Fúcihum 18
18
Acehériit mee narok Aburaham mara Saara be ebaj aleeh
1Nan púr to mee, Acehériit mee nápurul Aburaham cik ununuk wáamak wara Mamure. Tootook bunak baliŋer tiŋ, Aburaham min alakoe nꞌgayeem gara éguuhool. 2Náraahulo, nañow to mee umaañen gúfaajiir, nátiiŋ ngayuho to nꞌgayeemool, natey ayabiil. Aburaham nayah gújuul nꞌetaam fáculiil. 3Narok : « Paam, íciiniciin, jambil uwujom, éeni usoŋ min uwalen taahe síndo'om, be ésuumom máamak. 4Ubonket, niŋesuluul jal min jitaas goohuul, jifaak njíyolen nꞌfataam bununuk be. 5Be esenuul waaf jitiñ mimbil jíjuh jibaj sembe njifaalen. Mo, ejaaluul taahe mat kaan emontoŋ. » Ejawoora yaayu ngurogool : « Yoo, ukaan wan ulobe mee. »
6aÑeer Aburaham nawaaken atook akoñaool Saara dó nꞌéguuhool. 6bNarogool : « Ukaan tímer min uŋar sifeem sífaajiir sara epor yareg mee nejage, nukaaniil gúmbuur. » 7Aburaham nápurul, natey bu nꞌekooreool, nájogul dó jijiŋa jijak, nasen jo ájagagaool min acookoor jo tímer. 8Nan eluu yaayu eñul mee, Aburaham nátebul yo son ceecee nꞌefeeno abaŋ to ejawoora yaayu min gúcaho. Nan gommee nfúcaho, Aburaham nayuho acigiil to nꞌfataam bununuk baabu.
9Ejawoora yaayu ngusonken Aburaham : « Akoñai Saara úmey ? » Narogiil : « Umu dó nꞌéguut yaayu. » 10Aceeiil nꞌejawoora yaayu narogool : « Toon timaa maa, ínje be ébaañul bu taahe nꞌaw, ban be etook akoñai Saara min aakene aleeh amaañen. » Tooge Saara umu to mꞌbutum éguut yaayu nakohe mꞌbúsol Aburaham nan gáyenten. 11Naŋ min Aburaham bugo nꞌSaara gúfaanul mee, ban Saara nawuuwuuj ebaj aleeh, 12Saara naber dó mꞌbúyegehool napinoor. Narok : « Hé, ínje gáfallenum ge, araaŋom áfaanufaanul máamak. Mee pére ínje búyegehom be ebaañ bu nꞌamaañen ? » 13Ñeer Acehériit mee narok Aburaham : « Saara mara waa nabere ? Waa ucile napinoor ho gáfallenum, ájuhut ebaj aleeh ? 14aBabaj pére wan Acehériit mee ájuhut ekaan ? 14bToon timaa maa, nan ibil mee ébaañul bu taahe nꞌaw, be etook Saara min abaje aleeh amaañen. » 15Saara násebi, narien narok : « Iberut. » Acehériit mee narogool : « Aw kúm ubeber. »
Aburaham náciin Acehériit mee min abonket bugara Sodom
16Ñeer ejawoora yaayu nguyiho gon nejow nꞌgara ésuk yan guroge mee Sodom. Aburaham nátiineniil káŋ jaram guñeer maa Sodom nꞌetaam. 17Acehériit mee narok : « Icamenut gakoopen Aburaham wan en ejow be ekaan, 18nemmee Aburaham, búbajumool be emeeeŋ ban mbubaj sembe. Nu ho fiilóofiil nꞌdúniya fubili mee gásoonien. 19Icaapoocaap mbil aliik guleehool mꞌbúbajumool mbil guroŋ nꞌfuyuhoum faafu fúmbaam. Ho bu galiigeniil ekaan wátiliŋ mee son walago mee, yo ebil mee ecil nisen Aburaham wan irogool mee. » 20Ñeer Acehériit mee narok Aburaham : « Sikaaw sara bugan gaagu gan Sodom nꞌGomoor gucooce mee siruuruuk. Bugara Sodom nꞌGomoor síjunubeiil sipapak. 21Mee pére wan ijam mee gulob, wo ukaane ? Injé be étiiŋ dó min iñow. Mo be émir maregen maamu. »
22Ñeer bugaagu gúruba dó nꞌejawoora yaayu ngukahiil to ngujow gujooŋoor Sodom. Aburaham naŋaño to bugo nꞌAcehériit mee. 23Aburaham nacigool, narogool : « Teer aw bu ganimen an átiliŋ mee nu ganur nꞌafeegut mee ? 24Eéni pée baje dó bugan gafaŋ gúruba nꞌguñen (50) gátilintiliŋ nꞌésuk yaayu, mat ubonket ésuk yaayu mara mútiliŋ bugan gammee gafaŋ gúruba nꞌguñen (50) gacin dó mee ? Maregen aw be emugiil ? 25Haani, mat újuh ukaan waaf wanogoore mee ! Jamuk átiliŋ mee nu ganur nꞌafeegut mee ! Etek átiliŋ mee naŋ afeegut mee ! Haani, aw acafa hara dúniya, mat újuh ukaan walagout. » 26Acehériit mee narogool : « Eéni itooge dó Sodom bugan gafaŋ gúruba nꞌguñen (50) gátilintiliŋ, be ebonket yo mara bugo. »
27Aburaham nabenen arogool : « Ubonkehom, mara ínje mof son butune, ban nihañi elob nꞌaw. 28Eéni bugan futok gúpure dó mꞌbugan gafaŋ gúruba nꞌguñen (50) gátiliŋ mee, gammee futok be ecil min uyiis ésuk yaayu ? » Násuupool : « Eéni itooge dó Sodom bugan gafaŋ gúruba nꞌfutok (45) gátilintiliŋ, mat iyiis yo. »
29Aburaham nabenen arogool : « Eéni utook dó bugan gafaŋ gúruba (40) ? » Násuupool : « Mat iyiis yo mara bugan gammee gafaŋ gúruba (40). »
30Aburaham narok : « Paam, níciiniciin, jambil uñigen néeni ibenen ilob. Eéni bugan gafaakan nꞌguñen (30) déhooro gátilintiliŋ ? » Násuupool : « Eéni itooge dó nꞌésuk yaayu bugan gafaakan nꞌguñen (30) déhooro, mat iyiis yo. » 31Aburaham naroŋ nelob nu ho : « Paam, ubonkehom néeni ilobe benen. Júhe kaan bugan gafaakan (20) déhooro ? » Násuupool : « Mara bugan gafaakan (20), mat iyiis ésuk yaayu. »
32Aburaham nabaañ arok : « Paam, níciiniciin, jambil uñigen. Mat ibaañ ilob benen. Júhe kaan bugan guñen (10) déhooro gátilintiliŋ dó Sodom ? » Násuupool : « Eéni itooge dó bugan guñen (10) déhooro gátilintiliŋ, mat iyiis ésuk yaayu. »
33Acehériit mee nan afaak mee búñowoorool nꞌAburaham, najow. Aburaham nábaañul bu síndo'ool.
Currently Selected:
Fúcihum 18: gsl
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 (Active), Wycliffe Bible Translators, Inc. All rights reserved.