Aposkạmi 21
21
Jerusalem secʼteye senokʼkan
1Ado Ephesusren mukhiyạko ṭhen khon bidạ hataokate ale do jahajte mitʼ mohnḍa Kos diptele calaoena. Ar dosar hilokʼ do Rhodos diptele hecʼena. Ona tayom onḍe khon Patara nagrahatele calaoena. Onḍe do Phoenikiạte calakʼ lạgitʼ mitʼṭecʼ jahajle ńamkeda. 2Unre ale do ona jahajre decʼkatele mohnḍayena. 3Kupros diple ńel ńamketʼ khan ona dạkhin secʼte ạcurkate Siriạ Prodes reakʼ Tur nagrahate senkate jahaj khonle pheḍena. Onḍege aleakʼ jahaj reakʼ bojha do pheḍ reakʼ katha tahẽkantalea. 4Ado onḍenko celale sendra ńamketʼko khan onko sãote eae dinle tahẽyena. Onko do sonot Jiu hotete Pạulko nehõradea jemon Jerusalemte aloe calakʼ. 5Onako din paromen khan ale do onkole bạgiyatʼkote aleakʼ hortele mohnḍayena. Unre sanam celako ar onkoren bạhuko ar gidrạko do ale sãote nagraha bahre hạbicʼko oḍok hecʼena. Ar jalapuri ḍhipre ikhṛumentele koejoṅana. 6Ona tayom ale do bidạ hataokate jahajrele decʼena ar onko do akoakʼ oṛakʼteko ruạṛ calaoena.
7Ado Tur khonle mohnḍayente Ptolemaisrele seṭerena. Onḍe do biswạsi boehakole joharatʼkote onko sãote mitʼ dinle tahẽyena. 8#Apos 6.5; 8.5 Dosar hilokʼ dole oḍokente Kạisạriạtele hecʼena ar bhage sombat poporcaricʼ Philipakʼ oṛakʼrele tahẽyena. Uni do Jerusalem manḍerren eae goṭen sapʼdapʼko modren mitʼhoṛe tahẽkana. 9Uniren do ponea kũạ̃ri kuṛiko tahẽkantaea. Ar onko doko nạbi baṛayetʼ tahẽkana.
10 #
Apos 11.28
Ale do thoṛa din onḍele tahẽyen khan Jihudạ khon Agabus ńutuman mitʼṭen nạbiye hecʼena. 11Uni do ale ṭhen hecʼkate Pạulakʼ ḍanḍa paṭheakʼe raṛaketʼtaea ar onate acʼakʼ ti jaṅga tolketʼtaeteye menkeda, “Sonot Jiue meneda, “Jerusalemren Jihudiko do noa paṭheakʼren mạlik hõ nonkageko tolea ar boṅgan hoṛ jạtrenkoakʼ tireko jimạyea.”
12Noa kathale ańjomketʼ khan onḍenko hoṛko ar ale hõ Pạul ạḍile nehõradea jemon uni do Jerusalemte aloe calakʼ. 13Unre Pạule menkeda, “Rakʼ rakʼte monre cedakʼ dukpe imạń kana? Probhu Jisu lạgitʼ iń do Jerusalemre eken bondi ocokʼ do baṅ, bickom gocʼ ocokʼ hõń sapṛaogea.”
14Ado bae rebenlente ale dole thir hapeyena ar tayomtele menkeda, “Probhu Isorakʼ sana lekage baṛe hoyokʼma.”
15Niạ tayom moṭra jhoṭra tolkate ale do Jerusalemtele calaoena. 16Kạisạriạren adom celako hõ ale sãoteko calaoena ar Manason ńutuman Kupros dipren mitʼ hoṛakʼ oṛakʼteko idiketʼlea. Ar aleakʼ tahen reakʼ katha do uniyakʼ oṛakʼrege tahẽkantalea. Uni do pạhil celako modren mitʼ hoṛe tahẽkana.
Jerusalemre
17Ado Jerusalemtele seṭeren khan biswạsi boehako do kusiteko ataṅ daramketʼlea. 18Ar dosar hilokʼ Pạul do ale sãote Jakob ńeńele senena. Onḍe do manḍerren sanam murubbikoko tahẽkana. 19Pạul do onkoe joharatʼkoa ar acʼakʼ porcar talate cetʼleka Isor do boṅgan hoṛ jạtrenko talareye kạmi akada ona sanamakʼe lạiyatʼkoa.
20Noa kathako ańjomketʼ khan onko murubbiko do Isorko sarhaokedea ar Pạulko metadea, “E boeha, am mam ńeletʼkokange, tinạkʼ hajar hajar Jihudiko do Jisureko pạtiạu akana, ar onko sanamkoge Moseyakʼ ạn-ạri pańja lạgitʼ ạḍiko ahkaokʼ kana. 21Onko do khoborko ańjomakada, boṅgan hoṛ jạtrenko talare okoe Jihudiko menakʼko onko do Mose reakʼ ạn-ạri bạgikate senokʼ reakʼ sikhnạtem emakokana, metakʼme am do onkoren gidrạko bam khatna ocoako kana ar Jihudikoakʼ cạli leka senokʼ hõm baronetʼkoa. Ńitokʼ ale do cetʼle cekaya? 22Onko do khạṭigeko ańjoma amem hecʼakana mente. 23#Num 6.13-21 Onate ńitokʼ okale metam, ona baṛe onkaeme. Ale talare nonkan pon hoṛ menakʼkoa one okoe do mitʼṭecʼko khạṭi akawan. 24Noko hoṛ am sãote iditorakom ar onko soṅgete am hõ saphakʼme ar onkoakʼ bohokʼ upʼ hoyo giḍikatako reakʼ khoroc emokʼme. Unre sanam hoṛko baḍaea daṛeakʼa je, am reaṅ oka khoborko ańjomakatʼ ona do ạuṛiyakʼgea ar ạn-ạriko hõ ṭhik lekam manaoetʼkana mente. 25#Apos 15.29 Menkhan boṅgan hoṛ jạtren biswạsiko lạgitʼ okale goṭa akatʼ ona reaṅ do nonka ol katele baḍae ocoakatʼkoa je, onko do boṅga ṭhen samaṅakʼ bako joma, mãyãm hõ baṅ, limbạtʼ gocʼ janwarakʼ jel hõ bako joma ar jãhãlekan loṭghuṭi hõ bako kạmiya.”
26Unre Pạul do onko hoṛe iditoraketʼkote acʼhõ onko sãoteye saphayena. Ar dosar hilokʼ uni do mundilteye calaoena, ar onkoakʼ saphakʼ reakʼ kạmi tis cabakʼa mente ar mimitʼko lạgitʼ tis janwar teṅgenko hoyokʼa onakoe baḍae ocoketʼkoa.
Mundilre Pạule giriptaren
27Ado saphakʼ lạgitʼ ona eae din purạu lạgidokʼkan tahẽkanre Asiạ Prodesren adom Jihudiko do mundilre Pạulko ńelkedea. Onko do onḍe sanam hoṛko ạulạuketʼkoa ar Pạulko sapʼkedea. 28Ar ãṭ aṛaṅte nonka memenko ehopʼena, “E Israelko, dela hijukʼpe. Sanam jaegaren hoṛko ṭhen aboakʼ jạt ar aboakʼ ạn-ạri ar mundil upạrte okoe doe cetʼakokan uni hoṛ doe nui kangea. Ona chaḍa mundilre Junạnikoe aderetʼkote uni do noa sonot jaegaye bhonḍ akada.” 29#Apos 20.4 Onko do noa iạtegeko menkeda, ente noa lahare Ephesusren Trophimus hõ Pạul sãote nagrahareko ńelledea. Onateko hudiskeda, Pạul do Trophimus hõ mundilteye ạguakadea.
30Unre goṭa nagrahare gulmal ehopʼena. Hoṛko do mitʼ sãoteko ńir hecʼente Pạulko jhuṭiạukedea ar mundil khonko or oḍok kedea ar ona são sãote mundil reakʼ duạrkoko sińkada. 31Hoṛko do Pạul gojeko kurumuṭukan tahẽkanre, Romi palṭonkoren maraṅ subedar ṭhen khobor calaoena je, goṭa Jerusalem nagrahare gulmal hoyokʼkana. 32Unre Maraṅ subedar do adom subedarko ar palṭonko soṅgekate bhiṛ akatʼ hoṛko ṭhene ńir calaoena. Ar hoṛko do maraṅ subedar ar palṭonkoko ńelketʼko khan Pạul dadalko thirena.
33Unre maraṅ subedar do senkate Pạule giriptarkedea ar barea sikṛite tole lạgitʼe hukumkeda. Ona tayom uni doe kuliketʼkoa, “Nui hoṛ doe okoe kana? Ar cetʼe ceka akada?” 34Unre hoṛko modre adomko do mitʼ leka arhõ adomko do eṭakʼ lekako hohoyetʼ tahẽkana. Onate maraṅ subedar do sạri ghoṭna bae baḍae daṛeatʼte palṭon gaṛte Pạul idiye lạgitʼe hukumkeda. 35Ado Pạul siṛhi hạbicʼe seṭeren khan hoṛkoakʼ ti khon bańcaoe lạgitʼ palṭonko do gokʼ idiye hoyentakoa. 36Ar hoṛko do tayom tayomte ãṭ aṛaṅte hohowateko menkeda, “Uni do goje me.”
Hoṛko ṭhen Pạulakʼ katha
37Ado palṭon gaṛteko adere lạgidokʼkan tahẽkanre Pạul do maraṅ subedare metadea, “Am sãote thoṛa kathań roṛ daṛekea?”
Maraṅ subedare menkeda, “Junạni pạrsim baḍaegea? 38Misor disạmren uni hoṛ okoe do thoṛa din lahare hulkate pon hajar ḍạkuko hahaṅkarteye idiletʼko am do cetʼ uni hoṛ dom baṅkana?”
39Unre Pạule roṛ ruạṛkeda, “Iń do Kilikiạ Prodes reakʼ Tạrsus nagraharen mitʼṭen Jihudi hoṛ kạnạń. Jãhãlekan nagraharen hoṛ doń baṅkana. Dayakate onko hoṛ sãote katha roṛ ocowạńme.”
40Ado maraṅ subedarakʼ hukume ńamketʼ khan Pạul do siṛhi cetanreye teṅgoyena ar ti tulkate hoṛko thirokʼ lạgitʼe isạrawatʼkoa. Arko thiren khan Pạul do Ibri pạrsiteye metatʼkoa.
Currently Selected:
Aposkạmi 21: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.