Aposkạmi 10
10
Senapoti Kornelius
1Kạisạriạ nagrahare Kornelius ńutuman mitʼṭen hoṛ do Itạliạ Palṭon dolren subedare tahẽkana. 2Uni do Jihudi hoṛe baṅkanre hõ Isor bhokti hoṛe tahẽkana ar acʼ gharońjren sanamkoge Isorko sewawae kan tahẽkana. Uni do reṅgecʼ orecʼko ṭaka-poesakoe dan akokan tahẽkana ar Isor ṭhen jaogeye koejoṅkan tahẽkana. 3Mitʼ din pe baja okte uni do mitʼṭecʼ dorsone ńelkeda. Uni do pusṭạuteye ńelkeda Isorren mitʼṭen goḍet do hecʼkateye metaekana, “E Kornelius.”
4Kornelius doe botorente serma goḍet secʼ beṅgetʼkateye menkeda, “ Ma roṛme, E Probhu Isor.”
Serma goḍete menkeda, “Amakʼ koejoṅ ar reṅgecʼ orecʼkom dan akokan reakʼ katha do sermate seṭer akana ar Isor do onae disạ dohoakada. 5Ńitokʼ am do Joppa nagrahate hoṛ kolkom, ar Simon, one okoe do Patrasko metae uni hoho ạguiyem. Onḍe jalapuri aṛere ar mitʼṭen Simon menaea. 6Uni do harta reakʼe kạmiya. Patras do uni Simonakʼ oṛakʼrege menaea.”
7Ado okoeṭakʼ serma goḍet sãoteye galmaraokan tahẽkan uniye calaoen khan Kornelius do barea guti ar mitʼṭen gokʼṛoyicʼ palṭone hohowadea. Nui palṭon hõ Isor bhokti hoṛe tahẽkana. 8Ar sanamakʼe lại bujhạuatʼko khan uni do Joppateye kolkatʼkoa.
Patrasakʼ Dorson
9Dosar hilokʼ onko hoṛ tinre Joppa nagraha secʼko hijukʼkan tahẽkana unre tikin okte tahẽkana. Un jokhecʼ Patras do koejoṅ lạgitʼ chatteye rakapʼena. 10Unre Patras do ạḍi reṅgecʼkedea ar thoṛa jojome menana. Ar tinre jomakʼ tearokʼkan tahẽkana unre mitʼṭecʼ dorson paṛaoadea. 11Unre uni do serma jhicʼakan ar maraṅ okocʼ mitʼṭecʼ cador leka pon konare sapʼakatʼ otre pheḍ hijukʼkane ńelkeda. 12Onare joto lekan janwarko, ar otren leńokʼ ṭunḍạṅko ar coṭren uḍạukʼkoko tahẽkana. 13Inạ tayom okoe coṅ roroṛkane ańjomkedea, “E Patras, ma beredokʼme, ar gocʼkate jomkom.”
14Patrase menkeda, “Baṅa, E Probhu, ohoge hoedaṛelena. Besapha ar chutakʼ do tis hõ bạń jomakada.”
15Unre arhõe ańjomkeda, “Isor okakoe sapha akatʼ ona do be sonotakʼ alom metakʼa.” 16Onkage pe dhao hoyen tayom ona cador do sermate rakapʼ ocoyena.
17Patras do okaṭakʼ dorsone ńelketʼ ona reakʼ cetʼ mane hoydaṛekokʼa menteye hudisokʼkan tahẽkanrege, Korneliuse kolakatʼko hoṛ do Simonakʼ oṛakʼ sendra ńamkate duạr ṭhenko teṅgoyena. 18Onko do hohokateko kuliyana, “Simon, okoe do Patrashõko metaekan, uni do cetʼ nonḍeye tahenkana?”
19Patras do unhõ dorson reakʼ kathae hudiskan tahẽkana, unre sonot Jiu do uniye metadea, “Ńelme, pe hoṛ amko khojetʼmea. 20Ma beretʼkate latarte pheḍokʼme. Ar jãhãnakʼ begor digdhạte onko soṅgete calakʼme, ente ińge onko doń kolakatʼkoa.”
21Unre Patras doe pheḍ hecʼente onko hoṛkoe metatʼkoa, “Ape okoepe ńam baṛayede uni hoṛ doń ińkangea. Ape do cetʼ lạgitʼpe hecʼakana?”
22Onko hoṛko menkeda, “Subedar Korneliusge ale doe kolakatʼlea. Uni do mitʼṭen dhorom ar Isor bhokti hoṛ kanae. Ar sanam Jihudikoge uniko sarhaoede kana. Isorren mitʼṭen goḍet do uniye hukumade tahẽkana jemon acʼakʼ oṛakʼte ame hoho idi ocomete amakʼ kathakoe ańjomtam.” 23Unre Patras do oṛakʼ bhitrite onko hoṛe hoho aderketʼkoa ar onkoakʼ tahen jaega ar jom-ńũ reakʼe bebostawatʼkoa.
Korneliusakʼ oṛakʼre Patras
Ado dosar hilokʼ Patras do onko tulucʼe senena. Ar Joppa nagraharen adom biswạsi boehako hõ uni sãoteko sen torayena. 24Ar tesar hilokʼ do Kạisạriateko seṭerena. Unre Kornelius do acʼren peṛa ar gateko hoho jarwakate onko lạgitʼe koyokʼ horakatʼ tahẽkana. 25Ado Patras oṛakʼteye boloyen khan Kornelius do uniyakʼ ti jaṅgare giḍiyente uniye ḍobokʼadea. 26Menkhan Patras do uni beretʼkedeteye metadea, “Ma beretʼme, iń hõ coń manwakange.”
27Kornelius tulucʼ galmarao galmaraote Patras do bhitriteye boloyen khan onḍe aema hoṛ jarwa akane ńelketʼkoa. 28Uni doe metatʼkoa, “Ape mape baḍaege je, mitʼṭen Jihudi hoṛ do mitʼṭen boṅgan hoṛ sãote gatekʼ se uni sãote ńapamokʼ hõ aleakʼ dhorom reakʼ ạn-ạri birudkana. Menkhan Isor do ińe udukʼ akawạdińạ, okoe hõ besapha se chut mente metako do lek baṅkantińạ. 29Onate tinre ińpe hohowạdińa unre begor ạnḍuṅte nonḍeń hecʼakana. Ar ńitokʼ iń kuliyetʼpea, cedakʼ iń dope hoho akadińạ?”
30Unre Korneliuse menkeda, “Pon din lahare ṭhik niạ jokhecʼ pe baja okte iń do ińakʼ oṛakʼreń koejoṅkan tahẽkana. Unre ackage pĩṛĩtʼ pĩṛĩtʼ ponḍ kicricʼ horokʼ akatʼ mitʼṭen hoṛ do iń samaṅre hecʼenteye metadińạ, 31‘Kornelius, Isor do amakʼ koejoṅe ańjom akada ar reṅgecʼ orecʼkom danakokan reakʼ katha hõ uni doe disạ akada. 32Ado ńitokʼ Joppate hoṛ kolkom, ar Simon, okoe do Patrasko metaekan uni hoho ạguyem. Uni do jalapuri aṛere Simon camarakʼ oṛakʼreye ḍera akana.’ 33Onate iń do am hoho ạgume lạgitʼ unrege hoṛiń kolketʼkoa, ar amem hecʼente dom bhageakatʼgea. Nonḍe ale do ńitokʼ sanamkoge Isor samaṅre menakʼlea. Ar Probhu Isor okaṭakʼ ale ṭhen galmarao lạgitʼe hukum akatʼme ona jotowakʼgele ańjoma.”
34 #
Bib 10.17
Unre Patras do roroṛe ehopʼena, “Iń do ńitokʼ sạrigeń bujhạu daṛeakʼ kana, Isorakʼ mẽtʼãhã samaṅre do jotogeko somangea. 35Ar mimitʼ jạtrenko mod khon okoe do uniko botoraekan ar uniyakʼ mẽtʼãhã samaṅre dhoromko kạmikan uni do onkoe ataṅkoa. 36Isor do Israelko ṭhen noa bhage sombate kolletʼ tahẽkana je, Jisu Mạsi, one okoe do sanamkoren Probhu Isorkan, uni hotetege suluk do ńamokʼa mente. 37Ar Johan do hoṛkoakʼ bạptisma ataṅ jạruṛa menteye porcarketʼ khan Gạlil khon ehopʼkate goṭa Jihudạre okako hoylen ona katha mape baḍaege. 38Ar noa hõpe baḍaegea je, Isor do Nasaretren Jisuge sonot Jiu ar daṛeteye ojokʼlede tahẽkana. Isor do uni tulucʼe tahẽkante bhageakʼkoe kạmiyetʼ tahẽkana ar Soetanakʼ tire okoeko kosṭoko ńametʼkan tahẽkan onko sanamkoe bogeyetʼko tahẽkana.
39“Jihudikoakʼ disạmre ar Jerusalemre uni okakoe kạmiletʼ onaren gohako do ale kangeale. Hoṛko do kurusre akakate uniko gocʼkedea. 40Menkhan Isor do pe din hilokʼre gocʼko khon uniye jiwetʼ beretʼkedea ar sodorokʼ reakʼe danadea. 41Menkhan sanamko do bako ńelledea, eken okoe gohako Isor do lahareye bachao dohoakatʼko tahẽkan onkogeko ńelledea, metakʼme gocʼko khon jiwetʼ beretʼ tayom ale do uni sãotele jom-ńũleda ar alege unile ńelledea. 42Uni doe hukum akawatʼlea jemon Jihudiko ṭhenle porcar ar gohale em baṅma, Isor do unige jiwetʼko ar gocʼko bikʼcạrko lạgitʼe niṭ akadea mente. 43Ar sanam nạbikoge uni reaṅ noa gohako emetʼkana, unire pạtiạukʼ mitʼke mitʼ hoṛ do uniyakʼ ńutumte kại reakʼ ikạko ńama.”
44Patras do unhõ kathae roroṛkan tahẽkanre okoe kathako ańjomkan tahẽkan onko sanamkore sonot Jiu doe hecʼena. 45Ar okoe Jihudi biswạsiko Patras sãoteko hecʼlen onko do be-Jihudiko cetanrehõ sonot Jiu reakʼ dan dul oḍoken ńelteko hahaṛayena. 46Onko do onako bujhạu daṛeada ente noko be-Jihudiko hõ eṭakʼ eṭakʼ pạrsite roroṛkan ar Isor sabasiaekanko ańjomketʼkoa.
Unre Patrase menkeda, 47“Dakʼte bạptisokʼ lạgitʼ noko hoṛ do cetʼ jãhãeye akoṭ daṛekea? Onko hõ coṅ abo leka sonot Jiuko ńamakade.” 48Unre uni do onko hoṛko Jisu Mạsi ńutumte bạptisokʼ lạgitʼe hukumatʼkoa. Ar ona tayom onko do ako ṭhen thoṛa din tahen lạgitʼ Patrasko nehõradea.
Currently Selected:
Aposkạmi 10: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.