Matayo 6
6
Uvaarëya atuki
1“Ighoji utenda ntendo yanyu njija usonge a antu gusoko mumanyike kunë veeso. Nëmwatenda uvii, Tata wanyu në wëë girunde atiumufa gëfewa.
2“Uvii, nëwaduya waryo, utakhuvee mbëru usonge ako. Utatende mwino antu alakuno nëvëutendaa mumasinagogi na munjëa gusoko antu vëvakurye. Tutë nene namwëëra, veeso vadahie uhanga gëfëwa gawe. 3Ëgweeso vee nëwaduya dahwa, mukhono wako wa gëmoho utamanyee rësëë në mukhono wako wa gëlëlo ugutenda. 4Duya dahwa ako gwa gëmpihë, na Tata wako nëugoonaa mantu nëëfihëkie ugugufa gëfewa.
Marombi
(Luk 11:2-4)
5“Nëmuuromba, mutatendee mwino anyalakuno. Vasaa veyanjite gëmëka na uromba mumasinagogi na umpeoa njëa gusoko antu, vëvoone. Tutë namwëëra nyenye vasaa vadahie uhanga gëfewa gawe. 6Ëgweeso veve nëwooromba, umbee ako, wuutie ruri na romba kunë Tata wako nëugoonaa mugëmpihë, na Tata wako nëugoonaa mugëmpihë ugugufa gëfewa. 7Nanëmuuromba mutaghumangee nkhani mwino antu va Ndughu ingëja. Vasaa vëusëghaa mwino Muungu uguvategheeya gusoko a nkhani yawe në nyingë. 8Mutatendee mwino veeso. Gusoko Tata wanyu umanyie go nëmuuyafenja nëkëë aja mwinaromba. 9Uvii, nyenye rombi vii:
Tata witu vee në wëë girunde,
Rina rako rëëriwe.
10Utemi wako uje,
Nëuguyafenja ëtendeke
Mung'ë ëyëë mwino ëgutendekaa girunde.
11Ugufe rëo malëwa itu nëmaja,
12Ugurekëe sese hëërë yitu,
Mwino see guuvarekëa vasaa
nëvina hëërë kunë sese,
13Na utagutongeree sese mung'ë a maëghëëyo;
ëgweeso utyoe ufuma mu uvë.
14“Gusoko nyenye nëmwaarekea antu mahutye awe, Tata wanyu në wëë girunde ugumurekëa nyeenoo. 15Ëgweeso nëmwadëa uvarekea antu mahutye awe, Tata wanyu noo atiumurekea nyee mahutye anyu.”
Ufunga
16“Nëmwafunga mutatendee mwina uvavi mwino anyalakuno. Vasaa vëunyaryaa masyu awe vëdahe umanyëka na antu mwino vëfungie. Nene ngumwëëra tutë, vasaa vadahie uhanga gëf'ewa gawe. 17Ëgweeso veve nëwoofunga, vira itwe rako makuta na oya usyu wako. 18Muntu atamanyee mwino ufungie ëgweeso umanyëke gutufu kunë Tata wako në wëë mugëmpihë. Tata wako mweeso noo nëugoonaa mugëmpihë ugugufa gëfewa.
Mpamba girunde
(Luk 12:33-34)
19“Mutaivëkëyee mpamba afaa mu urëmi, fana noondo nanë ukhoto na ahëmbi vëgingëa na uhëmba. 20Ëgweeso ivëkëyi mpamba girunde fana noondo nanë ukhoto ëtiudaha uruvanga, fana ahëmbi noo vëtigingëa vëhëmbe. 21Gusoko faafo fana mpamba ako ërë, u faafo noo kunë nkhoo ako injë.
Weru wa Mwërëë
(Luk 11:34-36)
22“Riho u gemweega mwëërë. Nësa riho rako ifanga, mwëërë wako woong'e ugutendeka wëë muweru. 23Ëgweeso nësa riho rako ti ija, mwëërë wako woong'e ugutendeka wëë mukiti. Uvii, nësa weru në wëë mukhatë ako uu, nëkiti, kiti gasëë gëutendeka gëwurë!
Muungu na maari
(Luk 16:13)
24“Gutie muntu nëudahëtë uvatumamëa aküü vavëë; gusoko mbesa mweeso ugumuhura umwedu na umuyanja ungëja, mba mweeso ugifunya kunë umwedu na umuhorya ungëja. Gusoko mutiudaha umutuma mëa Muungu itambëëmwe na maari.
Wisaghasaghëi
(Luk 12:22-31)
25“Uvii, nene ngumwëëra nyenye tajaa moosëghanëya na uhanga uusaghasaghëi gwa ilëwa na intu roonywa nëmuufenja gwa uduvi, mbesa gwa masaa nëmuufenja gwa mëërë anyu wurë, uduvi utikëire ilëwana na mwëërë ti ukëra masaana? 26Yiraraavi nyonyi ya gihaka: Itiufandëaa, itiutënangaa, kangë itina iseengwa mba nduvë. Mbesa uvii, Tata wanyu në wa girunde uguyilësyaa. Wurë, nyenye ti mwëvaja nanguu ukera isiina? 27Uu anyu mukhatë anyu nëwasëghanëya na ukaghata ino ugudaha goongeya itungo ra uduvi wakwe mbesa gwa itiku rimwe? 28Na gwa masaa, asikë uhanga wisaghasaghei? Raraavi sembe ya gihaka mwino ëguteghetaa. Itiutendaa mwëmo mbesa usoghota. 29Gweeso, nene ngumukhanëa nyenye nanë Solomoni mweeso, na üküü na uja wakwe woong'e inatambëëywaa uja mwino rëmwe ra sembe yasii. 30Nësa, uvii, Muungu ugurëtambëëyaa uvii ihwa ra umughunda në rëo rërëfo na fadiu rëughumëwa mumoto, wurë mweeso atiutenda umuriecha nyenye, nyee antu nëmwina uhuvëi wëënduvëëngë? 31Uvii, nyenye tajee moosëghanëya na: ‘Mba gula ntuni?’ ‘Mba gunywa ntuni?’ Mba ‘Guryaa ntuni?’ 32Gusoko asaa oong'e ëgulwewaa na antu nëvëtimumanyie Muungu. Tata wanyu në wë girunde umanyie mwino muufenja mantu asaa oong'e. 33Uvii, ufenji tanju Utemi wa Muungu na mafenji akwe, na ayoo angëja oong'e muufewa gwa goongeeywa. 34Uvii, mutajee goosëghanëya na ukhaghata a fadiu, gusoko fadiu ëgëkhasëkea nyeeso. Malwe a itiku rëmwe ëmudahëte gwa itiku rësëë.
Currently Selected:
Matayo 6: RIMRC
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Kirimi New Testament © Bible Society of Tanzania, 2008.