Genesis 17
17
Ndjambi ma rukurura ena ra Abram na ziki omasukarisiro
1Abram tja ri nozombura omirongo muvyu na muvyu, Muhona we rimunikisa ku ye a tja: “Owami Ndjambi Omunamasaaehe, kara nonḓuviro ku ami, nu aruhe tjita ousemba. 2Nu ami me vanga okutjita omerikutiropamwe na ove, nu me takavarisa ozondekurona zoye tjinene.” 3Abram arire tja u onḓurumika, nu Ndjambi wa hungira kuna ye na tja: 4“Omerikutiropamwe wandje na ove owo nga: Ove mo karira ihe yomihoko omingi. 5#Rom 4:17Opu mo zu okuhinakuisanewa Abram rukwao, nungwari mo rire Abraham. Orondu tjinga ame ku tjiti u rire ihe mukururume womihoko omingi. 6Ami me ku pe ozondekurona ozengi tjinene, nu me ku tjiti u rire omihoko omingi; move mamu zu ozombara wina.
7 #
Lk 1:55
“Ami me zikamisa inga omerikutiropamwe omakarerere pokati ketu na ove nozondekurona zoye okuza komuhoko nga komuhoko, mbi rire Ndjambi woye nga kozondekurona zoye zokombunda yoye. 8#Oviu 7:5Nu me yandja kove na kozondekurona zoye ehi ndi mu u ri otja owozonganda. Ehi ndi arihe ra Kanaan mari karira oreṋu nga aruhe, nami me karira Ndjambi wawo.”
9Tjazumba Ndjambi wa hungira ku Abraham a tja: “Ove nozondekurona zoye ṱakamiseye omerikutiropamwe wandje nga okuza komuhoko nga komuhoko. 10#Oviu 7:8; Rom 4:11Omerikutiropamwe wandje ngu mamu ṱakamisa owo nga: Otjirume atjihe tji tji ri mokati keṋu nga tji sukarisiwe. 11Ihi otji matji rire otjihako tjomerikutiropamwe pokati kandje na eṋe. 12Okanatje akehe okazandu ku keri mokati keṋu nga ke sukarekwe ngunda ake nomayuva hambondatu; nomukarere auhe ngwa kwatwa monganda poo ngwa randwa mowozonganda ngu he ri owomuhoko woye, wina nga sukarekwe. 13Tjiri, auhe ngwa kwatwa monganda poo ngwa randwa nga sukarekwe; ihi otji matji rire otjihako kotutu tweṋu tjomerikutiropamwe wandje omakarerere. 14Omuvena auhe ngu ha sukarisirwe ma isiwa mo momuhoko, tjinga e ha ṱakamisire omerikutiropamwe wandje.”
15Tjazumba Ndjambi wa tja ku Abraham: “Ove o uhara amo isana omukazendu woye ena ndi Sarai rukwao; ena re nambano mari rire Sara. 16Ami memu sere ondaya, nu muye ami me ku pe omuatje omuzandu. Ami memu sere ondaya, neye ma rire ina yomihoko; mozondekurona ze mamu zu ozombara zoviwaṋa.”
17Abraham arire tja u onḓurumika na utu okuyora ame ripura nai: “Omurumendu ma sora okumuna omuatje tja vaza otjiwondo tjozombura esere rimwe are? Nu Sara ma sora okupanduka notjiwondo tjozombura omirongo muvyu are?” 18Nu Abraham wa tja ku Ndjambi: “Ami me ningire kutja Ismael ma kamune omakwizikiro ngu wa tjita ku ami!”
19Nu Ndjambi wa zira ku Abraham a tja: “Tjiri, omukazendu woye Sara me ku pandukire omuzandu; nove mo mu ruku Isak. Ami me zikamisa omerikutiropamwe wandje puna ye nga kozondekurona ze; inga owo omerikutiropamwe omakarerere. 20Nu ku ingwi Ismael ami mbe ku zuvire wina: Tara, me mu sere ondaya ne mu pe orukwato nozondekurona ozengi tjinene. Neye ma rire ihe yovahona ovahivirikwa omurongo na vevari, nami me mu tjiti kutja a rire otjiwaṋa otjinene. 21Nungwari omerikutiropamwe wandje me ye zikamisa nomuzandu woye Isak, ngu ma pandukwa i Sara moruveze mangara tjingero ndwi mombura ndji mai yende.” 22Nu Ndjambi tja mana okuhungira kuna Abraham, arire tja i.
23Nu meyuva tjingero ndo Abraham wa kara nonḓuviro ku Ndjambi na sukarisa omuzandu we Ismael na avehe mba ovarumendu mba kwatwa monganda ye, na imba mba randwa novimariva. 24Nu Abraham omuini wa ri nozombura omirongo muvyu na muvyu tja sukara. 25Nomuzandu we Ismael wa ri nozombura omurongo nandatu tja sukara. 26Abraham nomuzandu we Ismael va sukara meyuva tjingero, 27pamwe novakarere ve avehe.
Currently Selected:
Genesis 17: HRR-UNI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Herero Revision Bible © Bible Society in Namibia, 2021.