Mateyo 3
3
Yohana mubatizi kilongolezi cha Yesu abilikila: Hitulai ntongonyezi.
1-12.
1Mishi ija Yohana Mubatizi ne akiikala mwe nyika ya Yudeya akibilikila angwe: 2Hitulai ntongonyezi zenyu! Hambu uzumbe wa lwingu u hehi. 3Hambu uyu ni yuja ateγanyiγwaye ni mteγanyi Yesaya akiγamba: Kanwa cha mubilikizi chaivika mwe nyika angwe: Liγanyai sila ya Zumbe na kuγolosheza aho, ndiho agwile! 4Yuja Yohana ṅwenye ana kizwiko cha mayoya ya ngameya, aichikantile na kikowe; nkande zakwe ni siγe na woki wa vambi.
Yohana abatiza mwe Yolodani.
5Haja wa Yelusalemu woshe na wa Yudeya woshe na woshe weikala hehi hehi na Yolodani wazamlawila, 6wazabatizwa ndiye mwe muto wa Yolodani wakilaviliza wabanilevyo. 7Akiona, Mafaliseyo na Masadukeyo wangi wakiiza, wabatizwe, azawati: Wana nyoka inywi! Amionyesheye kuti: Mtazanyilika mayangwa, ndiyo yalawile, ni ndai? 8Tendai kuwo jeivana na kuhitula ntongonyezi! 9Mshefanyanye mwe myoyo yenyu kuγamba: Tina tate yweshu Abulahamu! Hambu namiti: Mulungu adaha kumwinulila Abulahamu wana mwe aya mawe. 10Miti iiteγanyiziγwe hoya nkoloi, kila muti ushiwovyala matunda matana utakelwa, utatambikwa mwe moto. 11Imi nimibatiza na mazi, mhitule ntongonyezi, miya yuja mwenitongela anizinka nguvu nkaviniagiza nikimwinwila vilatu, yuja atazamibatiza na mpeho ṅazi na moto. 12Aitozize kihetelo mwe mkono wakwe, aṅaze twelo jakwe ja ngano, mshele atauingiza mwe ikilo, miya makanka atayaoka na moto ushizimawo.
Yesu abatizwa ni Yohana.
13-17.
13Ne Yesu alawileho Galileya, azamwizila Yohana haja Yolodani, kangwe abatizwa ndiye. 14Miya uyu azamfingiza angwe: Imi vyaniagiza, nibatizwe ni weyo, lushe iwe uiza zeze na kwangu? 15Yesu azamlandula angwe: Leka du! Hambu ishwi vyatitala kubontola utanda woshe. Ne ahomkundiza. 16Yesu akibinda kubatizwa azafikalawa mwe mazi; akiolela, lwingu luzazuγuka azaona mpeho ya Mulungu, ikisheela, ikimwizila ifanana na suwa; 17kangi aho hazalawa kanwa mwe lwingu angwe: Uyu ni ṅwanangu, niyemkundisha, niyetamilwa ndiye.
Currently Selected:
Mateyo 3: KISHNT05
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
New Testament in Kishambala © Bible Society of Tanzania, 2005.