Matius 2
2
Tomwatar ma rafai ratnyose ftunar rma rof timur
2:1-12
1Maria namtoranbabe Yesus na kote Betlehem, na propinsi Yudea. Noak a ne rai Herodes nfarete na iano. Lama ramtoranbabe Yesus ne, tomwatar ketnir ma rafai ratnyose#2:1 Na Yunani liriny tomwatar ma rafai ratnyose na ayat ye rfalak sir feti tomwat Majusar. Sir a ne ma rafai ma rsalan fanikar a na langit. ftunar a ne rma rof timur ma rti kote Yerusalem. 2Noak ma rait kote Yerusalem e, sir renrat tomwatar na iane, “Kanak ma betno ramtoranbabe I ma keta neluk tomwat Yahudyar nir Rai ne, namin mpe? Kam msalan Kanak a ne Ni ftune ma nbotin na timur ma nfatutu feti ramtoranbabe I lo. Mpa kam ma, ma msatngur ber I.” 3Noak ma rai Herodes ndengar ngrie ne, dalamy to ntai. Ma tomwatar monuk na Yerusalem a ne dalmir to rtai nbal. 4Mpe rai Herodes nafburat monuk mangsompar ulnir ma mangaftutu Musa ni faretar ma nenrat sir, “Ray Silai ma Ratu nyoding I a ne lo, ramtoranbabe I a na mpe?” 5Ne sir rfalak, “Maken, na kote Betlehem, na propinsi Yudea. Kam mafai farane fali luryain e, nabyar sa narengi Ratu Ni ngribatnir. Ratu nfalak farye:
6‘Hei tomwat Betlehemar a kmi, ma mimin nus Yehuda,#2:6 Yehuda ma Yudea e feleles motak. Noak ramtoranbabe Yesus e, nus Yehuda ye propinsi sa na Roma ni ain farete. Tomwatar rtar nus Yehuda ye feti propinsi Yudea.
kete mdyaun feti nof kotar monuk na nus Yehuda ye mir kote ma to ubany desar.#Mi. 5:1
Fali tomwatar sa ma neluk ulun keta nbotin nof mir kote ne, ma nrure tomwat Israelar. Sir a ne ma reluk Ningw tomwatar.’”
7Lama rai Herodes ndengar ma rfalak farane, i ntar namudim tomwatar ma rafai ma ratnyose ftunar a ne ma rabut sir. Betno nenrat sir fen ngamone fali nmpeang ma nafai desar feti bengfir e, ftune ne nbotin. 8Ne i nluan sir ma rti kote Betlehem ma nfalak, “Mtyi ma msyalan fen ngamone kanak a ne feti namin mpe. Ma farlan mtyungan i e, ka weni mifbotin ber yakw nema ktwi kswatngur ber I a nbal.” 9-10Lama rdengar ma rai Herodes nfalak farane, tomwatar ma rafai ma ratnyose ne rti. Noak ma sir rsalan ma ftune ne nbotin nof timur e sir rsenang resi. Ne sir rmpan a rlarat ftune ma namin langit a ne terik ma nater ain ma kanak namin a ne. 11Mpe rti das dalam ma rsalan Kanak a ne nor enany Maria, ma rsatngur ber Kanak a ne. Ne rbanril nir lufwar ma rnau nir mase, kemenyan ma mur#2:11 Kemenyan ye katutun sa daran ma ka rapu e angtany a nangafel. Ma mur e katutun daran ma tomwatar ral ma rose obat, ma rose minyak ma angtany a nangafel a nbal. , betno ral mpane kabanir ber Kanak a ne neluk nir snyompar. 12Noak ma rose ma rbali sir e, Ratu nafbotin ber sir na mefi feti ka rbali sir e kete rti rakmat rai Herodes lo. Mpe rbali sir far nir nuse e rof dalamten walyete.
Yusuf nor Maria ma Yesus rti Mesir
2:13-15
13Noak ma tomwatar ma rafai ratnyose ftunar a ne rbali sir, Ratu ninr Mangnrure Ni malaekat sa nafbotin ber Yusuf na ni mefi dalam. Malaekat a ne nfalak: “Mpwote ko, ma musnyalik ma mwal kanak a ne nor enany ma mor sir far Mesir. Ka mimin iano terik ma kufbwotin ber ko ma mbyali kmi a mya, fali rai Herodes nluan tomwatar ma ranriak kanak a ne ma nfen I.” 14Mpe ni nronram a ne nbal Yusuf npote desar i, ma nor kanak a ne ma enany ma rti Mesir. 15Ne sir ramin iano terik ma rai Herodes nmat. Kabanir monuk a ne terjadi farlan ma luryain e, Ratu ninr Mangnrure ne nfalak ber Ni nabi. Ratu nfalak ber Ni nabi farye, “Yakw ktwar Anakw ma nbie nof Mesir.”#Hos. 11:1
Rai Herodes nluan suldadwar ma rfen kanak merwan darwewear monuk na kote Betlehem
2:16-18
16Noak ma rai Herodes nafai feti tomwatar ma rafai ratnyose ftunar a ne rfule i e, i nares desar. Mpa nfarete suldadwar far kote Betlehem ma na kotar seriny baldu ma rfen kanak merwanar monuk nof ma betno ramtoranbabe sir terik ma nir ngarkar du a ne. Herodes nafai ftune ma nbotin a ne nof tomwatar ma rafai ratnyose ftunar a ne. Mpa i nfayaki ntabw nof ftune ne betno nbotin terik lere ye, fafa ngarkar du lo. Iane nwayat ma i nluan ma rfen monuk kanak darwewear terik ma nir ngarkar du. 17Noak ma rfen kangkir a ne iane sir rafdiat safe ma luryain e, Ratu nfalak ber nabi Yeremia. Ratu nfalak farye:
18“Tomwatar rdengar ma tomwatar sa ntasing ma nalol desar na kote Rama.
Iane Rahel ntasing angkir.
Ma tomwatar rma ma rafmafun i nempa to nfaduli fali angkir a rmat monuk lo.”#Yer. 31:15
Yusuf nor Maria ma Yesus rbali sir far nus Israel
2:19-23
19Noak ma rai Herodes a nmat, Yusuf nor ni dasdalam lolone ramin Mesir. Ne Ratu ninr Mangnrure Ni malaekat nma ma nakmat Yusuf na ni mefi dalam. 20Malaekat a ne nfalak, “Yusuf, mpwote ko, ma mwal kanak a ne nor enany ma mbyali kmi far nus Israel, fali tomwatar ma rareke ma rfen Kanak a ne rmat lo.” 21Ne Yusuf npote desar i, ma nal Kanak a ne nor enany ma rbali sir far nus Israel. 22Nempa na dalamtene let e, Yusuf ndengar feti Arkhelaus neluk rai ma nlikur amany Herodes na propinsi Yudea, mpa Yusuf namtaut ma nbali i far propinsi Yudea. Ne Ratu ninr Mangnrure Ni malaekat nafbotin i ber Yusuf na ni mefi dalam a nbal nema kete rbali sir far propinsi Yudea nempa ka rti propinsi Galilea. 23Lama rait Galilea, sir ramin pnu sa ngarany Nasaret. Sir ramin iane feleles farlan ma luryain e, Ratu nfalak nalyole nabyar feti keta tomwatar rtar Kanak a ne feti tomwat Nasaret.#Mrk. 1:24; Luk. 2:39; Yoh. 1:4
Currently Selected:
Matius 2: YMD
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Yayasan Pemberdayaan Masyarakat Desa © Wycliffe Bible Translators, Inc. All rights reserved.