Lukas 24
24
Yefun Allah sun Yefun Yesus kadit sukkwop
(Mat. 28:1-10; Mrk. 16:1-8; Yoh. 20:1-10)
1Ye Yahudi bi kam sye ne or, kam Ari, bundugan, ete nggon bok ne mu mo makwe. Nggon ne mu mone sa, nggon gwat manik gato grik ndo, gato án fro re. 2Nggon ne mu kom mo jokwak saresa, nggon me do, jok gato kewa jokwak syo ne, yé wop jok sye ne wé kadit ne or re. 3Orge nggon ne sok mo jokwak mit, sarewo án yo ku Yefun Yesus mukri mone nde. 4Nggon ne ti mone, án nutbot ware, án jam nde koirut re. Nggon ti mone sa, án gensu yetu ge we ma ti karowa nggon re. Yetu ge we ne it san gato nggren ete rup-rek. 5Sane nggon ne nyu ndo nde, ete án su e mu bur mone. Sane ye we ne ki nai nggon do, ”Nin meret ye gato mbau mo yekwop bi nat-i ré wa suma ne? 6Ye gato nin meret ne, An yo more o nde. An mbau re! An sun re! Nin napawa suk gato An ki nai nin, suga nyim nin si An mo Galilea tó. An ki nai nin do, 7’Bere yé syo Yetu bi Pa to Ji ré mo ye gato ben sukibit syim wa yé ne but Ji ete yé gu Ji kwop mo kwesukwin. Sarewo kom mo kam we rek, bere Yefun Allah sun Ji kadit sukkwop o re.’ ”
8Sugane nggon ne napawa suk gato Yefun Yesus ki nai án ne. 9Nggon ne satu kadit makwe sa, nggon mu ku Yefun Yesus bi pakon ge musyu dik sop dik, si ye yi yo o gato simo Yefun Yesus dom. Nggon nuk subot suk mwa gato án me mo makwe nai Yefun Yesus bi pakon ne jam. 10Nggon gato nuk sukdu ne nai Yefun Yesus bi pakon anato Maria gato bi nat mo Magdala, Yohana, Maria gato Yakobus bi im, si nggon yo o gato si nggon ka gri ne mu mo makwe dom. 11Sarewo Yefun Yesus bi pakon ne nut do, nggon ne ki suk daret, sane Yefun Yesus bi pakon yo jammo nggon bi sukdu ne nde. 12Sarewo Petrus jam nggon ne bi sukdu sa, an ti, an kas mu mo jokwak ne. Petrus mu kom mo jokwak ne sa, Petrus ka, an me mo jokwak mit ne sa, an me san det gato yé far Yefun Yesus mukri su ne kwop mone. San det ne kwop mone tó, sarewo Yefun Yesus mukri yo mo nde. Orge Petrus mu kadit pe ne. An bi sukjimnut mwa subot suk gato an me mone. Petrus jam nde koirut ware.
Mo os gato mu mo Emaus miten
(Mrk. 16:12-13)
13Su kam gato Petrus mu mo makwe ne, Yefun Yesus bi pakon ka we mu kadit Yerusalem mu nden mo kampung dik yo gato gum do Emaus. Kampung ne karowa Yerusalem, yé muket gwes sor kom mo kam nap, ete yé kom mone, tepsu kilometer musyu dik sop dik. 14Pakon ka we ne mubot os sa, an we nukbot suk mwa gato yé ben nai Yefun Yesus mo kota Yerusalem. An we nuk subot sukdu gato nggon ki nai án ne. 15An we nukbot sukdu ne nai yu saresa, Yefun Yesus dakai ma mone ete Yefun sisu an we mu sino. 16Pakon ka we ne da me Yefun Yesus, sarewo Yefun Allah ben an we subere an we jam nde Yefun Yesus ana sisu an we ne. An we nut do, ye yi anane. 17Ete Yefun Yesus ndo mo an we do, ”Nin ka we nuk suma bot os ré ne?”
An we ti not. An we nutbot suk mwa gato bor mo Yerusalem anato an we ti not mone, an we nderku nggwa, an we sok mu bur sor. 18Ete an we dogato gum do Kleopas ndo mo Yefun Yesus do, ”Yenggras te, Nan ma mo Yerusalem, Nan tepsu yedamok mone, ete Nan wadigan jam nde suk gato kamekre bor mone bado?”
19Yefun Yesus ndo mo an do, ”Suma anato bor mone ne?”
An we ki do, ”Yé ben sukye nai Yesus, ye Nazaret ne. Ye ne anato yenabi gato ki sukdu gato Yefun Allah tarubot An nai men. An ki An bi sukdu-i ne pet mo nje. An ben An bi suk-i nggi wai o re. An ben suk gato ben yé mwa yeket. Sane suk mwa gato An ben ne kadum do Yefun Allah sisu An. Yé mwa dom ki do, An ye gato ben sukndo. 20Sarewo men bi yekwesú mo Yefun Allah bi nu, si men bi yekwesu sino gwat Yefun Yesus mu mo ye Roma bi yekwesu ndobot An, or ye Roma ne syokom yé gu An kwop, ete yé mban An mo kwesukwin. 21Su ketke men kwabom kam mo Yefun Yesus do, bere Yefun Yesus ma wa sombok men yewis ye Israel wé kadit sukye gato men ku mo nje gato jom men mo bur ré. Sarewo kam nggwete yé gu An kwop wé re. Or o kom mo kam ré An yo sombok men kadit suk yo mo nde. 22Suk yo o dom, nggon deyo kadit men ben men yeket. Sare, nyotkwo gado, bundugan ete nggon ne mu mo makwe, mo jokwak gato yé grem Yefun Yesus mukri mone. Sane nggon ne mu ware, 23án yo ku Yefun Yesus mukri nde re. Orete nggon bok ne satu ma, án ki nai men do, ’Men ku malaikat mo makwe ne. Malaikat ne ki nai men do, Yefun Yesus mbau re.’ 24Sane men bi yesyim deyo waii mu mo jokwak ne o. Án mu kom mone sa, suk mwa ne tepsu sukdu gato nggon ki ne dom. Sane án yo ku Yefun Yesus mone nde re.”
25Yefun Yesus ki nai an we do, ”Nin ka we jam nde suk! Suk mwa gato yenabi krom mo Yefun Allah bi sukdu ne, nin bi sukjimnut yo kak wa nin but sukdu ne kekro nde. 26Yekwesu gato Yefun Allah syogat ma mo bur ré wa nai yetu kadit sukye ete jowa yetu ne, Yefun Allah fro suk mwa ne nyim re do, Kristus ne ku sukye nyim or wé, ete Yefun Allah bes An gum kok sye wai wa jowa yetu wari.” 27Orge Yefun Yesus ki rer nai pakon ne subot suk gato yé krom mo Yefun Allah bi sukdu subot An dakai. Ketke Yefun Yesus ki subot suk gato Musa krom subot An dakai, ete Yefun Yesus ki subot suk gato yenabi bok ne waii krom subot An ne o.
28Pakon ka we mu karowa kampung gato an we mu mone sa, Yefun Yesus ben sato An mu wai kadit kampung ne. 29Sane pakon we kigat Yefun Yesus sare do, ”Nan si men kem sino more et. Karowa kam bok it are, bergan noru it.” Sane, Yefun Yesus si an we sok mo nu ne, án sino kem mone. 30An ka gri kem ga wa án git sugit sa, Yefun Yesus nai roti ma, ete An ki do, ”Ndo mo Nan, Yefun Allah wa roti gato Nan syo nai men ré.” Orge Yefun Yesus syat roti ne, An syo nai ye we re. 31Yefun Yesus do syo roti nai an we sa, ben sato an we bi sukjimnut kak mone, ete an we jam do, Yefun Yesus anato si an we kem mone. Orge Yefun Yesus fres kadit an we re. 32An we ki nai yu do, ”Yefun Yesus ki rer subot Yefun Allah bi sukdu subot os ne sa, men ka we iwa wai o re. Men ka we kwabom kam mo An bi sukdu ne fe!”
33Sane an we ti, an we yo git sugit o nde, an we satu mo Yerusalem o re. An we mu kom mo Yerusalem sa, an we ku Yefun Yesus bi pakon ge musyu dik sop dik si pakon ne bi yesyim deyo sum mone. 34Pakon ne ki nai an we do, ”Sukdu ne sangge, Yefun Yesus mbau satu re. An sun re, An kadum nggwa nai Simon re.”
35Pakon ka we jam sukdu ne, or an we nuk subot suk mwa ne sino gato an we ku ne tomgato an we muket os gato mu kadit Yerusalem mu mo Emaus. Or o, an we nuk subot suk gato Yefun Yesus ben ne. Yefun Yesus do syat roti sa, sugane an we jam do, Yefun Yesus anato si an we kem mone it.
Yefun Yesus kadum nggwa nai An bi pakon
(Mat. 28:16-20; Mrk. 16:14-18; Yoh. 20:19-23; Kis. 1:6-8)
36Pakon ne nuk sukdu saresa, án gensu Yefun Yesus ma si án ti mone sino. Yefun Yesus ti mone, ete Yefun ki do, ”Yefun Allah ete uttok nin sino. Nin nyu nde.”
37Pakon ne nyuwa Yefun Yesus ndo nde, án gendo, yekwop gen anato ma ne. 38Sarewo Yefun Yesus ki nai án do, ”Nin nyuwa Ji wa suma ne? Nin bi sukjimnut mwa subot Ji wa suma ne? Ji mbau satu anare. Ji kaim anare. 39Nin me Ji syim tak ré et! Nin me Ji gwes ré et! Ji anare it. Nin syimtok Ji et! Bere nin jam do, Ji kaim anare. Yekwop gen yo ka sare nde. Yekwop gen i-ku yo mo nde, yekwop gen dini yo mo nde, wo nin me Ji ré, Ji ku si Ji dini mó re.”
40Yefun Yesus do ki sukdu ne sa, An kadum An syim tak si An gwes wip nai An bi pakon bok ne me. 41An bi pakon me Yefun Yesus sa, pakon bok ne yeket ndo nde. Pakon me su án gro do, Yefun Yesus sun kadit sukkwop, sane pakon ne iwa wai o re. Sarewo pakon ne bi sukjimnut we mone dom, án nutbot do, sangge, Yefun Yesus dakai anare bado nde e? Sane Yefun Yesus ndo mo án do, ”Te, nin bi sugit yo mo, bado?” 42Pakon ne syo boge kwas koi nap nai Yefun Yesus. 43Yefun Yesus nai boge ne, ete An git. Yefun Yesus bi pakon me Yefun git boge su án gro re, {sane án jam do, sangge Yefun Yesus anane it.}
44Orete Yefun Yesus ki nai pakon ne do, ”Ji kem sisu nin tó, Ji ki nai nin nyim wé do, suk mwa gato yé krom subot Ji mo Musa bi sukdu-i, yenabi bi sukdu-i si Mazmur ne sino, bere bor mo Ji re.”
45Orge Yefun Yesus kak An bi pakon bi sukjimnut subere pakon ne jam Yefun Allah bi sukdu ne kom mo mit. 46Or o, Yefun Yesus ki nai án do, ”Yé krom mo Yefun Allah bi sukdu sare do, bere Yekwesu gato Yefun Allah syogat ma mo bur ré wa nai nin yetu kadit sukye ete jowa nin, bere An ku sukye, An kwop orete yo, kam we rek, ete Yefun Allah sun An kadit sukkwop o re. 47Bere yé mu kibot suk gato Kristus ben ne nai yewis mwa mo bur ré sino jam. Bere yé ki do, ’Nin onyar kem mo Yekwesu gato Yefun Allah syogat ma mo bur ré et! Nin onyar kem mo An eteyo, nin kwet kadit sukibit gato nin ben ne, ete nin jammo An yo, bere Yefun Allah yo maskwa nin mo sukibit mwa gato nin ben ne o nde, tepsu An tot sukibit ne wé kadit nin re.’ Bere yé ki sukdu ne frekbot bur ré iwedewe, yé ki nai nje mo kota Yerusalem jam nyim, orete yé ki nai yewis mwa ne mo bur ré or sino jam re. 48Nin anato yé gato me suk mwa gato Ji ben ne. Nin me su nin gro re. Sane nin mu nin ki suk gato nin me su nin gro nai nje jam. 49Bere Ji syogat Yefun Allah Gen ma bok nggwa mo nin, tepsu suk gato Ji bi Ai, Yefun Allah tom ne. Sane nin mu kadit Yerusalem nde, wo nin eswa more sor Yefun Allah Gen ma bok nggwa mo nin, ete nin ku suktinggi mone.”
Yefun Yesus it mu mo gu
(Mrk. 16:19-20; Kis. 1:9-11)
50Orge Yefun Yesus si An bi pakon mu kadit kota ne mu mo Betania. Yefun Yesus mu kom mone sa, An bes An syim, An ki suk su Yefun Allah subere Yefun Allah ben sukndo su pakon ne. 51Yefun Yesus do ki suk su Yefun Allah wa An bi pakon saresa, Yefun Allah kar Yefun Yesus it mo gu kadit pakon ne re. 52Orete pakon ne tu án umsu ete bes Yefun Yesus gum kok, ete pakon ne satu mo Yerusalem, án wi, án ambre, án mit iwa wai o re. 53Kamdik-kamdik pakon ne mu mo Yefun Allah bi nu, ete án un Yefun Allah mone.
Currently Selected:
Lukas 24: KGR
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@LAI 2004, 2014