Matias 2
2
Ngowa'a Majus da'a wangere ma la'o ino
1Wakutu sibuoro Yesus toma limau Betlehem toma daeraha Yudea, Herodes 'o dadi 'olana. Sibuoro Yesus pasala i'a, ngowa'a Majus nga muḏuo i'a 'aḏi sapolo da'a wangere ma la'o ino toma limau Yerusalem. 2Ananga 'aḏi masano-sano, “Ngowa'a matengo Unanga le'a Yahudi manga 'olana ga'a ro sibuoro? Ngomi mi oḏi'i mumuḏungu toma wangere ma la'o. Enanga gena-ge 'i dadi nana'o rimoi mangale sibuoro 'Olana matengo. Sababu gena-ge, ngomi mi sapolo di'a mi silamo'o re siḏubuso Unanga.”
3Wakutu 'Olana Herodes 'a 'isene habari gena-ge unanga 'ai 'akala re sinyingara 'i kangela masala. So'o gena ḏi'i ngowa'a mo-moini ḏi'i toma limau Yerusalem. 4Dadi Unanga 'o soma'a mo-moini 'imam-'imam ma sae'e re guru-guru 'agama, ananga 'aḏi malomu. Ḏua unanga 'o sano ra ananga, “Toma ngi'i le'a ḏuanga i'a sibuoro 'O Kristus#2:4 bolo 'O Mesias ga'a Ma Jou'ongu Madutu ro sijaji?”
5Ananga ya sangoro, “Toma gamu Betlehem toma daeraha Yudea. Sababu nabi matengo ra silefo so'o nena-ne:
6‘Hei ngowa'a Betlehem toma daeraha Yehuda.
Kalaha ngini ninga gamu ga'a 'i ceka'a, ḏuanga i'a 'i dadi gamu ma lamo'o,
sababu taninga sigolona ie baolo pareta ma bi-biri'i
ga'a sibi-biri'i 'Ari 'umata Israel.’ ”#Mi. 5:1
7Wakutu 'Olana Herodes 'a isene ma demo-demo gena-ge, unanga 'o 'aro'o ngowa'a Majus sigogoro. Re unanga 'o sano ananga gena-ge mangale 'au ngau ananga 'aḏi oḏi'i ma mulaingi mumuḏungu. 8Gena ḏua, unanga 'o soma'a ananga 'aḏi tagi toma gamu Betlehem re 'o bererongo, “Ni tagi, re ni disa waro mode-mode'e ngowa 'olo gena-ge. Wakutu ngini ni sanga Unanga gena-ge, ni ḏibo re ni siajele ngoi, la ngoi ḏi'i to sapolo di'a to silamo'o re siḏubuso Unanga.”
9-10Dadi, ngowa'a Majus gena-ge 'aḏi tagi. Tamanga ḏo-ḏagi toma gamu Betlehem, ananga 'aḏi oḏi'i ḏi'i mumuḏungu ga'a ananga ya oḏi'i toma wangere ma la'o pasala ḏua. Ananga manga 'akala re sinyingara 'i roanga masala, sababu ya oḏi'i mumuḏungu ḏi'i gena-ge! Mumuḏungu gena-ge 'i tagi tamanga biono, singadolo 'i togumu toma wala ma re'u ga'a 'age ngowa 'olo gena-ge 'ai ngi'i. 11Wakutu ananga 'aḏi osama toma wala ma dara, ananga 'aḏi oḏi'i Unanga gena-ge Rai ngina ngo Maria. Re ananga 'aḏi mapagara manga biono tala re silamo'o re siḏubuso Unanga. Gena ḏua, ananga ya welanga manga harata ma burua, re ya pula'a manga bu-bula'a ra Unanga. Manga bu-bula'a guraci, manyanyi, re mur.#2:11 Manyanyi (Kemenyan): dupa ma ijana lai hali, 'oro toma ate ino. Mur gena-ge 'oro toma ate ma da-daiti ga'a ri dudungu, ma bounu lai sa'i. 12Tamanga nanele ma dara, Ma Jou'ongu Madutu 'o sipo-poma ra ananga, la 'aḏi ḏibo ma'u sanga rawara ra 'Olana Herodes. Dadi ngowa'a Majus gena-ge 'aḏi ḏibo malalo'o mete'e ngo'omo lelegu.
Masilalo'o toma daeraha Mesir
13Wakutu ngowa'a Majus 'aḏi maḏibo pasala i'a, Ma Jou'ongu Madutu 'ai mala'ekata 'o waiti ra Yusuf tai nanele ma dara re 'o kanau so'o ne: “Yusuf! 'Olana Herodes 'o disa ngowa 'olo di'a 'o sisengene Unanga. Sababu gena-ge, momi'i re no tagi, gasa ngowa 'olo gena-ge re 'Ai ngina, re ni masilalo'o toma nagara Mesir. Tegoro 'age singadolo ḏuanga i'a Ngoi dadunu tini siajele ni maḏibo.”
14Gena ḏua, Yusuf 'o momi'i re 'o siwangolo ananga, kara utu gena-ge unanga 'o gasa ngowa 'olo re ma ngina ngo Maria, ananga 'aḏi tagi toma Mesir. 15Ananga 'aḏi tegoro toma Mesir singadolo 'Olana Herodes 'o sengene, kara 'aḏi maḏibo ino. Gena-ge 'i sitotomo 'oru ga'a Ma Jou'ongu Madutu 'o kanau pasala ḏua Tai nabi-nabi so'o ne: “Ngoi ta 'aro'o 'Ari Ngowa'a Nau'u da'a Mesir ino.”#Hos. 11:1
'Olana Herodes 'o soma'a sisengene ngowa 'olo na-nau'u
16Wakutu Herodes 'a waro ngowa'a Majus 'aḏi sihaga unanga, unanga 'o ruta lai siḏi. Dadi unanga 'o soma'a sisengene mo-moini ngowa 'olo na-nau'u ga'a manga 'umuru musungu romoḏiḏi re tuwaḏi toma gamu Betlehem re daeraha ma sebanga. 'Umuru gena-ge Herodes 'a roimi mete'e ngowa'a Majus 'aḏi oḏi'i mumuḏungu ma mulaingi gena-ge re sino. 17Dadi gena-ge 'i sitotomo 'oru ga'a nabi Yeremia 'a kanau pasala ḏua:
18“Toma gamu Rama ngowa'a matengo ma rerese ma gaḏi,
gena-ge ngo Rahel, munanga mo sigaḏi betongo 'ami ngowa-ngowa'a
re mo oḏu'u ngowa'a mi sisanangi 'ami 'akala re sinyingara,
sababu 'ami ngowa-ngowa'a raḏi cua.”#Yer. 31:15
Maḏibo da'a Mesir ino
19Wakutu Yusuf, Maria re Yesus toma Mesir moju, 'Olana Herodes 'o sengene. Gena ḏua, Ma Jou'ongu Madutu 'ai mala'ekata matengo 'o waiti ra Yusuf tai nanele ma dara. 20Mala'ekata gena-ge 'o kanau so'o ne: “Ngowa-ngowa'a ga'a disa di'a sisengene ngowa 'olo, ananga gena-ge raḏi sengene. Sababu gena-ge, momi'i re no tagi, gasa ngowa 'olo gena-ge re ma ngina, ngini ni maḏibo toma Israel.”
21Dadi 'a Yusuf 'o momi'i re ya'u gasa ngowa 'olo re ma ngina, re ananga 'aḏi maḏibo toma Israel.
22Mada'a pasala i'a Yusuf 'o 'isene Arkhelaus,#2:22 Oḏi'i “Arkhelaus” toma kamus. 'Olana Herodes 'ai ngowa'a nau'u, unanga ro ngali 'ai ḇaḇa sa'olo 'olana toma daeraha Yudea, 'a Yusuf 'o mojongo sapolo i'a toma daeraha gena-ge. Ḏua, Ma Jou'ongu Madutu 'ai mala'ekata 'o sipo-poma Yusuf tai nanele, la ananga 'aḏi tagi re tegoro toma daeraha Galilea. 23I'a da'a, Yusuf 'o tegoro toma limau ga'a ma lomanga Nazaret. Dadi 'oru ga'a nabi-nabi ya siajele pasala ḏua mangale ngowa 'olo gena-ge 'i sitotomo: “Unanga, ngowa'a 'U si'aro'o Ngowa'a Nazaret.”#Mrk. 1:24; Luk. 2:39; Yoh. 1:45
Currently Selected:
Matias 2: SNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
2015 © Indonesian Bible Society