ILOOWALI 16
16
Ti Hagar wolei Ismai̒lu
1Ti Sarai, dile lei Abram diipo loo̒tapu walao̒ olo. Bo tio owato ngota lonto Masiri, tadulahu ngota tai̒lunte Hagar. 2Ti Sarai malo loi̒ya mao̒ odelei Abram, “Eeya diila lopowali mai olaatia owalao̒. Sababu uito opiohelio ito motuluhu wolo wato lowatia botie. Tanu tio mowali owalaa̒i duo̒lo watia.” Tei Abram akolo wolo nasehati li Sarai. 3Oditolio ti Sarai malohudu mao̒ oli Hagar odelei Abram u pilohutulio pipia. Tou̒ boito tei Abram mamopulu lotaunu to Kanaa̒n. 4Tei Abram malo tuluhu woli Hagar, lapatao̒ ilombodaa̒alo mola taabua boito. Bo tou̒ ilotaawa li Hagar deu̒ tio maa ilombodaa̒, tio malowali sombongi wau diilalo momaduli oli Sarai.
5Lapatao̒ ti Sarai loloi̒ya mao̒ olei Abram, “Watia malohudu mai ti Hagar wato lo watia to olemu, wau anggadu ilotaawalio deu̒ tio maa ilombodaa̒, tio diilalo momaduli olaatia. Uito totalaamu. Hinta Eeya momutuusani mai palakala botie to wolotanto duulota.”
6Tilametao̒ lei Abram, “Opiohelio, tio watomu wau yio̒ okawasa to olio; pohutuwalo totoonulalo otohilaamu to olio.” Tulusi ti Sarai lopohutu mao̒ oli Hagar wolo palangi daa̒, tilinggula tio lolahi.
7Malai̒kati lo Eeya maloo̒ dungga oli Hagar totili butu lo taluhu tohuta datahu wau luasi udelita, to dalalo udulu-dulunga ode huta datahu wau luasi udelita lo Sur. 8Tahuda lo malai̒kati boito, “Hagar, wato li Sarai, yio̒ lonto utoonu wau maa deu̒toonu?”
Tilametao̒ li Hagar, “Watotia malolahi lonto oli Sarai ti nyonya lo watotia.”
9Malai̒kati boito lotahuda, “Pohuwalingolo mola ode olio wau bayai mao̒ tio.” 10Lapatao̒ tahuda lo malai̒kati boito poli, “Wau̒ mamongohi mai olemu walao̒ wau wombu dadaata daa̒, tilinggula diaaluo penu boli ngotaa mao̒ tamoo̒ leekeni olimongolio. 11Diilalo mohiheo yio̒ mamo potutu mai walao̒ talolai̒; tangguli mao̒ tio Ismai̒lu, sababu Eeya malo dungohe wuwaatiu̒mu. 12Bo walau̒mu boito matumumulo debo odelo kolodai molinggelo; tio mamoluwali timii̒du tau, wau timii̒du tau mamoluwali olio. Tio matumumulo mobua̒aya monto mongo wutatio ngoa̒amila.”
13Ti Hagar malohintu todelomo hilaalio “Wolo otutu watia maloo̒onto Allahu Taa̒ala tahelo poo̒tuoto olaatia?” Yi tio malo langgula Eeya, tamalo tahuda mai to olio, “Allahu Taa̒ala Taa Mopoo̒tuoto”. 14Uitolo sababuulio tau molanggula ali to wolota lo Kades wau Bered boito, “Ali Olio Taa Tumu-tumulo Taa Mopoo̒tuoto ola-U̒”.
15Lapatao̒ ti Hagari lopotutu mai walao̒ talolai̒, wau tei Abram tiyamolio, longunte walao̒ boito Ismai̒lu. 16Tou̒ boito tei Abram o umulu walu lopulu lotaunu.
Currently Selected:
ILOOWALI 16: LAIGOR
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ