Johanes 5
5
Omaverukisiro potjizeva tja Betesda
1Kombunda yoviṋa mbi pa ri omukandi wOvajuda, nu Jesus opa ira kOjerusalem. 2Nu pOmuvero imbwi wozOnḓu mOjerusalem pa ri otjizeva tji tja ri nomahitiro yetano nga ri nozongunḓe, nu tjiyaku zu Betesda mOtjiheberi. 3Nu momahitiro nga mwa rarere ovavere ovengi, okutja ovapoṱu noviṱeṱu novaremane. Owo aave undju omeva ye nyinganyinge, 4orondu porumwerumwe omuengeri wa Muhona aa pundu motjizeva okunyinganyingisa inga omeva. Omuvere ngwa tenge po okupunda motjizeva, omeva tji ya zu nokunyinganyingisiwa, aa verukisiwa komutjise ngamwa auhe mbwa ri na wo. 5Nu mokati kawo mwa ri omundu ngwa verere oure wozombura omirongo vitatu na hambondatu. 6Jesus we mu muna a rara mbo, nu aa tjiwa kutja wa vera oure woruveze orure nao, narire tje mu pura a tja: “Mo vanga okuveruka?”
7Ingwi omuvere arire tja ziri a tja: “Muhona, ami hi nomundu mba ngu me ndji pundisa motjizeva omeva tji ya zungwa, nu tji me vanga okupunda aruhe mbi tengerwa po i omukwetu warwe.”
8Jesus wa tjere ku ye: “Sekama, toora oruara rwoye nu u kawondje.”
9Tjimanga ingwi omundu a veruka, narire tja toora oruara rwe na utu okukawondja.
Notjiṋa hi tja tjitirwe mesabata. 10#Neh 13:19; Jer 17:21Ovanane vOvajuda otji va raera omundu ngwi ngwa verukisiwa ave tja: “Ndinondi esabata, nu pa tjaerwa kove okutjinda oruara roye.”
11Eye a ziri a tja: “Omundu ngwi ngwe ndji verukisa ongwe ndji raere kutja hi toore oruara rwandje nu mbi kawondje.”
12Owo ave mu pura ave tja: “Omundu ngwe ku raere kutja toora oruara roye nu u kawondje, owaṋi?”
13Nungwari ingwi omundu ngwa verukisirwe kaa tjiwa kutja eye owaṋi, Jesus tjinga a zenga mokati kovandu, novandu tjinga ava ri ovengi poṋa mbo.
14Kombunda yanao Jesus we kemuvaza mondjuwo ya Muhona na tja: “Puratena, ove nambano wa veruka; o tjiti ourunde rukwao tjapo otjiṋa otjivi ngaa tji tjitwa kove.”
15Okuzambo omundu ngwi arire tja kaserekarera kovanane vOvajuda kutja oJesus ngwe mu verukisa. 16Owo opu va utira okuhumisa Jesus nave mu sekamene, eye tjinga a verukisa omundu mesabata. 17Nungwari Jesus we ve zirire a tja: “Tate aruhe u ungura, nami wina otji mbi sokuungura.”
18Omambo nga ya handjisira ko ovanane vOvajuda, nga owo tji ve rimana okumuzepa. Kako ngwi okutja eye wa yamburura esabata porwe, nungwari wina eye wa tja Ndjambi oIhe omuini, nu komuhingo mbwi otje riṱekisa pu Ndjambi.
Omuna u nouvara
19Jesus arire tje ve ziri a tja: “Tjiri, tjiri, ami me mu raere ouatjiri, Omuna ke na tji ma sora okuritjitira omuini. Eye u tjita ihi porwe tje muna Ihe ame tji tjiti. Ihi Ihe tje tjita, Omuna wina otjinga e tjita. 20Orondu Ihe wa suvera Omuna, nu u mu raisira avihe eye omuini mbye tjita. Eye me mu raisire oviungura ovinene tjinene pu imbi, neṋe arire tji mwa himwa. 21Otja Ihe punga e pendura ovakoke ne ve pe omuinyo, Omuna wina opunga e yandja omuinyo ku imba mbu ma vanga. 22Ihe omuini wina ka pangura omundu, nungwari ouvara auhe wokupangura we u yandja kOmuna, 23kokutja avehe ve yozike Omuna otja tjinga ave yozika Ihe. Auhe ngu hi nokuyozika Omuna, ke nokuyozika Ihe ngwe mu hinda.
24“Tjiri, tjiri, ami me mu raere ouatjiri, ngu ma zuu omambo wandje na kambura mu ingwi ngwe ndji hinda, eye u nomuinyo waaruhe. Neye ke nokupangurwa, nungwari eye nao tjandje wa tuurunga onḓiro okuyenda komuinyo. 25Nu tjiri, ami me mu raere, oruveze maru ya, nu nai rweya, ovaṱi mu mave zuu eraka rOmuna wa Ndjambi, nu imba mbu mave zuu eraka ndi mave kara nomuinyo. 26Ihe omuini otja tjinga e ri omburo yomuinyo, eye otjinga a yandja kOmuna we a rire omburo yomuinyo. 27Nu eye wa yandja ouvara wokupangura kOmuna, tjinga e ri Omuna wOmundu. 28Amu kumisiwa i otjiṋa hi: Oruveze maru ya ovaṱi avehe mu mave zuu eraka re 29#Dan 12:2nave piti momaendo wawo: Imba mba tjita ouwa mave penduka nave kara nomuinyo, nu imba mba tjita ouvi mave penduka nave pangurwa.
Omahongononeno ngu maye tjama na Jesus
30“Ami hi na tji me sora okuritjitira mouvara wandje omuini; mbi pangura otja Ndjambi punga ame ndji raere, ombanguriro yandje opu ya ririra osemba, tjinga ambi ha tjiti ombango yandje, nungwari tjinga ambi tjita ombango yaingwi ngwe ndji hinda porwayo.
31“Ami tjinangara me rihongonona omuini, omahongononeno wandje nga kamasemba. 32Nungwari pena rive ngu me ndji hongonona nami me tjiwa kutja imbi mbi ma hungirire ami ovyo ouatjiri. 33#Jhn 1:19-27; 3:27-30Eṋe mwa hindire ovahindwa ku Johanes, neye wa hongonona ouatjiri. 34Ami hi nokuhepa omahongononeno womundu, nungwari omambo nga me ye hungirire kutja eṋe mu yamwe. 35Johanes wa ri emunine ndi yari yaka nokuyera, neṋe mwa vangere okuvyarera mondjerera ye okaruveze okasupi. 36Nungwari ami mbi nomahongononeno omananḓengu okukapita inga wa Johanes. Oviungura Tate mbye ndji pa kutja mbi yenenise, nu nai mbi mbi ungura, vi ndji hongonona, nu vi raisa kutja Tate ongwe ndji hinda. 37#Mt 3:17; Mk 1:11; Lk 3:22Nu Tate ngwe ndji hinda wina u ndji hongonona. Eṋe kamu na pu mwa zuvire eraka re, nu kamu na pu mwa munine omurungu we. 38Nembo re wina oro kari ṱakama momitima vyeṋu, tjinga amu ha kambura mu ingwi eye ngwa hinda. 39Eṋe mu konḓonona omatjangwa, tjinga amu tjangovasi mu wo omu mamu munu mo omuinyo waaruhe. Nu omatjangwa tjingewo nga ye ndji hongonona. 40Nungwari eṋe kamu nokuvanga okuya ku ami kutja mu kare nomuinyo.
41“Ami hi paha okutangwa i ovandu. 42Nungwari ami me mu tjiwa, nu wina me tjiwa kutja kamu norusuvero na Ndjambi momitima vyeṋu. 43Ami mbe ya mena ra Tate, nungwari eṋe kamu ndji yakurire ko. Nomundu worive tje ya mena re omuini, eṋe mamu mu yakura. 44Eṋe mu tangasana oveni, nungwari kamu roro okupaha ondangero ku ingwi erike ngu ri Ndjambi. Nu nao mamu sora vi okukambura mu ami? 45Amu tjangovasi ami me mu pe ondjo ku Tate. Moses ku mwe riyamekere eye ongu me mu pe ondjo. 46Eṋe andakuzu mwa kamburire mu Moses, atja mu kambura mu ami, eye tjinga a tjangerere ami. 47Nungwari eṋe tji mu hi nokukambura momatjangwa we, mamu sora vi okukambura momambo wandje?”
Currently Selected:
Johanes 5: HRR-UNI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Herero Revision Bible © Bible Society in Namibia, 2021.