayandag gubilimig ibun gan lande layuul ande minzeenz. 21Yees gawuful gida mwaan ndaa: «Madaaŋ makwe pas yi yimuyandag?» Gidan gafudul ndaa: «Yandag gimbeel gyande. 22Ibun mbal yavul muhuuŋ mween gamupinzaga gu mbaa dolo mu mazya mumbad gumuzwa. Gaanz de bumazol mu gumuzunus, duwugeen kyeene, dusalas!» 23Yees gamulees ndaa: «Kii mansuun, de bumazol! Maamb amooz mafed salam gulu muud wu magwigil.» 24Mbal imos gida mwaan gawagal mu ndag ya ngol ndaa: «Yagwigili, nsalas, mumbad kalaga mu pas mu gugwigil!»
25Daaŋ Yees gadeel ndaa baad bavul bawiyaag tiin, gaŋaneen muhuuŋ ambi ibun gansuun ndaa: «Muhuuŋ ambi, nze ugidilaga muud gihul ande gifwa manswi, yamagulees: dugu mu mwaan wu ibun loo gumufudugeen lyaag!» 26Muhuuŋ ambi gaŋan, ganigis mwaan ngol nsil, ibun gaduug, mwaan gagidig ngagun ndaa wafi, mupil ndaa baad bavul bagal han, bawagal ndaa: «wafi.» 27Gaanz Yees gamugam mu goog ibun gamunimis, ibun mwaan ganimig. 28Daaŋ Yees gawiŋin mu nzo, balongog bande basaal ande Nde, bamuwuful ndaa: «Mumbad akii biisi loo dagug mu guyid muhuuŋ mween?» 29Ibun Yees gabafuduleen ndaa: «Muhuuŋ wapil yi gafed guduug gag mu bisaam.»
Yees gayabas lyaag lufwa ande lufudumug lande
(Maday 17:22-23; Luug 9:43-45)
30Daaŋ lubadoog ha gihan gin, babwil gusim la Galiley. Ibun Yees loo gazolaag ndaa ada muud mos gayabeen gihan gibagal. 31Pamb lo gagal mu gulooŋ balongog bande. Gabalesaag ndaa: «Balemen Mwaan a muud gu myoog mya baad, bubamuzwa, ibun gungoy biluum bidaad gafudumug.» 32Gaanz loo babagasaag mu gudendel mfun ya maamb man ibun bamuwugaag boom mu gumuwuful byuuf mumbad maamb man.
Naa malig mfun
(Maday 18:1-5; Luug 9:46-48)
33Daaŋ lubaduul gu Gapelnawum. Hana bagal mukab lanzo, Yees gabawuful ndaa: «Gipag gya kii paan lumawa syananaag mu nzil?» 34Gaanz balemen pwedee, pamb lo mu nzil, bawaga syananaag gipag baa ye baa mumbad guyaab naa mukab la baa malig mfun. 35Ibun Yees gabwezen, gabiil balongog aba guum ye bool ibun gabalees ndaa: «Muud awooz mazol gugal wa teeg, gumalomog gagal muud wa nsug nsil, lyaag gisad gya baad abooz.» 36Ibun Yees gaseen mwaan mos wakuund, gamusi akaba kab la baa, ibun gungoy guyamb mwaan mween gu myoog myande, gabalees ndaa: 37«Muud awooz wun wayamb mwaan wun mu zin la Mee, wa yaamb Mee, lyaag muud ayooz wumayamb Mee, loo gamayamb me gaanz gamayamb muud wunu watum.»
Muud wu mago gugidun gilene wabiis
(Luug 9:49-50)
38Yowaan galees Yees ndaa: «Looŋ, dumadeel muud mos munu guyid mihuuŋ myambi mu ziin lanze, ibun daka mudunus mumbad loo gileen mu ndooŋ yabiis.» 39Gaanz Yees gawagal: «Loo gumudunus, mumbad muud loo galend gusal bipa mu ziin la mee ibun gungoy afidaaŋ wumawagal lyag maamb mambi mu ziin la mee. 40Pamb lo muud wun mago gudun biis, gil mumbad a biis. 41Yaululees mukyeleg, muud awooz wun wakaluwa goob lu mazya mu zin la mee, mumbad lul baad ba Kilisid, loo gabilis lufud lande.»
Gugebees
(Maday 18:6-9; Luug 17:1-2)
42«Gaanz de muud mos wabwisisi mu masum mwaan mos mukab la baan bakuund ban bakumanage, guleen piim mumbad ande,bamusi mudoy mukod ibun bamulum mu mweez. 43De goog lanze lugubwisiga mu masum, lugyeel; guleen piim mumbad anze mu guwiiŋ mu luziiŋ la kyeleg ande goog lumos, mu gihan gigugal ande myoog myeel, ibun maween gu biluuŋ, gihan gya mbaa yizimaag. [44Gunu, “mimfun mifwaag ibun mbaa yizimaag”.] 45De ndaa guul lanze lugubwisiga mu masum, lugyeel; pamb lo guleen piim mumbad anze mu guwiiŋin mu luziiŋ la kyeleg ande guul lumos, ha gihan gi gugal ande miil myeel ibun bagu gupiinz gu biluuŋ. [46Gunu, “mimfun mifwaag ibun mbaa yizimaag”.] 47Ibun de liis lanze lugubwisiga mu masum, ludogol, pamb lo, guleen piim mumbad anze mu guwiiŋin mu Gimfum gya Nzaam ande liis lumos, ha gihan gi gugal ande miis myeel, ibun baka gupiinz gu biluuŋ. 48Gunu, “mimfun milyaga luud mifwaag ibun mbaa se yizimaag.” 49Pamb lo muud amuud galig gu mbaa mumbad gamawiy piim nga muuŋ.
50«Muuŋ gili piim; gaanz de wabilisi piim yande, kii mutiind lafed gufudul lyaag piim yande? Gyagin, lugal ande muuŋ mukab labeen, ibun luziiŋ mu ngeemb been ande been.»
Tans Gekies:
Malgo 9: noq
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2025 The Seed Company in coordination with Association Congolaise de Traductions de la Bible