Nai Vakatekivu 18
18
E tolu na agilose sa lako vei Eparaama, a sa caka kedratou ko koya, 1-8. Sa vakatitiqa ko Sera ni na dua na luvena, 9-15. Sa tukuni vei Eparaama na ka ena yacovi Sotoma, 16-22. Sa vakamamasu ko Eparaama, 23-33.
1ASA rairai vua ko Jiova e na kau e so mai Mamire: a sa tiko ko koya e na katuba ni vale gatu ni sa katakata na siga: 2a sa ta cake e na matana ka rai voli, ka, raica, sa tu voleka vua e lewe tolu na tamata: ia ni sa raici iratou, sa cici mai na katuba ni vale gatu me laʼki tavaki iratou, a sa cuva kivaka ki na qele, 3a sa kaya, Noqu Turaga, kevaka kaʼu sa kune loloma e matamu, mo kakua mada ni lako tani vua na nomu tamata: 4me kauti mada mai e dua na wai lailai, mo dou vuya mada na yavamudou, ka vakacegu e na ruku ni kau: 5ia kaʼu na kauta mai e dua na tiki ni madrai, ia dou vakalecataka mada na lomamu-dou; sa oti dou na qai lako yani: ni dou sa lako mai vua na nomudou tamata me vakakina. A ratou a kaya, Mo kitaka mada me vaka ko sa kaya.
6A sa lako vakasauri ki loma ni vale gatu kivei Sera ko Eparaama, a sa kaya, Mo kusarawa mo cakava e tolu nai vaka-rau madrai droka; natuka, ka tavuna e na matadravu. 7A sa ciciva na karavau ko Eparaama, ka kauta mai e dua na luve ni karavau sa malumalumu na lewena ka vinaka, a sa solia vua e dua na cauravou; a sa kusarawa ko koya ni cokonaka. 8A sa kauta na uro ni wai-ni-sucu, kei na wai-ni-sucu, kei na luve ni karavau sa cokonaka oti, a sa viritu e matadratou; a sa tu voleka vei iratou e ruku ni kau, a ratou a kana.
9A ratou a kaya vua, Sa evei ko Sera na watimu? A sa kaya ko koya, Raica, sa tiko mai vale. 10A sa kaya ko koya, Au na lesu vakaidina mai vei iko me vaka na gauna ni bula; ka, raica, ena dua na luvena tagane ko Sera na watimu. A sa rogoca ko Sera mai na katuba ni vale gatu, a ya sa tu mai dakuna na agilose. 11A rau a qase mai ko Eparaama kei Sera, sa vuqa na nodrau yabaki; sa mudu vei Sera nai valavala vakaalewa. 12A sa dredre e lomana ko Sera, a sa kaya, Niʼu sa qase mai kaʼu na marau beka, ni sa qase talega na noqu turaga? 13A sa kaya vei Eparaama ko Jiova, A cava sa; dredre kina ko Sera, ka vaka, Au na vakasucu vakaidina beka koi au, niʼu sa qase mai? 14E dua beka na ka sa dredre vei Jiova? au na lesu mai vei iko e na gauna sa lokuci, me vaka na gauna ni bula, ia ena qai dua na luvena tagane ko Sera. 15A sa caki ko Sera, ka kaya, Au a tawa dredre; ni sa rere ko koya. A sa kaya ko koya, E segai; ko a dredre ga.
16A ratou a tu cake maikea na tamata, ka gole kivaka ki Sotoma: a sa lako vata kei iratou ko Eparaama me laʼki talatala. 17A sa kaya ko Jiova, Au na vunia li vei Eparaama na ka kaʼu na cakava; 18ni na yaco vakaidina ko Eparaama me matanitu levu ka kaukauwa, ena kalougata talega e na vukuna na veimatanitu kecega e vuravura? 19niʼu sa kilai koya, ni na vakaroti ira na luvena kei na nona mataqali era na muri koya, era na vakabauta talega na sala i Jiova, me kitaka na ka dodonu, ka ia na lewa dodonu; me vakayacora kina ko Jiova vei Eparaama na ka ka vosa kina vua.
20Sa kaya talega ko Jiova, E na vuku ni sa ka levu nai tukutuku kei Sotoma kei Komora, a sa ka bibi sara na nodraui valavala ca; 21au na lako sobu mada, ka raica se ra sa cakacaka me vaka sara na kenai tukutuku, a ya sa yacovi au; ia kevaka e segai, kaʼu na kila. 22Ia koi rau na tamata, erau a gole tani maikea, ka lako kivaka ki Sotoma; ia ko Eparaama, sa tutu ga e na mata i Jiova.
23A sa laʼki toro vua ko Eparaama, ka kaya. O ni na vakarusa vata beka na yalododonu kei nai valavala ca? 24kevaka sa limasagavulu na yalododonu e loma ni koro ko ya: o na vakarusa beka ga, ka tawa vosota na koro ko ya e na vukudra na lewe limasagavulu era na kune kina? 25e yawa mada vei kemuni me cakacaka vakakoya, ka me vakamatea vata na yalododonu kei nai valavala ca: se me tautau-vata na yalododonu kei nai valavala ca, me yawa mada vei kemuni: ena tawa caka dodonu li Ko Koya sa lewai vuravura kecega? 26A sa kaya ko Jiova, Kevaka kaʼu sa kunea mai Sotoma e lewe limasagavulu na tamata yalododonu e loma ni koro, au na qai vosota na koro taucoko e na vukudra. 27A sa vosa ko Eparaama, ka kaya, Raica, kaʼu sa doudou mada ni vosa vua na noqu Turaga, oi au na kuvu ni soso kei na dravusa: 28Kevaka sa yali e lima vei ira na lewe limasagavulu na yalododonu: o na vakarusa beka na koro taucoko ni sa yali e lima? A sa kaya ko koya, Kevaka kaʼu sa kunea kina e lewe vasagavulu ka lima, kaʼu na tawa vakarusa. 29A sa vosa tale vua, ka kaya, Kevaka sa ra kune kina e lewe vasagavulu. A sa kaya, Au na sega ni kitaka e na vukudra na lewe vasagavulu. 30A sa kava, Me kakua mada ni cudru na noqu Turaga, ka meʼu vosa mada: Kevaka sa kune kina e lewe tolusagavulu. A sa kaya, Au na sega ni kitaka, kevaka kaʼu sa kunea kina e lewe tolusagavulu. 31A sa kaya ko Eparaama, Raica, ka u sa doudou mada ni vosa vua na noqu Turaga: Kevaka sa kune kina e lewe ruasagavulu. A sa kaya, Au na sega ni vakarusa e na vukudra na lewe ruasagavulu. 32A sa kaya, Me kakua mada ni cudru na noqu Turaga, ka meʼu vosa vakadua bulu tale: Kevaka sa kune kina e lewe tini. A sa kaya, Au na sega ni vakarusa e na vukudra na lewe tini. 33A sa lako yani ko Jiova, ni rau sa veivosaki oti kei Eparaama: a sa lesu tale ki na nona tikina ko Eparaama.
Currently Selected:
Nai Vakatekivu 18: FIJ1864
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
First full Bible in the Fijian language © British and Foreign Bible Society, 1864.