JOHON 14
14
Jisu Apa Adung Kidam Duwar
1“Nali thinhel ihik-bihik do yek; Arnam yok krol, aro neyokta krol. 2Ne Apa ahem long pulu ako-ongdo; kangwenang tene, ne nalithano hoi; piyok pu tene ne naliphan athem kahonjok ayok dambang. 3Aro ne naliphan athem kahonjok yok damtene, ne pot athemlong do ye, nalita labang athem kidodam hlong aphan, ne wang phaksi naliyok nedung nalipone. 4Ne pot athem yok damsido, nali labang aduwarpo than unman.” 5Thomas po anangyok pulo, “O Hemphu, nang daklong yok damsi do, bangpo hali than un-eh. Pot badi duwarpo chini une? 6Jisu anangyok pulo, “Hane si duwarpo, khanangpo aro ajiulipo. Ne pen damde tene Apa adung yok ihut ta dam un-eh.” 7Nali neyok chini tene, ne Apa yokta chinilo hoi; minon parake nali anangyok chinilo aro thekngo.” 8Philip po anangyok pulo, “O Hemphu, Apa yok hali paklangot, bangso si haliphan dore.” 9Jisu analiyok pulo, “Ei Philip, ne nali pen la-an arni kido yongta, nang nechinine lang ma? Inghosi neyok nethek ngo, anang ne Apa yokta thekngo. Tene Apa yok hali paklang ngot pusi pot badi pudo? 10Ne ke Apa pen do, aro Apa ta nelong do, puke nang krolkre ma? Ne potsi alamthe naliyok thansi do, labang hel bithang ajakong parake thanthe; manta Apa nelong dosi anang sal tikido. 11Ne ke Apa pen do, aro ne Apa ta nelong do, ne labang kithan hel krol; lale labang ne katiki asalhel anat krolnot. 12Khanangsi ne nali thando, ne potsi asal tikido, neyok kikrol pota ladi tikiye, aro layok akithechot asal tiki ye, piyok pu tene ne Apa adung yok damsido. 13Aro Aso yok Apa jortang kipi badi, nemen pen potsi chihange, ne bangpo pachoknge. 14Nali nemen pen pene bak chihang, tene labangpo ne pachok piye.”
Jiuli-Kangthir Kipi Seme-Kitang
15“Nali neyok nengdok, tene ne kipi angton hel mengpon. 16Aro ne Apa ango pingkit ne, aro nalipen arnita kidolen ayok, anang prek ihut wang-kirap, lake khanang Ajiuli nali piye. 17Pirthepe anangyok chideng un-eh ye, piyok pu tene pirthepe anangyok thekthe, aro chinine, nalike anangyok chinido, piyok pu tene anang nalipen dodundo, aro nali angthin long doye. 18“Ne naliyok jangrete si tikang ke damde; ne nali dungyok wange. 19Bekso apor yok ke pirthepe neyok aro nethekthe ye, manta nalike nethek hlonge; piyok pu tene, ne hrengsi do, aro nalita hrengsi doye. 20Labang arni ne ke Apa pen do, nalita nelongdo, neta nalipen do, bangpo la arni chithan une. 21Anali ingho ne kipi angton hlongsi menge, anangsi neyok nengdok do; aro inghosi neyok nengdokdo, anang ne Apa anengdok hlonge, aro neta inghoyok nengdok si, anang ngo nebithang chiklange.” 22Latangsi ihut Judas po [Judas Iskariyot po ke kalek] anangyok pulo, “O Hemphu, pot badi chiplangbo, nang pirthepe ango chiklangklesi, nang hali ngo abithangyok chiklange ma?” 23Jisu anangyok pulo, “Ihut arleng neyok nengdok, pu tene anangke ne lamthe hel mainotsi doye; ne Apa anangyok nengdoknge, aro hali anang dung yok wangsi, anang pen dolenne. 24Inghosi neyok aneng dokde, anangke nelamthe hel mainotne, aro labang hel potsi alamthe nali onehlong do, lamehel ke ne lamthe kalek, manta neyok wangkitol ne Apa para kiwang alam. 25Ne nali pen kido jong amunsi, lamehel alam naliyok pulo. 26Manta Apa ne mensi ingho yok wangtole, labang wang-kirap, lake Jiuli-Kangthir naliyok ahuwit alam nali paklangsi, ne kithan kido kangwe nali neng purki ye. 27Ne nalipen nengsam tikangsi dame, ne nengsampo naliyok pido; pirthepe kipi badi, ne ladike nali pipe. Nali thinhel chipaduk ngek, aro pheredut ke doyek. 28‘Ne tikangsi dame aro nali dungyok wange,’ ne kithan bang alamthe nali arjulo. Nang neyok nengdok tene, ne ke Apa adungyok damdo pusi nali aneng aronge, piyok pu tene Apa ne yokta thechot. 29Aro bang hel kachiplang apor nalike krol, lasi kachiplang angot, ne minon nalithano. 30Nali pen ne ako-ong alamthe aro nalithan hlonghleye, piyok pu tene labang pirthepe phu-phangpo wangsi do; aro anang ne phuthak ke apharan ingjong. 31Manta ne Apa yok nengdokdo, aro neyok angton po kipipon badisi ne tikido, labang pirthepe kithan-unyok, thurnot, holek para dam minang dou.”
Currently Selected:
JOHON 14: AMRI-BSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.