Mateu 22
22
Yepe umumendari taira
1Asui Jesus umbeu yuiri inyenga irumu umbue aramawaa ipupe ainta, yawe umbeu ainta supe:
2—Iwaka ruixawa imiraita iyawe kua yepe tuixawa umumendariwaa taira umunya festa ixupe.
3Asui umundu upurakisaraita aintausu arama aintausenui kuaita uputariwaita aintauri arama aintaumaa kua kazamentu festa yuiri; maa tiaintauputari aintauri.
4Asui umundu yuiri aintapiri amuita upurakisaraita umbeu ainta supe:
—Hambauwana hamukaturu panye pembau arama, hayukána setapira serimbawaita ikirawaita yuiri pembau arama, pruntuana panye kazamentu rupiara ape peyuiri pemaa festa.
5Asui timaa arama aintauputari ae, asui aintausuana, amu usu upuraki ikupixawa upe, amu usu upiripana.
6Asui kuaita amuita aintaupisika aintaipu irumu ainta kuaita umunduwaita aintaukasuari ainta aintauyuká ainta.
7Asui ipiaiwa kua aintaruixawa ape umundu suraraita aintaumburi arama muiri kuaita uyukáwaita upurakiwaita ixupe, asui aintausapi aintarendawa.
8Asui umbeu ainta supe kuaita upurakiwaita ixupe:
—Pruntuana kua kazamentu festa yuiri maa kuaita hasenuiwaita timaa puranga ainta.
9Ape pesu panye pee uyusasawawaita ipiterupi pesenui muiri pewasemu aintauri arama aintaumaa kua yayumuatiriwaa upe.
10Asui aintausuana panye pee rupi kuaita upurakiwaita aintaumuatiri panye muiri kua aintauwasemuwaa puxuwerawaita purangawaita yuiri, ape teresemuana kua sala aintaumbau aramawaa upe aintairumu aintausenuiwaita.
11Asui uri kua aintaruixawa umaa arama kuaita aintauwasemuwaita meza ruaki, asui umaa ape yepe apigawa tiwa uriku sese rupa kazamentu rupiara.
12Asui aintaruixawa upurandu ae:
—Inde seanama, mayetaa rewike ike tiwa reriku nerupa kazamentu rupiara? Asui ukiririntu.
13Asui aintaruixawa unyee sumuaraita supe:
—Pepukuari ipu ipi yuiri perasu ae yanesui pitunawasuwaa kiti, akiti kuri aintauyaxiu aintausuu aintaranya.
14Siya kuaita usenuiwaita maa muiriira ainta kuaita uparawakawaita.
Maitaa yapagari impustu
15Asui kuaita farizewita aintausu isui aintauyatiri aintaumbeu Jesus rese aintauputari aintaukuawa maye aintaupuderi aintaupisika ae inyenga resewara.
16Asui aintaumundu ipiri aintaumbuewaita aintairumu kuaita erudianuita aintaunyee ixupe:
—Inde umbuewaa, yakuawate supiwa inde, yakuawate rembue Deus rapee rese supiwa, timaa arama inde arama awa supentu rembeu, tireparawaka miraita.
17Ape rembeu yande, maitaa remanduari, maitaa purangate yamee Sezar supe kua impustu uputariwaa yaneirumu u tiyamee?
18Jesus ukuawa aintaumanduariwaa puxuwerawa, ape umbeu ainta supe:
—Penye retentuwaita, marantaa peputari pesaã ixe?
19Pemukame hamaa yepe dinyeru impustu rupiara, asui aintaururi ixupe yepe dinyeru.
20Jesus upurandu ainta:
—Maa rangawataa kua uyariwaa dinyeru rese, awa rerataa kua uyariwaa dinyeru rese?
21Aintaumbeu ixupe:
—Sezar rangawa ae. Asui umbeu ainta supe:
—Pemee Sezar supe Sezar iyara, asui pemee Deus supe Deus iyara.
22Aintausendu irumu Jesus umbeuwaa aintaakayemu aintausendu ixupe, ape aintauxari ae aintausu isui.
Sadusewita rese
23Asui nyã ara aintauri ipiri kuaita sadusewita umbeuwaita tikuri yasemu manusawa sui, aintaupurandu Jesus:
24—Inde umbuewaa, Muize umbeu umanu rame yepe apigawa tairaimarewaa asui imu uyereu uyuka kua viuva kuera umukiriari arama tairaita sakakuera.
25Kuxima seti kuaita yepe apigawa rairaita yanepiterupi asui uyuka ximiriku kua aintatuyuwesawa maa tire uriku taira umanu ae asui kua kunya upita imu supe.
26Yawe aintausasawa kua mukuĩsawa kua musapirisawa yuiri ate aintaupawa kuaita setiwaita.
27Asui anyu arama umanu aintarakakuera kua kunya.
28Asui aintausemu rameana kuri manusawa sui awataa kuri aintasuiwara kuaita setiwaita rimiriku ae? —Nyãse muiri ainta aintarimiriku ae.
29Asui Jesus usuaxara ainta, umbeu ainta supe:
—Pepurungita apekatu kiti nyãse tipekuawa mayesawataa aintaumpinimawaa kuxima tiyuiri pekuawa kua Deus kirimbawasawa.
30Aintausemu irumu kuri manusawa sui tikuri aintauyuka aintarimiriku arama tiyuiri kuri aintauxari aintaumendari arama maa aintauiku kuri aintayawe kuaita anjuita iwaka kiti.
31Pepuderi pekuawa aintausemu kuri kuaita umanuwaita, maitaa tipeleri kua Deus umbeuwaa penye arama sese?
32Yawe unyee:
—Ixete Abraão Deus, Izaki Deus yuiri, Jaku Deus yuiri, ae timaa umanuwaita Deus maa upakawaita Deus ae.
33Aintausendu irumu Jesus nyenga kuaita miraita siyawaita aintaakayemu aintaumaa ixupe sesewara kua inyenga umbuewaa.
Inyenga purangawaa
34Asui kuaita farizewita aintausendu irumu Jesus resewara umukiriri kuaita sadusewita, asui aintauyumuatiri aintausika ipiri.
35Asui yepe ukuawawaa puranga kua Muize umpinimawaa upurandu Jesus usaã arama ae,
36Yawe unyee:
—Inde umbuewaa mayewataa turusu piri Deus uputari yamunya inyenga kuximawara upe?
37Jesus umbeu ixupe:
—Rerikute regustari neruixawa Deus panye nepia sui panye neanga irumu panye remanduarisawa irumu yuiri.
38Aete kua primeru umunduwaa turusuwaa.
39Yepewasu irumu kua mukuĩsawa umunduwaa, regustari neanamaita maye reyugustariwaa yawe indepawa.
40Panye Muize umpinimawaa panye yuiri aintaumpinimawaa kuaita utitikawaita uwapika sese santa kua mukuĩ Deus umunduwaa yamunya.
Davi rimiariru kua Kristu
41Aintauyumuatiri rame kuaita farizewita Jesus upurandu ainta.
42Umbeu ainta supe:
—Maitaa pemanduari kua Kristu, awa rimiarirutaa ae? Aintaunyee ixupe:
—Davi rimiariru ae.
43Asui Jesus umbeu ainta supe:
—Ape marantaa Davi umbeu Espiritu irumu suixawa ae?
44Davite umbeu Espiritu Santu irumu yawe unyee:
—Yaneruixawa umbeu seruixawa supe rewapika sekatusawa upe ate mairame kuri hamburi neruanyanaita neipi wira kiti.
45Davi umbeu rame maa suixawa ae, ape mayetaa maa ximiarirute ae?
46Asui tiawa upuderi usuaxara ae kua Jesus upuranduwaa, ape yawewaa rire aintausikie aintaupurandu ae.
Currently Selected:
Mateu 22: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO