MATAYO 14
14
Kifwa chakwe Yohane M’batizi
(Mrk. 6:14-29; Luk. 9:7-9)
1Igheri lila Mfumwa Herode akasikia mburi jakwe Yesu, 2akavati vandima vakwe, “Uo ni Yohane M’batizi, avuka he vefwie; heicho ijo nzinya jironga ndima heye.” 3Ambu Herode ekimgurire Yohane, akamchunga, akamgera he nyumba ya varechungwa vuntu vwakwe Herodia mche wakwe Filipo mjinawe. 4Ambu Yohane ekimvwirire kuti, “Si chedi hewe kuikaa naye.” 5Naye ekienda kumkoma akafoleke luvungano, kila vevona iti Yohane ni mroti. 6Igheri msi m’baha wa kumoghwa kwakwe Herodia akavina ghati he vantu, akamwizihija Herode. 7Niho akamravia kwa kukurigha kuti icho chose enemwomba, enemunka. 8Naye he vuntu vwa kusembekwa ni mlala wavo, akati, “Ninka mtwi wakwe Yohane M’batizi aha he si ii sahani!” 9Kikamshota mfumwa, mira he vuntu vwa kukurigha kwakwe, na he vuntu vwa vala veikae si naye hala vekila, akaazera iti ainkwe. 10Akatuma mntu he nyumba ya varechungwa, akamchwa Yohane singo. 11Mtwi wakwe ukaetwe he sahani, ula mwana akainkwa; akamtwaia mlala wavo. 12Varateri vakwe vakatonga, vakaghuha kila kimba chakwe, vakakijika; vakatonga kummanyisha Yesu iyo mburi.
Kuighushwa kwa vantu viku visano
(Mrk. 6:30-44; Luk. 9:10-17; Yoh. 6:1-13)
13Yesu ekisikia huvo akavuka aho akaingia he ngilawa, akatonga hantu ha mpiso hesina vantu. Mavungano vekisikia, vakafuma he mizi yavo, vakamratera kwa maghu. 14Yesu akafuma akavona luvungano lubaha, akavasikiwa vwasi, akavabanja vawaji vavo. 15Hekinaswe varateri vakwe vakamswia, vakati, “Aha hantu ni nyika, kangi igheri lavecha, aghanya mavungano vatonge he mizi varezora kijo.” 16Yesu akavati, “Vetongiani, vainkeni kijo engaunywi.” 17Vakamti, “Tetuna kintu aha, esire mikate misano na samaki mbiri.” 18Naye akati, “Vinietieni aha.” 19Akaazera iti mavungano aikae si he mani; akaghuha ila mikate misano na samaki mbiri, akarereha wanga, akaiinka lutelwedi, akabendua ila mikate, akavainka varateri vakwe, na varateri vakavainka mavungano. 20Vakala vose vakaighuta; vakatotola vibendo vyeshele, vikaizuja vikapu ikumi na viri. 21Vose velie ne sa viku visano, kushigha vache na vana.
Yesu evata wanga he bahari
(Mrk. 6:45-52; Yoh. 6:16-21)
22Niho Yesu akavatitikija varateri vakwe iti vaingie he ngilawa, na kurongora kukelanya na sela, aho ye ekiaghanya mavungano. 23Ekinakenje kuvaaghanya, akakwea na he ntuvi ye mwenye kurraomba. Hekiswa ekiho uko ye mwenye. 24Na ila ngilawa yafika ghati he bahari, irierieshwa ni mawimbi, ambu hekina nkungu yevafuma na mozya. 25Hekifika kucha, Yesu akavazia, ekivata wanga he bahari. 26Varateri vakwe vekimvona ekivata wanga he bahari, vakaituka, vekiti, “Ni mzuka,” vakagera nkunga kwa kufoleka. 27Hala indi Yesu akateta navo, akavati, “Tundanani, nimi, musifoleke!” 28Petro akamgharusha, akati, “Mfumwa, kakicha niwe niazera nivate wanga he mpombe, nize hewe.” 29Akati, “Nzo!” Petro akafuma he ngilawa, akavata he mpombe wanga iti amfikie Yesu. 30Mira ekivona ila nkungu, akafoleka, akadidimira, akagera lukunga ekiti, “Mfumwa, nikija!” 31Hala indi Yesu akaronga mkono wakwe, akamgura, akamti, “We mwenye mwitikijo mghere, hanini wekitatanya?” 32Vekiingia he ngilawa, nkungu ikahuja. 33Vala veho he ngilawa vakamdunkutia, vekiti, “Kididi we u Mwana wa Mrungu.”
Kubanja vantu uko Genesareti
(Mrk. 6:53-56)
34Vekinakelanye vakafika he isanga la Genesareti. 35Na vantu va hala hantu vekinammanye, vakatuma vantu he masanga ala eho mondo na mondo vakamwetie vose vekiwaa, 36navo vakamsemba iti vakunte du na ere mlingo wa suke yakwe, na vose veukuntie vakabanjwa pere.
Currently Selected:
MATAYO 14: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.