HINI UWASI-BIADRCIMOWA ya-sfadoci MAFIYO 9
9
1Macimi inv ulvga-lagi Ikvmwv, chena grmagi hawv, nahvlwrkv ut udawa-nagi si biawv. 2Macimi wrpvmahku, u biatvwrwrli nihki ilaneli vhqilugali ini nanagifewa, saxinoli tfvnagi : macimi u namvwvhi u dapwahsawa-nilici, Uqihfimv, uwasi-labwrlu; gi mvjelafewanv pvgfa-ladota, utalrli Jesise nili ya-vhqilugalici ini nanagifewa. 3Chena wrpvmahku, nr-nakuti nihki yr-ivwigacki, Pvhdrmu yrmv ilani, iwvki weyrwrgi. 4Macimi Jesise u wrkutvmvwvhi u tasi tahawa-nilici, Gociwa majrfigi ki tasi tahapwv iwv. 5Xvga drniwa ini vlikv wa-cihi, wvhsi, Gi mvjelafewanv pvgfa-ladota; walr tuga, Unsgrlu, macimi pamfalu, iugi? 6Wakv wvhsi gelvwv manvwvhi wrkutvmaqa yasi inv u Qihfvli ilani bonvgi simakufewa usgi-drmqa wvhsi pvgfa-latvgi mvjelafewanv (hina uwa nili ya-qilu-galici ini nanagifewa), Unsgrlu, macimi mvmahq gi tfvni, chena nhrla wegiwv ya-drivni, u talrli nili. 7Chena inv unskv, macimi wapfa ya-drci wegiwv hawv. 8Pvyaqv nihki mahsa-lagiki iah namu-wrci ini, grwilv-waki, macimi u wvhfrci-makuwhr-wrli Mvnadoli, mviahci melrtv simakufewa ilanihi.
9Chena yasi ini uci pamfaci Jesise, u nawrli ilaneli, Ma-fiyo yr-lofoli, bamvhga-pilici yr-tvh mrwvtuno-dagi taphi-gawa : macimi Nakvsilu, u talrli. Macimi inv pvfaqi chena u nakv-lrli.
10Chena ini biaiv wvhsi pamfa-yrgi, yasi lamvtv-pici tvh wihfanigi betiga ini wegiwv, wrpvmahku, maci mrwvtu-nigah-feki chena majela-ficki biaki chena u wetvbemr-wrli Jesiseli macimi u kvgahgimrfhi. 11Chena iah nihki Palaseki namu-wrci ini, Gociwa u wihpu-mvhi ki kvgahgimiwa-mwv nihi mrwvtu-nigah-fihi chena majelafilici? u talr-wvhi u kvgahgimrfhi. 12Pvyaqv iah notvgi ini, Nihki wr-sikvtu-wicki mvtv ut vgrwrlr-wrli nr-nvtvuci-galici, nihki wakv ya-qilu-gacki, iwv. 13Pvyaqv nhrkuna macimi wrkuta-fiku ya-yoyrgi yonfv, Skvtv ni ta la-latv gitaminrqa-ladewa, macimi mvtv vpanvwawa : xvga mvtv ni bir wvhsi nvtu-mvki nihki mayrwela-ficki, majela-ficki wakv.
14Hina uwa utfr-wrli nihki Jrne u kvgahgimrfhi, Gociwa gi-tvwilvhi nelvwa chena nihki Palaseki ni fvfvhqi ucigapa, wakv gi kvgahgimrfvki mvtv ucigaki? iwvki. 15Chena Jesise, Hv wih kvtvwi nihki ini uci uqihfi-mrki mvivgi-nhrkvna-iqawikv mvwaki, lrqvsi ya-bemaku-wrci nili mvivgi-nhrkv-nvli? pvyaqv nili grsagiki wah biaiv, ina nili mvivgi-nhrkv-nvli wah mvmr-qeki, macimi ina uwa wah fvfvhqi ucigaki, u talvhi nihi. 16Chena mvtv ilani u drsi bonv mrlaghi usgi-mutv gahtv betanikv-nagi; xvga wv hini si uhqih-fagi mv-mr-gaiv ini betanikv uci, macimi vlikv si la-lgah-grgi macdota. 17Mvtv nuhgi ilaneki u drsi bonr-nrwv mvivgi wveni gahtv wvenewi-bodr-lr-wvhi : belaba nihki wiahsi-wrki puhgicas-grki, macimi ini wveni fegahkv, chena nihki wiahsi-wrki myrla-feki : wakv u drsi bonr-nrwv nihki mvivgi wveni was-gilici wvenewi-bodrlr-wvhi, macimi nayeswi gifusgr-deiv.
18Iaha-iahi kvlo-lrci nihi yomv wiahi, wrpvmahku, biawv ’ntvsi ya-lrpvmatv, macimi usvsilvwa-hrli nili, Ni drnahfv datapilvhi uwa iqelafi : pvyaqv birlu chena usgici inv gah si bonv gi laci, macimi inv wah lanvwawi, isiwa. 19Chena pvfaqi Jesise, chena u na-kvlrli nili, macimi u kvgahgimrfhi gilagi. 20Chena wrpvmahku, iqawv, ba-bonvkv mskuwi-lugawa matvhfwi gikvtu gita-neswi, biawv udr-nrgi nili, chena u tah pahsanvmv-wrli ini tv npaniqr-dagi u betanikv-nilici : 21xvga iwv betiga weiv, Muhci kvtasgi pahsanvmv-wvga u betanikv, nah mafafiha-gopi. 22Pvyaqv Jesise pami kugewv macimi u pami nawvli nili, Udvnfimv, uwasi-labwrlu; gi dapwah-sawa naiahkv gi mafafihaku, u talrli. Macimi inv iqawv mafafi-hofu ina uci yrtafvgi. 23Chena iah birci Jesise betiga ini wegiwv ya-drci ya-lrpvmo-futv, macmi u nawvhi nihi bapi-qalici, chena nihi ya-fus-grlici pami tv-tvwrn-gahi, 24Meli-waku datvwrgi : xvga mvtviu napwv inv iqafv, nabawv wakv isiwa. Macimi u wrpvla-lamr-wrli nihki. 25Pvyaqv nihki ya-fus-grcki iah luhfa-lgofu-wrci, becfa, chena u tah fvgi-laja-nrli nili; macimi inv iqafv unskv. 26Chena yomv wrwena-kufe-wa ntvsi uci wapfaiv mafhega ini vsisgegi haiv.
27Chena yasi ini uci pamfaci Jesise, neswi kvgabeqawi-lani-hi u nakvla-kuhi, pami wivkv-hotv-muhi, Bonv-mvwi-nrga gitaminrqa-ladewa, gelv u qihfvli Dapide, lvhotv-muhi. 28Chena betiga ini we-giwv iah birci, utfa-kuhi nihi kagabeqawi-lanihi : macimi Jesise, Hv ki dapwahsa-pwv gelvwv yasi dabela-fiv wvhsi yomv si lvweiv? u ta-lvhi. Hvnkv, Dabalamiwatv, u talr-wrli nihki. 29Hina uwa u tah pahsanvmv-wvhi u sgesaku-wilici, ya-sfagi ki dapwahsawa-nwv ini ipanvlo-fuku, u talvhi. 30Macimi tvwano-dali u sgesakuwv. Chena u tapinv-laqi-mvhi Jesise, Wrpvtv-muku wvhsi tagi ilani wrkutvgi ini, iwv. 31Pvyaqv nihki wapfaki, macimi u lfwrtudr-nrwv u wrwe-nakufewa mafhega ini vsisgegi.
32Chena yasi wapfa-wrci nihki, wrpvmahku, ’n’ tvsi biadrqi gagapi ’laneli la-kusgr-kutv wvninah-feli. 33Chena iah luhfa-pv-gilo-fulici nili wvninah-feli, kvlvwi inv gagapi ’lani : macimi nihki mahsala-giki qvqahdrni tahaki, Mvtv lrqv ini yone si namota lr Iswelv, iwvki. 34Pvyaqv nihki Palaseki, Nili ugimr-osrkvn-wrli nihki wvninah-feki uci kvtvwi luhfa-pvgi-lvhi wvninab-fihi, iwvki.
35Chena mafhega nili udawanv macimi nili udawanafv brmfa Jesise, pami kvgahgimiwa u msi-kvmikum-wrki, chena pami nvnvhi-miwa ini uwasi-biadrcimowa ini ugimrwi-drmqa uci, macimi pami gega-hiwa jr-ivhgi si kvtunawa macimi jrivhgi si vhqi-lugawa. 36Pvyaqv iah na-wrci nihi mahsa-lalici, u gitaminrqa-lamvhi nihi, xvga qelvhsi tahaki nihki chena lfwasgrki, brsi magefvki bur pami bonrcki gahcitv-wvhaku-wrci. 37Hina uwa u talvhi u kvgahgimrfhi, Hini kvwvsqhrwa svpkvhi mrlatwi, pvyaqv nihki bakvtaficki mrtfwihi. 38Mvmrtumahku waciganvhi inv Dabalatvkv ini kvwvsqhrwa, wvhsi ini laskv-wrci br-pakvta-filici u kvwvsqhrwa-nagi.
Currently Selected:
HINI UWASI-BIADRCIMOWA ya-sfadoci MAFIYO 9: SJW
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published for Thomas Wildcat Alford in 1929