Mark 11
11
Jisu do Jerusalemteye bolokʼkan
(Mathae 21.1-11; Luk 19.28-40; Johan 12.12-19)
1Ado Jerusalem sorko seṭeren khan onko do Jạitun buru ṭhenakʼ Bethaphage ar Bethaniạ ato ṭhenko hecʼena. Onḍe seṭerkate Jisu do acʼren barea cela noa menkateye kolkatʼkina, 2“Aben do samaṅ senakʼ atote calakʼben. Ar atote bolokʼ jokhecʼ mitʼṭen gadha hopon onḍe tol akadeben ńamea. Unire do okoege tishõ bako decʼakana. 3Aben do raṛakate nonḍe ạguiye ben. Ar jãhãegeye kuli ben, ‘cedakʼ ben nonkayeda?’ Enḍekhan ben mena, ‘Probhu do nui reakʼ jạruṛ menakʼtaea; ar uni do usạrateye aṛakʼ abena.’ ”
4Unre unkin dokin senena ar gadha hopon chaṭka duạr ṭhen tolakade kin ńamkedea. Ar tinrekin raṛayede tahẽkana, 5unre onḍe okoeko teṅgo akan tahẽkan onko doko metatʼkinạ, “Cetʼ ben cekayeda? Gadha hopon do cedakʼ ben raṛayedea?”
6Unkin cela do Jisu okaleka roroṛe metatʼkin tahẽkan onkagekin metatʼkoa. Unre onko do gadha hoponko idiocowatʼkinạ. 7Ado Jisu ṭhenkin ạgukede khan uni cetanre ạkinakʼ oyonakʼkin aṭetʼkeda. Ar Jisu do unireye decʼena. 8Ar ạḍi utạr hoṛ do akoakʼ oyonakʼko hor horteko aṭetʼkeda ar eṭakʼko do goḍa khon ḍạrko hese ạguketʼte hor horteko aṭetʼ idikeda. 9#Ser 118.25,26 Ar Jisu laha lahate calakʼkanko ar uni pańjayekanko do ãṭ aṛaṅteko hoho idiyetʼ tahẽkana,
“Hosanna! Bhorangeae Probhu Isor ńutumte daraekạnicʼ do.
10Bhorangea aboren baba Dạudakʼ darakan raj do.
Coṭ utạrre Hosanna!”
11Jisu do Jerusalemre senkate mundilteye boloyena ar beṛhaete jotowakʼe ạri bạndhiketʼa, menkhan bela khaṭogeye tahẽkante acʼren gelbar celakoante Bethaniạteye calaoena.
Jisu loa dareye sarapakʼkan
(Mathae 21.18,19)
12Ado dosar hilokʼ onko do Bethaniạ ato khonko oḍokʼ hijukʼkan tahẽkanre Jisu do reṅgecʼ kedea. 13Unre loa belekʼ okte do baṅ tahẽkana, menkhan enrehõ uni do sạṅgiń khon mitʼṭecʼ loa dareye ńel ńamketʼte onare jo ńam lạgitʼe sen sorena. Ar ona dare sore senen khan onare sakam chaḍa ar cetʼge bae ńel ńamleda. 14Onate dareye metatʼa, “Okoege tishõ amakʼ jo aloko jom ńamma.” Celako do Jisuakʼ noa kathako ańjom tiyokʼkeda.
Jisu Jerusalem mundilteye boloyen
(Mathae 21.12-17; Luk 19.45-48; Johan 2.13-22)
15Ado Jerusalemteko seṭeren khan Jisu do mundilteye boloyena ar onḍe kiriń-ạkhrińkoe laga oḍokketʼkoa. Uni do ṭaka-poesa bodoletʼkan hoṛkoakʼ ṭebilko ar parwa kiriń-ạkhrińkoakʼ mạcikoe ulṭạu giḍikatʼtakoa. 16Uni do mundil talate kiriń ạkhirińkoakʼ oka jinis hõ bae parom idiocoatʼkoa. 17#Jes 56.7; Jir 7.11 Ado cetʼako jokhecʼ onko hoṛkoe metatʼkoa, “Sostorre cetʼ nonka baṅ ol akana, ‘ińakʼ oṛakʼ do sanam jạtrenko lạgitʼ koejoṅ oṛakʼ ńumogokʼa mente?’ Menkhan ape do ḍạkukoakʼ danderpe hoyoco akada!”
18Maraṅ naekeko ar sostor baḍaeko do noa katha ańjomkate Jisu goje lạgitʼ ạt ńam baṛaeko ehopʼena. Onko do Jisuko botoraekan tahẽkana, ente hoṛko do Jisuakʼ cecetʼakʼteko bhaṛo caba akan tahẽkana.
19Ar ạyupʼen khan uni do celakowante nagraha bahreteye oḍok calaoena.
Loa dare reaṅ
(Mathae 21.20-22)
20Ado setakʼ jokhecʼ ona horteko parom calakʼkan tahẽkanre celako do rehetʼ sudhạ loa dare rohoṛ akanko ńelkeda. 21Patras do Jisuakʼ katha disạketʼteye menkeda, “E Guru, ńelme okaṭakʼ darem sarapatʼ tahẽkan ona do rohoṛ akana.”
22Unre Jisui metatʼkoa, “Isorre biswạs tahentapema. 23#Mat 17.20; 1 Kor 13.2 Sạrigeń metapekana, jãhãege begor digdhạte noa burui metakʼ, ‘nonḍe khon uṭhạukʼte jalapurire khadlekʼme,’ are pạtiạukʼ baṅma, okae menetʼ ona do hoyokʼa mente, enḍekhan uni lạgitʼ do hoyokʼgea. 24Onateń metapekana, jãhãnakʼgepe koe arpe khoj, pạtiạukʼpe ape do onape ńam akada, ar ape lạgitʼ ona do hoyokʼgea. 25#Mat 6.14,155 Apepe koejoṅre jãhãe upạrte jãhãnakʼ tahentape khan uni do ikạyepe, 26jemon aperen sermaren Baba hõ apeakʼ kạikoe ikạitape.”
Probhu Jisu ar dhorom guruko
(Mathae 21.23-27; Luk 20.1-8)
27Ona tayom Jisu ar acʼren celako do arhõ Jerusalemteko hecʼena, ar mundilreye dãṛã baṛaekan tahẽkanre maraṅ naekeko, sostor baḍaeko ar murubbiko do uni ṭhen hecʼenteko kulikedea, 28“Cetʼ ektiạrite noakom kạmikana? Ar okoe noa ektiạriạ doe em akawatʼmea?”
29Jisui roṛ ruạṛatʼkoa, “Iń do mitʼṭecʼ kathań kulipea. Adope roṛ ruạṛ daṛeạń khan iń hõń lạiyapea oka ektiạrite noakoń kạmikana mente. 30Johan do bạptisma emokʼ reakʼ ektiạri oka khone ńamleda, Isor khon se manwako secʼ khon?”
31Unre onko do ako talare noako galmaraoana, “Menle khan bon ‘Isor ṭhen khon,’ enḍekhane meta bona, ‘cedakʼ tobe bape pạtiạuadea?’ 32Arhõ bon men lekhan, ‘manwa secʼ khon,’ enḍekhan?”
Onko do hoṛkoko botorakokan tahẽkana, ente sanamkoge Johan do mitʼṭen nạbi menteko manaoede tahẽkana. 33Onateko menkeda, “Ale do bale baḍaea.”
Unre Jisui metatʼkoa, “Enḍekhan iń hõ bạń lạiyapea oka ektiạrite noakoń kạmikana.”
Santali Bible © Bangladesh Bible Society, 2021.