मत्ती 3
3
यूहन्ना बपतिस्मा देहे बाला कर प्रचार
(मरकुस 1:1-8; लूका 3:1-9,15-17; यूहन्ना 1:19-28)
1ओ दिन मे यूहन्ना बपतिस्मा देहे बाला आए के यहूदिया परदेस कर जंगल मे ये प्रचार करे लागिस: 2“मन फिरावा, काबर कि स्वर्ग कर राएज लिघे आए गईस है।” 3ये ओहिच हे जेकर चर्चा यशायाह अगमजानी कर द्वारा करल गईस:
“जंगल मे एक पुकारे बाला कर गोएठ होवत आहे, कि प्रभु कर डगर ला तियार करा,
ओकर सड़क ला सीधा करा।”
4ये यूहन्ना ऊट कर रावा कर कपरा पहिनल रहिस, अउ अपन कनिहा मे चमरा कर कनिहाबन्ध बांधे रहिस। ओकर खाना फमफा अउ बन मधु रहिस। 5तब यरूशलेम शहर अउ सबेच यहूदिया परदेस, अउ यरदन नदी कर आस-पास कर सबेच जगहा मन मे मैनसे मन ओकर लिघे हिकेल के अईन। 6ओमन मन अपन-अपन पाप ला माएन के यरदन नदी मे ओकर ले बपतिस्मा लेहिन।
7जब ओहर ढेरेच झन फरीसी मन अउ सदूकी मन ला बपतिस्मा बर अपन लिघे आत देखिस, त ओमन ले कहिस, “हे साप कर लईका मन, तुमन ला कोन बताए देहिस कि आए बाला गुस्सा ले भागा? 8एकरे बर मन फिराव कर लाएक फर लाना; 9अउ अपन-अपन मन मे ये झिन सोचा कि हमर दाऊ अब्राहम है; काबर कि मैहर तुमन ले कहथो कि परमेश्वर हर ये पखना मन ले अब्राहम बर संतान जन्माए सकथे। 10अउ अब टांगी हर रूख कर जईर पर धरल आहे, एकरे बर जे-जे रूख हर बड़िया फर नी लानही, ओहर काटल अउ आगी मे ढोए देहल जाही।
11मैहर त पानी ले तुमन ला मन फिराव कर बपतिस्मा देहथो, लेकिन जे मोर पाछू आए बाला हे, ओहर मोर ले शक्तिशाली है, मैहर ओकर पनही ला उठाए कर लाएक नी हो। ओहर तुमन ला पवित्र आत्मा अउ आगी ले बपतिस्मा देही। 12ओकर सूपा हर ओकर हाथ मे रही अउ ओहर अपन कोठार ला बड़िया रीति ले सफा करही, अउ अपन गेहू ला त कोठी मे भरही, लेकिन भूसा ला ओ आगी मे जलाही जेहर बुझाए बाला नी है।”
यूहन्ना कर द्वारा यीशु मसीह कर बपतिस्मा
(मरकुस 1:9-11; लूका 3:21-22)
13ओ समय यीशु गलील परदेस ले यरदन नदी कर कगरे यूहन्ना कर लिघे ओकर ले बपतिस्मा लेहे बर अईस। 14लेकिन यूहन्ना ये कही के यीशु ला रोके लागिस, “मोला त तोर हाथ ले बपतिस्मा लेहे कर जरूरत आहे, अउ तय मोर जग आए हस?” 15यीशु हर ओला कहिस, अब त एहिच कस होए दे, काबर कि हमन ला एहिच रीति ले सबेच धार्मिकता ला पूरा करे बर आहे। तब यूहन्ना हर यीशु कर गोएठ ला माएन लेहिस। 16अउ यीशु बपतिस्मा ले के तुरतेच पानी ले उपर अईस, अउ देखा, यीशु बर अकाश हर खुईल गईस, अउ ओहर परमेश्वर कर आत्मा ला परेवा जईसन उतरत अउ अपन उपर आत देखिस। 17अउ देखा, ये अकाशबानी होईस, “ये मोर दुलरवा बेटा है, जेकर ले मैहर ढेरेच खुश हो।”
Currently Selected:
मत्ती 3: SGJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.