Luk 8
8
1Na ɣɔn aken nin juec thok, ke gɔɔc teek ne bɛi yic bɛi dit ku bɛi koor, ke weet kɔc ku lek ke thoŋ piɛth de ceŋ de Nhialic, ku tɔ thiɛrkurou kene yen, 2ku diar eke ci cɔk dem ne jak rac ku benyden dɛ, ye Mari man col Magdalene, man e cene jak rac keedherou bɛi bei ne yeguɔp, 3ku Joana tiŋ e Cudha, awundiit de Kerod, ku Thuthana ku diar kɔk, man e ye ke kony ne weuken.
4Ɣɔn ye dun diit de kɔc ye ci gueer, ku ci kɔc ke bɛi kedhia gueer enɔŋ en, ke jam ne parabol: 5Ye dupuk ee lɔ pok ne kɔth: ana ye puk, ke kɔk lony ne dhol kec; go ke dum ne kɔc cok, ku kuanyke ne diɛt nhial. 6Ku lony kɔk piny de kur; ana yi cilki, e ke nɔc, ne ciɛn tiɔp piiny. 7Go kɔk lony e kuɔth yic; goki ciil etok kene kuɔth, go kuɔth ke nhiac. 8Ku lony kɔk e tiɔm piathic, goki cil, ku lokki yiki naŋ nyiin keethiɛrnyɛny. Na ye luel keekake, ke cot, Ye cakka ke piŋ kɔc nɔŋ yith keek.
9Go kɔcpiocke thiɛc luɛl de yeparabole. 10Go jam, Ye we eka ci yiɛn nyiny de kecikum de ceŋ de Nhialic: ku kɔc kɔk aabi ya jaam ne parabool; bik ŋem, ku cik bi ya ŋem, bik piŋ, ku cik bi ya dot. 11Yen luɛl de parabol eke: Kɔth aye wɛt de Nhialic. 12Ka ke dhol kec aye kɔc ci wel piŋ; ela ke durieth bɔ, ku nyiɛi wɛt ne kepiɔth, duɔke kek bi gam ku bi ke luɔk. 13Ku ka ke piny de kur, aye kɔc ye na yi cik wɛt piŋ, ke gamki ne yum de piɔu; ku cinki mei, yiki yul ne gamic, ana ya them ke, e ke yuɛk. 14Ku ka ci lony e kuɔth yic, aye kɔc ci piŋ, ku na yi kuanyki dholdenic, e ke dɛc ne ka ke piny nom kene baany de kaŋ ku ka kɔɔr piɔu keek ke yepiire a cik lok apiath. 15Ku ka ci lɔ ne tiɔm piathic, aye kɔc nɔŋ piɔth piath, ana yi cik wɛt piŋ, ke kuɛkki piny arir etor, ku lokki e ke ce ŋueny.
16Acin ran ye lamba dɛɛp ku kum nom ne tony ka tɛɛu ne agen thar; aye muɔk nhial, bi kɔc lɔ ɣot bik riarde ŋem. 17Acin ke ci thian ku cii bi tuɔl; ku kacin ke mony ku cii bi tic ne ɣɔn ɣer. 18Ŋɛmka roth ne piŋ ye we piŋ; ran ye naŋ ke dɛ, e kabi bɛɛr ya miɔc, ku ran ye ciɛn ke dɛ, abene ke ye tak ye tɔ ke yen nyaai.
19Na re ke man bɔ enɔŋ en kene mithakɛcke, ku cik ɣet enɔŋ en leu, ne gel wei de duut. 20Go yɔɔk, Ya moor ku mithakɛcku aakaac kec, aakɔr bik yi ŋem. 21Go dhuk yook ke, Ye kɔc ye wɛt de Nhialic piŋka ku yiki loi, keeka ye ama ku keeka ye mithakɛcie.
22Ɣɔn ne kol toŋ de keeakolka, go kɛɛc riɛi, yen ku kɔcpiocke; ku yook ke, Ye teemku bar lɔŋti: goki lony dhol. 23Ku te ciɛth kek, go Yecu lɔ korou ne nin: go yomdit go bɛn bɛɛr, goki lɔ e ke thiaŋ ne piu, cik jal ya kɔc tɔ ne thuɔuic. 24Goki bɛn enɔŋ en, ku packi, jamki, Yi Bɛny, Bɛny, wɔ thou. Go rɔt jɔt ku wɛɛi yom kene atitiak: goki kɔɔc, a lɔ piny diu. 25Go ke thiec, Ye tɔ gamduɔn teno? Goki riɔc ku gɛiki, jamki ne roth, Yi yene yeŋa ekene, ye yi yom kene yi piu yɔɔk, ku yiki welke gam?
26Goki ɣet piny de Gadarai, tɔ ne Galili lɔŋti. 27Ɣɔn ye kɛɛc teɣer, ke ram ke ran toŋ de baai, nɔŋ guɔp jak rac, ken alath kan piɔth te ci mɛc, ku cii rɔt gɛm ɣot, ye ya rɛŋ yic. 28Na ɣɔn ye ŋem Yecu, ke cot areet, ku cuɛt rɔt piny ne yenom, ku jiɛm ne ror dit, Ye yeŋo ba bi loi wɔ yin, yin Yecu, Wen de Nhialinydiit Nhial? Yin laŋ, duɔne ɣa luc. 29Ne ke cen jɔŋ rac yɔɔk bi bɛn bei ne raan guɔp. Ee ye jɔŋ rac cool e dom: a go ya cok tit ne kɔc, ku ye deer ne joth ku luɔŋ; go ke ya dhoŋ kɔth, ku ye jɔŋ rac kuaath roor. 30Go Yecu thiec, Ye cɔl rinku de? Go jam, Ye ɣan ekee Duut, ne kee cii jak rɛɛc kuɔt lɔ ne yeguɔp. 31Goki lɔŋ duɔke bi ke ciɛc tethuth de piu. 32Ku nyuɛth kuɔl juec ne kuur nom: goki lɔŋ bi ke cɔk lɔ ne kuɔl gup. Go gam ke. 33Go jak rac bɛn bei ne raan guɔp, ku leki ne kuɔl gup: goki riŋ te lɔ tiɛlaŋ lek bɛɛr, goki mou. 34Ku na wen ŋem kɔc biok kuɔl ke ci tuɔl, goki kat, ku lek lɛk kɔc ke baai ku piny ebɛn. 35Goki bɛn bik ke ci tuɔl bi ŋem; ku bik enɔŋ Yecu, goki ran e ci jak rac bɛn bei ne yeguɔp yok ke rɛɛr ne Yecu cok, ke ci rɔt piɔth ku ci nom jal loi: goki riɔc. 36Ku kɔc ci e ŋem acik ciɛr kɔc ye luaŋ cene ran ci jak rac dɔm luɔk. 37Go kɔc ke piny de Gadarai yuil en kedhia goki Yecu yɔɔk bi jaal pinyden; ne ke ci riɔc dit ke dɔm: go kɛɛc riɛi, ku dhuk ciɛn. 38Ku ran cii jak rac jaal ne yeguɔp ee Yecu lɔŋ bi tɔ ke ye: go Yecu jai, jiɛm, 39Ye dhuɔkne panduɔn, ku ba kadit ci Nhialic ke luɔi yin lɔ ciir. Go lɔ ɣɔu dhol, ku le kɔc ke baai kedhia lɛk ka dit ci Yecu ke luɔi yen.
40Ana ye Yecu ye dhuk, go loor ne duut; ne kee tiit kek yen kedhia. 41Ŋem, go ran cɔl Jairo bɛn, ku kee ye bɛny de luaŋ de gueer: bii ku cuɛt rɔt piny ne Yecu cok, ku lɔŋ bi lɔ ɣonde; 42ee nɔŋ nyan toŋden lɔrir, ye runkeek ke dit thiɛr ku rou, bec a duur thou. Go lɔ ke guere ne duut.
43Go tiik bɛn tiŋ nɔŋ tetook ye riɛm kueer ne run keethiɛr ku rou, ci weuke riap kedhia yin ke kɔc ke wal, ku cin toŋ leu en ne kuny, 44go bɛn ne Yecu kɔu ku jiɛk alath thok: go riɛm dai lɔ ŋou. 45Go Yecu jam, Ye yene yeŋa ci a jak? Na wen ajai kɔc kedhia, ke Petero, ku kɔc tɔ kene yen jam, Yii Bɛny, ee duut yeneka thany yin riekki yin. 46Go Yecu jam, Ye kanɔŋ ran toŋ ci ɣa jak: ne ke nyiɛc an en ke riɛr ci jaal aguɔp. 47Na wen ye tiik ye ŋem rɔt ke cii bi muɔny, ke bɔ bei ke lɛthe, ku cuɛt rɔt piny ne yenom ku cir ke yen en jak ne kɔc nhiim kedhia, ku ne dɛm cen dai dɛm. 48Go yɔɔk, Ye nyane, gamdu aci yi cɔk dem; jɔl lɔ ne dɔɔr.
49Te ŋoot en ke jam, ke raan bɔ ɣon de bɛny de luaŋ de gueer jiɛm, Ye nyandu kee thou, duɔne Bɛny rɛɛm nom. 50Go Yecu piŋ, ku yook, Ye duɔne riɔc: gam pei, ku kabi cɔk piɔl. 51Ɣɔn ye Yecu ye leer ɣot, go ciɛn ran gam lɔ thin kene yen, aye Petero, ku Jɔn, ku Jakob, ku wun e nya ku man. 52Ku kɔc ake dhiau kedhia, wuiki ne yen: go jam, Ye duɔka dhiau; aken thou, kanin. 53Goki dɔl ke buiki, ne ke nyic kek yen ne ci thou. 54Go dɔm ciin ku cɔɔl, jiɛm, Ye Nyane, jɔt rɔt. 55Go weike dhuk, ku jɔt rɔt nelantoŋtɛi: go ke yɔɔk bik miɔc ne ke ciɛm. 56Go kɔcken gai: go ke lom thook duɔke bik lɛk ran dɛ yeke ci loine.
Currently Selected:
Luk 8: LEKJOT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© British and Foreign Bible Society 1940, 2017
ስለ Lek Jot de Jecu Kritho 1940 ተጨማሪ ይወቁ