Muuduko 6
6
Yiuwi'nokai a'mwo abolo tonyuro ma'no ma'no sajupo tovinokwono
1To'no'gwowi a'mwo abolo bwotonyago ton billumo'nyuno sumaveyokwe yiuwi'nokai tomuu so'mowopiyopogano. Toro yo'mowopiyo'mno taiyo togai'aro sawosunopogano. 2Toro sumo'nopo toga Gooti toolluro iko tovasuda'ai tooro a'mwo yasuwa'no mwalodupudo tooravuro sujuraiyo sugumaluko tonyu kwonyajuporogano. Toro tonyu ilaiyo sumdo kinuwiyodupu kevnokweravuro kuudo tovida'ai nokwo malluno malluno sajuporogano. 3Toro mujumovla'mdopure toga Gooti Yawel sumdo wono'no adokaikono. “Moro Kuullo tool a'mwo toorogai yiunokuudo mamjomwekovla'mwalonekono. A'mwo su tooro kwako akavida'airogano. Toro tooravuro poowokalago ton lumdo kuulopiyodupudo tovino tov kemoro aiyo mujomwekovlaiyo'mo tov yiuno 120 kworomo to'no uubwemorogano.” Gooti Yawel toro adokaikono. 4#Jag. 13:33Su toro toga a'mwo bwotonyo kumiko kuunodo pworo kwako akai amwallajuporogano. Aki lukomgu Gooti toolluro iko tovasuda'ai su tooro a'mwo tooravuro sujuraiyo togai woro'mno kwoloraiyo sawosunyajuporogano. Toro yawosunyuno sumaveyokwe toga a'mwo amuuloka kuunodo pworai sumo'nyajuporogano. Toro tooro a'mwo aguto yovokwe tooro sumo'nyajuporogano.
5 #
Mt. 24:37; Lk. 17:26; 1Pt. 3:20 To'no'gwowi Gooti Yawel kwako akavi wonyuno sumaiyokwe yiuwi'nokai a'mwo abolo ton ma'no ma'no bwotonyo mujumawodopure tonyu kwonokaikono. Toro ton yiuwi'nokai toga kemoro poowokalago kuudo ton yiuno kirovanyuvanyu kuumwiyo to'no sumo'nyajupogano. 6Gooti Yawel toro tonyu wonyuno sumaiyokwe adokaikono. “Nuu a'mwo abolo su tonyu miyokwolloso'mujuko'mno'juki kwako akav ilaiyo nokwo sumo'nowo'jujukokwono.” Adokaikono. Toro juno sumaiyokwe gamoro a'mwo abolo sokwollosoka su tonyuno gami poowokalago tovi jul'nyo bwotonyo subwosunokaikono. 7Toro ibwosuno'no Gooti Yawel aro adokaikono. “Nuu yiuwi'nokai kwako akavida'ai me'no sokwolloso su tonyu noromiyebuuropimogano. Yiuno puru'monodo kuruv mworonokwono. A'mwo abolo togai'aro noonyumwonyu ibesa'aiyo allu kuulolo toorogai'aro kwako tovi mworogu'nomollodupudo kworogai'aro dokato toorogai'aro yiuwi'nokai noonyumwonyu kwako akavi kwokopo tonyu noromiyebuuropimogano. Moro sokwolloso su tonyuno ilaiyo manyunumoka tovino tov toro imonyugono.” Adokaikono. 8Gooti Yawel toro adoka kwol kuruv Noowalluno'gwowi wono'no ilaiyo to'no amollokaikono.
9-10 #
2Pt. 2:5
Toro te Noowalluno kuuguudo tov arokwono. Noowal kwolaiyo pworapwolokwekono. Kwolaiyo su tooraino yovo tov Semol Hamol Jafetol toorogano. Toro te Noowal Gooti toollu uumjunyo'mo tov yiuno sugudo to'no mujumovla'mdowo judo tool Gooti toolluro ibwoto'nyo sumo'nyajukekono. 11Toro te su toro toga yiuwi'nokai a'mwo abolo kwako akavi mwalodupudo ton Gooti toolluro sumdo tovi yiuno kirovanyuvanyu kuumwiyo tonyu kwonyajukekono. Aki toro ton yiuwi'nokai toga magu'nyo to'no amujumovlaiyajuporogano. 12Toro mujumovla'mdopure tonyu Gooti tool muugona'no sumaiyokwe aro kuudo saurokaikono. Yiuwi'nokai a'mwo abolo kwako akavi mwalodupudo su ton kaiyako me'no sugolamo'nopogano. Toro ton yiuno ma'no ma'no pasudo to'no domjumovla'mwakovo. Kuudo saurokaikono.
Noowal sip pwol neya amodoneyokweyo'mo kuuguudokwono
13Gooti tool toro yau'no sumaiyokwe Noowallu aro kuudokaikono. “Yiuwi'nokai a'mwo abolo kwako akavi mwalodupudo ton ma'no ma'no sopiyopogano. Toro ton magu'nyo bwotonyo amjumawakwovo. Toro tovino tov nuu kwako akavi aiyowomno kaiyako mollounapiyo'mi a'mwo abolo kugai'aro romiyebuuropimonyugono.” Kuudokaikono. 14Toro wuudo'no Noowallu kuuguudo aro aduuwiyokaikono. “Guu iko jurogudo tokwe sip bwotonyo puruv domodono. Toro modo'bi anakuuto tomuu go'no go'no dovarojubinokwono. Aki wonyo tov noulawo'jokweyo'mo gwomalo tokwe yiuwi'nokai kwa'mgu tomuuge anakuuto kumuuge aiyowomno luvomuugutowopibinokwono. 15Sip su toollu mojo'moneyokwe tov moro agudumi tomgu'aro neya modubinekugono. Gamoro ga'bworoso'mo kumi'yago tov 130 mita wosubinekugono. Aki ga'bworoso'mo supto tomgu 22 mita wosubinokwono. Aki ido'nyu wuudapiyo tomgu 13 mita toru'aro wosubinokwono. 16Toro modo'bi toga ajulmdo tokwe'aro modubinekugono. Ajulmdo tokwe'aro kuuruko tokwe'aro tovallu akuuto toru 45 sentimita toru'aro dolo mallo'mo tov kuusosubinokwono. Aki sip toollu kuullo'mo tov noullo puru'mono kuusosubinokwono. Aki sip su toollu ago puruvapuruv modomunyuto'melabinekugono.” Gooti tool toro aduuwiyokaikono.
17Toro majuno sumaiyokwe kuudokaikono. “Nuvu yiuwi'nokai kwako akavida'ai aiyo amwakopo tonyu romiyebuuropiyo'mo buuru'allako puruv moropiyamonyugono. Toro tov kwako akai aiyowomno bu'duvolomaronokwono. 18Toro sumi kuvi kuruv guvuno'gwowi kaiyako mama'binekugono. Subuu'yamju toro agujumono. Toro te gumi abolo tokwe'aro gumi muugunyo toorogai'aro gumi jaiyo togai'aro togaikul sip amodubi tovi kuulomwalpinogaikikono. 19-20Aki dokato judo'no judo'nodo toorogai'aro ibesa'aiyo judo'no judo'nodo toorogai'aro kwako tovi mworogu'nomollodupudo toorogai'aro yiuwi'nokai su tooraida'ai kwoleke abolokwe piyaulno piyaulno maro'bi yiunokuudo nobolpiyokweyo'mo sip toollu mokaulabinogano. 21Toro te kevuge'aro yiuwi'nokai amokaulabi su toorogai'aro togaikul wosamujuko kuulonomwallo'mo tov yiuwi'nokai nonyo'mo ton mullu'bworoso'bi sip toollu neya mokaulabinekugono.” Gooti tool toro aduuwiyokaikono. 22#Hib. 11:7Toro te Noowal Gooti toolluro yiuwi'nokai aduuwiyoka tonyu kuvinono kuumjunokaikono.
Currently Selected:
Muuduko 6: SMB
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2022: Ethnos360 Sanford, Florida