Genesis 31
31
Jakob ma taura komurungu wa Laban
1Jakob wa zuva ovazandu va Laban amave tja: “Jakob wa kambura oviṋa avihe, mbi ri ovya tate; noutumbe we auhe wa isa moviṋa vya tate.” 2Jakob tja tara momurungu wa Laban, tjimanga otja muna kutja eye ke tji ri nawa na ye otja tja ri rutenga. 3Nu Muhona wa tja ku Jakob: “Twende u yaruke kehi rooiho na komuhoko woye; nami me kara puna ove.”
4Jakob arire tja hindi ombuze kooRahel na Lea kutja ve hakaenene mokuti ku kwa ri ozonyanda ze. 5Neye wa tja ku wo: “Ami mba munu kutja omurungu waiho kuna ami kau tji ri otja rukuru; nungwari Ndjambi wootate wa kara puna ami. 6Neṋe amuyevari mamu tjiwa kutja mba ungurira iho nomasa wandje aehe; 7vari iho we ndji wovisa na rundurura ondjambi yandje ovikando omurongo. Nungwari Ndjambi ke mu yandjerere okundjitjita otjipo. 8Laban tja tja: ‘Ozongombo ozombinḓe onḓu maze rire ondjambi yoye,’ okutja ozonyanda azehe otjaa ze kwata oungombona ouvinḓe; neye tja tja: ‘Ozonyanda zotuvao ngaze rire ondjambi yoye,’ okutja ozonyanda azehe otjaa ze kwata oungombona wotuvao. 9Ndjambi otja yeka iho ozonyanda ne ze yandja ku ami.
10“Nu moruveze rwokuhambwa kwozonyanda ami mba muna moruroto ozondwezu zozongombo nḓaa ze hamba ozonyanda kutja za ri notuvao nozombinḓe nozombonde. 11Nomuengeri wa Ndjambi wa hungira ku ami moruroto na tja: ‘Jakob!’ Ami e itavere e tja: ‘Owami ngwi!’ 12Neye wa tja: ‘Yera omeho woye u tare ozondwezu zozongombo nḓu maze hamba, ozo ze notuvao nozombinḓe nozombonde. Ami mba tjita nai, tjinga amba muna avihe Laban mbya tjita kove. 13#Gen 28:18-22Owami Ndjambi, ngu mba munika kove mObetel, ove ku wa twirisa ewe rotjizemburukiro nomaze womiṋinga, nu ku wa tjitira omakwizikiro ku ami. Nambano rongera, za mo mehi ndi u yaruke kehi rongwatero yoye.’ ”
14OoRahel na Lea otji va zira ku Jakob ave tja: “Kape notjiṋa tji tja hupu eṱe okurumata pu tate. 15Hapo eye ketu vara otja ovozonganda are? Eye we tu randisa, nu nambano wa mana ovimariva avihe mbya muna mu eṱe. 16Outumbe auhe Ndjambi mbwa yeka tate ombu ri owetu novanatje vetu. Nambano tjita ngamwa atjihe Ndjambi tje ku raera.”
17Jakob arire tja rongere okuyaruka na kavirisa ovanatje novakazendu ve kozongamero, 18neye wa hinga ozonyanda ze azehe; nu avihe mbya muna mOmesopotamie wa twaerera ku ihe kehi ra Kanaan. 19Laban ngunda a ya okukahora ozonḓu ze, nu ngunda e ha ri mo, Rahel otja vaka otjiserekarera tjotjisenginina tjomondjuwo ya ihe. 20Nu Jakob wa wovisa Laban, Omuaramea, okuhinokumutjivisa kutja ma i. 21Neye wa taura noviṋa avihe mbya ri na vyo, a kakonda onḓonḓu Eufrat na hungama ozondundu za Gilead.
Laban ma tezere Jakob
22Kombunda yomayuva yetatu Laban wa raerwa kutja Jakob wa hena. 23Eye arire tja toora ovandu puna ye na tezere Jakob oure womayuva hambombari nga tje kemuvaza kozondundu za Gilead. 24Nu ouṱuku mbo Ndjambi weya ku Laban, Omuaramea, moruroto, na tja ku ye: “Ṱakamisa kutja o ha hungire embo ku Jakob.” 25Laban wa kavaza Jakob a tono ozondanda mozondundu. Nu Laban novandu ve wina va tona ozondanda zawo mozondundu za Gilead.
26Laban arire tja tja ku Jakob: “Okutjavi tji we ndji wovisa, no toora ovasuko vandje otja ovahuurwa? 27Okutjavi tji wa hene nokuhinokundjiraera? Andakuzu we ndji raera, etje ku esa okuyenda mondjira yoye nondjoroka nomaimburiro nombosiro yovinangoma noviharpe. 28Wina ko ndji esire kutja mbi hupite ovanatje vandje novanatje vawo. Nao wa tjita ouyova! 29Ami mbi nomasa okumutjita otjipo. Nungwari ouṱuku mbwa zu ko Ndjambi waiho we ndji raere a tja: ‘Ṱakamisa kutja o ha hungire embo ku Jakob.’ 30Ami me tjiwa kutja ove wa ya mena rokutja wa ri nonḓero onene okuyaruka konganda yaiho. Nu otjiserekarera tjotjisenginina tjandje we tji vakere tjike?”
31Nu Jakob wa zira a tja ku Laban: “Ami mba tira, nu mbe ripura kutja ngahino mo ndji yeka ovanatje voye. 32Nungwari tji mo munu kutja pena umwe ngu notjiserekarera tjotjisenginina tjoye, nga ṱe. Ove paha otjiṋa ngamwa tji tji ri otjoye momurungu wovarumendu imba womuhoko wetu, nu u tji toore.” Nungwari Jakob ka tjivirwe kutja otjiserekarera tjotjisenginina tja vakwa i Rahel.
33Laban wa hita mondanda ya Jakob na paha; tjazumba ookuhita mondanda ya Lea na mozondanda zovakarere imba ovakazendu vevari. Nungwari eye ka mwine otjiserekarera tjotjisenginina tje. Tjazumba arire tja hiti mondanda ya Rahel. 34Rahel otja toora ihi otjiserekarera tjotjisenginina tjondjuwo ne tji twa mondjaṱu yotjikaviriro tjongamero na haama kombanda yatjo. Nu Laban wa tjingatjinga mondanda aihe, nungwari ke tji mwine. 35Rahel wa tja ku ihe: “O pindike na ami, muhona wandje, tji mbi hi nokusora okusekama komurungu woye; orondu tji mbi ri momuhingo woukazendu.” Nu Laban wa tjingatjinga, nungwari ka munine ihi otjiserekarera tjotjisenginina.
36Jakob arire tja ṱomazenge na posisa Laban na tja: “Ami mba tataiza tjike, nu mba katuka tjike, tji tje ku pa ousemba wokundjitezera. 37Nu tji wa zu nokupaha mokati kouini wandje wa munu mo otjikeṋa tji tji ri ouini wondjuwo yoye? Tji pitisa imba momuhoko wandje novoye pu mave tji munu, nu ve pangure kutja ngu ri osemba pokati ketu na ove, ouṋe.
38“Ami mba kara puna ove oure wozombura omirongo vivari; ozongombo nozonḓu zoye kaze na pu za hukura, nami hi na pu mba rya ozondwezu zotupanda twoye. 39Onḓu tji ya ṱu i ovipuka vyokuti, ami hi na pu mbe i eta kove okuyarisa kutja indji kandjo yandje; nungwari ondjo ndji iyei tjindi; ove iyo ningire otjisuta ku ami, nangarire kutja ya ṱu omutenya poo ouṱuku. 40Ovikando ovingi ami ee ṱoupyu omutenya nee ṱombepera ouṱuku, hiye sora okurara. 41Ozombura omirongo vivari ami mba kara monganda yoye; ami mbe ku ungurira ozombura omurongo na ine mena rovasuko voye aveyevari, nozombura hamboumwe mena rovinamuinyo vyoye, nove wa rundurura ondjambi yandje povikando omurongo. 42Andakuzu Ndjambi wootate, Ndjambi wa Abraham ngwa yozikirwe i Isak wina, ka ri puna ami, otjo ndji ramba ambi ri tjo. Nungwari Ndjambi wa muna ondjenda yandje, noviungura, mbi mba ungura; nouṱuku mbwa zu ko otja tjiti ombanguriro ye.”
Omazuvasaneno pokati kooJakob na Laban
43Nu Laban wa zira ku Jakob a tja: “Ovasuko mba ovandje, ovanatje mba ovandje, nozonyanda nḓa ozandje; avihe, mbi mo munu ovyandje. Nungwari nambano me sokutjita tjike kovasuko vandje novanatje vawo mbu va panduka. 44Nambano osemba! Ngatu tjite omazuvasaneno ngu maye rire omahongonone pokati kandje na ove.”
45Nokuzambo Jakob otja zika ewe rotjizemburukiro. 46Narire tja raere ovarumendu ve okuwonga omawe, ngu va twa pamwe; nowo va tjitira omariro pombindi ndji. 47Nu Laban we i ruka Jegar-Sahaduta, nungwari Jakob we i ruka Galed, okutja “Ombindi ohongonone.”
48Laban arire tja tja ku Jakob: “Ombindi ndji ondji mai rire ohongonone pokati kandje na ove,” poṋa mbo opu pa rukirwa Galed. 49Nu “Muhona nge tu tjevere ngunda atwa haṋika peke.” Laban wina opa rukira ombindi ndji ena Mispa, okutja “Opomatjeverero”. 50Laban arire tja tja nai rukwao: “Tji mo tatumisa ovasuko vandje poo ove tji mo kupu ovakazendu varwe posi yovasuko vandje, nandi pe hi nomundu pu eṱe, zemburuka kutja Ndjambi eye omuhongonone pokati ketu.” 51Nu Laban arire tja tja ku Jakob: “Tara, ombindi na indi ewe rotjizemburukiro mbi mba ziki pokati ketu, ovyo mbi! 52Ombindi ndji na indi ewe rotjizemburukiro aviyevari mbi ngavi rire ovihongonone: Ami tji mbi nomeripuriro wokukurwisa, himee kapita pombindi ndji; nove wina komoo kapita pu yo poo pewe ndi rotjizemburukiro, tji u nomeripuriro wokundjirwisa. 53Nu Ndjambi wa Abraham na Ndjambi wa Nahor ma pangura pokati ketu.” Nu Jakob wa yana ku Ndjambi ngwa yozikwa i ihe Isak. 54Nu Jakob wa punguhira ombunguhiro kondundu, na isana ovandu ve, ve ye okurya. Nu tji va za nokurya, va rara kondundu ouṱuku mbo. 55Nomuhuka omunene mependukirwa Laban wa hupita ovanatje vovasuko novasuko ve, ne ve sere ondaya, na yaruka konganda ye.
Currently Selected:
Genesis 31: HRR-UNI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Herero Revision Bible © Bible Society in Namibia, 2021.