Aposkạmi 3
3
Leḍha kokoe hoṛe bogeyen
1Mitʼ din Patras ar Johan do tarasiń okte reakʼ koejoṅre mundiltekin rakapʼ calakʼkan tahẽkana. 2Onḍe hoṛko do mundil reakʼ mońjko metakʼ duạr ṭhen dinạmge mitʼṭen hoṛ gokʼ ạgukateko dohokae kan tahẽkana. Uni do janam khonge leḍhageye tahẽkana. Ar mundilte bolokʼkanko ṭhen khon koe ńam lạgitʼ onḍeye doho ocokʼkan tahẽkana. 3Uni do Patras ar Johan mundilte bolokʼkane ńelketʼkin khan unkin ṭhene koekeda. 4Unre Patras ar Johan do unikin beṅgetʼ uricʼadea. Ona tayom Patrase menkeda, “Ạliń secʼ beṅgedme.” 5Unre uni hoṛ do jãhãnakʼe ńama aste unkin secʼe beṅgetʼ rakapʼkeda.
6Unre Patrase menkeda, “Sona ar rupạ do bạnukʼtińạ, menkhan okaṭakʼ menakʼtiń onageń emamkana. Nasaretren Jisu Mạsiyakʼ ńutumte beretʼme ar taṛamme.” 7Ado jojom ti sapʼkateye beretʼkedea ar unrege uniyakʼ jaṅga ar iḍi do keṭecʼentaea. 8Uni doe don beretʼena ar taṛam baṛaye ehopʼena. Tayomte uni do taṛam ar don donte Isor sarhao sarhaoete unkin sãote mundilteye boloyena. 9-10Ar hoṛko do uni taṛamkan ar Isor sarhaoedekanko ńelkede khanko oromkedea je, nui doe uni hoṛkana, one okoe do mundil reakʼ mońjko metakʼ duạrre duṛupʼkateye kokoekan tahẽkan. Ar unire oka hoyen onate hoṛko doko ṭhak cabayena.
Mundilre Patrasakʼ galmarao
11Uni kokoe hoṛ do Patras ar Johan tạkin bae bạgiyatʼkinạ. Ar hoṛko do Patrasakʼ kạmi iạteko hahaṛayente unkin ṭhenko ńir hecʼena. 12Unre onko do Solomonakʼ pinḍạreko tahẽkana. Ar Patras do onae ńelketʼ khan hoṛkoe metatʼkoa, “E Israelko, noa iạte cedakʼpe hahaṛakʼ kana? Ạlińakʼ daṛete se Isorakʼ bhoktite nui liń taṛam daṛe ocokedete cedakʼpe beṅgetʼ uricʼ ạliń kana? 13#Exo 3.15 Abraham, Isahak ar Jakobren Isor, metakʼme aboren hapṛamkoren Isorge noa kạmi hotete acʼren guti Jisuakʼ ṭhonoke sodor akada. Ape ma goje lạgitʼ mukhiyạkoakʼ tirepe soprotlede. Pilạt do aṛakʼkaegeye menleda, menkhan Pilạt samaṅre unipe baṅkedea. 14#Mat 27.15-23; Mrk 15.6-14; Luk 23.13-23; Jhn 19.12-15 Ape do uni sonoticʼ ar dhoromicʼpe baṅkedete mitʼṭen khũniạhi aṛakʼape lạgitʼpe khojleda. 15Okoe doe jionren mạlik kan unigepe gocʼkedea, menkhan Isor do gocʼko khon uniye jiwetʼ beretʼakadea; ar ale do onaren gohako kanale. 16Nuipe ńelekan arpe baḍaeyede kan hoṛ do, Jisureye pạtiạuente, uniyakʼ ńutumte daṛeye ńamkeda. Ar Jisu hotete oka pạtiạu hijukʼkan ona pạtiạuge uni do sanamko samaṅreye bogekedea.
17“E boehako, ńitokʼ ińiń baḍaea aperen murubbiko leka ape hõ begor bujhạutege Jisupe kurusledea. 18Menkhan Isor do ḍher din lahare sanam nạbiko hoteteye roṛleda Mạsi do duk jojom hoyokʼtaea; ar Isor do ona katha nonkageye purạukeda. 19Onate kại khon mon ạcurtape ar Isor secʼ ruạṛokʼpe jemon apeakʼ kạiko meṭaokʼtape; 20Ar ona iạte jemon Isor do uni Mạsi, metakʼme Jisui kol apeteye cerṭha ocope. Ente ape lạgitʼge uni doe bachao ocoakana. 21Isor do lahate leka sanamakʼ arhõe beretʼ ruạṛa mente ḍher laha khonge sonot nạbiko hoteteye roṛletʼa. Ar tin hạbicʼ acʼakʼ onako katha bae purạu unhạbicʼ Jisu do sermare tahen hoyokʼtaea. 22#Bib 18.15,18 (LXX) Moseye menleda;
‘Aperen Probhu Isor do aperen boehako tala khon iń leka mitʼṭen nạbiye teṅgoapea. Ar uniyakʼ katha leka ape do calakʼ hoyokʼtapea. 23#Bib 18.19 Ar okoe uniyakʼ katha bae ańjom uni do acʼren hoṛko khone marao giḍiyea.’
24“Ona chaḍa Sạmuel khon ehopʼkate tinạkʼ nạbikoko roṛakatʼ, onko hõ niạ okte reakʼ kathage lahareko lại oṭo akada, 25#Gen 22.18 ar ape ma onko nạbikoren bõsko kanpe. Aperen hapṛamko lạgitʼ Isor okae bondobos akatʼ tahẽkan, ape hõ coṅ onaren bhạgiyạdarko kanpe. Isor do Abraham noa kathateye bondobos akawade tahẽkana, ‘am bõsren hotete dhạrtiren sanam jạtrenko do bhorko ńama.’ 26Ar ape mimitʼko apeakʼ bạṛicʼ hor khon ạcurokʼte bhorape lạgitʼge Isor do ape ṭhen acʼren Guti Jisui kolledea.”
Currently Selected:
Aposkạmi 3: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.