Luk 18
18
Bơhmutu Kơ Khua Phat Kơđi Ƀu Tơpă
1Yêsu pơhiăp sa tơlơi bơhmutu kơ gơñu kiăng gơñu thâo khŏm iâu laĭ nanao, anăm hơtah hơtai ôh. 2Ñu laĭ: “Amăng sa boh plei anŭn hmâo sa čô khua phat kơđi ƀu hwĭ pơpŭ kơ Ơi Adai ôh, kŏn pơpŭ kơ mơnuih lơi. 3Amăng plei anŭn hmâo sa čô đah kơmơi blao rai pơ ñu nanao laih anŭn laĭ: ‘Phat brơi bĕ hăng tơlơi tơpă kơđi kâo hăng pô ayăt kâo.’ 4Pô khua anŭn hơngah sui laih, samơ̆ tơdơi kơ anŭn ñu pơmĭn glaĭ amăng pran jua ñu: ‘Wơ̆t dah kâo ƀu hwĭ pơpŭ kơ Ơi Adai ôh, kŏn pơpŭ kơ mơnuih lơi, 5samơ̆ yua kơ đah kơmơi blao anai ngă pơrŭng kâo, hnŭn yơh kâo či phat brơi kơđi ñu hăng tơlơi tơpă, kiăng kơ ñu ƀu rai ngă bơngơ̆t bơngañ kâo dơ̆ng ôh.’ ”
6Giơ̆ng anŭn Khua Yang laĭ: “Hmư̆ bĕ hơgĕt tơlơi khua phat kơđi ƀu tơpă laĭ. 7Hyư̆m, Ơi Adai ƀu phat brơi kơđi hăng tơlơi tơpă kơ ƀing mơnuih Ñu hmâo ruah mă laih, jing ƀing mơnuih hrơi mlam ur kơwưh kơ Ñu ôh hă? Ñu či pơhrưĭ amăng tơlơi djru kơ gơñu mơ̆? 8Kâo laĭ kơ ƀing gih, Ñu či tañ mơtam phat brơi kơđi kơ ƀing gơñu hăng tơlơi tơpă. Samơ̆ tơ Ană Mơnuih rai, Ñu či ƀuh mơ̆ tơlơi đaŏ ƀơi lŏn tơnah?”
Mơnuih Pharisi Hăng Mơnuih Ring Jia
9Yêsu pơhiăp tơlơi bơhmutu anai dơ̆ng kơ đơđa ƀing mơnuih yap gơñu pô jing mơnuih tơpă laih anŭn mưč mač kơ ƀing mơnuih pơkŏn. 10“Hmâo dua čô mơnuih đĭ nao pơ sang kơkuh pơpŭ kiăng iâu laĭ: sa čô jing Pharisi laih anŭn sa čô pơkŏn jing mơnuih ring jia. 11Pô Pharisi tơgŭ dơ̆ng hơjăn laih anŭn iâu laĭ kơ ñu pô#18:11 Đơđa Hră Ơi Adai Pơhiăp so đưm čih: iâu laĭ amăng pran jua. tui anai: ‘Ơ Ơi Adai, kâo bơni kơ Ih yua kơ kâo ƀu djơ̆ kar hăng ƀing mơnuih pơkŏn ôh. Gơñu jing ƀing mơnuih hưp ham, ƀing ƀu tơpă klă, ƀing klĕ pyu, kŏn hrup hăng mơnuih ring jia anai lơi. 12Kâo ư̆ ƀơ̆ng huă sa hrơi kơ̆m dua wơ̆t. Kâo pơyơr sa črăn amăng pluh mơ̆ng abih gơnam kâo hmâo.’ 13Samơ̆ mơnuih ring jia dŏ pơ ataih ƀu khĭn angak mơta ñu pơ adai ôh, samơ̆ ñu tŭk tơda ñu hăng laĭ: ‘Ơ Ơi Adai, pap mơñai kơ kâo đa, yua kơ kâo jing sa čô mơnuih soh!’ 14Kâo laĭ kơ ƀing gih, pô ring jia anai glaĭ pơ sang hmâo laih tơlơi yap tơpă hloh kơ pô Pharisi anŭn. Yua kơ hlơi pô pŭ đĭ ñu pô, Ơi Adai či pơtrŭn hĭ ñu; samơ̆ hlơi pô pơtrŭn ñu pô Ơi Adai či pŭ đĭ ñu.”#Mat 23:12; Luk 14:11.
Yêsu Hơơč Mơyun Kơ Ƀing Čơđai
(Mat 19:13-15; Mar 10:13-16)
15Arăng ăt ba nao ƀing čơđai anĕt nao pơ Yêsu, kiăng kơ Ñu dưi ah tơngan ƀơi ƀing gơñu; tơ ƀing ding kơna ƀuh tơlơi anŭn, gơñu khă ƀing ba nao ƀing čơđai. 16Samơ̆ Yêsu iâu gơñu hăng laĭ: “Brơi ƀing čơđai rai pơ Kâo bĕ, anăm khă gơñu ôh, yua kơ dêh čar pơtao Ơi Adai lơ̆m kơ ƀing jing kar hăng ƀing čơđai anŭn. 17Sĭt biă mă Kâo laĭ kơ ƀing gih, hlơi pô ƀu tŭ mă dêh čar pơtao Ơi Adai kar hăng sa čô čơđai ñu ƀu dưi mŭt pơ anŭn ôh.”
Sa Čô Khua Pơdrŏng
(Mat 19:16-30; Mar 10:17-31)
18Sa čô khua wai lăng tơña kơ Yêsu: “Ơ nai, pô hiam klă, hơgĕt kâo khŏm ngă kiăng kơ dưi tŭ mă tơlơi hơdip hlŏng lar?” 19Yêsu laĭ kơ ñu: “Yua hơgĕt ih iâu Kâo jing hiam klă? Ƀu hmâo hlơi jing pô hiam klă ôh, kơnơ̆ng hơjăn Ơi Adai đôč. 20Ih thâo laih tơlơi juăt: ‘Anăm klĕ pyu; anăm pơdjai mơnuih; anăm klĕ dŏp; anăm ngă gơ̆ng jơlan ƀlor; pơpŭ bĕ kơ amĭ ama ih.’”#Tơb 20:12-16; Mơñă 5:16.
21Pô anŭn laĭ glaĭ: “Kâo gưt laih abih tơlơi anŭn dơ̆ng mơ̆ng kâo dŏ čơđai.”
22Tơ Yêsu hmư̆ tơlơi anŭn, Ñu laĭ kơ gơ̆: “Ih ăt dŏ kơƀah sa tơlơi. Sĭ hĭ bĕ abih bang gơnam ih hmâo laih anŭn pơpha brơi ƀing ƀun rin, laih anŭn ih či hmâo dram gơnam yom amăng adai, giơ̆ng anŭn đuaĭ tui kâo bĕ.” 23Samơ̆ tơ ñu hmư̆ tơlơi anŭn ñu rơngot biă mă, yua kơ ñu pơdrŏng biă mă. 24Yêsu lăng ñu laih anŭn laĭ: “Tơnap tap đơi kơ mơnuih pơdrŏng sah mŭt amăng dêh čar pơtao Ơi Adai! 25Yua kơ sa drơi aseh samô čur mŭt ƀơi amăng jrum amuñ hloh hăng sa čô pơdrŏng mŭt amăng dêh čar pơtao Ơi Adai!”
26Ƀing hmư̆ tơlơi anŭn laĭ: “Tui anŭn hlơi dưi klaih lĕ?”
27Yêsu laĭ glaĭ: “Hơgĕt tơlơi ană mơnuih ƀu dưi ngă ôh, Ơi Adai yơh dưi ngă.”
28Pêtrôs laĭ: “Lăng anai, gơmơi lui hĭ laih sang gơmơi laih anŭn đuaĭ tui Ih.” 29Yêsu laĭ glaĭ: “Sĭt biă mă Kâo laĭ kơ ƀing gih, hlơi pô lui laih pưk sang, ană bơnai, adơi ayŏng, amĭ ama, yua kơ dêh čar pơtao Ơi Adai, 30ñu či tŭ mă lu hloh amăng rơnŭk anai, laih anŭn amăng rơnŭk tơdơi či tŭ mă tơlơi hơdip hlŏng lar.”
Tal Klâo Yêsu Laĭ Hlâo Kơ Tơlơi Ruă Nuă, Tơlơi Ñu Djai
(Mat 20:17-19; Mar 10:32-34)
31Giơ̆ng anŭn, Yêsu ba pluh dua čô khua ding kơna nao hơjăn hăng laĭ kơ gơñu: “Anai nê, ƀing ta đĭ nao pơ Yêrusalem. Abih tơlơi ƀing pô laĭ lui hlâo hmâo čih laih kơ Ană Mơnuih či krĕp djơ̆. 32Yua kơ arăng či jao hĭ Ñu kơ ƀing djuai tuai, arăng či djik djak kơ Ñu, ngă pơmlâo Ñu, laih anŭn kơčuh ia bah ƀơi Ñu. 33Arăng či taih Ñu hăng hrĕ hnuăt laih anŭn pơdjai Ñu, samơ̆ ƀơi hrơi tal klâo Ñu či hơdip glaĭ dơ̆ng.”
34Samơ̆ ƀing ding kơna ƀu thâo hluh ôh tơlơi anŭn, yua kơ khul boh pơhiăp anŭn jing hơgơ̆m kơ gơñu, laih anŭn gơñu ƀu thâo hluh ôh hơgĕt tơlơi Yêsu kiăng laĭ.
Mơnuih Bum Mơta Pơ Plei Yêrikô
(Mat 20:29-34; Mar 10:46-52)
35Tơ Yêsu giăm truh pơ Yêrikô, hmâo sa čô mơnuih bum mơta dŏ ber rơkâo dan ƀơi akiăng jơlan. 36Gơ̆ hmư̆ phung lu găn ƀơi anŭn, gơ̆ tơña hơgĕt tơlơi anŭn. 37Arăng laĭ glaĭ: “Yêsu plei Nasaret hlăk găn nao.” 38Pô bum anŭn ur kraih mơtam: “Ơ Yêsu, Ană Pơtao Đawit, rơkâo Ih pap mơñai kơ kâo đa!” 39Ƀing mơnuih nao hlâo khă brơi ñu dŏ rơiăt. Samơ̆ gơ̆ ur kơtang hloh dơ̆ng: “Ơ Ană Pơtao Đawit, rơkâo Ih pap mơñai kơ kâo đa!” 40Yêsu dŏ hĭ, brơi arăng ba gơ̆ nao pơ Ñu; laih anŭn tơ ñu nao giăm, Yêsu tơña kơ gơ̆, 41“Hơgĕt ih kiăng Kâo ngă brơi kơ ih?” Gơ̆ laĭ: “Ơ khua Yang, brơi kâo thâo ƀuh glaĭ dơ̆ng.”
42Yêsu laĭ kơ ñu: “Ƀuh rơđah bĕ! Tơlơi đaŏ ih hmâo pơsuaih ih laih.”
43Tañ mơtam gơ̆ ƀuh glaĭ rơđah dơ̆ng laih anŭn đuaĭ tui Yêsu, pơpŭ bơni kơ Ơi Adai. Abih bang ƀing ană plei ƀuh tơlơi anŭn, gơñu bơni hơơč kơ Ơi Adai.
Currently Selected:
Luk 18: JRA2016
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016 United Bible Societies. All rights reserved.