SPREUKE 4:1-27

Deel

SPREUKE 4:1-27 Afrikaans 1983 (AFR83)

Kinders, neem die opvoeding wat 'n vader julle gee, ter harte; slaan daarop ag, sodat julle kan leer wat insig is, want wat ek julle leer, is goed; moenie die onderrig wat ek gee, versmaai nie. Ek was ook eenkeer 'n kind, my moeder se oogappel, haar enigste. My vader het my toe ook geleer en vir my gesê: “Wat ek jou sê, moet jy vashou, my voorskrifte moet jy uitvoer, sodat jy werklik kan lewe. Sorg dat jy wysheid bekom, en insig! Moenie my woorde vergeet en daarvan afwyk nie; maak die wysheid jou metgesel, dit sal jou beskerm; as jy dit liefhet, sal dit jou veilig bewaar. Die wysheid kom eerste. Sorg dat jy wysheid bekom, gee alles wat jy het, om insig te kry! Slaan dit hoog aan, dan sal dit aan jou aansien gee. Dit sal jou 'n man van betekenis maak as jy dit vasgryp. Dit sal jou lewe versier, dit sal vir jou 'n sierlike kroon wees.” Luister, my seun, en aanvaar wat ek jou sê; dit sal jou lewensjare baie maak. Ek sal jou leer wat die pad van die wysheid is en jou die regte koers laat loop. As jy loop, sal daar niks in jou pad wees nie, en as jy hardloop, sal jy nie struikel nie. Hou vas aan wat ek jou leer, moet dit nie laat los nie; bly daarby, want dit is jou lewe. Moenie agter die goddeloses aanloop nie, vermy die pad van slegte mense. Los dit, moenie daarop loop nie, draai weg, vermy die slegte mense; hulle kan nie slaap as hulle nie kwaad gedoen het nie; hulle lê wakker as hulle nie iemand se ondergang bewerk het nie. Misdaad is hulle kos, geweld hulle drank. Die pad van die regverdiges is soos helder oggendlig wat groei en sterker word tot dit heeltemal dag is; die pad van die goddeloses is soos die donker: hulle weet nie waaroor hulle sal struikel nie. My seun, hoor wat ek vir jou sê, luister goed na my woorde! Moet dit nie vergeet nie, hou dit altyd in gedagte, want dit beteken lewe vir dié wat daarna luister, 'n volle lewe vir hom wat dit besit. Wees veral versigtig met wat in jou hart omgaan, want dit bepaal jou hele lewe. Weerhou jou van leuens, moenie mense mislei nie. Hou jou oë op die pad vorentoe, kyk reg voor jou uit. Baken jou koers af, dan sal jy seker wees van elke tree. Moenie links of regs wegdraai nie, weerhou jou van die verkeerde koers.

SPREUKE 4:1-27 Die Bybel 2020-vertaling (AFR20)

Seuns, luister na die vermaning van 'n vader, en slaan ag daarop om insig te leer ken. Want dit is goeie onderrig wat ek julle gee; my onderwysing – moet dit nie verontagsaam nie. Toe ek 'n seun was by my vader, onervare, en die enigste voor my moeder, het hy my geleer en vir my gesê: “Jou hart moet my woorde vashou. Kom my gebooie na, dan sal jy leef. Verwerf wysheid, verwerf insig, vergeet dit nie; wyk nie af van die woorde uit my mond nie. Moet haar, die wysheid, nie verontagsaam nie; dan sal sy jou beskerm. Wees lief vir haar, dan sal sy jou bewaak. Die begin van wysheid is: Verwerf wysheid, verwerf insig met alles wat jy besit! Stel haar hoog op prys, dan sal sy jou verhoog; sy sal aan jou eer gee as jy haar omarm. Sy sal op jou kop 'n swierige krans sit, 'n sierlike kroon aan jou skenk. “ Luister, my seun, en aanvaar my woorde sodat jou lewensjare baie kan wees. Op die pad van wysheid sal ek jou begelei, ek sal jou laat loop op reguit paaie. Wanneer jy loop, sal jou voetstappe nie belemmer word nie; en as jy hardloop, sal jy nie struikel nie. Hou vas aan vermaning, moet dit nie laat vaar nie; hou daarby, want dit is jou lewe. Op die pad van goddeloses moet jy nie kom nie; en moenie die weg van slegte mense betree nie. Vermy dit, moet dit nie eers oorsteek nie, draai weg daarvan en gaan verby. Want hulle kan nie slaap nie, behalwe as hulle kwaad doen; hulle slaap bly weg, tensy hulle iemand tot 'n val bring. Ja, hulle eet brood van goddeloosheid, en wyn van geweld drink hulle. Die pad van regverdiges is soos die helder oggendlig – dit verhelder geleidelik tot die volle dag. Die weg van goddeloses is soos die donker – hulle weet nie waaroor hulle struikel nie. “ My seun, slaan ag op my uitsprake; spits jou ore vir my woorde. Laat hulle nie aan jou oë ontglip nie; bewaar hulle diep in jou hart. Want dit is die lewe vir hulle wat dit vind; vir die hele liggaam bring dit genesing. Bewaak jou hart meer as enigiets wat bewaar word, want daaruit ontspring die lewe. Bly weg van 'n mond wat valsheid verkondig, en slinkse lippe, hou dit ver van jou. Jou oë moet vorentoe kyk, jou blik moet reg voor jou gerig wees. Hou die pad vir jou voet gelyk; en al jou weë, laat dit bestendig wees. Moenie regs of links afdraai nie, hou jou voet weg van die kwaad.”

SPREUKE 4:1-27 Die Boodskap (DB)

Jong vriend, luister na ouer gelowiges met baie kennis van die lewe. Doen jou bes om die regte dinge te leer. Ek wil jou goeie raad vir die lewe gee, kennis wat jy nooit moet vergeet nie. Ek was ook eenmaal jonk en sonder kennis. My pa het my van die lewe vertel en gesê: “Bêre my woorde in jou hart. Dink altyd daaroor na. Dan sal jy werklik gelukkig leef. “Doen jou bes om elke dag meer wysheid en insig te kry. Moet tog nooit my woorde verwerp nie. “Moenie lewenswysheid los soos ’n slegte man partykeer ’n vrou los nie. Wees lief daarvoor soos ’n goeie man sy vrou liefhet. Dan sal jy reg leef. “’n Belangrike reël vir die lewe is om meer en meer van die regte soort kennis in die hande te kry. Dan sal jy meer op jou gemak voel. Jy sal weet hoe om in die alledaagse lewe op te tree. “Leef die Spreukeboek se wysheid uit. Lees dit elke dag en dit sal met jou goed gaan. Omhels dit soos ’n vrou, en jy sal soveel vreugde ontvang. “Spreuke se wysheid sal jou help om jou lewe so mooi soos ’n pragtige kledingstuk te maak, jou lewenstyl soos klere wat almal raaksien en bewonder.” Jong vriend, ek het jou nou die weg na ’n wonderlike lewe gewys, jou vertel hoe ’n gelowige moet leef. Aanvaar dit nou. Dan sal jy jare van groot lewensvreugde smaak. Omdat ’n mens so maklik kan struikel en die verkeerde kan doen, moet jy tog vashou aan hierdie reëls wat ek jou leer. Oordink dit, want dit kan vir jou ’n goeie lewe vol vreugde verseker. Moet tog nie soos slegte mense leef of soos hulle raak nie. Bly uit hulle pad uit. Draai weg van hulle en loop jou eie pad. Hulle kan mos nie vanaand slaap as hulle nie eers iets verkeerds gedoen het nie. Hulle lê wakker as hulle nie iemand vernietig het nie. Hulle is skoon slapeloos as hulle nie vandag iemand te kort gedoen het nie. Misdaad is vir hulle soos kos. Geweld is soos wyn waarna hulle smag. Hulle lewe is een groot donkerte. Hulle kan nie sien waar om te loop nie. Boonop val hulle hulle stukkend oor al hulle booshede. Totaal anders is die lewe van iemand wat die Here liefhet. Dit is soos ’n skerp lig wat almal kan sien en wat net al hoe helderder word totdat dit uiteindelik heeltemal dag is. Jong vriend, luister baie mooi na wat ek vir jou sê. Spits jou ore vir my lewenswysheid. Vergeet dit nie ’n enkele oomblik nie. Hou jou oë altyd op die spreuke se lewensreëls. Dink heeltyd daaroor na. Wie dit sy eie maak, sal vreugde ervaar, soveel dat dit selfs sy liggaam beter sal laat voel. Wees versigtig wat jy dink. Jou denke kan jou lewe ingrypend beïnvloed. Vermy dom praatjies en leuens en glibberige woorde. Dink mooi na oor alles wat jy sien. Kyk na die goeie dinge van die lewe. Let mooi op hoe jy jou lewe inrig en kyk waarheen jy stap. Jou manier van leef bepaal jou geluk!

SPREUKE 4:1-27 Bybel vir almal (ABA)

Kinders, julle moet luister wanneer julle pa vir julle leer, julle moet luister, sodat julle kan weet wat om te doen, want dit is goeie dinge wat ek vir julle leer, julle moet aanhou doen wat ek vir julle sê. Want ek was ook voorheen 'n kind, ek was jonk, en my ouers was lief vir my. Toe het my pa vir my ook geleer. Hy het gesê: “Jy moet onthou wat ek vir jou sê, jy moet dit doen, sodat jy kan aanhou lewe. Jy moet wysheid kry, jy moet verstandig word, jy moenie vergeet nie, jy moenie ophou om te doen wat ek vir jou sê nie. As jy die wysheid nie los nie, dan sal dit vir jou wagstaan, as jy lief is vir die wysheid, dan sal dit jou beskerm. As jy regtig slim wil word, dan moet jy wysheid kry, jy moet ook verstandig word, saam met al die ander dinge wat jy kry. As jy hou van die wysheid, dan sal dit jou 'n belangrike mens maak. As jy wys dat jy lief is vir die wysheid, dan sal mense jou respekteer. Die wysheid sal soos 'n mooi kransie wees, soos die kroon van 'n koning op jou kop.” My kind, jy moet luister, jy moet doen wat ek vir jou sê, dan sal jy baie lank lewe. Ek het vir jou geleer om te loop op die pad van die wysheid, ek het jou gelei op reguit paaie. As jy op hierdie paaie loop, dan sal jou voet nie vashaak nie, en wanneer jy hardloop, dan sal jy ook nie val nie. Jy moet vashou aan wat ek vir jou leer, jy moenie dit los nie, jy moet dit doen, want dan sal jy waarlik lewe. Jy moenie op die pad loop van mense wat verkeerd doen nie, jy moenie saam met slegte mense loop nie. Jy moet daardie pad los, jy moenie daarop loop nie, jy moet wegdraai en jy moet op jou eie pad loop. Daardie mense kan nie slaap as hulle nie verkeerd gedoen het nie, hulle bly wakker as hulle nie sonde gedoen het nie. Hulle hou daarvan om verkeerd te doen en om mense seer te maak, dit is vir hulle so lekker soos om te eet en te drink. Maar mense wat reg doen, se pad is soos die oggendlig, dit word meer en meer helder totdat dit dag is. Mense wat verkeerd doen, se pad is soos die donker, hulle weet nie waaroor hulle sal val nie. My kind, jy moet luister wanneer ek praat, jy moet luister na wat ek sê. Jy moet altyd onthou wat ek vir jou sê, jy moenie dit vergeet nie, want elkeen wat doen wat ek sê, sal aanhou lewe, en hy sal 'n gesonde mens wees. Jy moet baie versigtig wees wat jy dink, meer versigtig as met ander dinge, want as jy reg dink, dan sal jy aanhou lewe. Jy moenie leuens vertel nie, jy moenie mense bedrieg nie. Jy moet reguit vorentoe kyk, jy moet weet waarnatoe jy gaan. Jy moet op die reguit pad loop, dan sal jy seker wees waarnatoe jy loop. Jy moenie wegdraai van die reguit pad nie, jy moenie regs of links draai nie, jy moet wegbly van alles wat verkeerd is.

SPREUKE 4:1-27 Afrikaans 1933/1953 (AFR53)

HOOR, julle seuns, na die tug van die vader, en luister om insig te leer ken; want ek gee aan julle goeie lering, verlaat my onderwysing nie. Want toe ek 'n seun was by my vader, teer en 'n enigste voor my moeder, het hy my geleer en vir my gesê: Laat jou hart my woorde vashou; onderhou my gebooie, dan sal jy lewe. Verkry wysheid, verkry insig; vergeet nie en wyk nie af van die woorde van my mond nie: verlaat dit nie, dan sal dit jou bewaar; kry dit lief, dan sal dit jou bewaak. Die beginsel van die wysheid is: Verwerf wysheid en verwerf insig deur al wat jy besit. Hou dit hoog, dan sal dit jou verhoog; dit sal jou eer as jy dit omhels. Dit sal 'n lieflike krans gee vir jou hoof, dit sal jou 'n sierlike kroon verskaf. Hoor, my seun, en neem my woorde aan; dan sal die lewensjare vir jou vermeerder word. In die weg van die wysheid onderrig ek jou, ek laat jou die spore van opregtheid betree; as jy loop, sal jou treë nie belemmer word nie, en as jy hardloop, sal jy nie struikel nie. Hou vas aan die tug, laat dit nie los nie; bewaar dit, want dit is jou lewe. Kom nie op die pad van die goddelose en betree die weg van die slegtes nie. Vermy dit, gaan nie daarop nie, wyk daarvan af en gaan verby; want hulle kan nie slaap as hulle geen kwaad doen nie; en hulle slaap is weg as hulle nie tot 'n val bring nie. Want hulle eet brood van goddeloosheid en drink wyn van gewelddadigheid. Terwyl die pad van die regverdiges is soos die lig van die môreglans, wat al helderder word tot die volle dag toe, is die weg van die goddelose soos duisternis: hulle weet nie waaroor hulle sal struikel nie. My seun, luister na wat ek sê, neig jou oor tot my woorde, laat hulle nie wyk uit jou oë nie, bewaar hulle binne-in jou hart. Want hulle is die lewe vir die wat hulle vind, en 'n genesing vir hulle hele liggaam. Bewaak jou hart meer as alles wat bewaar moet word, want daaruit is die oorspronge van die lewe. Verwyder van jou die valsheid van mond, en hou ver van jou af die verkeerdheid van lippe. Laat jou oë reguit kyk en jou ooglede hulle reg voor jou uit hou. Maak die pad van jou voet gelyk, en laat al jou weë vas wees, wyk nie regs of links af nie, hou jou voet ver van boosheid.

SPREUKE 4:1-27 Contemporary Afrikaans Bible 2023 (CAB23)

Hoor, kinders, die opdrag van 'n vader, en let op om insig te leer ken. Want Ek gee julle goeie leer, verlaat my wet nie. Want ek was my vader se seun, teer en enigste geliefde in die oë van my moeder. Hy het my ook geleer en vir my gesê: Laat jou hart my woorde behou; bewaar my gebooie en lewe. Verkry wysheid, verkry insig; vergeet dit nie; en moenie van die woorde van my mond afwyk nie. Verlaat haar nie, en sy sal jou bewaar; wees lief vir haar, en sy sal jou bewaar. Wysheid is die belangrikste ding; verkry daarom wysheid, en verwerf insig met al jou insig. Verhef haar, en sy sal jou bevorder; sy sal jou tot eer bring as jy haar omhels. Sy sal aan jou hoof 'n sieraad van genade gee; 'n kroon van heerlikheid sal sy aan jou gee. Hoor, o my seun, en neem my woorde aan; en die jare van jou lewe sal baie wees. Ek het jou geleer in die weg van wysheid; Ek het jou op regte paaie gelei. As jy gaan, sal jou voetstappe nie benoud wees nie; en as jy hardloop, sal jy nie struikel nie. Hou vas aan die tug; laat haar nie gaan nie; bewaar haar; want sy is jou lewe. Moenie die pad van die goddelose betree nie, en gaan nie op die weg van die bose mense nie. Vermy dit, gaan nie daar verby nie, draai daarvan af en gaan verby. Want hulle slaap nie, tensy hulle onheil gedoen het; en hulle slaap word weggeneem, tensy hulle sommige laat val. Want hulle eet die brood van goddeloosheid en drink die wyn van geweld. Maar die pad van die regverdiges is soos die skynende lig wat meer en meer skyn tot die volmaakte dag. Die weg van die goddelose is soos duisternis; hulle weet nie waaroor hulle struikel nie. My seun, let op my woorde; neig u oor tot my woorde. Laat hulle nie van u oë afwyk nie; bewaar hulle in jou hart. Want hulle is lewe vir dié wat hulle vind, en gesondheid vir hulle hele vlees. Bewaar jou hart met alle ywer; want daaruit is die kwessies van die lewe. Verwyder 'n verkeerde mond van jou af, en verdraaide lippe ver van jou af. Laat jou oë reguit kyk, en laat jou ooglede reguit voor jou uitkyk. Bedink die pad van jou voete, en laat al jou weë vasstaan. Draai nie regs of links nie; verwyder jou voet van die kwaad.

SPREUKE 4:1-27 Nuwe Lewende Vertaling (NLV)

Kinders, luister na my! Gee aandag aan julle pa se vermaning. Slaan ag daarop sodat julle insig kan kry. Die opvoeding wat ek julle gee, is van hoë gehalte. Moenie my onderrig ignoreer nie. Ek was self ook ’n kind van my pa, die enigste oogappel van my ma. My pa het toe ook vir my gesê: “Hou vas aan wat ek jou leer. Hou by my voorskrifte dat jy kan lewe. Soek na wysheid en goeie oordeel. Moenie my woorde vergeet nie. Moenie dit laat los nie. Moet nooit afstand doen van die wysheid nie. Dit sal jou beskerm. As jy wysheid liefhet, sal dit jou beveilig. Die verstandigste ding om te doen, is om eers wysheid te bekom. Wy jou daaraan toe om veral onderskeidingsvermoë te verkry. Stel wysheid voorop, dan sal dit vir jou aansien gee. Stel dit hoog op prys en dit sal aan jou eer gee. Dit sal jou kroon met voorspoed. Dit sal vir jou ’n pragtige kroon gee.” My seun, luister na my! Neem my woorde ernstig op. Dit sal jou lank laat lewe. Ek sal jou leer hoe wysheid werk. Ek sal jou op die regte pad lei. As jy op jou lewenspad loop, sal daar nie struikelblokke op jou pad wees nie. As jy hardloop, sal jy nie oor iets val nie. Hou vas aan die reëls wat ek jou leer. Moet dit nie laat los nie. Bewaar dit, want dit verryk jou lewe. Moenie dieselfde pad loop as goddelose mense nie. Bly weg van die pad van boosdoeners. Los hulle pad uit, moenie daarop gaan nie. Draai daarvan weg en kies ’n ander koers. Hulle kan nie gaan slaap as hulle nie kwaad gedoen het nie. Hulle kan nie tot rus kom as hulle nie iemand anders ook laat struikel het nie. Misdaad is hulle kos. Geweld is hulle drank. Die pad van die regverdiges is soos die lig met dagbreek. Dit word al helderder totdat die volle dag aanbreek. Die pad van die goddeloses is soos stikdonkerte. Hulle weet nie eers waaroor hulle gestruikel het nie. My seun, luister baie goed na wat ek vir jou sê. Spits jou ore vir my woorde! Moet dit nooit uit die oog verloor nie. Hou dit altyd in gedagte. My woorde beteken lewe vir dié wat daarna luister; gesondheid vir die hele liggaam. Bo alles, wees versigtig met wat in jou hart aangaan. Wat jy dink, bepaal alles wat jy doen. Moenie lelike dinge sê nie. Bly ver weg van lawwe praatjies. Kyk reguit vorentoe; bly gefokus op wat voor jou is. Merk jou pad vir jou duidelik af, dan sal jy seker wees waarheen jy gaan. Moenie links of regs van jou koers afwyk nie. Bly weg van wat verkeerd is.