MARIKO 16
16
Kuvuka he vefwie kwakwe Yesu
(Mat. 28:1-10; Luk. 24:1-12; Yoh. 20:1-10)
1Igheri sabato ikinasie, Maria Magdalena ne Maria mlala wavo Yakobo ne Salome, vakazora mafuta epupuntika nezo, nesa varemvira. 2Niho msi wa kuvoka juma chaheyavo kere, izuva lekibuka vakaswi he mbira. 3Vo venye vakavwirana, “Ni ani enetuhelijija lila ibwe he mpenge ya mbira?” 4Aho vekisungia vakakicha lila ibwe lakenja kuhelijwa, nalo neki ibaha mno.
5Vakaingia he mbira, vakavona m’bwange eikae si mondo wa kume, edokie suke nyewa, vakamaka. 6Naye akavati, “Musimake; mumuenda Yesu Mnazareti, ula evambiwe he msalaba, akavuka he vefwie; tewaha ye; rerehani hantu vekimvikie. 7Mira tongani murevwira varateri vakwe, ne Petro, iti amurongorira kutonga Galilaya; niho hantu mwenemvonia, sa vuntu emuvwirire.” 8Vakafuma na nze, vakaaha kufuma he mbira, ambu vagurwa ni kizingizo na kiambalala, neri vasimvwire mntu kintu, ambu vagurwa ni kipea.
Yesu efumia Maria Magdalena na ntume
(Yoh. 20:11-18; Luk. 24:13-35; Mat. 28:16-20; Luk. 24:36-49; Yoh. 20:19-23)
[ 9Ekinavuke msi wa kuvoka juma chaheyavo, akarongamfumia Maria Magdalena ula emfunyije mpepo mfungate. 10Naye akatonga akavavwira vala vekiho naye, navo vekireho he ntiro na kuia. 11Mira avo vekinasikie iti eho moo, na iti emvonie, teveitikije.
12Nyumba akavafumia vantu veri hevo ena fwani ingi, navo vekitonga he mighunda. 13Na avo vakatonga vakavwira vaghenji vala vangi, neri vo tevevaitikije.
14Nyuma akavafumia vala ikumi na mmwe vekila akavabohija vuntu vwa kusaitikija kwavo na vukuji vwa ngoro javo, kila vesivaitikije vala vemvonie ekinavuke he vefwie. 15Akavati, “Tongani he masanga ose, mubirikire Mburi Yedi he virumbe vyose! 16Ye eitikija na kubatizwa enekia, ula esiitikija enelahwa. 17Na maluvengo aa enetonjanya na vala veitikija: He izina langu venefunya mpepo; veneteta miterire mishaa; 18venegura nyoka; na vakatenwa kintu chekoma, tekikavaghende ze neri; venevikia vawaji mikono navo venebanda.”
Kukwea wanga
(Luk. 24:50-53)
19Niho Yesu ekikenja kuteta navo, akatikwa noko wanga, akaikaa he mkono wa kume wa Mrungu. 20Navo vakafuma vakabirikira hantu hose, Mfumwa ekironga ndima hantu hamwe navo, na kukonesha kila kiteto kwa maluvengo eraterane nacho.]
Currently Selected:
MARIKO 16: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.