Johanes 8
8
Omukazendu ngwa kamburwa ama katuka orukupo
1Okuzambo omundu auhe arire tja yaruka koye, nu Jesus a i kOndundu yOmiṋinga. 2Nu omuhuka omunene, Jesus wa kotokere kondjuwo ya Muhona. Ovandu avehe va woronganene ongondoroka na ye, neye wa kara pehi na utu okuvehonga. 3Ozonongo zomambo nOvafarisei arire tji va eta omukazendu ngwa kamburirwe ama katuka orukupo, ave mu kuramisa komurungu wovandu mba avehe, 4nave tja ku Jesus: “Muhonge, omukazendu ngwi wa kamburwa ngunda ama katuka orukupo. 5#Lev 20:10; Deu 22:22-24MOmatwako wetu Moses wa rakizire kutja omukazendu otja ingwi a ṱe nomawe. Nambano ove motja tjike?” 6Omambo nga ve ye hungirira okupata Jesus momambo, kokutja ve mu pere po ondjo. Nungwari eye we ripeta na tjanga mehi nomunwe.
7Nu ngunda ava kurama mbo okumupura omapuriro, Jesus arire tja kurama oseka na tja ku wo: “Tjinangara mu nomundu umwe mokati keṋu ngu hiya roro okutjita ourunde nga tenge po okuyumba ewe a vete omukazendu ngwi.” 8Tjazumba e ripete rukwao na tjanga mehi. 9Nowo tji va zuva omambo nga, avehe va pita koumweumwe, ovanene ombari ovatenga okupita. Jesus wa sewa erike, ingwi omukazendu ngunda a kurama mbo. 10Jesus arire tja kurama oseka rukwao na tja ku ye: “Ovandu ve ri pi? Kape nomundu ngwa sewa po okukupangura are?”
11Omukazendu a ziri a tja: “Kako, Muhona, kape nomundu.”
Jesus a tja: “Osemba, ami wina hi nokukupangura, kako. Twende, nungwari o otjiti ourunde rukwao.”
Jesus ondjerera youye
12 #
Mt 5:14; Jhn 9:5 Jesus wa hungirire rukwao kOvafarisei a tja: “Owami ondjerera youye. Ingwi ngu me ndji kongorere kamaa ryanga ko monḓorera, nu ma kara nondjerera yomuinyo.”
13 #
Jhn 5:31
Ovafarisei arire tji va tja ku ye: “Nambano ove mo rihongonona omuini, okutja omahongononeno woye kauatjiri.”
14Jesus a ziri a tja: “Kako, nandarire kutja ami me rihongonona omuini, omahongononeno wandje ouatjiri, tjinga ame tjiwa kutja mba za pi, nu me i pi. Eṋe kamu nokutjiwa kutja mba za pi, nu me i pi. 15Eṋe mu pangura komuhingo wovandu, nami hi pangura omundu. 16Nungwari andakuzu mbi tjita nao, ombanguriro yandje itjai rira osemba, tjinga ambi he ri erike, nungwari Tate ngwe ndji hinda tjinga e ri puna ami. 17#Deu 19:15MOmatwako weṋu mwa tjangwa kutja omahongononeno wovandu vevari owo ouatjiri. 18Ami me rihongonona omuini, nu Tate ngwe ndji hinda wina me ndji hongonona.”
19Owo ve mu purire ave tja: “Iho u ri pi?”
Jesus a ziri a tja: “Eṋe kamu ndji i, nu Tate wina kamu mu i. Andakuzu mu ndji i, atja mu tjiwa Tate wina.”
20Jesus wa hungirire omambo aehe nga ngunda ama hongo mondjuwo ya Muhona metuwo mu mwa ri ovipwikiro vyovimariva vyombunguhiro. Nu kape ningire omundu ngwe mu kambura, oiri ye tjinga aya ri ai hiye ya.
Ku me i kamaamu i ko
21Norukwao Jesus wa tjere ku wo: “Ami me i; eṋe mamu ndji paha, nungwari mamu ṱire ourunde weṋu. Ku me i, eṋe kamaamu i ko.”
22Ovanane vOvajuda arire tji va tja: “Eye ma tja ku ma i eṱe kamaatu i ko. Eye hapo ma vanga okurizepa omuini are?”
23Jesus a ziri a tja: “Eṋe oweṋe vokehi ngunongwi, nungwari ami owami wokombanda. Oweṋe ovouye mbwi, nungwari ami hiwami owouye mbwi. 24Opu mba zu okutja mamu ṱire ourunde weṋu. Neṋe mamu ṱire ourunde weṋu indu tji mu hi nokukambura kutja ‘Ami owami Ami.’ ”
25Owo ve mu zirire ave tja: “Ove oOvyaṋi?”
Jesus a ziri a tja: “Ami hapo me hungirire tjike na eṋe? 26Mbi nomambo omengi okuhungira otja ku eṋe, nomengi okumupangura. Nungwari ingwi ngwe ndji hinda eye u nouatjiri, nami me raere ouye imbi porwavyo ami mbi mba zuva mu ye.”
27Owo kaave zuu nawa kutja Jesus ma hungire Ihe ku wo. 28Neye opa tjera ku wo: “Tji mwa zu nokutongamisa Omuna wOmundu, mamu tjiwa kutja ‘Ami owami Ami’, nu wina mamu tjiwa kutja hi tjiti otjiṋa mouvara wandje omuini, nungwari mbi hungira omambo nga porwe Tate nge ndji honga. 29Nu ingwi ngwe ndji hinda u ri puna ami; eye keye ndji esa erike, tjinga aruhe ambi tjita imbi mbi tjata ku ye.”
30Novengi mba zuvire omambo wa Jesus nga va kambura mu ye.
Ovanauyara novakarere
31Nu Jesus wa tjere kOvajuda, mba kamburire mu ye: “Tji mwa panḓere pomahongero wandje, tjiri, oweṋe ovahongewa vandje, 32neṋe mamu tjiwa ouatjiri, nouatjiri mau mu kutura.”
33 #
Mt 3:9; Lk 3:8 Owo arire tji va ziri ave tja: “Oweṱe ozondekurona za Abraham, nu katu na pu twa ri ovakarere vomundu. Nu mo hee tjike tji motja: ‘Eṋe mamu kutuka?’ ”
34Jesus a tja ku wo: “Tjiri, tjiri, ami me mu raere ouatjiri, auhe ngu ma tjiti ourunde, eye omukarere wourunde. 35Omukarere ka karerere oweṱunḓu rawo, nungwari omuatje omuzandu u karerera e ri oweṱunḓu ndo. 36Nu Omuna tje mu kutura, mamu rire ovakutuke, tjiri. 37Ami me tjiwa kutja oweṋe ozondekurona za Abraham. Nungwari eṋe mamu vanga okundjizepa, tjinga amu hi nokuvanga okuyakura omahongero wandje. 38Ami mbi hungira ihi tji mba muna mu Tate, nungwari eṋe mu tjita ihi iho tje mu raera.”
39Nowo ave mu ziri ave tja: “Abraham eye tate.”
Jesus arire tja ziri a tja: “Andakuzu oweṋe ovanatje va Abraham, atja mu tjita oviṋa tjingevyo mbi eye mbya tjita. 40Nungwari eṋe nambano mamu vanga okundjizepa, ami ngu mbi mu raera ouatjiri mbu mba zuva mu Ndjambi. Abraham ke na pa tjita otjiṋa tji tja sana ngo! 41Eṋe mu ungura oviungura vyaiho.”
Owo ave ziri ave tja: “Ndjambi erike onguri Tate porwe, neṱe oweṱe ovanatje ve katjotjiri.”
42Jesus wa tjere ku wo: “Andakuzu Ndjambi, tjiri, oIho, atja mu ndji suvera, tjinga amba za ku Ndjambi; nu nambano owami ngwi. Hi ere mouvara wandje omuini, nungwari eye ongwe ndji hinda. 43Okutjavi tji mu hi nokuzuva nawa omambo ngu me hungire? Omotjimbe tjokutja eṋe kamu nokuvanga okupuratena kombuze yandje. 44Oweṋe ovanatje vaiho, okutja Satan, nu mu vanga okutjita ozonḓuma zaiho. Eye omuzepe okuza kombutiro, nu keya rora okuungurira ouatjiri, mu ye tjinga amu hi na imbwi ouatjiri. Tji ma kora ovizeze, u tjita imbi porwavyo mbye mu pwira, tjinga e ri omunavizeze ne ri ihe yovizeze avihe. 45Nungwari ami mbi hungira ouatjiri, neṋe opu mu ha zu okukambura mu ami. 46Owaṋi mokati keṋu ngu ma yenene okuraisa kutja ami mbi nondjo yourunde? Nu tji me mu raere ouatjiri, okutjavi tji mu hi nokukambura mu ami? 47Ingwi ngwa za ku Ndjambi u puratena komambo wa Ndjambi. Nungwari eṋe kamu zire ku Ndjambi, nopu mu ha zu okupuratena.”
Jesus na Abraham
48Ovajuda va purire Jesus ave tja: “Katu hungirire osemba are, tji twa tja oove Omusamaria nu u nombepo ohakohoke?”
49Jesus arire tja ziri a tja: “Ami hi nombepo ohakohoke. Mbi yozika Tate, nungwari eṋe mu ndji tengurura. 50Ami hi ripahere omuini ondjozikiro. Nungwari pena umwe ngu ndji pahera ondjozikiro, neye omupangure. 51Ami, me mu raere ouatjiri, auhe ngu ma panḓere pomahongero wandje kamaa ṱu nga aruhe.”
52Ovajuda ave tja ku ye: “Nambano tu nouatjiri wokutja u nombepo ohakohoke! Abraham wa ṱa, novaprofete va ṱa, nove motja ingwi ngu ma panḓere pomahongero woye kamaa ṱu nga aruhe. 53Oove omunene pu tate Abraham are? Eye wa ṱa, novaprofete wina va ṱa. Ove hapo mo tjangovasi oove aṋi?”
54Jesus arire tja ziri a tja: “Andakuzu me riyozike omuini, andakuzu ondjozikiro yandje katjiṋa. Tate ongwe ndji yozika, ingwi eṋe ngu mu tja oNdjambi weṋu. 55Eṋe kamu mu i, nungwari ami mbi mu i. Nandakuzu me tja hi mu i, etje rira omunavizeze otja eṋe. Nungwari ami mbi mu i, nu mbi ṱakamisa embo re. 56Iho Abraham wa nyanda omutima kutja maa munu eyuva ami ndi meya, neye we ri muna na nyanda.”
57Ovajuda va tjere ku ye: “Ove inga koya tjita ozombura omirongo vitano, nu wa muna Abraham are?”
58Jesus a ziri a tja: “Ami, me mu raere ouatjiri, Abraham ngunda e hiya kwatwa ami tjandje owami.”
59Nowo arire tji va toora omawe kutja ve mu vete, nungwari Jesus wa kaṱara na piti mondjuwo ya Muhona.
Currently Selected:
Johanes 8: HRR-UNI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Herero Revision Bible © Bible Society in Namibia, 2021.