MATAYO 20
20
Mfwanano wa vaimi he mghunda wa mizabibu
1“Ambu vufumwa vwa uko wanga vwefwanane na mwenye kaa, erokie chaheyavo kere kuraenda vaimi, avatonje he mghunda wakwe wa mizabibu. 2Ekinaaghane na vala vaimi iti msi mwonzi enevainka dinari mwe, akavatuma he mghunda wakwe wa mizabibu. 3Akafuma kangi sa igheri la saa ntatu, akavona vangi veimuke he kiete vesina ndima, 4avo navo akarevati, ‘Tongani na unywi he mghunda wangu wa mizabibu, ninemuinka kiringanyo chenyu.’ Vakatonga. 5Akafuma wa sa igheri la saa mtandatu na saa kenda ekiraketa huvo. 6Akafuma kangi sa igheri la saa ikumi na mwe, akavona vangi veimuke, akavati, “Hanini mwereimuka msi di mwesina ndima?” 7Vakamti, ‘Ni kila hesina mntu etuendie.’ Akavati, ‘Tongani na unywi he mghunda wa mizabibu.’ 8Hekinaswe, mwenye mghunda wa mizabibu akamti ula mreimukia, ‘Itanga vaimi uvaghavie mhako wavo; uvokie vala va nyuma mhaka ufike vala va kuvoka.’ 9Vala va saa ikumi na mwe vakaza, kila mntu akainkwa dinari. 10Vala va kuvoka vekiza, vakadunganya iti vo veneinkwa kukela: mira hata vo vakareinkwa kila mntu dinari. 11Vekinainkwe, vakamdengeretia ula mwenye kaa, 12vekiti, ‘Ava va nyuma verongie ndima saa mwezu du, nawe ukarevaringanya na uswi twelie vwasi na kusenuka msi wose di.’ 13Naye akagharusha, akamti mmwe wavo, ‘Mbwiaa, sikuishije; tetuaghane dinari? 14Ghuha kila e chako utonge; natakunda kumunka uu wa nyuma cheringane na chako. 15Kana tekinitara kuketa na mari yangu sa vuntu nekunda? Kana iziso lako lina kiru kila mi ne wedi?’ 16Nirehuvo, va msirikijo veneoka va kuvoka, na vaa kuvoka veneoka va msirikijo.”
Yesu erota ka katatu mburi ya kifwa chakwe
(Mrk. 10:32-34; Luk. 18:31-34)
17Aho Yesu ekikwea noko Yerusalemu, ahi nzieni akavatika vala varateri ikumi na veri njama, akavati, 18“Rerehani, tukwea noko Yerusalemu, na Mwana wa Mntu eneinkijwa he vabaha va vatasi na vaandiki, navo venemchwia mburi ya kufwa; 19kangi venemwinkija he Vakiisanga, vamsole na kum’bigha viboko na kumvamba he msalaba, mira msi wa katatu enevuka he vefwie.”
Mitanjije ya kuenda shima ya ili isanga
(Mrk. 10:35-40)
20Niho mlala wavo vana Zebedayo, akamswia hamwe na vanawe, akamdunkutia na kumtanja kintu. 21Akamti, “Uendani?” Akamti, “Azera iti ava vana vangu veri, uko he vufumwa vwako, mmwe aikae mkono wako wa kume, na ungi mkono wa kumoso.” 22Yesu akagharusha, akati, “Temumanyije cho mwetanja. Muidima kunwia kikombe kila nenenwia? Vakamti, “Tuidima.” 23Akavati, “Kididi munenwia kikombe changu, mira kuikaa mkono wangu wa kume kana wa kumoso, siidima kumuinka, esire vala veringanyijwe ni Vava wangu.”
Vubaha vwa idi
(Mrk. 10:41-45)
24Niho vala ikumi vekisikia huvo, vakavavihiwa vala vandughu veri. 25Mira Yesu akavaitanga, akati, “Mwemanyije iti vabaha va Vakiisanga vevatetia kwa nzinya, na vabaha vavo vevabinusha. 26Mira unywi si huvo! esire ula eenda kuoka m’baha wenyu aoke mndima wenyu; 27na kila mntu eenda kuoka mrongori wenyu, aoke mzoro wenyu; 28ambu ni sa vuntu Mwana wa Nntu esizie kutumikiwa, esire kutumikia, na kuinkija moo wakwe uoke irivi la vajinki.”
Matuntu veri veinkwa kuvona
(Mrk. 10:46-52; Luk. 18:35-43)
29Aho ekifuma uko Yeriko, luvungano lubaha vakamratera. 30Hekina matuntu veri veikee si mbaimbai he nzia; vekisikia iti Yesu evecha, vakaitanga na izii ibaha vekiti, “Mfumwa, Mwana Davidi, utuvoneie!” 31Luvungano vakavabohija iti vahuje. Mira vo vakazika lonza, vekiti, “E, Mfumwa, Mwana Davidi, utuvoneie!” 32Yesu akaimuka, akavaitanga, akati, “Muenda nimuketieni?” 33Vakamti, “Mfumwa, tuenda iti meso etu atambarujwe.” 34Yesu akavaondia, akakunta meso avo. Hala indi vakavona, vakamratera.
Currently Selected:
MATAYO 20: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.