HINI UWASI-BIADRCIMOWA ya-sfadoci MAFIYO 13
13
1Hina ini grsagigi ini wegiwr-pagi uci luhfa Jesise, macimi pvkvci ini msi-napi lamvtvpiwv. 2Macimi ntvsi maci mahsalalici u mrwvtusgr-makuhi, waciganv’ hulvga-lagi Ikvmwv macimi lamvtvpiwv; macimi jrivhgi inv mahsalakv ini sqrbiagi nepwi. 3Chena u kvlo-lvhi nihi maci wiahi pamrtuwawa-nagi, Wrpvmahku, isiwa, Inv ya-vh-cigatv wapfa wvhsi vhcigaci; 4macimi yasi inv vhcigaci, nrlatv mengrnv ini pvkvci-kvnv si panfanu, macimi nihki wisgiluhfvki biaki chena u jrkvdrnrwv nili : 5chena kutvkvli ini tvh sekunvhgiki si panfanu, tvh bur waivhkv vhdagi vsisgi : macimi walanv nili frginu, xvga mvtv waivhkv spihfanwi vsisgi : 6macimi ina inv gesagi-gesfwv iah biatvhkufvgi, svhta nili; chena xvga mvtv ujapkvhkvtuwi, naputa nili. 7Chena kutvkvli Ir nihi grwesahi si panfanu; macimi nihki grwesaki sqinegeki, chena u napwvsqahdonrwv nili : 8chena kutvkvli ini uwasi vsisgegi si panfanu, macimi neginwi mvwifowa, nrlatv tabawa tfwagfanwi, nrlatv nakudwrsi, nrlatv nfwr-pitvgi. 9Hinv ba-bonvkv utvwvgrwvli, welrni nodrgata.
10Chena nihki kvgahgimrfvki biaki, macimi, Gociwa gelv gi kvlolrki nihki pamrtuwawanv? u talrwrli. 11Chena inv rpvfsa macimi, Gelvwv si meliwapi ini wvhsi wrkutvmaqa nili ini wafapvh-kvmigigi ugimrwi-drmqa uci ma-ivtki, wakv nihki mvtv si meliwapi ini. 12Xvga goqa-nafv-grci u bonv, inv wah si meliwapi, macimi inv wah bonv mrlafewa : wakv goqa-nafv-grci mvtv u bonv, wah mvmrqi muhci ini ba-bonvgi inv. 13Waciganvhi nelv pamrtuwawanv ni kvlo-lrki nihki; xvga nagaki mvtv tapinvmoki nihki, chena nodrgaki mvtv tapahsaki nihki, mvtv nuhgi nanuhsaki nihki. 14Macimi nihki si uqihfadota ini u mosigesqawa Visviv, ya-yoyrgi,
Nodrgawa ga huci nodrgapwv gelvwv, macimi mvtv gah wiahisi nanuhsapwv;
Chena nagawa ga huci nagapwv gelvwv, macimi mvtv gah wiahisi nawiwapwv :
15Xvga yrmv lanvwa u tahi vlvlikv si kufaqvnwi,
Macimi u tvwvgrwv nodrgawa si saqvnu,
Chena u sgesakuwv naiahkv pafvkuqenoki nihki;
Belaba nihki u sgesakuwv wi huci nawiwaki,
Macimi uci nodrgaki u tvwvgrwv,
Macimi uci nanuhsaki u tahiwv,
Chena wi kutaqeki nuhgi,
Macimi nih gegahrki nihki.
16Pvyaqv gelvwv gisrdalamaqvtu ki sgesakuwv, xvga nili tapinvmoiv; macimi ki tvwvgrwv, xvga nili nodrgaiv. 17Xvga tapilo gi talapwv nelv, yasi maci mrmosigesqacki macimi tapvsvwi ’laneki mrtvwi na-muwrci nili wiahi gelvwv na-namayaqa, macimi mvtv u namanrwv nili. 18Notvmuku gelvwv waciganv’ hini u pamrtuwrfowa inv ya-vhcigatv. 19Hina wiyafv iah notvgi ini uci kvlvwewa ini ugimrwi-drmqa, macimi mvtv nanuhsa ini, ina inv uwa biawv mvci-wiyafv, macimi u qv-qvtanvmrgoli ini mviahci vhdodalici u tahigi. Hinv yrmv ya-vhci-gagi ini pvkvci-kvnv. 20Chena inv ya-vhcigagi tvh nili sekunvgiki, hinv yrmv na-notvkv ini kvlvwewa, macimi walanv uwasi-labwrwi utvh-panv ini; 21gawvgi mvtv u bonv ujapkvhkvtwi weyrgi, pvyaqv wesigi-fi mrlrqvsihi; macimi gesanrci-nvmowa walr nrnuhgrchadewa iah pv-faqeyrlici xvga ini kvlvwewa uci, walanv utvgikvh-sinwv inv. 22Chena inv ya-vhcigagi alagenv nihi grwesahi, hinv yrmv na-notvkv ini kvlvwewa; macimi ini utvmafewa ini ya-lakuqvh-kvmigigi uci, chena ini pvwrwanv uci wvnimafewa napwvsqayrli ini kvlvwewa, macimi mvtv mvwifowa-niwi inv. 23Chena inv ya-vhcigagi ini uwasi vsisgegi, hinv yrmv na-notvkv ini kvlvwewa, macimi nanuhsa ini; yonv tapilo u negtu mvwifowa, macimi u biatu, nrlatv tabawa tfwag-fanwi, nrlatv nakudwrsi, nrlatv nfwr-pitvgi.
24Kutvgi nuhgi pamrtuwawa u tah pvgfanvmvwvhi ya-lvhfvmelici nihi, Hini wafapvh-kvmigigi ugimrwi-drmqa brsi ilani ya-dotv uwasi menkv u gitigr-nagi si tvqa-lama-qvtwi : 25pvyaqv ia-haiahi nabr-lici ilanihi, u mvda-ladewa-nvli biali u tidr-goli nahfrpi myrsi-wvsku alagenv ini kvwvsqi, chena wapfali. 26Pv-yaqv iah frgi-pvgigi ini macimi nepagi, hina uwa nvuqvtu nili myr-si-wvsku nahfrpi. 27Chena nihi ut vlolrkvnhi biahi inv da-ba-latvkv wegiwv, Yalaniwivni, hv mvtv uwasi menkv gi titu gi gitigr-nagi? uwa drniwa ucifaiv nili myrsi-wvsku? u takuhi. 28Macimi, Mvda-ladewanv yasi lvweci yomv, u talvhi. Chena Hv ni na hrpa uwa wvhsi macimi mrwvtunv-mrga nili? u takuhi nihi vlolrkvnhi. 29Pvyaqv, Mvtv, u talvhi; Belaba gah weci puqvh-ganvnrwv ini kvwvsqi, yasi mrwvtunv-maqa nili myrsi-wvsku. 30Welrni nayeswi wi sqineginu nakudwasi brlu’ hini kvwvsqhrwaga : macimi ini Irqr-niga ini kvwvsqhrwa, Mrwvtunv-muku nhihtv nili myrsi-wvsku, macimi vfipi-doku nili wvhsi fvgfv-maqa : wakv ini kvwvsqi ni kvwv-sqigr-nagi si mrwvtunv-muku, na hilrki nihki ga-kvwvsqhr-wacki, u talvhi.
31Nuhgi kutvgi pamrtuwawa u tah pvgfanvmv-wvhi ya-lvhfv-melici nihi, Hini wafapvh-kvmigigi ugimrwi-drmqa brsi nakuti-paqa mvstvdewi menkv inwi, ma-mvmagi ilani, macimi u titu u gitigr-nagi : 32heni svpkvhi gici-utvhpi lakuqv’ jrivhki mengrnv; pvya-qv iah kvtamo-yrgi ini, vliwi inwi notv nili mamagi-nvsku, macimi mtakuniwi, waciganvhi nihki wisgiluh-fvki ini manvtwi uci bia-ki macimi nili si Iwvhsi-noki ba-pga-ivkuki, iwv.
33Nuhgi kutvgi pamrtuwawa u kvlo-lvhi nihi; Hini wafapvh-kvmigigi ugimrwi-drmqa brsi ini unvlascikv ma-mvmagi iqawv inwi, macimi u gigitu nfwi tapvcikv-nagi lughrnv, brlu’ hini jrivhgi unata, iwv.
34Jrivhki yolumv wiahi Jesise u kvlo-lvhi pamrtuwawa-nagi nihi mahsa-lalici; macimi frgici pamrtuwawa mvtv wiahi u kvlo-lvhi nihi : 35wvhsi manvwv’ hini uqihfagi ya-iugi srpwi inv rar-mosigesqatv,
Pamrtuwawanv nah si tvwanv ni doni;
Na hrtutv wiahi gigifoiv ina uskvh-gahfanwi ini ya-laku-qvh-kvmigigi uci.
36Hina uwa u nvkvlvhi nihi mahsa-lalici, macimi ini wegiwv si becfa : chena u kvgahgimrfhi utfakuhi, macimi, Tapinrqi-wetv-mvwi-nrga ini pamrtuwawa nili si ini lr gitikv myrsi-wvsku, u ta-kuhi. 37Macimi rpvfsa, chena, Inv ya-vhdotv ini uwasi menkv u Qihfvli ilani inv; 38chena ini gitikv ya-lakuqvh-kvmigigi ini; chena ini uwasi menkv, iuhgoni nihki ini ugimrwi-drmqa uci uqih-fimrki; chena nili myrsi-wvsku niheni u qifhi inv mvci-wiyafv; 39chena inv mvda-ladewanv ya-vhdotv nili mvci-mvnatu inv : chena ini kvwvsqhrwa ini ya-qrgi ini ya-lakuqvh-kvmigigi; chena nihki ga-kvwvsqhr-wacki ancvleki nihki, iwv. 40Yasi waciganvhi mrwvtuno-daki nili myrsi-wvsku macimi fvgfo-daki skudagi; yone wa higi ina jaiahqvh-kvmigiga. 41Hinv u Qihfvli ilani wah wrwenvhi uta an-cvle-mhi, macimi nihki ini u gimrwi-drmqa-mi wa huci mrwvtwi luh-fanr-nrwv jrivhki wiahi waci pami utvgikvh-sinagi, macimi nihi ma-jrfigi yasi Ivwelici, 42chena ini wah si becfa pvgilr-wvhi nihi gasidagi skuta : ’n’ tvsi wah pami wihfvqa-wani macimi ini wah tvlwawah-fanu wepitvli. 43Hina uwa nihki ma-yrwela-ficki wah wvhfafv-moki brsi inv gesagi gesfwv betiga ini u gimrwewa-nilici u Fwrli. Hinv ba-bonvkv utvwvgr-wvli, welrni nodrgata.
44Hini wafapvh-kvmigigi ugimrwi-drmqa brsi pvwrwa inwi gi-gidota ini gitigr-nagi; ma-mkvgi ilani, macimi u gigitu; chena wapfa via uwasi-labwrwani macimi inv u myaga jrivhgi ba-bonvgi, macimi u tapanv ini gitikv.
45Nuhgi, ini wafapvh-kvmigigi ugimrwi-drmqa brsi ilani inwi wrdgetv u pami nvtuna-whvhi uwasi megafhi : 46macimi u mahci mkv-wrli nakuti megafvli gasuwa-lamaku-filici, wapfa inv macimi u myaga jrivhgi ba-bonvgi, macimi u tapanrli nili.
47Nuhgi, ini wafapvh-kvmigigi ugimrwi-drmqa brsi rqvsqhrkv inwi, ya-ipvgido-dagi ini msi-napigi, macimi mrwvtuni-gaiv jrgi ya-talici : 48ini ia uqihfagi, nihki utvhpanr-nrwv sqrbia-gesi; macimi nihki lamvtvbeki, chena u tah mrwvtunr-wvhi nihi wa-lafilici nili bonvhfu-cikvnv, wakv nihi ma-tafe-filici u pvgilr-wvhi. 49Yone wa higi ini ina jaiahqvh-kvmigiga : nihki ancvleki wah biaki, macimi wah pginr-wvhi nihi ma-jela-filici alagenv uci nihi ma-yrwela-filici, 50chena ni wah si becfa pvgilr-wvhi ni-hi gasidagi skuta : ’n’ tvsi wah pami wihfvqa-wani macimi ini wah tvlwawah-fanu wepitvli.
51Hv ki nanuhsa-pwv gelvwv jrivhki yolumv wiahi? Hvnkv, u talr-wrli nihki. 52Chena, Waciganvhi jrgi yr-ivwigatv mviahci kvgahgimrfiho-futv ini wafapvh-kvmigigi ugimrwi-drmqa isi brsi ilani ilafi da-balatvkv wegiwv, inv u biaci luhfvtu u pvwrwa uci wiahi usginwi macimi gahtv, u talvhi nihi.
53Chena ni biamikvtwi, iah mahci lutvgi Jesise yolumv pa-mrtuwawanv, ’n’uci wapfa.
54Chena welv ut vsisge-magi si pami biawv u kvgahgi-mvhi nihi betiga u msi-kvmikum-wrki, waciganvhi nihki cihsi-tahaki, chena, Drniwa uci bonv yrmv ilani yomv laburwa macimi yolumv mv-geci pakvtaf ewanv? iwvki. 55Hv mvtv yrmv inv utqi-pakvtafewi-lani u qihfvli? hv mvtv u gali Male yrlofoli? chena u janinvhi, Jamseli, chena Joseli, chena Svimvneli, chena Jotvseli? 56macimi ut iqamhi, hv mvtv jrivhki nihki weci gelvwa? Drniwa uwa uci bonrnv yrmv ilani jrivhki yolumv wiahi? 57Macimi u gisfaku-wrli nili. Pvyaqv Jesise, Mrmosigesqatv mvtv bur vhdali utvga-lamakufewa, waciwaphi nahvlwrkv ut vsisge-magi, macimi ya-drci wegiwv; u talvhi. 58Chena svpkvhi mvtv maci si Ivwi mvgeci pa-kvtafewanv ’n’tvsi xvga mvtv dapwahsawa-nihi.
Currently Selected:
HINI UWASI-BIADRCIMOWA ya-sfadoci MAFIYO 13: SJW
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published for Thomas Wildcat Alford in 1929