LUKA 12
12
Yesu evachunda varateri vakwe kukurinda he lung’ong’o
1Igheri ilo mavungano a viku na viku vakamvungania, mhaka vakatana; akarongavwira varateri vakwe, “Kurindeni na chachu ya Vafarisayo, eyo ling’ong’o. 2Mira tehena kintu chevisike chesikazefunukurwa, neri chevisiwe chesikazemanyika. 3Huvo, vyose mwetetiie he kija, vinesikiiwa he kianga, na vila mwewewese he isikio la mntu uko he vyumba vya ndeni, vinebirikirwa wanga he nyumba.
Yesu evadindija varateri vakwe
(Mat. 10:19-20, 28-33)
4“Nami nimuvwira unywi vambwie vangu: Musivafoleke avo vekoma mwiri, na vekikenja hesina cho veidima kuronga kukela. 5Mira nimuvonyesha ye mwenemfoleka, Mfolekeni ula eye ekikenja kumkoma mntu, ena nzinya ya kumtagha na he gehena; yee, nimutio: mfolekeni uo. 6Hamao, vuntoronto vusano tevutaghwa kwa senti mbiri? Mira tehena neri kamwe keivawa mozya he Mrungu. 7Mira hata nywii ja mitwi yenyu jetarirwe jose. Heicho ra, musifoleke, unywi mwekelile vutoronto vujinki. 8Nami nimutio, Ye enenizumira he vantu, Mwana wa Mntu naye enemzumira he vamalaika va Mrungu; 9na ula enenikana he vantu, uo enekanwa he vamalaika va Mrungu. 10Na mntu enemteta Mwana wa Mntu uvivi, eneshighiwa, mira ye emfalaja Mpeho Wedi, tekashighiwe. 11Vekinemutonja unywi mozya, musile vwasi na kudunganya viteto vyenyu vuntu mwenegharusha kana kuteta; 12ambu Mpeho Wedi saa iyo iyo enemmucheja vyetara kuteta.”
Lukolo na mfwanano wa mzuri erundie
13Mntu mmwe he luvungano akamti, “Mcheji, mvwire mndughu wangu anighavie vupuli vwetu.” 14Akamti, “We mntu, ni ani enivikie kuoka mremuchwia kana mghavi wenyu?” 15Akavati, “Rerehani, kurindeni he ndambi, ambu nkalamo ya mntu teiho he vujinki vwa vukina vwa mntu ena navwo.” 16Akavavwira kisoma, ekiti, “Mghunda wa mntu mmwe mzuri wegerire haiwa; 17akavoka kudunganya he ngoro yakwe ekiti, ‘Nikete ze, ambu sina hantu ha kuvika ndungu ya mafindiko angu? 18Akati, Nineketa huvu:Ninebaja majumba angu, nijenge angi mabaha kukela, na aho ninevika vijo vyangu vyose na vintu vyangu. 19Nekikenja ninekuti: We moo wangu, una vintu vyedi vijinki wekuvikiie ndungu he miaka mingi; hema ra, ule, unwe, uizihirwe.’ 20Mira Mrungu akamti, ‘U kirundu we, kio iki cha yoo veenda ngoro yako, na ivyo wekuimbikie vineoka vyakwe ni?’ 21Nivwo vuntu mntu ekuvikia ndungu eikee, ekisakughosha mzuri he Mrungu.”
Mabinuko na kumwitikija Mrungu
(Mat. 6:25-34)
22Akavati varateri vakwe, “Heicho nimutio, musibinukie kukaa na moo kwenyu, Munela ni, neri miri yenyu iti, Munedoka ni. 23Ambu kuikaa na moo kwekelile kijo, na mwiri wekelile suke. 24Dunganyijani he makunguru, iti teehanda neri teefindika; teena gu neri nyumba ja ndungu, na Mrungu eraarera. Unywi mwekelile madeghe kantu kajinki. 25Ni ani wa henyu, hata ekitakubinusha, eidima kukuongejija vueza vwakwe neri mkono mmwe? 26Igheri, ukinakiche temuidima kintu kidori, hanini mwekubinusha vuntu vwa vintu vingi? 27Dunganyani cha virangare vuntu vyeeha tevironga ndima neri tevimiricha; nami nimutio, na ere Salomoni he vwedi vwakwe vwose, tedokiwe nezo sa kimwe cha ivyo. 28Ukinakiche Mrungu ehamba huvo mani tekamuketie unywi kukela, unywi mu va mwitikijo mdori? 29Unywi musiende vyo mwenela kana vyo mwenenwa; neri musiweriwerite; 30ambu ivyo vyose nivyo vyeendwa ni vaisanga va si ii, mira Vava wenyu emanyije iti ivyo muvienda. 31Mira endani vufumwa vwa Mrungu, na ivyo muneongejijwa.
32“Musifoleke unywi kafio kadori, ambu Vava wenyu evonie iti ni chedi kumuinka vula vufumwa. 33Taghani vila mwena, mufunye matasi; kuharehiani mabene esisakaa, ndungu yesiduika uko wanga, hantu hesifika mkea, neri mpeghesa yesikonda. 34Ambu hantu ndungu yenyu yeho, nireho hantu na ngoro jenyu jeneikaa.
Vurinji vwedi na mfwanano wa mzoro mkitengo
35“Ikaani mwekuchungie vikwidi, na taa jenyu jekiaka. 36Na unyi okani sa vantu vewinda mzuri wavo, ekihunduka kufuma he mlondola, nesa ekiza na kukokonta vamjughuie hala indi. 37Varela vwedi ni vazoro vala mzuri wavo ekiza enevakicha veavije. Kididi nimutio, enekudoka na kuvaikaja si he kula, eneza na kuvapirikia. 38Ekiza lughojo lwa keri kana lwa katatu, ekiravakicha huvo, vazoro avo ni varela vwedi. 39Mira manyani kiteto iki, kuti, nanga mwenye nyumba ekimanya saa mkea enezia, ekiyaa kiavi, neri tekishigha nyumba yakwe ibawe. 40Na unywi ikaani mwerekuringanya, ambu saa mwesiirekere, niho Mwana wa Mntu eza.”
41Petro akamti, “Mfumwa, kisoma icho utuvwira uswi du, kana ni na vantu vose?” 42Akati, “Ni ani msungaji mkitengo, mkiugho, eye mzuri enemvika he vandima vakwe vose, avainke vantu chala he igheri lekifika? 43Mrela vwedi ni mzoro ula eye mzuri wakwe ekiza enemkicha ekiratera huvo. 44Kididi nimutio, Enemvika wanga ya vintu vyakwe vyose. 45Mira ula mzoro ekiti uko he ngoro yakwe, ‘Mzuri wangu akaisha,’ akavoka kubigha vazoro vaghinji, va kiume na va kiche, ekila na kunwa na kuengea; 46mzuri wa uo mzoro eneza msi esiurekere, na saa esiimanyije, enemchwa vihindi viri, na kumvika ifungu lakwe hamwe na vala vesiitikije. 47Na mzoro ula emanyije, kikundire cha mzuri wakwe, asikuringanye, neri kuronga kikundire chakwe, enebighwa haiwa. 48Ula seimanyije, naye akaronga vyetara kubighwa, enebighwa hadori. Na ula einkiwe vijinki, heye heneendwa vijinki; na ula evikiiwe mbizyo vintu vijinki, heye uo venemwenda vijinki kukela.
Igheri la maluvengo
(Mat. 10:34-36; 16:1-4; Mrk. 8:11-13; Mat. 5:25-26)
49“Nezie kugera mbaghia he si ii, kakicha ra yakenja kuaka, nikini neenda kukela? 50Mira nina m’batizo wenitara kubatizwa, nami nina vwasi sani mhaka ukoloshwe. 51Hama mudunganya iti nezie kuete mporere he si ii? Nimutio, Hai, si huvo, esire misopano. 52Ambu kuvokia iki he nyumba mwe heneketa vantu vasano vesopane, vatatu he veri, veri he vatatu. 53Vava na mwanawe wa kibwange venesakana, na mwana wa kibora na mlala wavo; mkwewe mntu na mkwe, mkwe na mkwewe mntu.”
54Akavwira hata ala mavungano, “Mwekivona ijumbi lekikwea mondo wa kigwaizuva, hala indi muiti, ‘Mvua ineza;’ kioka huvo. 55Nkungu yekifefeta kufuma mondo wa ishi, muti, ‘Heneketa ndughuri;’ na nivwo vuntu cheoka. 56Unywi valung’ong’o, muidima kutwarija fwani ya isanga na uko wanga; cheikee ze ra aha mwesiidima kutwarija magheri sa aa? 57Hanini ra he ngoro jenyu mwesichwa kwa singisirya?
58Ambu wekitonja na mmasa wako kutonga kitala, aho nzieni, kukindije kukundanywa naye, asize kubulula mhaka mozya ya mzalaha; na ula mzalaha akarekuinkija he mikono ya mzarihija, na ula mzarihija akakugera he kichungo. 59Nikutio, Tukahafume neri, mhaka ukenje kuriha ila senti yakenjija.”
Currently Selected:
LUKA 12: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.