JOHON 10
10
Bherabik Khokhre po Athenghlan
1Jisu pulo, “Khanangsi ne nali thando, ingho si owa aga lutle, kamprek aga arlusi bherabik arol ayok lut dam, anangke kanghu pen daku. 2Manta inghosi owa aga lutdam, anangke bherabik akhokhrepo. 3Owa kihonpo anangyok owa ingpu piman, aro bherabik helta anang asi oneman. Anang ta abithang bherabik helyok amen pen taramsi analiyok mokolyok ponman. 4Anang abithang bherabik helyok mokol wandetsi, anang anali ngo-ngotsi daman, aro bherabik helke anang phel-phel dunman piyok pu tene analike anang asi chiniman. 5Ananli kachinine abang aphel ke jatsi dunde ye, manta anali anang parake katne piyok pu tene anali kachinine arleng hel asike abhu hlonghle.” 6Jisu labang athenghlan alam analiyok pulo, manta anang kipu alam acho ke anali abhu hlonghle yongot.
Jisu si Khokhre Akime
7Lasi Jisu analiyok pu phakngo, “Khanangsi ne nali thando, bherabik arol owapo nelo. 8Inghosi nengo kiwang abangke, ahuwit kanghu aro daku; manta bherabik helke anali lam onene yongot. 9Hanesi owapo. Nepen ingho lutman, anali joknge, aro wanglut une aro mokol dam une aro bap kido athem thek hlonge. 10Kanghu ke kachunghu, kamari aro kapangho yok detsi wang man. Ne ke anali jiuli kapahlong un aphan, aro ongne-ong kapahlong aphan ne wango. 11“Bherabik khokhre akimepo nelo; khokhre akimepo ke abithang bherabik hel aphan ajiu chipi detman. 12Inghosi kichak akhokhre arideng ke, lake inghosi bherabik akhokhre kalek, aro abithang bherabik ke kalek, timit kiwang thekngo tene, aro bherabik hel tikang detman aro kat hrolman aro la-amun timit hel analiyok nepman aro pakak salman. 13Chaksi kiwan apotsi kak hrolman piyok pu tene kichak khokhre arideng bherabik helyok langle. 14Bherabik khokhre akimepo ne lo. Ne bithang bherabik ayok ne chiniman aro nebithang bherabik poke nechiniman, 15jibadi ne Apa neyok nechiniman aro ne Apa yok ne kachini badi. Aro bherabik hel aphan nebithang ajiu ta piman. 16Ne kamprek arol long kangwe angkhan bherabik hel dolang. Ne analiyokta wan nange, aro lahel ne asi oneye. Lasi lalong ipal choksi, ihut det khokhresi doye. 17Labang anat Apa neyok nengdokman, piyok pu tene ne jiu kachi-en phak ayok ne bangpo champidet man; 18kaita ne para bangpo thipon det un-eh, manta ne bithang kar-ih ateng champi detman. Bangpo kichampiyok ne apharan do, aro bangpo ki-en phak ayokta ne apharan do; labang kanong alam ne Apa para hlongo.” 19Lamehel alam anat Jihudi hel asitem chibhak phakngo. 20Anali asitem amokha arleng pulo, “Anang longke si-ik aghai do aro anangke ingcham hapdo. Anang lam piyok onedo?” 21Angkhan ke pulo, “Ladi alam si-ik kido arlengpo ke than un-eh. Si-ik ajiu ke mek chotok arleng yok pot badi amek pathek phak une?”
Jihudi hel Jisu yok Kachidengde
22La-apor Jerusalem long Arnam ahem Kiparjak-kamai kido. Labang apor kichum adin kido; 23aro Jisu Arnam ahem along Solomon po aganthik long artingwor si kido. 24Lasi Jihudi hel anangyok kom detsi chingrumo aro anangyok pulo, “Konbak arniyok nang hali neng hinghang-dang si biye? Nangke Khristo, tene hali than phlen not.” 25Jisu analiyok pulo, “Ne nali thano, aro nali nekrolkre. Ne Apa amen pensi ahuwit asal tikido, lamehel asal neyok hakhi pido; 26manta nali nekrolkre; piyok pu tene nalike ne bherabik kalek. 27Ne bherabik helke, ne asi oneman, ne ta analiyok chiniman, aro anali nephel wang dunman. 28Ne analiyok or-eh len ajiu piman, aro lasi anali jat inghohe ye. Kaita ne rideng para analiyok thipon det un-eh ye. 29Ne Apa, jipe ne rideng pilo, anang ahuwit yokta thechot, aro kaita Apa arideng para ihut yokta thipon det un-eh. 30Apa aro hane ihut det.” 31Jihudi hel anangyok kiwaryok arlong en phakngo. 32Jisu analiyok pulo, “Ne Apa para ako-ong akime asal nali paklango; dak bangpo anat te neyok arlong newarsi mari ye?” 33Jihudi hel anangyok pulo, “Akime asal katiki anatke kalek, nang ihut munusi chiplangsi, abithang Arnam chipusi Arnam yok mahang patharak do; lasi nangyok arlong nangwar do. 34Jisu analiyok pulo, ‘Ne pulo, nali ke arnam’ puke “Nali kanong long labadi wiwe-yong ma? 35Ingho longyok Arnam alam kiwang, lahel yok ‘arnam’ pusi pulo, (aro lo-kangthir alam pangho un-eh), 36tene ‘Ne Arnam Aso’ ladi kachipu apot, Apa arwalsi pirthepe long wang kitol poyok, ‘Ne Arnam yok patharak’ do pusi nali pot badi pu une? 37Ne Apa asal ne tikike yong pu tene neyok nekrolkre ye. 38Manta ne lamehel tikido, tene Apa nelong do, aro ne Apa pen do, labang abhu hlongsi nelong nekrolkre yong ta, katiki asal hel along krol not.” 39Laparake anali anangyok kinep phakyok awak lango, manta anang anali ari para chipajoksi damo. 40Anang Jordan langjon pe apar, daklongsi Johon po ango baptist ka-ote, labang athem longyok dam phaksi lalong dolo. 41Amokha arleng anang dungyok wango, aro anali pulo, “Johon po ke jatsi asombhik asal tiki ke paklangkle yong; manta bangpo arlengpo alam Johon po potsi kithan, labang ahuwit khanang.” 42Aro lalong amokha arleng anangyok krolo.
Currently Selected:
JOHON 10: AMRI-BSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.