KEJADIAN 22
22
Abraham Biuji
1Memerip iluniu ju kenjeh Jenang Kiuji iman Abraham. Jenang Kicereg, “Abraham!” Lalu Abraham kiberlag, “Ma, Jenang?”
2Jenang Kiurok, “Enloh kenon hek Ishak de nek nanek, de ihad hahok ajeh, ru etloh nu tik Moria. Korbanloh kek sebegei pesembahan teknod ku nanek lod de doh Ngternyol nu hek.”
3Jadi, ku ipepegelap huper Abraham kikos ru kisedia ikeldei. Lalu kek kipakat nar mom ihambe ru Ishak ikenon ajeh. Telas kibelah ceos ha pesembahan teknod, enai naicip nu tempat de biternyol ya Jenang. 4Ku arik ketige ku kateh ceknip enai, Abraham kibakek tempat ajeh ju kennyak. 5Jadi, kek kiurok nu nar mom ihambe, “Geiloh ku padeh ru keldei adeh. Eng ru kenon eng jarha-et nu lod ajeh. Jar doh jarsembah Jenang ku pajeh, telas ajeh doh jarjog nij nu jerkek.”
6Lalu Abraham kikot ceos ha pesembahan teknod ru kidek ku gelpal ikenon Ishak. Ilei kien bara os ru yoj. Lalu baicip besama-sama. 7Ku kateh ceknip ajeh, Ishak kiurok, “Apak.”
Abraham kiberlag, “Ma, bei?”
Ishak kitanya, “Har ya haren os ru ceos, tapi ku belok kenon dombe ha pesembahan teknod ajeh?”
8Abraham kiberlag, “Jenang Sendiri doh Kisedia kenon dombe ha pesembahan teknod.” Lalu ubai pen baipeteros nij ceknip ubai.
9Bile ubai lei ku tempat de ya bipasal ya Jenang, Abraham kibeh nanek tempat ennog pesembahan ru kisusot ceos ku ikemil. Lalu kibeg ikenon ru kiperdak ku kemil ceos ajeh. 10Telas ajeh kek kikot yoj kaha-perdat ikenon. 11Tapi ju serga malikat Yahweh kibeseru nu kek, “Abraham, Abraham!”
Abraham kiberlag, “Ma, Jenang?”
12Malikat ajeh kiurok, “Wes agok perdat sanget litau ajeh, wes agok beh ma-ma nu kek. Hunen eng ngpanei hek hahormat ru hataat ha Jenang kerana hek pek hanyek engog kenon hek de nek nanek ajeh nu Kek.”
13Bile Abraham kineng nu isekelileg, kek tiba-tiba kibakek nuikor dombe ibek de itandok seksog ku semak. Abraham kikot dombe ajeh lalu kipesembah nu Yahweh sebegei pesembahan teknod ha genanti ikenon keral. 14Abraham kiog muh tempat ajeh, “Yahweh doh Kisedia.” Lei hunen pen mai naiurok, “Ku kemil Ilod Yahweh doh Kisedia.”
15Nukali nij, ju serga malikat Yahweh kiurok nu Abraham, 16“Jenang Kiurok begei adeh: Eng adeh Yahweh. Eng Ngbesumpah. Kerana hek habeh hal adeh ru pek hanyek engog kenon hek de nek nanek ajeh nu Eng, 17Eng Ngbejanji hal adeh: Eng doh mimang Ngberkat hek ru Ngpejadi kenon-cenok hek begei jengoi perloi ku langit ru paser ku pantei. Kenon-cenok hek doh naipealah musoh enai ru naikot kote-kote musoh enai. 18Melalui kenon-cenok hek, dikdij bangse ku bumi doh biberkat, kerana hek ya hataat nu Eng.”
19Telas ajeh Abraham ru Ishak bailos nij nu nar mom ihambe lalu naiet besama nu Bersyeba. Abraham ru iperingak naigei ku pajeh.
Kenon-cenok Nahor
20Telas ju kenjeh mong bipasal nu Abraham begei adeh: “Milka ya kiperyos lapan urag kenon keral ha Nahor menang hek ajeh. 21Ikenon sulog imuh Us. Muh ikekenon de kilek ajeh Bus, Kemuel (apak Aram), 22Kesed, Hazo, Pildas, Yidlaf, ru Betuel.” 23Betuel ajeh apak Ribka. 24Nahor mong gundek imuh Reuma. Igundek ajeh pen kiperyos empat urag kekenon keral: Tebah, Gaham, Tahas, ru Maakha.
Currently Selected:
KEJADIAN 22: AEH
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.