SAHRUOTHUNA 7
7
Tiypa-aa
1Cakhutaa cata Abyipa ta Noah kha, “Nama hne na ingchungkhue bangkhuo khata tiypalaw chung luo ca a ngie tie ung, tahematapakieca ata chuo lie hing nama pakha kyalya dyi hingna i hmiekunglie aa dangpa ta ica hmung, 2A pathepa saruopa a canung a capaa ba sariy, a pathe lipa saruopa a canung a capaa ba kha; 3pavaa a canung a capaa ba sariy kaluo kha alyi lie ama ciy a ming li riypata a ngiekhyi tie. 4Tahematapakieca ata taa hingta ning sariyna lie alyi luo hing ning sawliy hne zuo sawliy chung khy pasaa sa'a angte i sapa a hringpa bangkhuo alyi taa hingta i pahli diy'a yi,” a ta. 5Noah ca Abyipa ta naw a pipa bangkhuo kha a tue.
6Alyi cunglie tiypa-aa a tlung ning kha Noah ca kung 600 na a ta. 7#Mat 24.38,39; Luk 17.27 Noah ca a sacapaa zaw, a napuvnung hne a munung zaw hne cata tiypa-aa taata law riypata tiypalaw luo ca amaa ngie. 8Khazing ta Noah kha naw a pipa haata a pathepa saruopa, a pathe lipa saruopa, pavaa hne alyi lie a valepa saruopa, 9a canung hne a capaa, a ba a ba ta tiypalaw chung luo ca Noah hne cata amaa ngie hne. 10Ning sariy khutaata alyi lie tiypa-aa a tlung.
11 #
2Pit 3.6
Noah kung 600 a tling kung, thla hning thlaa, ning hraa hlyisariy ning ta aa thuvna lie a awpa riyliy tiyhnaa bangkhuo ca a pahaw te, avuo thlaluo-aw bangkhuo zaw aa pahaw. 12Ning sawliy hne zuo sawliy chung alyi lie khy a saa. 13Capa ning cata Noah hne a sacapaa zaw, Shem hne Ham hne Jafeth, Noah napuvnung hne a munung zaw pathung ca tiypalaw chung luo a maa ngie. 14Iema hne cata saruopa phangting, sahring phangting, alyi lie a valepa saruopa phangting, pavaa phangting hne a mathlaa a hnyipa saruopa phangting zaw amaa ngie ra. 15A huv a sungpa saruopa bangkhuo a ba a ba ta Noah hne cata tiypalaw chung luo ca amaa ngie. 16Khazing ta Noah kha naw a pipa haa cata saruopa bangkhuo a canung a capaa a tling pata amaa ngie; Noah aa ngie khutaata Abyipa ta ingchiy kha a khaakhung.
17Ning sawliy chung aa pazue pata tiy a pa-aa; tiy ca kya pa-aa vie le te tiypalaw kha kya pha te alyi ca a vya. 18Alyi lie ca tiy ca pa-aa hryly te tiypalaw ca tiy cunglie a paphang. 19Alyi cunglie ca tiy ca khuosa ta pa-aa hryly te tluo aa suopa bangkhuo kha a vya; 20tiy ca tluodaw taata daw hraa hlyipangaa a kie. 21Alyi lie a awpa a huv sungpa pavaa, sahring, saruopa, alyi lie a valepa saruopa bangkhuo hne cawsaa bangkhuo ama thiy diy; 22alyi lie a awpa a huv sung te a hringpa bangkhuo ama thiy diy. 23Alyi lieta a awpa a huv a sungpa bangkhuo, cawsaa hne saruopa hne a valepa saruopa hne pavaa bangkhuo kha a pahli diy yi. Noah hne tiypalaw chunglie ama hneta a awpa tie dyi kha amaa ngaa. 24Cahaacata alyi cunglie ca ning zakha sawngaa chung bangkhuo tiypa-aa ca a tlung.
Currently Selected:
SAHRUOTHUNA 7: LNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lutuv Holy Bible © Bible Society of Myanmar, 2023.