Mr 5
5
Gerasa kaꞌiareka Satanárika ima ñaꞌrĩjãikaki majaroka
(Mt 8.28-34; Lc 8.26-39)
1Iꞌsuᵽaka simaeka beꞌerõꞌõ kika imaekarãᵽitiyika Jesúre Gerasa kaꞌiarã tẽrĩeyaeka. 2Tẽrĩeyatirã Jesúre marĩwaꞌrika ᵽoto ĩꞌrĩka Satanárika ima ñaꞌrĩjãikakire kire torika. Ãta wiꞌiarã majaka natarikõꞌrĩmatoᵽi Jesús ᵽõꞌirã ketaeka. 3Wejabiritika uᵽaka oyiaja imaekaki imarĩ torã kimaeka. Ᵽerumijiaᵽi kire naᵽiꞌᵽeka imakoꞌomakaja ñojimarĩji sakibaitaꞌruijiᵽaeka. 4Ĩꞌrãkurimarĩa kiãñaraka, kiᵽitakaoka kire naᵽiꞌᵽekoꞌomakaja sakitũrũtatajiᵽaeka. Suᵽa imarĩ ᵽoꞌimajare marãkãꞌã kire baawãrũberika. 5Ñamioka, ĩmima watoᵽekarã, majaka natairõꞌõrã akaserebaraka kituritaᵽaeka. Iꞌsuᵽaka baabaraka tĩmarĩji ãtaᵽi kiᵽoꞌia kikãꞌmibaaeka.
6Kimaekarõꞌõᵽi Jesúre ĩatirã Jesúᵽõꞌirã kirĩrĩraꞌaeka. Kiᵽõꞌirã etatirã kiwãjitãji kiñukuruᵽaeka, “Marãkãꞌã yibaaberijĩki kime”, ãrĩwaꞌri. 7-8Suᵽa imarĩ, ikuᵽaka Jesúre kire ãrĩka:
—Miaꞌmitiᵽe Satanárika ima. Ĩꞌĩ ᵽuᵽakareka mimarõꞌõᵽi miᵽoᵽe,== kire kẽrĩka.
Iꞌsuᵽaka kẽᵽakãꞌã,
—Jesús, Tuᵽarã tẽrĩritaki imatiyaiki Maki mime. ¿Marãkãꞌã yire baaerã mibaayu mae jeꞌe? Tuᵽarãre ĩaika wãjitãji, “ ‘Baꞌiaja mibaaika ᵽareaja baꞌiaja mire baabesarãki yiꞌi’, yire meᵽe”,== akasererikaᵽi Satanárika ima ñaꞌrĩjãikakire ãrĩka Jesúre. 9Iꞌsuᵽaka kẽᵽakãꞌã ikuᵽaka Jesúre kire ãrĩka:
—¿Marãkãꞌã miwãmea?==
Kire kẽᵽakãꞌã,
—Rĩkimarã baꞌirã yija ima simamaka Legión#5.9 Un grupo militar romano compuesto de 6000 soldados. ñime.==
10Suᵽabaatirã, “Ika kaꞌiaᵽi yijare miᵽoataꞌsi”, wayuᵽiꞌribaraka Jesúre kẽrĩrijarika. 11Iꞌsuᵽaka nabaaeka ᵽoto nakoyikurirã rĩkimakaja jẽjewẽkoa ᵽaꞌitaeka baꞌabaraka ĩmimajãꞌãrã. 12Suᵽabaatirã ikuᵽaka Satanárika ima ãrĩka:
—Kireka yijare miᵽoatayeꞌe, “Jẽjẽwẽko ᵽuᵽakarã mija ñaꞌrĩjãibe”, yijare meᵽe,== ãᵽaraka Jesúre najẽñeka.
13Iꞌsuᵽaka naᵽakãꞌã,
—Jẽjewẽko ᵽuᵽakarã mija ñaꞌrĩjãibe jeꞌe,== nare kẽrĩka.
Toᵽi mae, ĩmirĩjireka ñaꞌrĩjãitiirã imakoᵽeka ᵽorika, jẽjewẽkoarã ñaꞌrĩjãiokaroꞌsi. Suᵽa imarĩ jẽjewẽkoa dos mil rakamaki imaekarã Satanárika ima ñaꞌrĩjãimaka jãjia sarĩrĩwaꞌrika. Rĩrĩwaꞌritirã ᵽusiᵽemarã eyatirã ᵽaꞌwarã sajũjĩka. Iꞌsuᵽaka baawaꞌri simauᵽatiji sañaꞌmiᵽataeka.
14Suᵽa imarĩ sĩarĩrĩrimajare rĩrĩwaꞌririka, wejearã, ĩꞌrãriwiꞌi ñoakuri imaeka rõꞌõrã ᵽoꞌimajare sanabojarĩ. Toᵽi mae, “¿Dakoa suᵽa baaika?”, ãrĩwaꞌri ĩarĩ ᵽoꞌimajare aꞌrika. 15Jesúre imaekarõꞌõrã eyatirã, Satanárika ima kireka ñaꞌrĩjãika mirãkire niaeka: “Jariroaka jããekaki kimaeka, mamarĩ kimaeka uᵽakamarĩa, jia kiᵽuᵽaka jaᵽakãꞌã, ñaꞌrĩyaaekaja ruᵽaki kime mae”, ᵽoꞌimajare ãrĩᵽuᵽajoaeka. Iꞌsuᵽaka kimamaka ĩatirã, jimarĩ Jesúre nakĩkika, “Tẽrĩritakiji kime”, ãrĩwaꞌri. 16Suᵽabaatirã Satanárika ima Jesúre ᵽoataekakaka, jẽjewẽkoa baaekakaka ĩaekarã aᵽerãre sabojaekarã. 17Iꞌsuᵽaka kibaaika ãꞌmitiritirã Gerasakarã Jesúre kĩkiwaꞌri nawejeaᵽi kiᵽeꞌririka jãjia naᵽakataꞌrika.
18Suᵽa simamaka toᵽi ᵽeꞌriraꞌaerã kũmuarã kijãika ᵽoto ikuᵽaka Satanárika ima kireka ᵽoritaᵽaekakire kire ãrĩka:
—Mika aꞌririka yiyaᵽatiyayu yiꞌioka,== kire kẽrĩkoꞌomakaja ikuᵽaka Jesúre kire yiꞌrika:
19-20—Yika aꞌririyaᵽabekaja, miwiꞌiarã miᵽeꞌriwaꞌᵽe. “Yire wayuĩaiki imarĩ, jia Maĩᵽamakire yire baayu”, ãrĩwaꞌri mirĩrãre mibojaᵽe==.
Iꞌsuᵽaka Jesúre kire ãrĩka yiꞌriwaꞌri kiᵽeꞌrika. Ᵽeꞌriwaꞌritirã Decáᵽolireka imaeka wejearã Jesúre kire baaeka majaroka kibojataᵽaeka. Sãꞌmitiritirã marãkãꞌã ᵽoꞌimajare ãrĩwãrũberika, iꞌsiakaka ãꞌmitirikoriberikarã imarĩ.
Jairo makore Jesúre tããeka
(Mt 9.18-26; Lc 8.40-56)
21Torãjĩrã mae keꞌrika kũmuᵽiji Jesúre ᵽeꞌriraꞌaeka ate. Ᵽeꞌrietatirã ᵽaꞌwarijerã kirĩkamarika ᵽoto, rĩkimarãja ᵽoꞌimajare kiᵽõꞌirã rẽrĩka. 22Torãjite judíorãka rẽrĩriwiꞌi ĩᵽamaki, Jairo wãmeikire Jesús ᵽõꞌirã etaeka. Suᵽabaatirã kiwãjitãji ñukuruᵽatirã ikuᵽaka kire kẽrĩka:
23-24—Yimakore ᵽuᵽaririrã baayu. Miᵽitaka koᵽoꞌiarã mijaꞌaᵽearika yiyaᵽatiyayu kojãjiokaroꞌsi,== kire kẽᵽakãꞌã, Jesúre kika aꞌrika mae. Toᵽi kĩĩrika rĩkimarãja ᵽoꞌimajare kika aꞌrika. 25Naꞌrika watoᵽekarã ĩꞌrãko wãmarĩa imakakore imaeka. Ĩꞌᵽoũꞌᵽuarãeꞌearirakakuri wejejẽꞌrãka koeyawaꞌrika ᵽuꞌuriweaᵽi kaꞌwisijũabaraka. 26Ᵽaᵽemarĩa ĩkobaarimajare kore nikobaarũjekoᵽeka. Suᵽa imarĩ sawaᵽa koniñerũ imakoᵽeika kõjiᵽataeka. Suᵽa kobaakoꞌomakaja jãꞌrĩbaji kojaririjarika. 27-28“Wãmarĩa imarãre jimarĩa Jesúre bayayure”, ãrĩrika majaroka koãꞌmitirika. Sabeꞌerõꞌõ kowãꞌtarã Jesúre etamaka ĩatirã, rĩkimarãja ᵽoꞌimajare imaeka watoᵽekaᵽi kiᵽẽterõꞌõrã koeyaeka. Kimaekarõꞌõrã eyatirã, “Kijariroaka yiraberãkareka jia yijarirãñu”, kõrĩᵽuᵽajoaeka. Iꞌsuᵽaka ᵽuᵽajoawaꞌri kijariroaka korabeka. 29Torãjite ᵽuꞌuriwea koreka oꞌrika mae. “Risirika yireka imakoᵽeika oꞌyua mae”, kõrĩwãrũeka. 30Kijarijoaka korabeka beꞌerõꞌõ, “Tẽrĩrika ñimaᵽi ĩꞌrĩkare tããñu”, Jesúre ãrĩwãrũtika. Suᵽa imarĩ jorowaꞌritirã ikuᵽaka ᵽoꞌimajare kẽrĩka:
—¿Maki yijariroaka rabekoꞌoka?==
31-32Kẽᵽakãꞌã kika wãrũrimajare ikuᵽaka kire yiꞌrika:
—Miᵽõꞌirã rĩkimarãja mire rabeirã jeꞌe. ¿Marãkãꞌã simamaka, “¿Maki yijariroaka rabekoꞌoka?”, meñu?== narĩkoꞌomakaja ᵽoꞌimajare ĩabaotabaraka kire rabekakire kimoꞌarijarika. 33Ᵽoto, “Yiꞌi, risirika yire ima oꞌyaokaroꞌsi mire yirabekoꞌoko”, ãrĩᵽuᵽajoawaꞌri kiᵽõꞌirã koeyaeka. Iꞌsuᵽaka koᵽuᵽaka imakoꞌomakaja kire kĩkiwaꞌri tarabaraka kiwãjitãji koñukuruᵽaeka. Suᵽabaatirã kobaaeka uᵽakaja kire kobojaeka. 34Iꞌsuᵽaka kõᵽakãꞌã, wayuĩarimaji imarĩ, ikuᵽaka kore kẽrĩka:
—Mae miaꞌmitiᵽe yiwãyuĩaiko. Yire yiꞌriwaꞌri, jia mijayu. “Risirika yireka oꞌyua”, ãrĩwaꞌri jĩjimaka miᵽeꞌriwaꞌᵽe mae,== kore kẽrĩka.
35Ᵽoto judíorãka rẽrĩriwiꞌi ĩᵽamaki, Jairo wiꞌiakarãre etaeka, ikuᵽaka Jairore ãrĩrĩ:
—Mimako ᵽuᵽaririkoꞌoko. “Yimakore mibayaᵽe”, merĩaꞌsi wãrõrimajire mae,== kire narĩka.
36Iꞌsuᵽaka simakoꞌomakaja,
—Baꞌiaja ᵽuᵽaribekaja, yire miyiꞌᵽe,== Jesúre kire ãrĩka.
37Keꞌrika ᵽoto Ᵽedrore, Santiagore, suᵽabaatirã Santiago rĩꞌĩ Juare maekarakamarãre takaja Jesúre akawaꞌrika. 38Aꞌritirã, rẽrĩriwiꞌi ĩᵽamaki wiꞌiarã neyaeka. Jimarĩ ñajoabuꞌabaraka tokarã ᵽoꞌimajare imaeka rõꞌõrã. 39Ikuᵽaka nare kẽrĩeyaeka:
—¿Dako baaerã mija oyu? Ᵽuᵽariribeyuko meꞌrõ. Kãrĩkako koime,== nare kẽrĩka.
40“Ᵽuᵽariritiyaekako koime”, ãrĩwaꞌri Jesúre neeka. Suᵽa imarĩ nare kiᵽorirũjeka. Suᵽabaatirã ᵽuᵽaririkakore imaeka kurarakarã koᵽakiarã, suᵽabaatirã maekarakamarã kika imaekarã ᵽitiyika kikãkaeka. 41Naka kãkatirã koᵽitakarã kore ñiꞌatirã,
—Talitá cum,== kore kẽrĩka. (Mokareka ᵽuri ikuᵽaka ãrĩrika simaeka, “Meꞌrõ, mimiꞌmibe, mire ñañu”, ãrĩrika suᵽa kore kẽrĩka.)
42Iꞌsuᵽaka kore kẽrĩka ᵽotojĩji miꞌmirĩkatirã, kojaarĩkawaꞌrika. Ĩꞌᵽoũꞌᵽuarãeꞌearirakakuri wejejẽꞌrãka eyawaꞌyuko koimaeka meꞌrõ. Õñia kojariᵽeꞌᵽakãꞌã ĩawaꞌri, marãkãꞌãoka ãrĩwãrũberijĩka najarika kika imaekarã, iꞌsuᵽaka ima ĩakoriberikarã imarĩ. 43Torãjite mae,
—Aᵽerãre samija bojaꞌsi,== nare ãrĩtirã baꞌarika koroꞌsi keꞌeraꞌarũjeka.
© 2019, Wycliffe Bible Translators, Inc. All rights reserved.