YA-SFADOCI JRNE 20
20
1Huwa ina wasgi grsagigi ini balaku tvh mvnadowi-gesagi-gi, biawv Male Magitalenv ini nabowrlvkugi qalvh-whrpvgi, iahaia’ hini gawvgi papagijrgi, macimi u nawrli nili sekunvli ini nabowrlvkugi uci pvivgilv lvtanofoli. 2Mamaqi wacigav’ hinv, chena Svimvn’ Betvli si biawv, macimi nili kutvkvli kvgahgimrfvli Jesise ya-vhqalamrci, macimi, Naiahkv nihki ini nabowrlvkugi uci luhfvhrwrli nili Dabalamiwalici, macimi mvtv niwrkutv tvh saximrwrci naiahkv nili, u talvhi nihi. 3Waciganvhi Betv nha-wv, chena inv kutvkv kvgahgimrfv, macimi nihki ini nabowrlvqi wvyaci haki. 4Chena neswi pidoki nihki : macimi inv kutvkv kvgahgimrfv u nvwvfwrli Betvli, chena nhihtv ini nabowrlvqi si biawv; chena mrsi wrgi macimi betiga Irpi, inv u namanv nili wrpi mudrwvli sagfanu; pvyaqv mvtv inv becfa. 6Svimvn’ Betv waciganvhi nahfrpi biawv, u biaci nakvlrli nili, macimi inv ini si becfa nabowrlvqi; chena u ta lrpvdrnv nili wrpi mudrwvli sagfa-nu, 7macimi ini pfewanahi, ya-vhdagi inv welagi, mvtv gilagi-fanwi nili wrpi mudrwvli, wakv tatapajanota tabrna tvsi. 8Hina uwa waciganv’ hinv kutvkv kvgahgimrfv nahfrpi becfa, ba-birtv nhihtv ini nabowrlvkugi, chena inv naga, macimi dapwahsa. 9Xvga yasi gawvgi nihki mvtv wrkutvmuwrci ini tapilo awigrda-gi, wvhsi qelv’ hinv nili napalici uci unsgrci. 10Waciganvhi nih-ki kvgahgimrfvki nuhgi wapfaki nahvlwrkv ya-drwrci haki.
11Wakv Male bami grpvwici frgici ini nabowrlvqi, wihfvqa : waciganv’ hinv, yasi wihfvqaci, wrgi chena ini betiga nabowrlvqi Irpi; 12macimi u talrpvmvhi neswi ancvlihi bamvh-gapilici, naku-ti welagi, chena nakuti ufitagi tv hinv saximofuci u weyrnvli Jesise. 13Chena, Iqawv, gociwa gelv gi wihfvqa? u talrwrli nih-ki. Xvga nihki naiahkv ud rmwalrwrli ni Dabalamiwamvli, macimi mvtv ni wrkutv tvh mahci saximrwrci nihki, u talvhi inv. 14Hvlvini iah si mahtuwaci inv, udrnrgi si kugewv, macimi u talrpvmrli Jesiseli bami grpvwilici, chena mvtv u wrkutv yasi ini Jesise-wilici. 15Iqawv, gociwa gelv gi wihfvqa? nafvwa gi nvtun-awhv? u talrli Jesise. Hinv, tuga mamagincigrfv u talalamrli nili, Yalaniwivni, qahqi gelv mahci yoci uci rmwalatv inv, wetvmvwilu tvh mahci saximvci, macimi na hrmwalv inv, u talrli nili. 16Male, u talrli Jesise. Hinv kugewv, macimi, Lapunrye, u talrli inv Heblogi; Ga-gahgimiwa wv hiugi ini. 17Tagi pahsanilu; xvga nelv mvtv gawvgi inv Ufimv ni ta kuqicfa : wakv ni janinrki hrlu, macimi, Nelv n’ Uhfv ni ta kuqicfa macimi gelvwv k’ Uhfwv, che-na nelv ni Mvnadomv macimi gelvwv ki Mvnadomwv, hisi nihki, utalrli Jesise. 18Biawv Male Magitalenv macimi u wetvmvwvhi nihi kvgahgimrfhi, Ni mahci nawv inv Dabalamiwatv; macimi yasi mahci nili ilrci inv yolumv wiahi.
19Hina waciganv’ hini ulrqefi, ina grsagigi, ini wasgi gesagi ini balaku manadowi-gesagigi, macimi ina nili sqrdawvli gibhota tv hvpiwrci nihki kvgahgimrfvki, xvga nihki Josvki uci kufadewa, Jesise biawv chena ini alaghi nepvwi, macimi, Grmrnelafewa udwafiku, u talvhi nihi. 20Chena inv iah mahtuwaci yomv, u wrpvtalvhi nihi u laciwvli chena ini u sahgi. Waciganv’ huwasi-labwrki nihki kvgahgimrfvki, iah nawrwrci nili Dabalamiwalici.
21Waciganvhi nuhgi Jesise, Grmrnelafewa udwafiku gelvwv : yasi inv Ufimv mahci wrwenaskvwici, datapilvhi yone gelvwv gi tasi wrwenasgolapwv, u talvhi. 22Chena inv iah mahtuwaci yomv, u tah lahfahtvwvhi nihi, macimi, Utafiku gelvwv inv Ufapi Ucv-jrlvhqv : 23goqa-nafvki-grci u mvjesilvwewanwv ki pvgfa-ladrnr-wv, nili pvgfa-latvmrqeki nihki; goqa-nafvki-grci u mvjesilvwe-wanwv ki foginrnrwv, foginota nili, u talvhi.
24Pvyaqv Drmuse, nakuti nihki matvhfwi-gita-neswi, Titi-mvs yrlofu, mvtv weci nihi ina Jesise biawv. 25Nihki kvgahgim-rfvki waciganvhi, Ni mahci nawrpa inv Dabalamiwatv, u talrwrli nili. Pvyaqv inv, Waciwaphi nah nama ini u laciwvli tvsi ya-sfrwrci nihki fvghikvnvki, chena ni lacv ini ya-sfrwrci nihki fvghikvnvki si bonvga, macimi ni laci u sahgigi si bonvmv, mvtv ni tvh dapwahsa, u talvhi inv.
26Chena nfwrsig-fuku si vhkuwihi u kvgahgimrfhi nuhgi vpihi betiga, macimi Drmuse weci nihi. Biawv Jesise, nili sqrdawvli nvkvia gibhota, chena ini alaghi nepvwi, macimi, Grmrnelafewa udwafiku gelvwv, iwv. 27Hina uwa inv, Utvhfv-lvtani gi lacv, macimi namplu ni laciwvli; chena utvhfv Ivtanvnu gi laci, macimi ini ni sahgigi si benhvnu : macmi tagi rnwahsa-wilu, wakv dapwahsawilu, u talrii Drmuseli. 28Drmuse rpvfsa macimi, Ni Dabalamiwamv chena ni Mvnadomv, u talrii inv. 29Xvga gi mahci nawi gelv ivaci mahci dapwahsaivni : gisrdalama-kufeki nihki ba-bur mahci nagacki, macimi melowi mahci dapwah-saki nihki, u talrii Jesise.
30Maci kutvkvli giginolowanv silvwi Jesise waciganv’ hini yalvhfvmewrci nihki kvgahgimrfvki, buryr yomv awigrdagegi tvlvwigaki : 31wakv yolumv vwigapi, wvhsi gelvwv manvwvhi dapwahsayaqa yasi Jesise inv Klvisde-wici, nili u Qihfvli Mvnatu; macimi wvhsi dapwahsawiyaqa manvwvhi gelvwv bonvmaqa lanvwawewa u wefowa-nagi.
Currently Selected:
YA-SFADOCI JRNE 20: SJW
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published for Thomas Wildcat Alford in 1929