METHIU 12
12
Sabat Rella Ruina
(Mak 2:23–28; Luk 6:1–5)
1 #
Mak 2:23–28; Luk 6:1–5 Mahlai achunna Jisu in loulai vanna Sabat niah sehsa; che aroivah traamsei, churel ansaaktu kihu ahuui majuui amithronpei. 2Chuta Pharisi in mahchuta anmuh in akuungah anson, “Anro, nang niroi in tlohphunoh Sabat nia antlohpei.” 3Chunna Jisu in ankuungah asonei, “Devit in mahche amah in anruuipi mii in antraamlai jangthlouta antlohme: 4che khatloh a amah in Ringpu inna aluutche thiimpu noh a mahche amah in anruuipi mii inkho saa janoh tol asaakkha nannih in paanohchoume? 5Chunohle Sabat niah thiimpu in Ringpu mathruunna thlaamma Sabat nita sakmang amivei maraal amnoh tih a nannih in trongsuur paanohchoume? 6#Met 12:41–42; Luk 11:31–32Chuta keiin nannihta kitihchou, mah chuvah amah amun inna Ringpu mathruunna thlaamchunga akliin inkhat amsa. 7#Met 9:13‘Keiin rilvoltheihta kikdit, inkat pootta dinoh ang’ mah ita artha romchouleva, nannih in amaraal amnoh miita malaalnoh uchouta. 8#Jon 5:1–18; 7:19–24; 9:1–41Alamva miivaa Asa kupa in Sabat nivaa akpu.”
Akutthi Kupa Khatta Amthrat
(Mak 3:1–6; Luk 6:6–11)
9 #
Mak 3:1–6; Luk 6:6–11 Jisu in mah chunnata sehsa, che anmah sinakok a luutsa. 10Che anve, akut inkhattong thi mii khat rouam, anmah in Jisu ta anrui, “Sabat niah akna mathrat ajame?” Mah i Jisu ta amraal jonnatu anson. 11#Luk 14:5Chunna amah in ankuungah asonei, “Nannih nankaarna khatin Sadam khat asih, chuta Sabat niah khurra tlasa, mahchuta kaia aklounohtu tu amchoume? 12#Met 10:31Mii in sadamchunga khalmo amanchaal nohchoume? Chunnava Sabat nia akthra thlou tlohphu.” 13Cheva Jisu in akutthi kupa khata ason, “Nikutkha jamro.” Cheva akutta ajam jn inkhatna khananga thrasa. 14#Mak 14:1; Jon 7:30; 8:59; 10:39; 11:53Cheva Pharisi in apaalla inthruh a Jisu ta janoh a khatloh immaang umeta intelsei.
Ringpu in Achar Roijuih
15 #
Mak 3:7–12; Luk 6:17–19 Mahchuta Jisu in arompeia, mahkhannata sehsa. Che miitam in aknu anjuih, chunna aknaeita amthratei, 16che amahta mii amiromnoh natu anmahta matrit a asonei, 17Mah i ringraan Isaiah in asonkha atlungnau veisa: 18“Anve keiin kichar roijuih, kei kikli in kipelna kirilvol. Amahchungah kei kikli kisihtu, amah in Jental anchunga akchim aphoongtu. 19Amah in housuuk a inna ongnohtu, che tukhat inkho lamma ahou rungainoh tuei; 20Amah inchek a akchimta amsehnohmiil raphal khalekho tliknohtu, che annaal ruina meikhu thatnohtu, 21Che amah akming Jental jatih in amituurna veitu.”
Jisu leh Biljebul
(Mak 3:20–30; Luk 11:14–23)
22 #
Met 9:32–33; Mak 3:22–27; Luk 11:14–22 Che Khousaar chuung mitcho trongtheihnoh khatta Jisu kuung anthlen, che amah in amthrat, chunna mitcho trong theinoh in amuhche trong anchekpei. 23Chunna miinaam in salungkhou seia ansonpei, “Mahmii i Devit vaa Asa kupa meio?” 24#Met 9:34; 10:25; Jon 7:20; 8:52; 10:20Chuta Pharisi in mahchuta antheih a anson, “Mahmii in khousaarta manomnoh, chuta khousaarei aklok Biljebul apaalla anmahta amnomei.” 25Chuta anmah in amidonta Jisu in aromma ankuungah asonei, “Kurung huunna naamte anroua injanoh a inthrek suukei; che anroua injanoh a inthrek khuuboom nohle inn naamte anroua ngir cheknohtu; 26Seitan in Seitanta manomle, anmah in anroua injanoh a inthrektuei; chuleva khatloh a amah kurung huunna in ngir achekume? 27Che keiin khousaarta Biljebul appaalla manom angle, nannih nansa kupava tunang apaalla aminomtu? Alamchunna anmah in nannihtu pichaar akpu vei tuei. 28Chuta keiin Ringpu vaa Li apaalla khousaarta manom angle, Ringpu kurung huunnakha nankuungah thlengsa. 29Chunohle amah in aktrang mii khata makaangnoh maan avah, khatloh a amah inna luut a poot eita sut a lou achekume? Amah khata amkaang maanche innkhanna poot eita sut achektu. 30#Luk 11:23; Mak 9:40Tunangkhat keisoh inruuinoh mii khavah keita keijanohsa, che keisoh anchunnoh mii khanna akthek. 31#Mak 3:28–30; Luk 12:10Churella keiin nannihta kisonchou, miivaa anlehta mahche aleh alah a trongva ki iptu. Chuta Li ta janoh a alehlah aktrong miivaa ipnohtung. 32#Luk 12:10Tunangkhat in miivaa Asa kupata janoh a aktrong khava in iptu, chuta Li Akseengta janoh a aktrong miikhava ipek ringnatluun leh akthlengsam ringnatluun akho in ipnohtu.”
Thing Mahche Akrah
(Luk 6:43–45)
33 #
Met 7:16–20; 15:18; Luk 6:43–45; Jem 3:11–12 “Thingkha akthra inrah maveive che akrahkho mathratve, chunohle thingkha thranoh veile mah akrahkho thranoh veitu. Alamva thingva akrah a inrom. 34#Met 3:7; 23:33; Luk 3:7; Met 15:18; Luk 6:45Ruulsokvaa atute eio! Nannihva thranoh choua khatloh akthra trong nanchek ume? 35Akthra mii in arilla athra asihkhata amthruh, thranoh mii in arilla thranoh amkhoolkhata amthruh. 36Chuta keiin nannihta kisonchou, mah chuvah mii in cheksilnoh a trong anaamte pichaarniah amlantu. 37Alamva nang nitrongin nangta namchimtu, mahche nannih nantrong in nannihta nanimlaaltu.”
Jonah vaa Daang
(Mak 8:11–12; Luk 11:29–32)
38 #
Met 16:1–4; Mak 8:11–12; Luk 11:16,29–32; Jon 2:18; 6:30; 1 Kor 1:22 Chunna ringjih lulok mahche Pharisi arouin akuunga anson, “Lulok, nangningnata daang inkhat muh kandit.” 39#Met 16:4; Mak 8:12Chuta Jisu in amsangei, “Akthranoh leh miimei miisa laal ringnatluun in daang anjon, chuta ringraan Jonah daangnoh a daang amnoh. 40Alamva Jonah in suun inthum che khulouh inthum akliin nga vonsuungah am. Mahchunanga miivaa Asa kupa in suun inthum che khulouh inthum tuklei rilsuunga amtu. 41Nineveh na mii in mah ringnatluun na mii eisoh pichaarniah inthruh tuei che anmah amiraal amilantu alamva Jonah in trong araanlai anmah in ril anthleng. Che anve, Jonah chungah akliin mii khat amsa. 42Akhuna kurungpii in mah ringnatluun na mii eisoh pichaarnia inthruhtuei che amiraal amilantu alamva amah in thaleiram akiingnata Solomon lousing rungeihnatu thlengsa. Chunna Solomon chungah akliin mii khat amsa.”
Akseengnoh Li in Veikhat Inleng
(Luk 11:24–26)
43 #
Luk 11:24–26; 2 Pit 2:20 “Akseengnoh li inkhat in mii khat ningnata anthruhche, amah in anngeihnatu jonna akchaar ram amunna seh a am, chuta anngeihnatu tuuknohsa. 44Chunna amah in ason, ‘Keiin kanthruhna inna veikhat inlengtang.’ Che amah in anlenglai, innkha tlenga inthiira thratea louam antuukpipei. 45Chunna inlenga amahchunga akthranoh li sirihsoh inruuia thlengsa, che anmah in luut a amsei; mahchu aknua mahmiichu matsahna chunga ralla thranoh veisa. Chunna mah thranoh ringnatluun ikho maisoh intrimma veitu.”
Jisu vaa Anu Khatkho Anaoei
(Mak 3:31–35; Luk 8:19–21)
46 #
Mak 3:31–35; Luk 8:19–21 #
Jon 2:1–12; 19:25–27; 7:1–10; Mak 6:3; 1 Kor 9:5 Jisu in miitamsoh tronga amsuung, anve, amah anu mahche anao eiin amahta trongpinatu jonna apaalla ngirra amsei. 47Chuta tumekhat in Jisu ta ason, “Anro, nang ninu mahche ninao eiin nangta naktrongpinatu apaalla ngirra amsei.” 48Chuta Jisu in amsang, “Kei kinu mahche kinaochu tuseime?” 49Cheva Jisu in aroi ankuungah akut khoh a asonei, “Onna ak am ei i kinu mahche kinaosei! 50#Jon 15:14 Alamva tungangkhat in ringramma am Pa in amdon aktloh miikha kei kinao, kisar mahche kinusei.”
Currently Selected:
METHIU 12: TARAOBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.