Ioane 8
8
1Wia oubi auwoha nei himia motoito naibaha orohomo wia Iesu Oliveta akabuito naibaha iorowa. 2Wia hiwio kiheheaiwa, Tana‐motoito ina nou naibaha odoro wia oubi auwoha nouido naibaha o’uwaumo wia nou naibaha emi nei iatomuaiwa. 3Wia titi‐oubira, Parisea oubira, na’u o’bo nouido naibaha owoumo; nou ta’uwa nou siwokoriri, oubi amidao oweaumo wia neiio nou turiwa owomiumo. 4Wia nei nouido naibaha iaowaumo: Auwo dubu, nouri o’bo siwokori ododiaiwa ohiaumo nou ta’uwa nou aiododiai. 5Wia Mose bubu‐bukawa imoido modoboito iaotuti, o’bo naiba nou akabu ihaito madoumo; touna wade rarodai ro naiba? 6Nei naiba aroumo nouido ematuhemoi, neiio kowapotai wade oweamoi. Wia Iesu naibaha oroboria wia tuito hopuwa titi naibaha iatiwa. 7Ina neiio nouido aiatorodiowaumo ina nou naibaha oroviai wia neido naiba iaowa: Nouri dubu riomu uba kidia ia biahai, nouido opuito akabu nouro maive. 8Wia nou ina oroboria wia tuito hopuwa titi naibaha iatiwa. 9Ina nou ta’uwa neiio nou wade naibaha irovidiowaumo nei iminiwa hipo imahebidiowaumo wia nei naibaha ihuoumo, ta’uo kowahoro oubii nei opuitori, dooudo kowahoro oubii nei dooudori wia Iesu nou himia gauwoha naibaha emidiowa wia o’bo nou himia naibaha otoa turiwa. 10Ina nou ta’uwa Iesu naibaha oroviai nou nouido naiba iaowa: O’bo touowai ro kowapotai oubii; dubu ataro ro owotoi tatora? 11Wia nou naibaha iaowa: Oo, Auwo dubu e, mo kowotoi dubu biahai. Wia Iesu nouido naibaha iaowa: Nou aibo moro ro owotoi raihe; ta’u wia ata ubauba kidia idodiai aue.
12Ina nou ta’uwa Iesu neido ina naibaha iaowa, nou naiba iaowa: Mo batibati pidari. Dubu nou mo dooudo orobodowa, duriiwa nou oroho raihe wia kiiro pidari nouro aiwarahooi. 13Nouri Parisea oubi nouido naiba iaowaumo: Ro himiaido kemapoi wade kiaori, nouri ro kemapoi wade nou naiheha biahai. 14Iesuro naibaha imowameai neido naiba iaowa: Ina mo himiaido kemapoi wade naibaha niao, mo kemapoi wade nou naihehari mabu nouri tou batiudo no’uro mo, mo umori wia tou batito na’ui mo mo umori wia rio umo biahai mo tou batiudo no’uro wia tou batito nairi o’ui. 15Rio wegewa kiauri na’i airimeiwotatutidumo, moro dubu ata imeiwotatuti biahai. 16Ina moro imeiwotatutiwa, mo kimeiwotatuti wade nou naihehari, mabu nouri mo gauwoha biahai, mo wia mo Abea, mo nouro notiodoiro, imeiti. 17Titi rio himia bubu‐bukawa nou naibaha iatiumo: Neewatoi dubu kemapoi wade nou naihehari. 18Mo na’u mo himiaido naibaha emapoi wia mo Abea, mo nouro notiodoiro, nouvia moido ainemapoiwa. 19Ina nei nouido naibaha iaowaumo: Ro abea touowai? Iesuro naiba imowameai: Mo wia mo Abea rio umo biahai. Ina rio mo umo oitimowa, rioo mo Abea umo aiwaimoiti. 20Nouri wadei Iesu Tana‐moni‐motowa naibaha iaowa nou ta’uwa Tana‐motowa nou naibaha imatomudiotuti, wia dubu ataro nou tuito ohidio biahai mabu nouri nou ta’u o’u biahai.
21Wia Iesu neido ina iaowa: Mo himia naveito mai na’i wia rioo mo ainaimo‐omohoi wia rio himia ubauba kidia kidodiaiwa ta’uwa rioo aiwaimo‐oroihi; nouri bati mai na’ui rioo noito orohomo raihe. 22Ina Iudaia oubi naibaha iaowaumo: Nou nou himiaro awara’idai mabu nouri nou airaro: nouri bati mai na’ui rioo noito orohomo raihe. 23Wia nou neido naiba iaowa: Rio goroudo rorohomo, mo ohudo noruoro; rio batibatinu nou oubiri, mo batinu nou mere biahai. 24Nouri mo rioido nou naro: rio himia ubauba kidia kidodiaiwa ta’uwa rioo aiwaimo‐oroihi; ina rioo araromodioumo biahai mo nouri, rio himia ubauba kidia kidodiaiwa ta’uwa rioo aiwaimo‐oroihi. 25Nouri nei nouido iaowaumo: Ro botiri? Iesu neido naiba iaowa: Mo nou aibori naiba mo opuito nou naro rioido kowahoro hiwiowa wia hiwio’i auwoha. 26Nana godogodo mo niro rioido iaoi wia kimeiwotatuti nana godogodo mo niro rioido imapoiwai, wia mo nouro notiodoiro nouvia naihehari wia nouri nana moro ainirovidio nou mabudo, batibati oubido auwoha moro naibaha ainirowaduutidai. 27Nei umo biahai nouro Abea rowaduuti neido. 28Nouri Iesu neido naiba iaowa: Nou ta’uwa rioo Oubiha‐mere aiwaimo‐oviai, rioo umo aiwaimoiti mo nouri; ina nana amida mo himia gauwoha idodiaiwa biahai, wia nouri nana mo Abea nou moido ainatomuai mo nou niao rioido. 29Wia mo nouro notiodoiro nou momuri; Abearo nou mo gauwoha emeheai biahai wia auwoha nana nouro geii airimowaidioro moro ainidodiaiwa. 30Ina nouri kiao wadei nouro naibaha iaowa, oubi godogodoo nou naibaha araromodiowaumo.
31Nouri nouido kiraromodio Iudaia oubii Iesuro neido naiba iaowa: Ina rio mo wadeito emidiomowa, rio naiheha mo himia kitomudio mereri. 32Wia naiheha nana rioo umo aiwaimoiti wia naiheha nanao rio aiwaimo‐iwohuoduti. 33Nei nouido naibaha omowameaumo: Imo Aberahamo mereri; dubu ataro hiwio auwoha imo iohidio biahai; teiri raro ro naiba, rio aiwaimo‐iwohuoduti. 34Iesu neido naibaha imowameai: Naiheha, naiheha, mo rioido ainaro, dubu amida ina nei ubauba kidia idodiaiwamowa neivia ubauba kidia kowaati mereri. 35Wia kowaati‐mere nou motowa kemidio tutu biahai; Mere nou kemidio tuturi. 36Nouri ina Merero rio aiwai‐wohuoduti, rioo naiheha aiwaimo‐iwohuoduti. 37Mo umori rio Aberahamo mereri, ata rioo mo ainemaihiditidumo epiamoi mabu nouri mo wade riomu naiheha oa biahai. 38Nouri nana mo tau neauri mo Abea batiwa moro naibaha niwaduuti wia nouri nana rioo tau eauriumo rio abea batiwa rioo naibaha ridodiaiwadumo. 39Neiio naibaha omowameaiwaumo nouido naiba iaowaumo: Aberahamo imo abeari. Iesu neido naiba iaowa; Ina rio Aberahamo mereri Aberahamo kidodiai na’i rioo naibaha waimo‐idodiaiwatuti. 40Wia doihabuo rio mo epiamoi nemahiditidumo, rioido naiheha wade kiao duburi mo; wia nouri naiheha wade moro ainirovidio Abea aue‐udori. Aberahamoro naiba idodiai biahai. 41Rio abea kidodiai na’i rioo naibaha idodiaitutiumo. Nei nouido naiba iaowaumo: Imo iwo kidiaudo irotuti biahai; imo abea na’u noworohodumo, Iehova nou himiari. 42Iesu neido naiba iaowa: Ina Iehova rio abeari, rio mo auwo niro emahebidiomoi, mabu nouri mo Iehova mabudo no’uro noito; mo mo himia iminito ko’u biahai, Nouro mo notiodoiro. 43Tounai rio umo biahai mo kiao wadei; nouri taiba mo kiao wade irovidiomoi rio umo biahai. 44Rio abea nou ubauba uriori. Rio nou mereri wia nouri nana rio abea nou niro rio idodiai niroi. Kowahoro ta’uwa nou korowoto dubu mereri wia na’u bati naiheha batiwa nouro airiworoho biahai, mabu nouri naiheha wade noumu ia biahai. Nouri nou kiromohuwodio duburi wia kiromohuwodio abeari. 45Mabu nouri ina mo rioido naiheha wade ainiao rioo moido irovidioumo biahai. 46Boti mereri rio mabuwa mo ubauba kidia nouro nemapoidai? Ina mo naiheha wade niao, tounai rioo iraromodioumo biahai? 47Nouri dubu nou Iehova mereri, Iehova wade nouro rirovidiodio, ina rio irovidioumo biahai mabu nouri rio Iehova oubi biahai. 48Ina Iudaia oubi naibaha omowameaiwaumo nouido naiba iaowaumo: Imo naiheha tatora nou ta’uwa imoo ainarodumo ro Samaria duburi wia koiioi mereri? 49Iesuro naibaha imowameai: Mo uba urio ramu biahai, wia mo Abea moro pai ainowomai wia rioo mo hipo nowaidumo. 50Mo himia moari mo niro biahai, ata na’u nou niro mo himia moari wia nouvia kiwotoi wade riaodio. 51Naiheha, naiheha, mo rioido ainaro, ina dubu nou mo wade idodiaituti koihiai na nouro owea raihe. 52Nouri Iudaia oubi nouido naibaha iaowaumo: Doihabuo imo umori rovia uba urio ramuri. Aberahamo nou tau oihiai, peroveta oubi nei tau oroihiumo, wia ro naiba raro; Ina dubu nou mo wade idodiai, koihiai na nouro owea raihe. 53Rovia auwora imo abea Aberahamo aibora? Nou tau oihiai wia peroveta oubi aibora, nei tau oroihiumo; boti ro? 54Iesuro naibaha imowameai: ina mo himiaido pai ainaiti, mo moari nou buru aibori; mo Abea nou himiaro mo pai ainomowaidio; nouri Abea rio naibaha riaodumo, nouvia rio himia Urio‐abeari. 55Ina rioo nou umo biahai ata mo nou umori. Ina mo naiba arowa mo umo biahai nou, mo koromohuwo mere aibo naiti rio aibo; ata mo nou umori wia nou kiao wadei moro ainidodiaiwa. 56Aberahamo, rio himia abeari, nouvia geii tau oiti nou ta’uwa mo hiwio’i nouowa nou naibaha eauri; wia nou tau eauri wia nou geii emahebidio. 57Nou ta’uwa Iudaia oubi nouido naibaha iaowaumo: Rovia 50 konobo biahai wia rora Aberahamo aauri? 58Iesu neido naiba iaowa: Naiheha, naiheha, mo rioido ainaro: nou tauwa Aberahamo oroto biahai, mai nemidio. 59Ina nou ta’uwa neiio akabu naibaha imeiwaumo nou atourutimoi wia Iesu nou himia piroha edea wia Tana‐motoudo nou naibaha ohuo wia nei turiwa naibaha o’uwa naibaha iohodai.
Currently Selected:
Ioane 8: KXW1941
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published by the British and Foreign Bible Society in 1941.