မာကု 5
5
ယေဆု ဒဲႈအီကူကီုရ်နံမ်ချှိုလီပ်စံပ် ချံမ်ဆာ
(မဿဲ ၈.၂၈–၃၄; လုကာ ၈.၂၆–၃၉)
1ဟွည်ႇဒီန် ယေဆုဂါရ် တဘဲႇအ်ုန်ဂဲ ရောတ်ဒိုည်ႇ အရာပ်ဂါရစ၊ ဆဲႈပြါ အိုမ်ဆက္လုင်ဂါလိလဲ လ်ုပ်တည်။ 2ယေဆုစွလေႈ ဒိုရ်တပါင်ရိူဝ် ဒံင်အူကပြေ့၊ အီကူကီုရ်နံမ်ကာကျကာလ လီပ်စံပ်တအ်ုန်ဒီန် လေႈဒိုရ်ဆာင်ခဲင် လာ်ႈက်ုရ်ယိူဝ်ပွံတ်အ်ုန်။ 3အ်ုန်ဂွည်ဂိူဝ်ဒေ တဆာင်ခဲင်၊ အဆေမိူဝ်ႈ ကာဘိူန်ဒေ ဒါႎံရ်ဟီရ် တိုည်တုအူန်အ်ုန်။ 4ကောပ်ဆေတဒါႈညာခိူည်ဒီန် ဂဲဘိူည်တုဂံတ်ဇိူင်အ်ုန် တႎံရ်ဟီရ် တွံန်လိူဝ်ႈတွံန်လိူဝ်ႈ၊ အ်ုန်တီုတ်က်ုရ်တ်ုတ်ပဲတ် ႎံရ်ဟီရ်ကျံင်ဇိူင် ပ်ုန်တုဂဲဒီန်၊ ကောပ်ရဲင်အ်ုန်ဒါင်လူတ်လာည် အဆေမိူဝ်ႈ ကာဘဲဒေထိင်အ်ုန်။ 5ကာဒါႈ ရဆငီ၊ ရမှိူဝ် အ်ုန်ပြိုႈဒေရျံင် တဆာင်ခဲင်ဂါရ် တပါင်ဆိုရ်၊ ဒါမိုဟေတ်တိုဒေ ဒဲႈပဲန်ဒိုည်ႇတိူဝ်ဆူ တပါင်တိုအ်ုန်။
6ဘံန်အ်ုန်ယိူဝ်ဒေငိူပ် ယေဆု တအရာပ်ဆငါည် ခူန်ဒေလာ်ႈ မာ့်ပ်ုရ်ဒ်ုပ်ကိင်ကေရ်ဒေ တရအာတ်အ်ုန်။ 7အ်ုန်ပြိုႈဒါႈ ပည်ဂံရ်ႈရဲင်၊ “အိူဝ် ယေဆု ကွံန်ဖြာ မျြံတ်ဇာရ်၊ ဆေမီ ဆ်ုန်ဘိူန်တအောအဲႈ။ ဒါဇီုဝ် ဖြာ၊ အောတောင်ဘာန်မီ မာည်ဆဂေအောစိ။” 8(အ်ုန်ဒါႈခိူည်ဒီန်မိူဝ်ႈ၊ ကောပ်ယေဆုဒါႈ၊ “အိူဝ် ကီုရ်နံမ်ကာကျကာလ၊ လေႈပွံတ်မီ ဒိုရ်တိုအီကူအီုဝ်။”)
9ဘံန်ညာခိူည်ဒီန် ယေဆုဆ်ုရ်မွံတ်အ်ုန်၊ “ဆေမီဇီုဝ်၊”
အီကူဒီန် ႎီရ်ဒါႈ၊ “ဇီုဝ်အောမိူဝ်ႈ လေဂေါင်၊ ယဲကီုန်ညှိုႈ။” 10ဟွည်ႇဒီန် အ်ုန်တောင်ဘာန်ယေဆု မာည်ရူပ်လေႈဂဲ ဒိုရ်အရာပ်အီုဝ်။
11ယိူဝ်ဖုင်လေ့ဒါင်အူက်ုရ်စု ဂဲဟောမ်ဂွည် တပါင်ဆိုရ် တပြောအရာပ်ဒီန်။ 12ဘံန်ညာခိူည်ဒီန် ႎိငျံန်ကီုရ်နံမ်ချှိုဂဲ တောင်ဘာန် တယေဆု၊ “ပ္လေါည်ဒဲႈယဲ လီပ်ဂွည် တန်ုလေ့စိ။” 13ဘံန်အ်ုန်ဒဲႈပွံတ်အခွါင် တကီုရ်နံမ်ကာကျကာလဂဲ၊ ဂဲလေႈပွံတ် ဒိုရ်တိုအီကူဒီန် ဂဲလာ်ႈလီပ်ဒိုည်ႇပွံတ် တဖုင်လေ့၊ ဖုင်လေ့ က်ုရ်ပံတ်အာရ်ဟြဲင် ဟောမ်ဂွည်တအရာပ်ဒီန် လှောဒေခူန်ဇောမ်ကြောင်ဆိုရ် လေႈယံမ်ဒိုည်ႇဒေ တန်ုအိုမ်ဆက္လုင်။
14အီအ်ုန်ဟျံင်လေ့ဂဲ ခူန်လီပ်ပွံတ်တန်ုကုင်ရူ၊ ဘံန်ဂဲလာ်ႈဂြည်ဆဒါင်ဒီန် ဘီဂဲလာ်ႈငိူပ်ဒိုည်ႇ ပ်ုန်ပဲန်အ်ုန်ဒီန်။ 15အခိင်ဂဲရောတ်ဒိုည်ႇ တယေဆု၊ အီကူကီုရ်နံမ်ချှိုလေဂေါင် တိူမ်လီပ်စံပ်တအ်ုန်ဒီန် ဟွည်ႇချှုပ်ဒေဒါဂြူ ဒါ့်မာ့်ဒေ ပဲန်ပွံတ်ခိူည်ပြီမ်၊ ဘံန်ဂဲယိူဝ်ဒေငိူပ်ခိူည်ဒီန် ဂဲညာယောဒိုည်ႇပွံတ်ဒေ။ 16ဘီအ်ုန်ယိူဝ်ဒေငိူပ် တရအာတ်ငါည်ဒေဒီန် ဂြည်ပျဒိုည်ႇ တဘီဂဲ အကျံင်ကီုရ်နံမ်ချှိုစံပ်တအီကူ ခိူည်မောအ်ုန်ပဲန်ဂါရ် အကျံင်လေ့ဂဲဒီန်။
17ဘံန်ညာခိူည်ဒီန် ဘီဂဲတောင်ဘာန် ယေဆု ဒဲႈအ်ုန်လေႈပွံတ်ဒေ ဒိုရ်အရာပ်ဂဲဒီန်။
18ယာမ်ယေဆု ရဲန်ဒေဟာ့်တပါင်ရိူဝ် အီကူကီုရ်နံမ်ချှို လီပ်စံပ်ဒီန် တောင်ဘာန်အ်ုန်၊ “ဒဲႈအောလာ်ႈ ဇောမ်မီစိ။”
19ကောည်လိုည် ယေဆု ကာဒဲႈစိ အခွါင်။ အ်ုန်ႎီရ်ဒါႈတအ်ုန်၊ “ႎေင်ပွံတ် တဂါင်တရမာမီ၊ ဂြည်ပျတဂဲ ဘ်ုရ်မောကီုရ်ညာဖြာ ရ်ုရ်ဒဲႈကေစူတပါင်မီဂါရ် ခိူည်အ်ုန်ညာဒေ က်ုရ်ႎေမီဒီန်။”
20ဘံန်ညာခိူည်ဒီန် အီကူဒီန်လေႈလာ်ႈပွံတ်ဒေ၊ အ်ုန်လာ်ႈဂြည်ပျဆဒါင် ဘ်ုရ်မောယေဆု ရ်ုရ်ဒဲႈကေစူတပါင်ဒေ တကပီုန်ကုင်ဒေကာပေါလိ၊#၅.၂၀ ဒေကာပေါလိ၊ ကုင်ကပိုမ်အူန် ကပီုန်ကုင်ကိူရ်ကုင်။ ဘ်ုရ်ယိူဝ်ဘီဂဲဒီန် ဘံန်ယိူဝ်ဒေဆတီုင် ဂဲအာမ်ဒိုည်ႇပွံတ်ဒေ။
ကွံန်ရပျာယာဣရုဂါရ် အီပ်ုန် ထိဆဒေါလှိူင်ယေဆု
(မဿဲ ၉.၁၈–၂၆; လုကာ ၈.၄၀–၅၆)
21ဟွည်ႇဒီန် ယေဆုဘရိူဝ် ႎီရ်လာ်ႈထဲင် ဆဲႈပြါအိုမ်ဆက္လုင်ဂါလိလဲ လ်ုပ်တည်၊ ယာမ်အ်ုန်ဂွည် တပြါအိုမ်ဆက္လုင် ဘီက်ုရ်စုဒါင်ဂဲ လာ်ႈက်ုရ်စုဒိုည်ႇဒေ က်ုရ်ႎျံရ်အ်ုန်။ 22အခိင်ဒီန် တာအွံရ်ကိင် ကျောင်ရဆောန်ဒဲႈတရာ အီကူဇီုဝ် ယာဣရု လာ်ႈပေါပွံတ်၊ ဘံန်ယိူဝ်ဒေငိူပ်ယေဆု အ်ုန်လာ်ႈ ဆကူပ်ပွံတ် တရအာတ်ဇိူင်အ်ုန်။ 23အ်ုန်နွံရ်ႈရဲင်ဖိူမ်ရဲင်ဒေ တောင်ဘာန်ဒါႈ၊ “ကွံန်ရပျာဒျံတ်အော ဘ်ုပ်ဆူဖိူဝ်နာ။ ရာ့်မီ စွလာ်ႈဂံမ်တီမီ တပါင်အ်ုန်စိ၊ က်ုန်ညာခိူည်ဒီန် အ်ုန်ဒီဘိူန်ဒေချံမ်ဆာ အဆာႇအီမ်။”
24ဟွည်ႇဒီန် ယေဆု ဇောမ်လာ်ႈပွံတ်အ်ုန်။ ဘံန်ဘီဘာ့်ဘာ့်ဘိူဝ်ဘိူဝ်ဂဲ က်ုရ်ညဲတ်ဒေလာ်ႈ ဇောမ်ယေဆု ဂဲတ်ုရ်တိူဝ်ဒိုည်ႇအ်ုန်။
25ယာမ်ဒီန် ယိူဝ်အီပ်ုန်အူကူ ဘ်ုပ်ဒေခါမ်ဇာ ရောဂါနှာမ်တခူႈနာ ဒံင်ကိူရ်အာရ်ဆန်ုမ်၊ 26တာဆရာႎှုန်ဘာ့်ဘိူဝ်ဂဲ ဘိူည်ဆန်ုမ်ဒဲႈဂံတ် မောအုဇာဂြူဂြိမ် ဘ်ုရ်ယိူဝ်အ်ုန် ဂိူပ်ဒိုည်ႇ၊ ဆဲႈကာဟြာည် ရောဂါအ်ုန် ယိူင်ရဲ့ယိူင်နာ။ 27ဘံန်အ်ုန်ယိူဝ်ဒေဆတီုင် အကျံင်ယေဆု၊ အ်ုန်လာ်ႈဇောမ်ပွံတ် လ်ုပ်ရဘံန် ဘီက်ုရ်စုဂဲ အတွထိဆဒေါလှိူင်အ်ုန်၊ 28အ်ုန်ဒါႈရာင်ကွည်ဒေ၊ “အောက်ုန်ဘိူန်အော ထိဂိူဝ်ဆဒေါလှိူင်အ်ုန်၊ ရောဂါအော ဒီဘိူန်ဒေဟြာည်။”
29ဘံန်ညာခိူည်ဒီန် အ်ုန်လာ်ႈထိပွံတ် ဆဒေါလှိူင်ယေဆု၊ ဒံင်အူကပြေ့ အ်ုန်နံပ်ပွံတ် ရောဂါနှာမ်တခူႈ ပ်ုန်ဘ်ုပ်တန်ုတိုဒေဒီန် ဟြာည်။ 30ယေဆုနံပ်ပွံတ် အဖုင်တီုင်ဂိုဒေ လေႈဒိုရ်တို အူဒီန်တောအူဒီန်၊ အ်ုန်က်ုရ်ပံတ်ပွံတ်ဒေငိူပ် လ်ုပ်တန်ုဘီက်ုရ်စုဂဲ အ်ုန်ဆ်ုရ်မွံတ်ဒါႈ၊ “အဆေ ထိဆဒေါအော။”
31တဘဲႇအ်ုန်ဂဲ ႎီရ်ဒါႈတအ်ုန်၊ “မီယိူဝ်ဘိူဝ်ဒေငိူပ် ဖုင်ဘီဂဲ က်ုရ်စုညဲတ်ဒေလီပ် ခိူည်အီုဝ်၊ ဆေညာ မီဆ်ုရ်မွံတ်ယဲ၊ ‘အဆေတိူဝ်အောဒီန်။’ ”
32ကောည်လိုည် ယေဆုငိူပ်ပွံတ်က်ုရ်ႎျံရ်ဒေ အ်ုန်ဆ်ုန်နံပ် အဆေထိဒေဒီန်။ 33ဘံန်အီပ်ုန်ဒီန်နံပ် ခိူည်မောဟွည်ႇပဲန်တတိုဒေ အ်ုန်ယောလူတ်လာည် လာ်ႈမာ့်ပ်ုရ်ဒ်ုပ်ကိင်ကေရ်ဒေ တရအာတ်ဇိူင်အ်ုန်၊ အီပ်ုန်ဒီန် ဂြည်ဆီုဝ်ပွံတ် ခိူည်ပဲန်တတိုဒေ။ 34ယေဆုဒါႈတအ်ုန်၊ “အိူဝ် ကွံန်အီပ်ုန်အော၊ ဖိူမ်ညှိုမ်မီဒီန် ဒဲႈမီချံမ်ဆာယာ့်။ လာ်ႈယေန်ညီမ်ပွံတ်မီ၊ မီချံမ်ဆာ ဒိုရ်ႎိုည်ဒနာဒေဒီန်ယာ့်။”
35ယာမ်ယေဆုဒါႈငဲခိူည်ဒီန်၊ ဘီပ်ုရ်ဒီ ဂွည်တဂါင် တာအွံရ်ကိင်ယာဣရု လာ်ႈပေါဒေ ဒါႈတယာဣရု၊ “ကွံန်ရပျာမီ ဟွည်ႇယံမ်၊ မာည်ဒါ့်ကဝ်ဆျှုယာ့် တာဆရာဒီန်။”
36ကောည်လိုည် ယေဆု ကာတိူဝ်ႈငဲဂဲလီပ်တနွံရ်ႈဒေ#၅.၃၆ ကာတိူဝ်ႈငဲဂဲလီပ်တနွံရ်ႈဒေ၊ က်ုန်ကာမိူဝ်ႈ ယိူဝ်ဒေဆတီုင် ကာအူန်တနွံရ်ႈ။ အ်ုန်ဒါႈတတာအွံရ်ကိင် ကျောင်ရဆောန်ဒဲႈတရာ ယာဣရု၊ “မီမာည်နွံရ်ႈဟ၊ ဒဲႈဂိူဝ် မီညှိုမ်။” 37အခိင်ဒီန် ဆဲႈပေတရု၊ ယာကုပ်ဂါရ် ႎါအ်ုန် ယောဟန် အဆေမိူဝ်ႈ အ်ုန်ကာဒဲႈစိ ဂဲလီပ်ဇောမ်ဒေ။ 38အခိင်ဂဲရောတ်တဂါင် တာအွံရ်ကိင်ယာဣရု ယေဆုယိူဝ်ဒေငိူပ် ဘီဂဲဒါ့်ကန်ုမ်က်ုရ်ႎှ်ရ်၊ ယိူဝ်ပည်ဒေဆတီုင် ဂဲဒါ့်ယာမ်ဂံရ်ႈရဲင်ဒီန်။ 39အ်ုန်ဒါႈတဂဲ၊ “ဆေညာ ပဲဒါ့်ယာမ်ကန်ုမ်က်ုန်ႎှ်ရ် ခိူည်ဒီန်။ ကွံန်ကညောမ်အီုဝ် ကာမိူဝ်ႈစိအ်ုန်ယံမ်၊ မိူဝ်ႈအ်ုန်ဒါ့်အီတ်ဒေ။”
40အခိင်ဒီန် ဘီဂဲပ်ုန်ဘဝ် ယူမ်ဒိုည်ႇအ်ုန်။ ဘံန်ညာခိူည်ဒီန် ဆဲႈကူန်မာကွံန်ကညောမ်ဂါရ် တဘဲႇဒေဂဲအွည်ကူ အ်ုန်ဆူတ်ဘီဂဲ လေႈဒိုည်ႇဒေရရိူဝ်ႇ၊ ဂဲလီပ်ပွံတ်တအခါန် ကွံန်ကညောမ်ဒီန်။ 41အ်ုန်ဘာပွံတ်တီ ကွံန်ရပျာဒီန်၊ အ်ုန်ဒါႈ “တလိသ ကုမိ” တီုင်အိုမ်ငဲ ပ်ုန်ဒါႈအ်ုန်ဒီန်မိူဝ်ႈ “အိူဝ် ကွံန်ရပျာ၊ အောဒါႈတမီ ယိူဝ်ႇ။”
42ဒံင်အူကပြေ့ ကွံန်ရပျာဒီန် ယိူဝ်ႇလာ်ႈပွံတ်ဒေ။ (အ်ုန်ဘိူန်ဂိူဝ်ဒေအဆာႇ ကိူရ်အာရ်ဆနံမ်။) အခိင်ဒီန် ဂဲညာအာမ်ဒိုည်ႇပွံတ်ဒေ။ 43ကောည်လိုည် ယေဆု ပိင်ငျှံပ်ရံတ်ရံတ်ဂဲ မာည်ဂြည် အဆေနံပ် အကျံင်အီုဝ်၊ ဟွည်ႇဒီန် အ်ုန်ဒါႈ၊ “ဒဲႈအ်ုန်ဟောမ် အူနဲအူနဲ။”
Currently Selected:
မာကု 5: SPBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
The Word for the World International and The Shwe Palaung Bible Translation Reviewer Committee.