Johan 18
18
Bạirikoakʼ tire Probhu Jisu
(Mathae 26.47-56; Mark 14.43-50; Luk 22.47-53)
1Ado noakoe roṛ sạtketʼ khan Jisu do acʼren celako sãote kedronko metakʼ mitʼṭecʼ nala hanasae parom calaoena. Onḍe do mitʼṭecʼ bagwan tahẽkana. Jisu ar acʼren celako do ona bagwanteko oḍok calaoena. 2Ar bạirikoakʼ tire okoeye soprotlede uni Jihudạ hõ ona jaega doe baḍaeakatʼ tahẽkana, ente ạḍi dhao Jisu do acʼren celako sãote onḍeye senokʼkan tahẽkana.
3Ar maraṅ naekeko ar Phạrusiko do Jihudạ soṅgete mitʼ dol palṭon ar kạmiyạko kolketʼkoa. Unre Jihudạ do onko sãote diuhe, mosal ar khanḍa banḍawante onḍeye seṭerena.
4Jisu do acʼre hoylạgidokʼkan jotowakʼ doe baḍaekan tahẽkana. Onate uni do oḍok hecʼkate onkoe metatʼkoa, “Okoepe ńam baṛayede kana?”
5Onkoko menkeda, “Nasaretren Jisu.”
Jisui metatʼkoa, “Iń kangeạń uni do.”
Ar bạirikoakʼ tire okoeye soprotlede uni Jihudạ hõ onko sãoteye teṅgo akan tahẽkana. 6Ado “Ińkangeạń,” menteye metatʼko khan onko doko pạcgotʼena ar otreko bhindạṛena. 7Jisu do arhõe kuliketʼkoa, “Okoepe ńam baṛayede kana?”
Metadeako, “Nasaretren Jisu.”
8Unre Jisui metatʼkoa, “Iń ma coń metapekange uni kangeạń. Ar ińgepe ńam baṛayediń khan noko do sen ocoakope.” 9Noa do hoyena Jisui menletʼ katha jemon purạukʼ, “Okoekom emakawạdiń onko modre mitʼ hoṛ hõ bạń atʼakadea.”
10Simon Patras ṭhen mitʼṭecʼ tarwaṛe tahẽkana. Patras do tarwaṛe bocʼkate maraṅ naekeren gutiyakʼ jojom luture heseketʼtaea. Uni gutiyakʼ ńutum do Malkus tahẽkana. 11#Mat 26.39; Mrk 14.36; Luk 22.42 Noa iạte Jisu do Patrase metadea, “Tarwaṛe do khapre bhoraokakʼme. Baba oka duk reakʼ bạṭiye emakawạdiń ona do cetʼ bạń ataṅa?”
Jisu do Hannas samaṅre
12Unre palṭonko ar onkoren subedarko ar Jihudi mukhiyạkoren kạmiyạko do Jisu sapʼkedeteko tolkedea. 13Ar Hannas ṭhenko idi maṛaṅkedea, ente Hannas do ona bochorren maraṅ naeke Kaeapharen hońhartetʼe tahẽkana. 14#Jhn 11.49,50 Nui Kaeaphage Jihudi mukhiyạkoe solhawatʼko tahẽkana je, goṭa jạtrenko bodolte mitʼ hoṛe gujukʼge boroṅ bhagea.
Patras Jisui baṅekan
(Mathae 26.58,69,70; Mark 14.54,66-68; Luk 22.54-57)
15Simon Patras ar eṭakʼ mitʼṭen cela do Jisukin pańja idikedea. Uni eṭakʼ cela do maraṅ naekeren oprom hoṛe tahẽkana. Uni cela do Jisu sãote maraṅ naekeakʼ bakher raca hạbicʼe bolo calaoena, 16menkhan Patras do bakher duạr ṭhene teṅgo tahẽyena. Unre maraṅ naekeren opromicʼ cela do bahrete senkate duạr horhoyicʼ kạ̃ṛmĩye galmaraoade khan bhitrite Patrase aderkedea. 17Uni kạ̃ṛmĩ do Patrase metadea, “Am hõ cetʼ uniren celako modren kanam?”
Patrase menkeda, “Baṅ kạnạń.”
18Unre bes rabaṅ paṛao akan tahẽkana. Ona iạte golamko ar kạmiyạko do koela seṅgel jolkate teṅgokateko jorogokʼkan tahẽkana. Ar Patras hõ onko sãote teṅgokate jorogokʼe ehopʼena.
Maraṅ naeke Jisuye kuliyede
(Mathae 26.59-66; Mark 14.55-64; Luk 22.66-71)
19Unre maraṅ naeke do Jisu acʼren celako reaṅ ar acʼakʼ cecetʼakʼ reaṅe kulikedea. 20Jisui roṛ ruạṛkeda, “Iń do hoṛko ṭhen sodortegeń galmarao akada. Ar Jihudiko mitʼ sãote okareko jarwakʼ ona sunạgogkore ar mundilre iń do jaogeń cetʼ akawatʼkoa. Ar danaṅre do cetʼge bạń roṛakada; 21enḍekhan cedakʼ iń dom kuliyediń kana? Ińakʼ katha okoeko ańjomakatʼ onkoge kulikom cetʼiń men akatʼkoa mente. Ar okań roṛakatʼ ona doko baḍaegea.
22Jisu noa kathae roṛketʼ khan sorre teṅgo akan tahẽkan kạmiyạko modren mitʼ hoṛ do uniye thapakedeteye metadea, “Maraṅ naeke nonkam roṛ ruạṛae kana?”
23Jisu do uniye metadea, “Bạṛicʼ iń roṛketʼ khan udukʼạń me. Menkhan bhageakʼ iń menakatʼ khan cedakʼem daleńkana?” 24Unre Hannas do maraṅ naeke Kaeapha ṭhen tolgeye kolkadea.
Patras do Jisu arhõe baṅe kan
(Mathae 26.71-75; Mark 14.69-72; Luk 22.58-62)
25Ado Simon patras teṅgokate tinreye jorogokʼ kan tahẽkana unre hoṛko do uniko metadea, “Am do cetʼ uniren celako modren mitʼ hoṛ dom baṅ kana?”
Patras do baṅketʼteye menkeda, “Baṅ iń doń baṅkana.”
26Patras okoeyakʼ luture heseletʼtae uniren mitʼ peṛa do maraṅ naekeren golame tahẽkana. Khan uniye menkeda, “Iń do bagwanre uni tulucʼ cetʼ bạń ńeletʼmea?” 27Patras do arhõe baṅkeda, ar unrege mitʼṭen sim sạnḍi doe rakʼgotʼkeda.
Jisu Pilạt samaṅre
(Mathae 27.1,2,11-14; Mark 15.1-5; Luk 23.1-5)
28Jihudi mukhiyạko do ạḍi setakʼre Kaeapha ṭhen khon Romren disạm cakʼlaoyicʼ Pilạtakʼ doṅgolte Jisuko idikedea. Menkhan onko do ona doṅgol bhitrite bako bololena jemon saphako tahente bańcaokʼ porob reakʼ bhojko jom daṛeakʼ. 29Unre Pilạt do onko ṭhen bahrete oḍok hecʼenteye metatʼkoa, “Nui hoṛ do cetʼe dos akatʼtepe dusiyede kana?”
30Jihudi mukhiyạkoko menkeda, “Bạṛicʼakʼ bae kạmile khan am ṭhen do ohole ạgukea.”
31Pilạte metatʼkoa, “Nui do idiyepe ar apeakʼ ạn leka bicạrepe.”
Onate Jihudi mukhiyạko do Pilạtko metadea, “Menkhan jãhãege gujukʼ sạjại emae reakʼ ektiạri aleakʼ do bạnukʼtalea.” 32#Jhn 3.14; 12.32 Jisu do cetʼleka gujukʼ hoyokʼtaea ona do laharegeye lạiletʼa. Noa do hoyena uniyakʼ ona katha jemon purạukʼ.
33Unre Pilạt do arhõ oṛakʼ bhitriteye boloyena ar Jisu hohowadeteye metadea, “Am do cetʼ Jihudikoren raj kanam?”
34Jisui menkeda, “Am do cetʼ apnarte noa katham roṛeda, se eṭakʼ hoṛ iń reaṅko lại akawatʼmea?”
35Pilạte roṛ ruạṛkeda, “Iń do cetʼ Jihudi kạnạń? Am jạtren hoṛ ar maraṅ naekekoge coṅ iń ṭhenko soprot akatʼme. Am do cetʼem ceka akada?”
36Jisui menkeda, “Ińakʼ raj do noa dhạrti reakʼ do baṅkana. Ente noa dhạrti reakʼ tahẽlen khan enḍekhan ińren hoṛko lạṛhạikokʼa jemon Jihudi mukhiyạkoakʼ tire aloń paṛaokokʼ; menkhan ińakʼ raj do nonḍenakʼ do baṅkana.”
37Pilạt do Jisui metadea, “Enḍekhan am do cetʼ raj kanam?”
Jisui roṛ ruạṛkeda, “Am do ṭhikgem menakada, iń doń raj kana. Iń do sạri goha emokʼ lạgitʼgeń janam akana ar ona lạgitʼge dhạrtiteń hecʼakana. Ar okoeye sạriyakʼren kan uni do ińakʼ kathae ańjoma.”
38Pilạt do uniye metadea, “Sạriyakʼ do cetʼ kana? Noa katha menkate uni do arhõ bahrete senkate Jihudi mukhiyạkoe metatʼkoa, “Iń do nuiyakʼ cetʼ dosge bạń ńametʼtaea.
Jisu do gujukʼ lek kanae menteye bicạr dusi ocoyen
(Mathae 27.15-31; Mark 15.6-20; Luk 23.13-25)
39Menkhan apeakʼ mitʼṭecʼ niạm menakʼa, bańcaokʼ porobre mitʼṭen kạidiń aṛakʼape. Ape do cetʼ Jihudikoren rajiń aṛakʼapepe khojkana?”
40Noa iạte sanamko ãṭ aṛaṅte hohowateko menkeda, “Uni do baṅ, Barabbage.” Uni Barabba do mitʼṭen ḍạkui tahẽkana.
Currently Selected:
Johan 18: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.