Fúcihum 20
20
Aburaham bugo nꞌSaara ngubanten Abimelek
1Púr to, Aburaham natoosoor bu mof mara Negeew. Nahaj etuhoor Kades son Súur. Afaak najow acong nꞌésuk yan guroge mee Geraar. 2Aburaham arogerok mara akoñaool Saara, áliinool. Yo ecil mee Abimelek, áyiih hara Geraar, naboñ guŋarulool Saara ayab. 3Bare Atúuha náyauhen Abimelek nu fuk, narogool : « Aw be eyab ecet, mara akoña hara an nuyabe. » 4Tooge Abimelek bagorerut Saara. Narok : « Atúuha ! Injé mꞌbuganom ukaanut wafeegut, ñeer aw be emugóli ? 5Aburaham fannaool arogóli Saara áliinool, Saara may narogóli manur maamu. Mꞌbúyeget baseset niyabool, ban ikaanutool mákojie. » 6Atúuha narogool dó nꞌsíyaut saasu : « Maregeni. Injé ímimir mꞌbúyeget baseset nuyabool, yo ecil mee ikahenuti min ugorool, jambil ubaj júnube nꞌínje. 7Ñeer ubaañenool araaŋool. Min emmee araaŋool anabiyoŋ, ho be éciin min upak. Eéni ubaañenutool, aw be émir mara ecet non éŋarul bu nꞌaw nꞌfiili. »
8Ñeer Abimelek nayuho noono mꞌbújom, nawook usaabaool peepe min agaaniil síyauhool. Ngúsebi máaamak. 9Abimelek nawook Aburaham min asonkenool : « Waa ucile nukaanóli mee ? Injé mꞌbuganom ucilólicil nulaar miñ. Waa nilaari ? Búkaanum nukaanaam ban an akaanériit apaalool an ! » 10Abimelek nabaañ asonken Aburaham : « Bakaaner baabu ubu, aw be ebaj to waa ? » 11Aburaham násuupool arok : « Nijojok mara bugan bugara taahe gúsebiut Atúuha. Bugo be emugom min guŋar akoñaom. 12Maregen maregen, áliinom, mara paayóli hanur. Bare jaaóli let hanur, ban nábaañul akaan akoñaom. 13Nan Atúuha akaan mee min ípur yaŋ paayom, nirok Saara : “Ubonket, banooban nubilaale ejow, nurok ínje áliini.” »
14Ñeer Abimelek nabaañen Saara asen Aburaham. Abimelek nabaañ ájii Aburaham sísaaja, sijaameen, nꞌsiyaha, nꞌemiigeel umaañen nꞌukoña. 15Abimelek narogool : « Etaamom uyue, ucin tan súumi mee. » 16Afaak narok Saara : « Uñoñow, be esen áliini ukuparu woono éwuli. Yo ebil mee eliik bugan gaagu peepe gammee nꞌaw, mara aw ukaanut waafóowaaf, mbil ubaj gasal mꞌbugan gaagu peepe. »
17-18Tooge min Acehériit mee asaahe gabugoor ukoña bugara yaŋ Abimelek mara nabohe Saara, akoña Aburaham. Ñeer Aburaham náciin Atúuha. Atúuha násonten Abimelek, akoñaool nꞌemiigeelool ; ngubaañ gukaan ubugoora.
Currently Selected:
Fúcihum 20: gsl
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023 (Active), Wycliffe Bible Translators, Inc. All rights reserved.