Luk 20
20
Tơlơi Tơña Djơ̆ Kơ Tơlơi Dưi Khua Yang Yêsu
(Mat 21:23-27; Mar 11:27-33)
1Hmâo sa hrơi, tơdang Yêsu pơhrăm ƀing ană plei amăng sang kơkuh pơpŭ laih anŭn pơtô Tơlơi Phrâo Hiam, ƀing khua ngă yang prŏng hăng ƀing nai pơtô tơlơi juăt hrŏm hơbĭt hăng ƀing kŏng tha rai 2laih anŭn tơña kơ Ñu: “Laĭ brơi gơmơi thâo mơ̆ng tơlơi dưi pă Ih ngă tơlơi anai, ƀôdah hlơi pô brơi tơlơi dưi anai kơ Ih?”
3Yêsu laĭ glaĭ kơ ƀing anŭn dơ̆ng: “Kâo ăt kiăng tơña kơ ƀing gih sa tơlơi mơ̆n. Laĭ brơi Kâo bĕ: 4Tơlơi ƀatem Yôhan tơbiă rai mơ̆ng adai ƀôdah mơ̆ng mơnuih?”
5Ƀing anŭn črŏng sai tơdruă gơñu hăng laĭ: “Tơdah ƀing ta laĭ: ‘Mơ̆ng Ơi Adai,’ Ñu či laĭ: ‘Yua hơgĕt ƀing gih ƀu đaŏ ôh kơ ñu?’ 6Samơ̆ tơdah ƀing ta laĭ: ‘Mơ̆ng mơnuih,’ abih bang ană plei či glŏm boh pơtâo kơ ƀing ta, yua kơ gơñu đaŏ kơ Yôhan jing sa čô pô laĭ lui hlâo.” 7Tui anŭn gơñu laĭ glaĭ gơñu ƀu thâo ôh mơ̆ng pă tơlơi ƀatem anŭn tơbiă rai.
8Yêsu laĭ glaĭ kơ gơñu: “Kâo kŏn či laĭ brơi kơ ƀing gih lơi mơ̆ng tơlơi dưi pă Kâo ngă tơlơi anai.”
Tơlơi Bơhmutu Kơ Ƀing Ngă Đang Boh Kơƀâu Apah
(Mat 21:33-46; Mar 12:1-12)
9Yêsu čơdơ̆ng pơhiăp tơlơi bơhmutu anai kơ ƀing ană plei pla: “Sa čô mơnuih ngă sa boh đang boh kơƀâu laih anŭn brơi kơ arăng čan, laih anŭn ñu nao pơ tring pơkŏn sui hrơi.#Êsai 5:1. 10Tơ truh bơyan pĕ boh, pô đang pơkiaŏ nao sa čô ding kơna ñu pơ ƀing čan anŭn kiăng kơ ƀing čan brơi kơ ñu sa črăn boh kơmlai mơ̆ng đang boh kơƀâu anŭn. Samơ̆ ƀing čan taih gơ̆, laih anŭn pơkiaŏ hĭ gơ̆ glaĭ tơngan soh. 11Tơdơi kơ anŭn pô đang pơkiaŏ nao dơ̆ng sa čô ding kơna pơkŏn. Samơ̆ ƀing mơnuih apah ăt taih gơ̆, laih anŭn ngă sat kơ gơ̆, hăng brơi gơ̆ glaĭ hăng tơngan soh. 12Pô đang pơkiaŏ nao ding kơna tal klâo dơ̆ng, samơ̆ gơñu ăt taih pơrơka gơ̆ hăng puh pơđuaĭ hĭ gơ̆. 13Hlăk anŭn pô đang boh kơƀâu laĭ: ‘Hơgĕt kâo či ngă? Kâo či pơkiaŏ nao ană đah rơkơi pô kâo khăp hơeng; Năng ai gơñu či pơpŭ kơ gơ̆.’ 14Samơ̆ tơ ƀing čan ƀuh gơ̆, gơñu bơlaĭ tơdruă gơñu: ‘Anai jing pô mă tŭ kong ngăn; brơi ƀing ta pơdjai hĭ ñu, kiăng kơ kong ngăn anŭn či lơ̆m kơ ƀing ta.’ 15Gơñu glŏm hĭ gơ̆ pơ gah rơngiao đang boh kơƀâu hăng pơdjai hĭ gơ̆. Tui anŭn hơgĕt pô đang boh kơƀâu či ngă kơ ƀing gơñu? 16Pô anŭn či rai pơdjai hĭ ƀing čan anŭn, laih anŭn jao đang boh kơƀâu kơ ƀing pơkŏn.” Tơdah ƀing ană plei hmư̆ tơlơi anŭn, gơñu laĭ: “Ư ưh, brơi Ơi Adai khă tơlơi anŭn!”
17Samơ̆ Yêsu lăng kơ gơñu laih anŭn laĭ: “Tui anŭn, hơgĕt tơlơi Ơi Adai Pơhiăp čih anai kiăng laĭ:
‘Boh pơtâo ƀing ngă sang hơngah lui laih,
Hmâo jing hĭ laih boh pơtâo phŭn akiăng sang’#Adoh 118:22.
18Hlơi pô lĕ rơbuh ƀơi boh pơtâo anŭn, pô anŭn či pơčah brăk brai hĭ; laih anŭn tơdah boh pơtâo anŭn lĕ djơ̆ ƀơi hlơi, boh pơtâo anŭn či glit pơphač hĭ pô anŭn yơh.”
Tơlơi Tơña Djơ̆ Kơ Tơlơi Duh Jia
(Mat 22:15-22; Mar 12:13-17)
19Ƀing khua ngă yang prŏng hăng ƀing nai pơtô tơlơi juăt hơduah jơlan kiăng mă Yêsu ƀơi mông anŭn mơtam, yua kơ gơñu thâo Yêsu pơhiăp tơlơi bơhmutu anŭn djơ̆ kơ gơñu; samơ̆ gơñu hwĭ kơ ƀing ană plei pla. 20Tui anŭn gơñu krăp lăng sŭ Yêsu, laih anŭn pơkiaŏ nao ƀing kơnuă pơƀlor mă jing kar hăng ƀing mơnuih tơpă hiam, kiăng hmâo tơlơi dưi pơčŭt kơ tơlơi Yêsu pơhiăp, kiăng kơ gơñu dưi jao gơ̆ kơ kơnuk kơna laih anŭn kơ khua prŏng Rôm. 21Ƀing anŭn tơña kơ Yêsu: “Ơ nai, gơmơi thâo ih pơhiăp laih anŭn pơtô hăng tơlơi tơpă. Ih ƀu dŏ gah sa bơnah ôh, samơ̆ pơtô jơlan Ơi Adai hăng tơlơi sĭt tơpă. 22Phiăn mơ̆ ƀing ta duh jia kơ Sêsar?”
23Samơ̆ Yêsu thâo tơlơi mơneč gơñu laih anŭn laĭ kơ gơñu, 24“Brơi Kâo lăng sa kak đơniê. Kak đơniê anai hmâo rup hăng anăn hlơi?” Gơñu laĭ glaĭ: “Sêsar.”
25Yêsu laĭ kơ gơñu: “Tui anŭn ba glaĭ bĕ kơ Sêsar gơnam kơ Sêsar, laih anŭn ba glaĭ bĕ gơnam Ơi Adai kơ Ơi Adai.”
26Ƀơi anăp ană plei pla, gơñu ƀu hmâo tơlơi dưi pơčŭt kơ Yêsu kơ sa mơta tơlơi hơgĕt ôh. Gơñu hling hlang kơ tơlơi Yêsu laĭ glaĭ, laih anŭn gơñu dŏ rơiăt.
Tơlơi Tơña Kơ Tơlơi Hơdip Glaĭ Dơ̆ng
(Mat 22:23-33; Mar 12:18-27)
27Hmâo đơđa ƀing Sadusi rai pơ Yêsu, jing ƀing laĭ ƀu hmâo tơlơi hơdip glaĭ dơ̆ng ôh.#Bruă 23:8. 28Gơñu tơña Yêsu tui anai: “Ơ Nai, Môis čih laih tơlơi juăt kơ ƀing gơmơi tơdah sa čô ayŏng djai, hmâo bơnai samơ̆ ƀu hmâo ană ôh, brơi adơi gơ̆ mă dŏ bơnai ayŏng ñu, kiăng hmâo ană djă pioh djuai ayŏng ñu.#Mơñă 25:5. 29Anai nê, hmâo laih tơjuh čô adơi ayŏng. Ayŏng tha dŏ bơnai laih anŭn djai, ƀu hmâo ană ôh. 30Adơi tal dua dŏ đah kơmơi anŭn mơ̆n, 31tal klâo dŏ đah kơmơi anŭn mơ̆n, tơl abih bang tơjuh čô adơi ayŏng dŏ đah kơmơi anŭn, djai ƀu hmâo ană ôh. 32Đŭt tơdơi, đah kơmơi anŭn ăt djai mơ̆n. 33Tui anŭn, ƀơi hrơi hơdip glaĭ, đah kơmơi anŭn či jing bơnai kơ hlơi lĕ? yua kơ abih tơjuh čô anŭn leng kơ hmâo dŏ laih ñu.”
34Yêsu laĭ kơ gơñu: “Ƀing ană rơnŭk anai dŏ rơkơi dŏ bơnai, 35samơ̆ ƀing arăng yap năng lăp mŭt amăng rơnŭk tơdơi laih anŭn kơ tơlơi hơdip glaĭ mơ̆ng ƀing djai ƀu či dŏ rơkơi dŏ bơnai dơ̆ng ôh, 36gơñu ƀu dưi djai dơ̆ng ôh, yua kơ gơñu jing kar hăng ƀing ling jang hiam Ơi Adai laih anŭn jing ƀing ană Ơi Adai, jing ană kơ tơlơi hơdip glaĭ. 37Bơ kơ tơlơi ƀing djai hơdip glaĭ, wơ̆t kơ Môis bơrơđah laih amăng tơlơi čih ră ruai kơ apui ƀơ̆ng pum drơi dŏ jă, hlăk ñu iâu Khua Yang jing Ơi Adai kơ Abraham, Ơi Adai kơ Isak, laih anŭn Ơi Adai kơ Yakôp.#Tơb 3:6. 38Tui anŭn, Khua Yang ƀu djơ̆ jing Ơi Adai kơ ƀing djai ôh, samơ̆ kơ ƀing hơdip, yua kơ gah kơ Ơi Adai abih bang gơñu leng dŏ hơdip.”
39Hmâo đơđa ƀing nai pơtô tơlơi juăt laĭ glaĭ dơ̆ng: “Ơ Nai, Ih pơhiăp djơ̆ yơh.” 40Tui anŭn gơñu ƀu khĭn tơña kơ Yêsu sa mơta tơlơi hơgĕt dơ̆ng ôh.
Yang Krist Ană Pơtao Đawit
(Mat 22:41-46; Mar 12:35-37)
41Yêsu tơña kơ gơñu: “Hyư̆m arăng dưi laĭ Yang Krist jing ană pơtao Đawit lĕ? 42Yua kơ Đawit pô laĭ amăng hơdrôm hră Tơlơi Adoh Hơđăp:
‘Khua Yang laĭ hăng Khua Yang kâo: Dŏ ber bĕ gah hơnuă Kâo,#Adoh 110:1.
43Tơl Kâo ngă kơ ƀing ayăt ih jing hnăl tơkai ih juă.’
44Đawit iâu Krist jing ‘Khua Yang’; Tui anŭn hyư̆m Krist dưi jing ană đah rơkơi Đawit lĕ?”
Brơi Răng Kơ Ƀing Khua Čih Hră
(Mat 23:1-36; Mar 12:38-40)
45Tơdang abih bang ƀing ană plei pla dŏ hmư̆, Ñu laĭ kơ ƀing ding kơna Ñu, 46“Răng bĕ kơ ƀing nai pơtô tơlơi juăt. Gơñu khăp čŭt ao phyung rơbat hyu, laih anŭn khăp kơ tơlơi arăng kơkuh kơ gơñu amăng sang sĭ mia, hăng ruah anih hiam hloh amăng sang bơjơnum laih anŭn anih hmâo tơlơi pơpŭ hloh amăng tơlơi ƀơ̆ng huă. 47Gơñu plah sua mă sang ƀing đah kơmơi djai rơkơi laih anŭn ngă mă iâu laĭ sui. Gơñu či tŭ tơlơi pơkơhmal kơtang hloh.”
Currently Selected:
Luk 20: JRA2016
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016 United Bible Societies. All rights reserved.