Ioane 13
13
1Ina kiohodio‐horiomoo opuito hiwio o’u biahai, Iesu nou umori nou hiwio tau o’u, ina nouro batibati auwoha kimeheai tariwai, Abeaido naibaha ioro. Nou himia oubi nou auwo niro nei batinu nouowa wia nou auwo niro nei nou koropoi hiwio’i nouowa. 2Wia doho‐dou kihi ta’uwa, Iesu nou umori Diabolo, Iuda Isakarioto, Simona mere, nou iminiwa nouro owaeviai nou piroha owateai. 3Ina ata, Iesu nou umori nana auwoha Abearo nou himia tuito nou emaairo wia Iehovaudo nou tau o’uro ina Iehovaido nou aio’u. 4Kiho batiudo nou naibaha otoa, nou hipura nou naibaha amododai wia bo’u kipiti na nou naibaha emidai naibaha orooi. 5Dooudo obo kepuriwa nouro naibaha ahauodoi wia kitomudio mere kono nouro naibaha idu’utiwa naibaha ipitiwa, nou korooi bo’u kipiti na’i noito. 6Ina nou naibaha o’u Simona Pitaido wia Pita nouido naiba iaowa, Pai dubu e, ro mo kono iduutira? 7Iesuro naibaha imowameai, nouido naiba iaowa, Nouri nana mai nidodiaiwa ro umo biahai doihabuo, ata dooudo rovia umo aiwaiti. 8Pita nouido naibaha iaowa: Roro mo kono iduuti aue. Iesuro nouido naibaha imowameai; Ina moro ro kono iduuti tatowa, ro mo hapuo biahai. 9Pita nouido naibaha imowameai, Pai dubu e, mo kono gauwoha biahai mo tu neewa wia mo opu naiba. 10Iesu nouido naiba iaowa: Dubu nou tau iduutiwa, ata na nou iduuti niro biahai na’u nou himia kono wia nou soviori auwoha wia rio sovio tau oitiumo, ata riovia auwoha sovio biahai. 11Mabu nouri nou umori nouri dubu nouro nou piroha aiwaimaai, mabu nouri nou naibaha iaowa: Riovia auwoha sovio biahai.
12Ina nou ta’uwa nei kono nou tau iduuti wia nou hipura nouro naiba aodia ina naibaha emi, nou neido naiba iaowa: Rio umora mo touna nododiai rioido? 13Riovia mo Pai‐dubuito wia Auwo‐dubuito nemahoodumo wia rioo naiheha nemahoodumo naiba, mabu mo nouri. 14Ina mo, rio himia Pai‐dubu wia Auwo‐dubu ina moro rio kono tau niduuti, rio himia oubi kono’i rioo kiroduutiha tairoduutimo. 15Mabu nouri, modobo rioido moro tau nimaai rioo naibaha taidodiaiwamo mo rioido kidodiaii nou aibo. 16Naiheha, naiheha, mo rioido ainaro; Hiwaa mere nou pai biahai nou pai‐dubui wia kotiodoi‐mere nou pai biahai nou himia kotiodoi‐dubui. 17Ina nouri nana rio umo oitimowa, rio tiaha geii waimo‐emahebidioi ina rioo naibaha waimo‐idodiai. 18Mo nou naro rio auwohaido biahai moro kimebomai oubi nei mo umori; ata, ina nou aibo titi iati wade nou naiheha aiwaiwai: Dubu nou momu ihowa nou ebenupu mo hohowa nou tau oviai. 19Doihabuo mo rioido nou naro ina ta’u ko’u biahai, ina nou ta’uwa nou o’uwa rio umo aiwaimoiti mo nouri. 20Naiheha naiheha mo rioido ainaro: Dubu nou mo kotiodoi‐mere naibaha oobuai nouro mo naubuai, wia dubu nou mo oobuaiwa mo nouro notiodoiro nouro nou naibaha oobuai.
21Ina nou ta’uwa nouri wade Iesu tau aro, nou himia imini godogodoha iraromodiowa, nou wade pupuoito aro naiba iaowa: Naiheha, naiheha mo rioido ainaro, na’u dubu riomu, mo nouro piroha aiwamaai. 22Ina nou kitomudio mere nei himia himia naibaha ereiauriwaumo neiio naibaha iraromodiowaumo boti mereri nou nou raro. 23Wia na’u kitomudio mere Iesu nou nou niroi, nouro Iesu bodorowa naibaha odomai. 24Simona Pita nouido naibaha emaduduowa wia nouido naiba iaowa: Taro imoido boti merero waroi. 25Nouro ina nou Iesu bodorowa naibaha odomoi nou nouido naiba iaowa: Pai dubu e, botiri? 26Iesuro naibaha omowameai: Dubui nouri ina moro dou kere urowa moro ainamodoubiai nouido moro ainaamai. Wia nou ta’uwa dou kere ina nouro idadoubia, Iuda Isakarioto, Simona mere, nouido nouro naibaha emaai. 27Wia dou kere do’oudo Satanaro nouido naibaha odoro. Ina Iesu nouido naiba iaowa; Nouri ro kidodiai nana’i hagohagoha taidodiai. 28Wia dodoowa kemidio oubi auwoha nei umo biahai teiri raro nou nouido nouri wadei. 29Mabu nouri amidao naibaha araromowaumo Iuda hao keauri duburi; nouri Iesu nouido naiba iaowa: Nouri horiomoo nana’i imo niroi, roro owame ta’u, ina ata, Roro nana tato oubido nana amida imaati ta’u. 30Ina nou ta’uwa dou kere nouri nouro damidai, nou gamooiha naibaha ohuowa wia nouri duo’i.
31Ina nou ida’u, Iesu naiba iaowa: Doihabuo Oubiha‐mere nou pai tau oiti wia Abea nou pai aioiti noumu. 32Ina Iehova nou pai aioiti noumu, Iehovaro nou pai aiwawai nou himiamu wia doihabuo hagohagoha nou pai aiwawai. 33Mo mere keke, doihabuo mo riomu tutu kemidio biahai, Rioo mo ainaimo‐omohoi wia naiba mo nou naro Iudaia oubido, doihabuo mo nou naro rioido, mo tou batito na’ui rio o’u raihe. 34Na’u orio bubu wade moro rioido ainemaai, nouri rio himia himia niro taimahebidioumo, naiba mo rioido niro nou nimahebidio, ina nou aibo rio himia himia niro taremahebidioumo. 35Oubi auwoha neiio umo aiwaimoiti rio mo himia kitomudio mereri ina rio himia himia niro eremahebidiomoi.
36Simona, paina ata Pita, nouido naiba iaowa: Pai‐dubu e, Ro tobatito wa’ui? Iesu nouido naibaha omowameai; Tobatito na ui mo doihabuo ro mo dooudo orobodo raihe, ata doo ro mo dooudo aiwauro‐orobodoi. 37Pita nouido naiba iaowa; Pai dubu e, Teiri mo ro dooudo doihabuo orobodo tato? Mo himia kiiro mainatoai roido. 38Iesu nouido omowameai: Naihehara ro kiiro moido awatoai? Naiheha naiheha mo roido ainaro, Kokora nou otua tatowa ina roro mo neewa na’uito mai namatuhe.
Currently Selected:
Ioane 13: KXW1941
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published by the British and Foreign Bible Society in 1941.