Mak 4
4
Maun vehuran u aji ah teruwu birika
1Jisas mwesesesrak mwetak mwatwen sileng niah Galili. Tarutmumu rat tepma nesasabisi dalji gonong bi utnen go tebulong ah bat toptop mini ni. Mwisip li aga bi mwesadok tavan bi mwega doptop mini ni. 2Tesesra ni i apma halkawu lengleng li maun vehuran. Le non sesesrakan ba tevep nuhu, 3“Karu rongtak gololo vehuran ahe. Aji tevan neruwu birika. 4Entorah tekabarani mapmapma, ba datngin rateiah mapma dingin hal bi bwihilni ram mapma negani. 5Datngin rat teiah vali ut ah tan tei temnipnip, ba vet tei kawu alvan. Tei vilbwaleh ba ramdip gonani tan temnipnip basla. 6Entorah al tesisin tokol bi mwisina bi ram matgu, gonani koron teba sip tenga tokol le tan. 7Datngin rat teiah vali ut ah tei utnen kawa niah rowon mwidi. Entorah ratmiu tewep ba kawa ramahi, rat leli bi wan rat bambdok nga. 8Datngin rat teiah vali tan tekabis bi ramiu bi wan ramdok. Datngin ba wan tedi tewep, ba datngin ba wan tedi tokol, ba datngin ba wan tedi ah tedi.”
9Jisas bep mini ni nuhu, “Aji ah dalingan tedok ba nerorongtak dihi.”
Jisas tevep seresere nuhu tei u apma ba tedoptop mini ni li maun vehuran
10Entorah Jisas tevan manedi nihken, ba datngin tarutni ah rat rongo apma ah tevep, bi mwegai datngin non tarutni ah ni tesangwul vepnan karu. Raban ben Jisas bi ram uhleli rotvi meramnan maun vehuran niah tetwo mini ni. 11Jisas balu ini mini ni bep nuhu, “U gimi ba God teskani ililnginan apmate ah matpo surak le non ut kokon mini gimi. Ba u datngin ajini, niah ramdi i lenglengan, ba ramali vehuran nante li maun vehuran. 12Metan goah bat rop bwiswis naululan niah tevep nuhu,
‘Ran git bi negit ba ran baga git dihi ut nga,
Ran rorongtak nerorongtak ba ran baga ililngi nga,
Tigoah rabat git dihi ut bi rabukak dini no kapmwaan bi nepma ben God.
U goah God bat vihni gabarani no kapmwaan.’ ”
Jisas tevep rotvi meramnan maun vehuran u birika
13Jisas muhleli i ni nuhu, “Nambih nuhu, kat baililngi meramnan maun vehuran nga ahe? Mangai gavak nagoah kaneililngi sera maun vehuran ah tapmak? 14Aji ah teruwu birika ba tekeni aji ah bep dalen God. 15Lego ba dalekte maiah vadingin hal tekeni birika niah maiah vadingin hal. Mwegeni ajini naah ram rongo dalekte ba Setan mapma nelep gabarani dini ni. 16Datngin ajini ba ram geni birika naah rateiah vali tan temnipnip ah vet kawu alvan. Ram mali vehuran vale buju le rongnan nokokte tekabis, 17ba teba sip nga tokol le jine, bi tebadi ngaiviuk. Entorah taron illan mapma u dalekte ah rat rongo ba ramaiah vilbwaleh. 18Datngin ajini ram geni birika naah rat teiah vali ut ah tei utnen kawa ah woron mwidi. Ajini nananong niah ram rongo dalek non God 19ba toninan ut li uruu modok basla noko. Bi remdoni basla meres, vihninan leut at li uruu mapma bi mogodori dalekte niah rat rongo. Mweleli bi wan no masan tebamdok nga. 20Datngin ajini ba ramgeni birika naah rat teiah vali tan tekabis. Ajini nananong ah ram rongdihi i dalek non God, niah maskak mini ni, bi ramali vale buju bi wan no masan modok. Datngin ba wan mwidi tewep, ba datngin ba wan mwidi tokol, ba datngin ba wan mwidi ah mwidi.”
Kon ba wesak surani hee nga van baket
21Jisas mumu bep mini ni nuhu, “Aji mweleptete heete bi mambwesak surani van baket? Halan gavak, tebali nga bi mambwesani mere li utnen? 22Metan goah apma ah matpo surak ba bat tetpo utemsa. Bi tigoah apma ah man netpo surak, ba man netpo utemsa bi mwigitan. 23Aji ah dalingan manetka ba nerorongtak dihi.”
24Mumu bep mini ni nuhu, “Kan buh gololo dalekte ah kam rongo dini nana. Gonani apma ah kaneskani mini aji watwatnende ni ba manei apma nananong niah God maneskak bamula mini gimi. God maneskani ngate kawu mini aji nanong. 25Aji ah teli apmate, ba maneli ngate kawu vali goah telep bawora, ba u aji ah teli apma nge tewep ba manlevan dini apma nan nga ah teli ah tewep.”
Maun vehuran u miuran non birika
26Tevan bi Jisas bep mwetani mini ni nuhu, “Ut kokon non God ba tekeni aji naah mwegabarani birika lekonan. 27Bibi bung ba ban mamju, bibi uteren ba ban muhural. Ba birika ah teruwu ramdi nemiu bi rabi bwerabwerakte. Tebaililngi apma nga ah mweleli ba birika ramdip. 28Bibi tan ah mweleli ba birika ramiu. Mweleli ba ramdip, limalen ba ramabungak. Rabungak sera ba wan ramdi. 29Entorah wan matraba ba aji ah teruwu mwegapma nanong neum lelen gonani bibi taron nemkuran.”
Maun vehuran u birika niah tekeni birin wale
30Jisas muhleli i ni nuhu, “Apma go ngama ah tan bep nuhu tekeni ut kokon non God? Manei maun vehuran apma ah tan netwo uru, niah man dokoi? 31Ut kokon non God ba tekeni birin wale nae, niah biri tewepsislang, entorah maiah vali bujuka bi mwidip. 32Ban ngama ba malngi ran ah kapkawu, metan goah bwihilni ram mapma bi ramalngi wulki le ran.”
33Jisas tesesra ras i non dalekte mini ni li maun vehuran ah rat tapmak, niah tei tewoswos u goah rabat rongdihi, bi neililngi. 34Teba doptop tenga vautemsa mini tarutni, ba tedoptop nante mini ni li maun vehuran. Ba entorah tegamdima nihken mini non tarutni ba tega sesra ni nanong i meramnan maun vehuran niah tedok nembep mini ni.
Jisas tewotani leng leteh
35Tei utebwarek, ninge leto nanong ba Jisas bep mini non tarutni nuhu, “Taban rotvi teh.” 36Ramamlu dini tarutmumu ah ratti, non tarutni ram sip li aga niah Jisas tedi masi lin, bi raban. Datngin agani ratmudi iginan leto nanong. 37Rat van ngama ba bwera leng mamlu, bi tahkin bawo mbut le agaa, teh tewelwelna newewe le agaa. 38Jisas tedok dobo al wanten aga, tetpo nemju bi teulung li pillo. Non tarutni rabamta, rabep mini nuhu, “Sesesrakan, kot ba vihni gongai bwelwel natamat nong?” 39Jisas mudumre bi maskani dalekte tetkol mini leng bep nuhu, “Ut kodi ronga,” mumu bep mini teh nuhu, “Kodi ronga.” Leng mut bi ut mwidi ronga, bi teh mwegabis bamul. 40Jisas bep mini ni nuhu, “U apma ba kamamtaji? Nomi vihni mwetakngaan tebulong ngama?” 41Rat temtaji bos. Ram gamdima nembep mini aji go nuhu, “Ani nemai aji apma ahe gonani leng bi teh ba ramru rong mwetani dalen entorah botani nuru?”
Published by the Bible Society of the South Pacific in 1977.