መጽሐፈ መዝሙር 83

የእስራኤል ጠላቶች እንዲሸነፉ የቀረበ ጸሎት

1አምላክ ሆይ! እባክህ ዝም አትበል፤

አትተወን፤ ችላ አትበል!

2እነሆ፥ ጠላቶችህ ዐምፀዋል፤

የሚጠሉህ ሁሉ ራሳቸውን በአንተ ላይ አንሥተዋል።

3በሕዝብህ ላይ በስውር ያደባሉ፤

አንተ በምትጠብቃቸው ላይ ያሤራሉ።

4“እስራኤል ለዘለዓለም የተረሳ እንዲሆን

ኑ፤ መንግሥታቸውን እንደምስስ” ይላሉ።

5በአንድነት በአንተ ላይ አሤሩ፤

በአንተ ላይ ለመነሣት የቃል ኪዳን ስምምነት አደረጉ።

6እነርሱም የኤዶም፥ የእስማኤል፥ የሞአብ፥ የአጋርያን፥

7የጌባል፥ የዐሞን፥ የዐማሌቅ፥ የፍልስጥኤምና የጢሮስ ሰዎች ናቸው።

8አሦርም የሎጥን ልጆች በመርዳት ከእነርሱ ጋር ተባብራለች።

9በምድያማውያን፥ በሲሣራና በያቢንም ላይ

በቂሾን ወንዝ ያደረግኸውን በእነዚህም ላይ አድርግ። #መሳ. 4፥6-22፤ 7፥1-23።

10እነርሱን በዔንዶር ድል አደረግሃቸው፤

ሬሳቸውም በሜዳ ላይ በስብሶ ቀረ።

11በዖሬብና በዜብ ላይ ያደረግኸውን

በእነርሱም መሪዎች ላይ አድርግ፤

በዜባሕና በጻልሙናዕ ያደረግኸውን

በእነርሱም ገዢዎች ላይ አድርግ። #መሳ. 7፥25፤ 8፥12።

12እነርሱ “የእግዚአብሔርን ሕዝብ ርስት የራሳችን

እናደርጋለን” ብለው ነበር።

13ስለዚህ አምላኬ ሆይ! እንደ ትቢያ፥

በነፋስም እንደሚወሰድ ገለባ በትናቸው።

14እሳት ደንን እንደሚያጋይ፥

የእሳት ነበልባልም ተራራዎችን እንደሚያቃጥል

15በሞገድህ አባራቸው፤

በዐውሎ ነፋስህም አስደንግጣቸው።

16እግዚአብሔር ሆይ! አንተን ይሹ ዘንድ

ፊታቸውን በኀፍረት ሸፍን፤

17ዐፍረው ለዘለዓለም ተስፋ እንዲቈርጡ አድርግ፤

ተዋርደውም እንዲጠፉ አድርግ።

18በምድር ሁሉ ላይ ጌታና ሁሉን ቻይ አምላክ

አንተ እግዚአብሔር እንደ ሆንክ ይወቁ።

Currently Selected:

መጽሐፈ መዝሙር 83: አማ05

ማድመቅ

Copy

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

ስለ አማርኛ አዲሱ መደበኛ ትርጉም ተጨማሪ ይወቁ