Fúcihum 19
19
Atúuha napagen Loot nꞌganimen gara Sodom
1Nan bunak bommee nejon, simalayika sammee síruba nsítiiŋul dó Sodom. Tootook Loot min alakoe to mꞌmúnogenum ésuk yaayu. Nan añowuliil mee, nayiho najow ngurehoor, nayah gújuul nayah fúriiŋool nꞌetaam. 2Narogiil : « Sipaam, jibonket, níciinuuciin ujaal bu síndo'om, njitaas goohuul njiŋot, tikahen gajom, njifaalen. » Simalayika saasu nsirogool : « Haani, kahóli nuŋot nꞌeluwaato yaayu. » 3Bare Loot nakoten jaram gusoŋ, ngujow bu síndo'ool. Nawaleniil, nasowiil gúmbuur, násiiliil jak gúcaho.
4Jandiŋ Loot nꞌejawooraool bu gaŋot, umaañen bugara Sodom ngújool gugongen yaŋ yaayu ; sikambaano nꞌunafaan peepe gujaalojow, bajut aŋañoulo. 5Nguwook Loot, ngurogool : « Umaañen gan uwalen mee taahe síndoi gárusa ge, úbugey ? Upúrenuliil, éli be eŋariil ubaj ukoña. » 6Loot nápurul napeek gápeegum gaagu najooŋoor mꞌbugo. 7Narogiil : « Gutiom, níciinuuciin, jambil jikaaniil kóji. 8aNibabaj síjur gúruba gámirut umaañen, be esenuul bugo njikaaniil naŋ min súumuul mee. Bare 8bumaañen ge ubuge, jambil jikaaniil waafóowaaf, taahe nꞌyaŋom ngooma, ban ínje be epooyiil. » 9Bugara Sodom ngurogool : « Utos baba ! Aw ammee ajawoora taahe, aw ubilóli egaan mara bakaaneróli bufeegut ! Ñeer aw be eyab bacooc barege booliil ! » Ngufaren Loot bíh, ngúcigul butum bara yaŋ yaayu bu gáwaŋul gápeegum gaagu. 10Bare simalayika saasu nsijok Loot nꞌgañen, nsiñagulool sírur dó nꞌyaŋ yaayu nsipeek gápeegum gaagu. 11Simalayika saasu nsikaan gammee tíyaŋ yaŋ yaayu peepe ngúpiim, jaram gújuhut guñow gápeegum gaagu ; biriŋ nꞌaleeh káŋ bu nꞌanafaan.
12Simalayika saasu nsirok Loot : « Eéni nubabaj dáare bugan bugara fiili : guleehi gumaañen bugo nꞌguleehi gukoña, nꞌgapañiil mee, nꞌanooan han jibaji ; úpureniil kuhi nꞌésuk ye. 13Mara óli be efum yo. Acehériit mee najanjam sikaaw sáamak sara bugan gaagu gan Sodom nꞌGomoor gucooce mee. Yo ecil mee naboñulóli be efum yo. » 14Ñeer Loot najow atook gurolool gabileen mee eyab guleehool. Narogiil : « Jípur dáare tímer ! Mara Acehériit mee be efum ésuk ye. » Bare gurol Loot ngujok elob yara fúraari.
15Nan bunak bommee ngakahen, simalayika saasu nsicooñen Loot nsirogool : « Uyuho nuŋar akoñai nꞌsíjuri gúruba gammee taahe, njípur tímer jambil jicet dó nꞌganimen gaagu gabil mee gawaloúl mꞌbugara ésuk ye mara bakaaneriil bafeegut mee. » 16Loot náŋararoor. Acehériit mee nabaj gabonket nu ho. Simalayika saasu ñeer nsijogiil nꞌguñen, ho nꞌakoñaool nꞌsíjurool gammee gúruba, nsípureniil nꞌésuk yaayu. 17Nan sípureniil mee nꞌésuk yaayu, acee nꞌsimalayika saasu narok Loot : « Utey min upagen síñundui. Jambil ujeg búsol, jambil uyuho tanootan dó nꞌgásilimb gaagu. Utey bu nꞌemontaañ yaaya jambil ucet. » 18Loot násuupool arok : « Paam, ubonket, mat júho. 19Maregen ukaanankaan jak, nupagenom nꞌecet. Bare ínje íjuhut itey bu baaaba nꞌemontaañ yaayu. Bala ítiiŋ, mátaañie maamu be egorom, ban ínje be ecet. 20Uñoñow jísuk járiita jaaju uju, jikúhiut. Ijúhe itey bu bo, nko jirehoorehoor ! Ukahom nikoop dó min ipagen síñunduom. » 21Amalayika aahu narogool : « Isonsoŋ, mat ikajen jísuk jan uroge mee. 22Uwaaken nujow ukoop dó mara mat íjuh ikaan waaf, aw bátiiŋerut. » Ngurok jísuk jaaju Sowaar (yo yommee : járiita).
23Loot átiiŋe Sowaar, min bunak búpurulo. 24Ñeer Acehériit mee nawalenúl dó Sodom son Gomoor sambun sajeejeek son gapor gásusup cúm. 25Nanimen sísuk sammee síruba son gacin dó mee, gásilimb gaagu son wariil dó mee mꞌmof maamu peepe. 26Akoña Loot najeg búsol, nálowulo fúlundaay fara mutasen.
27Noono mꞌbújom, Aburaham nabaañ bu tan gukahoor mee nꞌAcehériit mee. 28Nañeer bu nꞌgásilimb gaagu peepe son sísuk sara Sodom nꞌGomoor san dó mee, nañow fakoor fúyuhoul dó, funogoor naŋ fakoor fara gamburnaati. 29Atúuha nan ammee nejow be efum sísuk san dó mee mꞌmof maamu, awosenwosen etuhoorool nꞌAburaham min apagen Loot mꞌbúyiik baabu. Apagenool afaak, nanimen sísuk saasu dan Loot acineen mee.
Loot bugo nꞌsíjurool
30Loot ásebisebi bucin nꞌSowaar, nápur dó nꞌésuk yaayu min ajow acin bo nꞌemontaañ yaayu. Síjurool gammee gúruba ngulalenoor mꞌpaayiil, bu bo mꞌbúwaay bara emontaañ yaayu min gucin dó. 31Funak fucee ájur anafaan aahu narok atiool áriita : « Paayolaal afallenfallen, ban mofolaal mubajut amaañen abilolaal eyab, naŋ min nja kaani mee banooban. 32Usenaal paayolaal bunuk arem min ákali nufiihoaal nu ho, jambil búbajumool buniiho. » 33Bu nu fuk faafu, ngusen paayiil bunuk arem ákali min ájur anafaan aahu ajow afiiho nu ho. Loot ájuhut ámir waafóowaaf nꞌgafiiho gara ájur aahu nꞌgayiho'ool. 34Fara gajom, ájur anafaan aahu narok atiool áriita : « Nifiihofiiho mꞌpaayolaal fugen nu fuk ; ubaañaal usenaalool arem nu fuk fee min aw may ujow njifiiho jambil búbajumool bunim. » 35Nu fuk faafu ngubenen gusen paayiil bunuk arem ákali, ájur áriita aahu nafiiho mꞌpaayool. Bandiŋ Loot ájuhut ámir waafóowaaf nꞌgafiiho gara ájur aahu nꞌgayiho'ool.
36Ñeer síjur gammee gúruba nguŋar búteb bara paayiil Loot. 37Ajúr anafaan aahu nabaj aleeh amaañen narogool Mowab (yo yommee : ápurulo mee mꞌpaayom). Emowabiit yaayu, ho ammee jaat paayiil afaan. 38Atiool áriita may nabaj aleeh amaañen narogool Ben-Ami (yo yommee : aleeh amaañen hara fiilom). Emoniit yaayu, ho ammee jaat paayiil afaan.
Currently Selected:
Fúcihum 19: gsl
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 (Active), Wycliffe Bible Translators, Inc. All rights reserved.